Kum 2007 atang tawh khan United States-ah hian “vote thlak” thei dinhmun a insiam ve thei ni tawh mah ila ka phur tehchiamlo bawk nen ka ngaihsak ngailo. Thiante hnenah pawh ka tumloh thu ka sawi zeuh zeuh tawh thin bawk. Kum 2008 a United States President thlanna a awm khan, ram tan a mi tha a ni dawn a ka hriat vangin (a campaign auhla vang a ni ang), vote thlak tumna lam nei chuang hauhlo chuan ka nupui hnenah Barack Hussein Obama vote ngei ngei turin ka fuih. Ka fuih mai pawh nilo-in ka tur zawk mah awm e. Vote tumna lam neive lem rihlo mah ila, awmna ram atan chuan mi dik leh ram tan a tha tur ni a ka ngaih chu party politics a buailo-in kalo tan ve em em ringawt mai a nih chu.

A campaign auhhla a ropuiin a ukil nih hriat tak a tawngkam thiam Hussein Obama chu President a nita ngei a, a lawmluh ni pawh a pui hep hep teh e! Mahse, kum khat pawh a ral hma chuan kalo tanta kha inchhirna leh inngeina deuh ka neita tlat pek a. A rei zel a, mihring lem tak leh America ram chakna haw tak (he seem to hate strong America), khawvel a chak bik nih duhlo niawm taka engkim kalpui a ni chhota zel mai a ni. America hmelma Iran a thlawp a, remchang a hmuh apiangin America hmingin ngaihdam a dil a, middle east a America thiantha ber leh Democracy ram awm chhun chu a hawta em em mai a nih kha. Tichuan, kum 4 a ral dawn… 2012 a inthlan awm leh turah Hussein Obama a ding leh chu a lungchhiat thlak lek lek zawk a ni. Tin, hna a thawh hma a Nobel Peace price an pek khan a lawmman siamtute a ti nep sawtin ka hre nghe nghe. Hussein Obama leh Romney te chu ram tan a tha lo tur nia ka hriat ve ve vangin vote thlak lam ka ngaihtuah leh talo a, ka nupui pawh chuan a tu zawk mah chu a vote ta lo a, kan chhungkua atangin 2012 inthlan khan vote a tla talo a ni.

Kum 2016 inthlan lo awm tur chu Republican party a candidate an tam hle mai a ( mi 17), mi tha deuh hlir nia ka hriat anni hlawm nghe nghe. Democratic party candidate te erawh: pakhat chu kan awmna state, Maryland governor hlui, a mayor nihna a record chhe fahran, governor a nih pawh a record tha nei lemlo a ni. Pakhat dang lah chu Democratic hming a ding independent candidate leh Socialist a ni. An hmeichhe neih chhun lah chu dawt sawi avanga a hna lian thawh hmasak ber atanga an ban, record tha reng reng kum 30 vel chhung neilo a ni. Republican lamah chuan politics lam a hming la nei ngailo pakhat, frank tak mai, mi pawisawi palh hlauhna neilo a thil a nih ang ang a sawi chhuak phawng phawng mai chu an chuk rawn ta luai luai mai a — a chanchin chhui chian chakna ka neita tlat!

Donald J. Trump, New York billionaire chanchin chu behchian dawl nia ka hmuh theih ang ang ka chhiar ta char char a, chutih pah chuan Hillary Clinton leh Socialist Bernie Sanders chu ka chhui thiam ang tawk tawkin ka chhui ve bawk a ni. Donald Trump a record chuan min hnehta em em mai a, liberal chanchinbu leh professional politician ten an beihrawn nasat em avang chuan ram tan a mi tha a nih rinna ka nei zualta sauh bawk a ni. Amerian politician ho hi (Republican & Democratic), an campaign lai a pawisa tam tham thawhtute hian an thuhnuaiah an dah vek a ni ber a, chumi chu ram tan a pawi telh telh mai a ni.

Kum 2016 inthlan lo awm tura vote thlak tur chuan inbuatsaih a ngaihna zawng zawng chu ka tifel ve ta hluai mai a, mak tak maiin ka phur ve nek lehnghal a! Vote thlak ni, November ni 8, 2016 hma chuan vote thlak hma duhte tan state 37 leh District of Columbia-ah vote thlak hma (early voting) phal a ni a. Inthlan ni (election day), November ni 8 a ka hman dawnloh vang ni hauhlo chuan Donald J. Trump ka tan em vang chuan November ni 2 chuan vote thlak turin phur fahranin ka inkhalh chhuak ta a ni. A hma a voters registration tilo ka nih vang chuan polling station a duty te chuan Republican angin nge Democratic angin register ka duh minlo zawt a. Kei chuan, independent rih phawt ka duh thu sawi pah chuan, “tun tum chu in register pawh ka tumlo, Mr. Trump ka vote hmu tur a ni tho tho,” kan ti hram pek a, duty nu pahnih chu an nui nasa teh asin!

