Sawmtea hi thla 5 chhung vel ka hmelhriat a, heng thla 5 te hi a rei lo ka va ti tehlul em! Kum za pawh hmelhriat tur leh nuihpuia, thu thra leh hla thra sawia hlim taka hun hmanpui atana thlakhlelhawm mihring a ni. He leia a zinkawng a tawi lutuk te, kan inhmelhriat rei lo lutuk te, a… a tam em mai! Sawmtea hi chuan ka thinlungah hmun a chang reng dawn tawh a nih hi maw…

Kan zinho a, vai trawng te hi kan han thiam lo laileng hlawm khawp a. Room hrang hrangah kan thleng a, zan khat chu ka vai trawng thiam zawng zawng leh ka phuah belhte sawm khawmin hotel reception atranga bia ni awm tak hian intercom hmangin Sawmtea te room chu thingpui an duh leh duh loh thu ka va zawt a. Sawmtea ngei hian phone chu a lo la a, kei ka ni tih hre hek lo, a thiam zawng zawng leh phuahchawp hmang bawk chuan mi lo chhawn a, vaitrawng dik leh dik lo a hre lo tih kei ka chiang si, ka duh duh hi ka sawi a, thingpui no engzat nge an duh te leh he khawvel - lei leh van inkara awm zawng zawng nia ka ngaihte chu vaitrawng phuahchawpin ka sawi a, a buai ngang mai. Tichuan, eng tin tin emaw chuan thingpui an duh thu chu mi hrilh ta a. No engzat nge an duh ka han zawt leh a, “abi tin” tia mi chhan te, ‘darmendra’ tih vel ilo ka telh nuai hnu pawha ‘hindi pakka’ a biaa mi hriat tlatna te kha lung tileng chu an ni ringawt tawh mai. Hemi truma ka biak hian a pindan luahpui Sanga sawi dan chuan: phone a dah rual khan Sawmtea chuan, “Hindi hi chu a trul dang angin ka ti ve thei viau zelmai (!)” a ti e a ti. Tichuan, a hnuah an pindanah ka va kal a, thingpui an chah thute mi hrilh a, mahse an thingpui chah chuan thlen tik a nei lo, a chhan pawh ka hre tawh bik lo (hahahaha).

Tichuan, zanah ka muhil thei lo a, ka tal ka tal a, ka inlet sek bawk a, ka mobile phone ka en a, 4am vel a lo ni reng mai. Intercom bawk chuan an pindan chu ka va thrawng tho leh a, Sanga a lo la a chhan pawh min chhang duh lo. A hnu maiah an pindan doorbell chu ka va hmet leh a, kan pindan lama ka tlan phei tur mawng phe mi rawn hmu hman a, “Zawnga, a nuihzatthlak miah lo!” a rawn ti a. Mahse kan nuih chu a za ngang mai.

Thriante hming hi Sanga kaihhruaina hnuaiah kan phuah kan phuah a, thriamte phei chuan ‘Nomenclature Committee’ min ti fiamthu nghe nghe a; mahse tunah chuan a hmun a ruak a, a aiawh tur hi he leia kan awm chhung hian kan hmu tawh meuh lo ang…

Ka thrian chhar thar, ka thrianpa Sawmtea, mangthra ngawih ngawih le…

“To be absent from the body is to be present with the Lord”.