Inthlan ni, November ni 8, 2016 zanah chuan vote chhiar ka nghak ran mai a, state hrang hrang an chhiarte chu ka thlir zel a. Politics lam a lehkhathiam te chu Pu Trump-a chuan dawt a sawi chhoh tirta zel mai chuan ka lawmna an siam hle. Zing lam a liberal media hoin phurlo zet a, “Mr Tump is going to be the next President of the United States,” an rawn tih te, Pennsylvania state, Democratic party lam hmun him chu 100% vote chhiar tlin dawn tepah pawh chak zawk anla puang duhlo tlat maite chuan ka nuih anti za a, an che naupang chhia ka ti hle. Tih ngaihna thlawt an neihloh hnu, November ni 9 zing dar 2:30 a a tlin thu an rawn puang chiah kha chu “America-ah hian Kristian nih a nuam leh dawn e,” tihna te chuan ka rilru a luah nghal a, “Obama chhuak chiah anga ISIS lam hian America an rawn bei zui zat ang em le?” tihte pawh chuan ka rilru a luah tel ve bawk. Ka nupui muhil chu ka kaitho a, Trump a tlin thu ka hrilh chu, “Tinge a tlin hma atangin min kaihthawh loh…” ti chung chuan lawm hmelpu takin min rawn kuah (hug) a… “a tling ang ka tih reng kha,” a ti sap a.

United States of America a ka vote thlak hmasak berah hian ka tisual emlo turah ka ngai, ilo thlirleh phawt ang aw. Tihsual tak leh inthan leh tikah thlan nawn tawhloh a ni mai. Tihsual loh erawh ka inring hle thung.

Thubelh: University professor tam takte hi liberal zealots an ni a, chutiang zinga mi, North Carolina professor pakhat, Andrew Raynolds chuan Republican party chuan chakna an lak nasat em avangin USA chu democracy pawh ni tawhlo ( ” they win so much, it is no longer a democracy…”) hialin thu a chhuah a ni. California a hmu tello aniang e Democratic party chak lawrlakna a ni si a! Hairehai

In la en loh chuan en ve ngei chi a

SR : 16th Adventure Course [1/2]

SR : 16th Adventure Course [2/2]

St. Anthony’s High School-ah ka lut thin a, Don Bosco hostel a ka insuan luh hma zawng chuan ka pa u, ka ni Biaknemi, w/o Paul Z. Hauhnar (fam) te in-ah ka khawsa thin a, Laitumkhrah, Beat House ral lehlam, Bakthak ho Presbyterian biak in chhak chiahah, Meena Cottage chu ka awmna thin a ni nghe nghe.

Hostel-ah khan zan dar kua a rik chuan khumah kan awm tawh thin a, dar kua leh a chanve-ah “light down” an ti a, mut a chhuak e chhuak lo ve muthilh a ni tawp tawh mai. Exam a hnaih erawh chuan kan thianzaho-in zan dar sawm emaw velah, midang an muhilta tihah chuan mombati nen kan chhuak ru thin a. Kan mutna dormitory hnuai chiah, kan classroom-ah chuan lutru-in, zing thawhhun hma hret thleng mombati eng hnuaiah lehkha kan zir thin — kan lo va’n peih tak em! Hostelah hrim hrim khan nitin a huhovin darkar ruk vel kan zir ziah (mandatory) a ngai tho. Khatih lai kha chuan ka thiamthei ve teh asin aw!

Mizoram lama kan chhungte nen kan inbiakpawh theihna ber chu lehkhathawn emaw telegram emaw ala ni tawp. PCO te chu khawilam, a awm teuhlo. Telephone hman tur lo awm pawh ni tehreng mah se, Mizoram lamah phone nei an la awm mang lo va tangkaina a awm tamlo khawp ang. Hostel naupang ta chu a ‘broke’ ve theih khawp mai. Chhungte pawisa chah kan duh ve si, Laimu (Laitumkhrah) a Kalsang Restaurant leh Police Point inkar a post office-ah kalin, telegraph-ah a tawi thei ang berin, “Fee Rs.400 urgent” tih emaw ringawt-te kha Mizoramah kan thawn thin. Lehkha thawn dawn pawhin envelope leh stamp man ui chang a tam a, Inland letter, a rawng hring ngei mai kha kan hmang thin bawk. “Chhungte an chah leh zel theih a lawm” ti niawm tak khan tangka-te kha kan hmangzo zel a, renchemna chang ka lo hre ngailo. Tun hnu hian chhungte kalo tih luhai theih thin tur zia ka ngaihtuah thiam tan ta a, inchhir a pawi tihna avan lian ta em!

Zirzawh hmain ka lungleng chu Mizoramah ka haw ta a, ka nu chuan “A van pawi tak em aw!” a ti vawng vawng mai a ni. Ka nu hlauhthawn ang ngeiin college pawh zo fumfe ta manglo chuan ka awm ta mai mai a. Sawrkar pisaah pawh han thawk ve liuh leuh thin mah ila hna nghet a nih loh mai bakah mawhphurhna sang chelh thei dinhmunah ka ding talo reng a. Mizo movie-ah te changin eng eng emaw ti thin mah ila ka nunphung chuan changkan lam aiin chhiatna lam a pan thuk tawlh tawlh a, a tawpah phei chuan mi biak peih meuh lovah ka inchhuah thei ta hram a.

Ka nun chu ka ning ta a, miten min thlir dan ka hrethiam ta a ni ber ang chu. Tichuan Thakthing bazarah ka nu Silai-Mual huan antam zuarin ka thu ve ta ran mai a. Mi thenkhat chuan, “Ipa first class officer a ni a iti mualpho,” tiin min kaihthawh an tum. Ka pa nihna kha ka nihna a ni lo va, a thawhchhuah ka thawhchhuah a ni tlat lo, ka tho teuhlo mai. Ka antam tel leh kha alo lian deuh aniang chu, ka thut hmasakber tum chuan kharchhawng hovin min lakzawh sak vek nghal nghe nghe a ni. Lungleng khuaah hmunphiah keh zir chawpin kar hnih chhung hmunphiah kekin ka zuk khawsa leh a. Chu’ngte chu Aizawlah rawn hawnin ka zuar kual thin a ni. Kawng siam a inhlawhin Serlui kamah thla thum haw lovin ka inhlawh leh bawk, a nuam ka ti ta phian mai lehnghal a. A chhan ber nia ka hriat chu thianghlim tak leh hah taka thawhchhuah ka nei ve ta kha niin ka hria.

Mi nuihsawh leh fiamthu thawhna ka nireng duhlo mai ni lovin, mi awh tur nih ka tum ve ran a, Serlui kam atang erawh kha chuan ngaihtuahna bak a kal thui mawh kher mai. Ka tum a ruh viau mai, United States a chhuk theihna remchang ka dap ve ran. Chhungten min phatsan loh zarah sponsor-tu tur ka hmuta hlauh mai a, ka lawm ngei mai. Visa dil turin Calcutta ka thleng ve ta rawih a, kamis var pakhat leh kekawr pakhat kha ka jeans baka ka thuamhnaw neih chhun a ni mai a –ka nu-in, bual-in a ken luh chi sekhawnhan funte zipper nei min leisak nen. Calcutta Mizoram House-ah chuan, Manipur lam a Mizo pastor pahnih leh tlangval pakhat chu U.S. visa dil turin interview an inpuahchah ve bawk a. Interview a hun dawn chuan ka thuamhnaw, Mizoram House mattress hnuai a ka dah mar chu ka phawrh a, mar thalo zet chuan U.S. consulate chu ka pan ve ta a. Min han interview veta ngei mai a, ka kal duh chhanah, “Khawvel a ram ropuiber hi ka damchhung hian vawikhat tal hmuh ve ka duh a ni. Mihring hrisel chin hriat a ni lo va, tun tum hian hlawhtling hlauh ila ka duh hle mai,” ti zawngin ka chhang a—“tlaiah I passport rawn lam rawh,” min ti ta a nih kha. Ka lawm teh e, khami ni khan keimah leh tlangval dang pakhat chiah kha U.S. visa hmu kan ni nghe nghe awm e.

Tunah chuan United States-ah in leh lo chhete neiin ka inbengbel ve tawh a, lehkhate zir tha lehin ka zirzawh ang chin phu tawkin, Washington DC –ah, full time-in hnachelh ka nei ve ta. Chumi hna a ka thawhloh nite chuan kan awmna khua, Frederick, Maryland ah, firefighter/emergency medical service lamah ka volunteer thin bawk. Upat lamah lehkha ka zir nawn leh e ka ti a, full time a zir turin hun ka nei thei tawh si lo, part time-in ka ti chho ve hram hram zel a ni. Lehkha zir pawimawh zia hi ka upa tulh tulh a ka hre chiang zual zel mai a ni e. Nu leh pa ka lo hmangaih thiamloh thin zia ka inhre zual sauh bawk a, koh kir theih nise tul lo va ka pawisa dil thinte kha ka dil kher loving — “Tlangval lai chuan…” ti a chhuanlam siam chi-ah ka ngailo.
Shillong sikul kallai-ah khan han lut lehta lawk ila. Keini aia u Mizo zirlai hruaitu thenkhat khan an zirna lam khawihbuai khawpin (a ni ngei ang) politics an khelh avang khan exam an phal ta lo va. Anni lah chuan Mizo zirlaite exam phallo angin thu an thehdarh a, exam tumte kha an dang thul (kan unaupa ngei pawh an dang a ni). An mahni tih dikloh niawm takah khan Mizo zirlai dangte kha nawr-luh an tum a ni ber ang chu. Mizoram an rawn haw a, pasaltha ang maiin politics chu an luhchilh ta tak tak reng a. An luhna tur taka an lut kha a lawmawm, mahse zirlai dangte an tihbuai ang boruak erawh kha chu tun hnu zelah awm leh tawh ngailo se ka ti takzet.

Tunlai angin smart phone kan nei ve ngai lo va, internet pawh a awm heklo. Ram hran a mi thian kan siam dan ber chu penpal hmangin a ni. Magazine-ah te hian penpal column a awm thin a, keini tleirawl rual chuan kan bih hmasaber foin ka ring. Chuta ka penpal pakhat chu tun hnu thleng hian thiantha tak kanla ni chho ta zel bawk. Khawvel hmun hrang hrang a penpal thian neih takah chuan stamp chi hrang kan khawl thin a, to tak tak a leichhawng duh pawh an awm ve zel mai bawk a. Peter C. Lalrinmawia hla, “Kar Hla Thian” tih pawh kha penpal uar lai ani bawk nen a lar ngei mai. Penpal neih kha kan social network a niber thin awm e.

Kum reilote atang khan Mizoram lamah pawh cell phone (mobile phone) kan hmang ve tan a nih kha. Kan unaupa Nonoa (fam) chuan, “Bro’ mobile phone ka nei hmasaber,” tiin a rawn awrh vauh vauh, nei dang awm vak heklo, a awrh a han awrh pawh kha a awm ve viau tho e. Nokia phone holam tak atangin smart phone chi hrang hrang a rawn awm ta zel a, tunah chuan khawvel a tha ber ber, iPhone S6 te leh Samsung Galaxy S6/S6 edge te thleng pawhin Aizawlah pawh lei tur a awm ta. Mahse! Mahse kanti teh ang, kan phone neihte hi a smart hlawm em em nangin a hmangtute hi kan smart lo riauin ka hre fo mai. A hmeh vel leh a tih theih hmehchhuah dan kan thiam viau pawh a ni thei e, hnadang a tlai phah emaw, tihtur tizo thei lawk lova min siamfo ta mai hi a hmangtute kan smart lo hle niin ka hria. Fiamthuin ‘a ruaitu aiin a hlawhfa phone a hlai zawk’ tepawh anti ta hial. Sikul/College naupang mahni zirlai zir hman lo khawpa smart phone khawih nasa te hian an phak tawk tur an phalo foin ka ring. Shillong a kan sikul kal hunlai khan internet hmang a social network neilo mah ila, a hunlai a awm chhun penpal buaipui tak tak ho kha lehkha zirna lamah a hnufual fo mai. Smart phone emaw internet hrim hrim hman chintawk hrelo pawh hian, an zirna lamah an muangchan phah mai bakah, khawvel tak (cyber world nilo) ah hian an bo hu duh hle.

Ka fapa naupang zawk hi tunah hian ka kiangah, United States-ah awmin internet hmanga game khelh thiam ve angreng tak a ni a, lawmman te pawh a lo dawng ve tawh a ni. Mahse, hunbi ka siamsak loh chuan a zirnain a tuar em em thin a, hunbi ka siamsak chinah erawh chuan zirna lamah rual a pawl pha ve leh ta deuh. Engkim mai hi a lutuk chinah chuan thalam a min hruai aia thalo lam a min hruai thei alo ni fo thin. Kum tam a liam hnuah kumin June, 2015 khan Shillong tlang ka chuan leh a, ka sikul kalpui thiante nen inhmuleh in lung a leng thar leh ngei mai. Shillong Mizo Zirlai-te Pathianin awmpui zel rawh se.

NB: Shillong Mizo Zirlai hruaitu pakhat-in an magazine/chanchinbu-a chhuah turin fuihna thu min dil a, mahni chanchin ekzampul a hmangin Shillong Zirlai tan deuh a ka ziak a ni. Khawih damlam hret mah ila Shillong lam a awn deuh tui maithei. Hairehai

Engtizia teh reng nge ni 1994 kum khan sawrkarin sikul tan hma tur a ti mauh mai a. Centenary lawmna hnu khawi pawh tel hman loin kan khaw lam pana chhuah zui mai a ngai si a. “Tuan tul vanga ka liam ni khan maw…..chawhnu zin lamtluang a thui ngei e”

Ka thuam tlem a zawng nen Jail hlui lam panin ka in ak chhuak ve ta a. Kum a la tir bawk nen kan khaw bus chu a lo la service lo tawp mai a. Hmangaih berte lenna tia Pu Zorocka’n a koh Kolasib lam service bus remchangah chuan ka inthiat ve ta a. A chuang tur ang ang kan kim ta tih ah Zawlkhawpui chu kan chhuahsan ta a.

Kolasib lam tlangdung a zin dawn reng reng chuan Driver hnung zawn seat hi thlan chat zel tur a ni. Eng vangin maw ? E le….ni sa in bek a hem lo. Aizawl pan kan nih pawhin chuti tho. Aizawl pana kan zing chhuah chuan vei lam pang hi ni in a em a, Aizawl atanga kan chhukin vei lam bawk niin a em a. Chuvangin Driver hnung zawn seat a chuan hi a tha em em a ni.

Bawngkawn kan pel a. Durtlang pelin Selesih Sihphir kan pel zel a. Lungdai gate an siamna thinte thleng zelin kan lawng chuan a tum ram a pan zel a. Kan lawng hi mahse Bus a nia. Pu F. Laltuaia pawhin Thlalertuivalawng a hmuh ve tho kha maw. Thlalertuivalawng hi va mak sak tak a nih ka ring. A lem leh chanchin hi tun thlengin ka la hmu lo nia !

Tlan reng takah chuan kan thleng thui ta hle a. Kolasib kan thlen meuh chuan a lo thlasik khua deuh bawk nen a lo tlai fe tawh a. Mahse khua a la thim lo. Diakkawn diak si lo ah chuan min unload ta a. Eldorado kawt thlang lamah chuan kan khaw lam kal tur motor chang chuan ka Pawi khual din ve he haw a. Silchar lam pan tur Punjab cab leh cab lo pawh hmuh tur a vang hle mai a. Bairabi kal tur passenger duh hi an awm a. An au lauh lauh a. Mahse ka kalna lam tur a ni si lova. Ka tan chuan darbenthek ri mai mai ang vel a ni. Thahnemngai taka a au hnu pawh chuan passenger han inthiat luk lak tur an hmu chuang lo. A au rei fe hnu chuan Pu Kaisera fapa ni awm tak te pawh chu Bairabi lam pan tur chuan an chhuak ve ta a. Mahse kei chu chhingkhualah ar ang ka la vai motor changin.

‘Tlai khua i var za ang Kolasib Diakkawnah hian’ min ti tumah ka tawng lo a nih chu mawle ! Tichuan tlai ngai lo Pathian chuan ka chuanna atana a ruat ngei mai Tractor tê chi chu a rawn chhawp ta heu mai le. ‘Lirthei zawng zawngah a mawi ber awm e’ han tih tur phei chu a ni law. Mahse a aia hlu erawh ka hmu si lo. Chu tractor chuan hnunghnuh trailer a nei a. YMA thutthleng ang pahnih a chhawm bawk a. Passenger pawh tlem a chhawm bawk. “Ka lo inthiat ve luk lak ang chu Bilkhawthlir ka kal dawn a. In khaw zirtir ka nia” ka han ti a. Driver chuan a lo Amen thum dap a. Tichuan kan khaw lam pan tur chuan kan lawng chu a kiu ta ruai ruai a. Kan lawng hi mahse Tractor a nia. Pu F. Laltuaia pawhin Thlalertuivalawng a hmuh ve tho kha maw. Thlalertuivalawng hi va mak sak tak a nih ka ring. A lem leh chanchin hi tun thlengin ka la hmu lo nia !

Kan lawng hi kiu ruai ruai angin ka sawi naa a hawk dut dut zawk a ni awm e. A tang thawm lah a na, a tha thlah thawm lah na bawk. Kan ri thla rum rum mai a. Keini a back seat a thu ho phei chu a sawh gear a tam khawp a. Mounting rubber that loh vang emaw shock absorber that loh vang lam a ni lo. Tractor hnung hnuh a ni tlat. Pu Lathu-a pawh khan a khalh sawt dawt dawt thin tho ang a hmelin puak ti lo mahse.

Hma lam zawng chauh a kal ta chu a rei a rei ah chuan kan thleng hla ta fu mai a. “Kan hnenah awm ta che khua pawh a thim dawn hi” ti tur reng reng an awm lo. Kual lut zawng te kual chhuak zawng te chuan kan kawi kan kawi a. Kan chuanna lawng thawm chu mitdelte hriat khawp a ni. Chutin kal zelin Keichâm kan thleng a. ‘Tin Pisidia rama Antiokei ah chuan’ an tih ni lo Bilkhawthlir khaw tawn tirh Bawngbuk kawn pawh chu kan thleng a. Laltin chhi lo tan chuan a thim fu tawh tih ah chuan Eldorado ka ti dawn nge Xanadu ka ti dawn ….kan khua….kan veng…..Bilkhawthlir Kualmawi chu ka thleng ta a. Kan zin kawng hi a thui si…aaa…a tawi bawk si.

Sikul tan hma chuan ka thleng ve chiang alawm.

Buannel hi Myanmar (Burma) ram Hmunluah atanga chhim chhak dep, Hmunluah khawlu tlang liam, mel sarih vela hla, Luangdam lui bul lawka awm a ni. Buannel hi chhuah lam leh tlak lam dawng tha tak a ni a, a tlang inkhawh cham durh mai te chu an mawi em em a ni. Rih Dil awmna Rihkhawdar atang hian Motor keng lo tan pawh Bike a hire theih a, inphurhtir man hi pakhatah Burma pawisain Kyat (Chiat tia lam tur) 8000/- zel a ni. Khawmawi tlanpelin, Lianhna khawthar leh khawhlui tlanpel leh zelin, Chawhte thlen hnuah Hmunluah a thleng a. Hmunluah thleng chauh hi Motor-in a thleng thei rih a ni. Hmunluah atang hi chuan ke-a fehkawng tum ang tiat velah kal a ngai tawh a, kein a thlen theih tawh a ni.

Buannel-ah hian a nu tlang leh a pa tlang an awm a, chung tlang cham durh mai te chu an mawi em em a ni. Tin, a nu tlang leh a pa tlang inkarah chuan phai ruam zau tak a awm a, phai lo atan a itawm hle. Tin, a nu leh a pa inrina phaizawla lui luang hi ngil taka luang lovin a luang kawi nghiat mai a, hetianga lui te a zik zaka a han luang kawi ngiai mai hi a makin a mawi dangdai hle a ni. Chumai ni lovin a nu tlanga lui te luang pawh hi a kawi nghiat tho a ni. Hetianga Buannela lui te pahnih luang kawi nghiat maia an luang hi thil mak tak leh sawi hlawh tak chu a tling a ni.

Tin, Buannela a nu tlang leh a pa tlang dung inkhawh zur mai te chu a rai nuam hle a. Hmun thenkhat laiah chuan tlang dung sahmul thenna takah hian phul mawi tak leh ngaw dur pui, hring nghulh mai chu mawi leh mak danglam takin a inri zur mai a; an inrina laia chhawkhlei kung a intlar zui mai chuan a tlang mawina chu a belhchhah lehzual a ni. A phul phai tual hlo hnimte chu a hring nghulh mai a, a thianghlim em em mai a. Han thuin han mu vel mahila thutphah tha tak leh awngphah tha tak an tling a, thawmhnaw pawh a bal chuang lo.

A pa tlang lama tlang sang lai ber, Chawngtinleri puantahna tlang an tih phei chu a mawi leh zual a ni. Tlang dung sahmul then lai phul leh ngawpui inrina laiah chuan Chhawkhlei kung leh raw te chi, mi thenkhatten Thothek an tih thin, mihring aia sang deuh chauh a inthuahthipa an han ding tlar zur mai chu Khuanu’n mawi tur renga a duan a ni ang e tih loh theih a ni lo a ni. A pa tlang lam lui mawng lama tlang phul mawi tak lui hnar lam epah chuan tlang pawng mawi tak, lung chhawrdawh mawi zet mai, Adama thlan an tih chu a awm a, a tlang mawina fanga kal te chawlhhahdam nana hmun nuam tak a tling a ni.

Buannelah hian sabual hmun leh puk thuk tak takte a awm bawk a; chumai a la ni lo, a tlang mawina tizualtu leh cheimawitu Bingbi, mi thenkhatten Buannel Par an tih leh ngawpui thingzarah chuan hmun danga awm ngai lo Chhawkhlei par var a awm bawk a; chhawkhlei par var hi Chawngduma sai ngho leh Bawltehamtai te anga thing nunna ringa awm chi a ni. Chhawkhlei par var hi a par sen chi aia a danglamna chu a par rim hi a tui em em a, a zung hi tanakha ai hian hmai hnawihah a tha zawk a ni. A zung rual takin an tan bung a, lungtatah tui nen an nawt a, hmaiah an hnawih mai thin a ni. Hmai vun a tinovin a tinung sarh mai a ni. Damdawiah a that avangin miten an la nasa a, a tlem phah a ni an ti.

Buannel hi upaten ram tha sawi nana chun mittlai an tih ang maia mit titlai thama mawi leh nalh a ni. Ram reh ruih mai a ni a, nungcha chai thawm han ri chiah chiahte chuan lung a tileng thei hle. Hmangaih lungduhte nen hlim tak maia a tlang mawina nena inenbel chunga se se thudi tiamdun nan chuan duhthusam a tling a ni. Tin, a nu lam tlang pang a pa lam epah hian tuma chin ni lo purun phek/Purun pheng an tlim hmur mai a. A tlawhtute pawh hian mak an tiin chawhmehah an hmang ve fo a ni awm e. A ram boruak hi a zo vah mai a, thing hmun chinah chuan Sarzuk te chi te pawh a awm ve a ni.

Buannel hi tlang thengthaw nuam tak, a phul mawi tak chu ngawpuiin a hualpup mai ram a ni a. Hetiang hmunah hi chuan Ni leh Thla pawh a eng mawi duh bik a ni. Chuvangin phul hnim chunga zan daifim tla thla chhun en ser ser kara thla eng lawm chhawlhnawm nungcha chiarnghian leh Khuangbaite pawhin biahthudi inhlan vein an mawi a ni. Chi thlah tura Pathian siam an ni ve si a.

He hmunah hian mi tupawh inhmangaihna vawrtawp pawh lo hmang se an demawm chuang lo ve. Hmun mawi nuam, fianrial leh biru lai apiangah in ittawn hmangaihna chu a inpuang chhuak duh thin miau si a. “Ka enchimlohte, ka hmangaih chein i va han tha zim ziam tak em,” tiin lo innul dun pawh nise a mawh love. Kei ngei pawh hian Khuangchawi Chhawrthla eng hnuaia Luite kawi phul Chhawkhlei par kepchhingchheng hnuaia thlifim dawng chunga se se thudi hlan nan chuan a mawi ngei e,’ ka ti ve tho a ni. Buannel mawina fangdun tura enchimlohte nena hnaizo sa lova kiu kawn inbat chunga dar insi rial rial a han lendun chu a nuam ngawt ang le. Hahchhawl dawi ang min tur tawk chauhvin zo thli vawt, Chhemdam thlifim lah chu a thaw heuh heuh mai si nen, hei ngei hi Vanram tlafual Lei Eden tih mai chu awl tak a ni! Tunlai phei hi chuan zaithiam tak tak te’n Music Video siamna hmun atan an hmang a, kal lam leh hawng lam pawh an insul ve ta zut zut mai!

Mizo literature-a mithiam thenkhatte’n Buannel hrilhfiahna atan-a,“Ram tha tak, Ramngaw, Sa tamna, adt.” an han tingawt hi chu a dik lova, mizo pi pute ngaihdan leh thuvawn suasamna hlauhawm tak a ni zawk. Mita hmuh theih leh belh theih a awm miau avangin ram tha zawng zawng sawi nana “Buannel” tih tawngkam hman hi a rem lo a, thangthar zelte bumna leh kan cultural heritage suasamna tur chak tak a ni zawk. Ram tha leh sa tamna hi Buannel kan tih dawn te chuan Discovey Channel leh National Geographic-a ramsa tam tak awmna kan hmuh Amazon ramngaw te, Australia rama sa tamna te hi “Buannel” tih vek a ngai dawn a, chu lah chu kan rilrem zawng a ni thei kher lovang. Sa tamna leh ramngaw tha tawh phawt chu, “Tuk loh ram” tih mai hi a tawk viau a ni. Thangtharte chuan Buannel hi a takin a awm a, ramngaw tha satliah sawina tawngkam a ni lo tih hi i hre hram hram ang u.

“Buannel ram daiah va tuan i,
Chhuihthangvala hmingthan nan;
Chengrangpui lungleng a au ve,
Damsa hraileng awite tlan dial dial.”
– Rokunga

www.getaheadofthegames.com/best-armor-games

getaheadofthegames.com/best-cooking-games

Khaw hran hran kan fanga, kilkhawr tak tak, mêl lung pawh ina a thlen phak tawh loh na te a ni. Vân paw’n a khuh phak tawh lovang a tih hial khawpa hla a thang vang vang kha kan ni a, an chhûm tepawh a pan hlang tawh, hla tak hi a ni tawp mai. Motor nen a luh chu sawi loh fur lai phei chuan“Siliper” takngial pawh a bun luh theih loh tep zel a, Motor a chuang ê ti lovin, mawng hi kan hung hman ngai mang manglo a, chuan ai mahin nawr kha a thui mah thin. An Jeep chuanman hi cheng zathum leh tharum a ni. Tlan chak lam hi a chuti lua lo khawp a, nu ho thingphur pawn min kal pel fua fua renga, eirawng min lo bawl kep turin thu te kha kan chah lawm lawm thin. Kawng tluanin Bawngkai ho nen kan in “Race” tluan parh a ni hrim a, chak tawka han tlan pelh ve chang te hian kan lawm thei em em mai a, kan han bye bye ve lawp lawp a… a chhak mai ah kan lo tâng leh mai thin, vawi za dawn kan in thlah hman in ka hria!! An khaw kawng te chu a han te lulai khawp a … Pa nuamsa êkin kawng tia lek hian a kaw riak chauh mai a, tih fuh loh changa ip tepui lian deuh ak han tawn fuh phei chuan “Back” ngat ngat ngai hial khawpa tê leh tawt kawng te a ni. Kawngkam hnim te lah Kânchhî-i englo hmul ang mai in kawngpui lamah rawn a buk thla chhûm a, Vangvat kailawn tha tak a lo ni a, Motor chhung atang pawn kan Chabet kâi mawlh mawlh mai zel.

Driver duhthlang thiamlo deuh te chu kawngpui vângtan zawng in an in hûng leh hê hâw thin a, in dim theih ni hek lo, min Dumka Kêl phruh miah miah mai a, Beram a hmul mettu hma a ngawi renga a awm ang mai hian kan ngawi kara, fur lai mah ni se thlan sa phûl bulhin mâwn hmetin motorah kan thu chip hman reng mai. Kawng titoh tak ah chuan a dul kiar kiar kha kan sawt duh a nimai a, chunglam leh hnuailam hi kan tauh tawn ngat ngat a, mawng ai mahin chip hi a sil zawmah a, tum loh takin kan in pawm leh nawlh nawlh thin!!!

Kan Pî leh Nula karcheh a chuang tihtakah kawng chhia in a min han thap vawr suau tawh hi chuan a khawi zawk zawk emaw hnute hi chu ka nghawk then leh nawlh mai thin a. Polite taka hnute nghawk ka nih a vang khan huat thu awm suh kan in nuih leh tawp mai zel!!! In dawm ngheh reng a ngai a, kawng an lei deuh lahin vawn a pelh laklawh chuan sira thu tu tu te emaw hnute hi kan dawm leh chut zel mai a, in vawn ngheh a har khawp mai!!!.  Mipa, tlangval hnahkhat ni na na na chu kawng chhe karah pawh he thinlung hi a mipatna a lo chhuak hman peka“Mo-thar kap” ang mai in kawngtluan in thinlung a hnawng chuar mai a. Ngaihtuahna a lo hmul miau chuan hmalam ah hian a in do kalh ve rûn zel mai zela, a sawh thlep hnawk ang tih hlauhawm khawpin tan a khawh ve tui mai a, Pastor thinlung ka mamawh takzet mai. He kan tumkawng hi Sunday school zirtirtu tan pawh engemaw kawng tak chuan kawng sexy tak a tih loh theih loh. Mahse, Seat kha chu ka thlang fuh thlawt a ni!!  (kan Pi khan a chhiar leh em lovang chu)…

Kham panga kal tih takah rin na pan deuh chuan kan thil sual tih zawng zawng te kan ngaihtuah chhuaka, naupan lai a kan chini bar ruk thleng thleng mai khan hrilhfiah hran ngai hauh lovin a fiah uarh uarh tawh mai a, Isua meuh pawn Gezmani huana a thil hloh “Thih thlamuanna” kha a ngial a ngana han hmachhawn tak ah chuan a lo chiang khawp mai!!! A zirtir luhlul deuh deuh ho kha dem tur zawngin kan dap chung tawh mai a. Chhandamna ah hian chian hi a lo har duh fu mai!! Baptisma chan that tak mai kha ka nap rum rum a, duhthaw luat avangin khatih lai kher khan chuan a chian lehzual nan “a hnim a in hnim” ngei kha ka thlang ber mai awm e.

Khua kan lut ta cheng a, Power supply chu khawilam, Bati Original pawh hmuntur a awmlo hrim hrim mai a, Phone pawh VCP Pu Tlângtlawha Sertawk Kûng zâr dinglam ah chiah signal a awm peka, chu pawh in lawn chhawk a ngai zui!!! Satel tluka thing thiamlo hi “Ănka- bâwm” nen dul pilh hrupin kan han lawn chhuak ve hram thin!! Chhum a zin palh hlauh chuan thing zara nghah char char kha a ni tawp mai!!! Harsatna tamtak kar ah duhtak te kan han be tlang ve hram a, a chham sweet theih loh bawk nen, signal awmloh awih lovin min lo ringhlel ve tumhranga, kan han insawi fiah dek dek a, a kûng bul lama waiting list ho an lo nui thûm leh huk thin. “Lo inbual fai rawh…” chu kan tih hram kha!!!!

Heng zawng zawng karah hian ka suangtuahna ram luah thuk ta ber mai chu, heng thingtlang kilkhawr lehzuala awm kan unau te hian châk la in pûrchaw puakphur rit tak tak nen, then sen rualloh vangvat karah, zing dâi vawt tak tak te pal darhin an nitin nunna tur atan mamawh te an lo lam khawl ve thina, Pisa te dawrin inthlahrung tak leh inkiltawih takin thil min rawn zawt ve dek dek thin. Ngaihsak an hlawh loh pawhin ngawireng in min nghak fan fan zel a, chutih lai in, kei tlangval satliah, mahni hminga vahsan pawh la la lo hian thingpui hâng takngial pawh hlui nachang ka lo hre lo thin a, ka lo va han mawl tawk tak em!!! Ka inchhir takzet mai. Tun chinah ka ti leh tawh ngai lovang. Thingtlang nu leh pa te u, in lova in thar chhuah hahthikula in thlawh chhuah, thlan tui far zawih zawih a in rawn phurh thlen, in thlai thar te hi tlâwm dîlin ka lo dawn ngat ngat thin che u a, min ngaidam ngawih ngawih teh u. Pawisa nawi kîr tur in neih loh paw’n ka ngaidam vek tawh ang che u. He ka piantharna hi Kross ah ni mah suh sela min pawm sak hram turin ka Zawlkhaw unau te ka dil e.

Ngaihsak ngai loh, duhsakna dawng lo te hi i hmangaih ang u.
Zoram Sorkar ah hian an kawng hi tun ai hian ngaihsak ni thei se.
Mnister leh MLA te hian kawngchhia thlawh khumin, kawng an mangnghil mai ang tih a va hlauhawm tak em!!!

Hemi kan zin tum hian kan member Lushai_er nen Zokhawthar lei bulah kanin tawng nawlh a, Sermon kaihhruaina lehkhabu a hûm in ka hria…

= Rethei ngailo retheih a na (mihausa tlachhia hi an chhe duh ve fe nia)

2.Lungpui pawh lungtein a kamki loh chuan a awm thei lo.

= Lungte pawh lungpui a awmloh chuan kamki tur a nei biklo (inmamawh tawn theuh kan nisi a. eg-Mihausa te hi retheite(inhlawhfa) te telloin an awm theilo ang bawkin miretheite pawh mihausate an awmloh chuan inhlawhfakna an nei biklo)

3.Mahni infak leh sakhi ngalah engmah a bet lo.

= Mahni infak leh Sakhi ngalah a ti, vun leh a ruh tlem a bet (Mahni kan infak hi chuan chhete chuan engemaw chu a awm a ni)

4.Se bo hnu a se kawng khar

=hian a dang bo tur a veng ve thei

5.Sial rangin sial rang a hring, sakawlin sakawl a hring, sunhlu kungah thei dang a rah ngai lo, Kawi pawh a kawm a that leh a rah a tha.

=Serfang kungah serthur a maw ni an rah tir (eg- Pastor, Kohhran Upa etc. fa an nih vang ngawt hian an fel ngawt lo a nia)

6. Zawngin a ngumkhak a hmulo a a thiante ngumkhak a nuihzat

=A thiante pawhin an ngumkhak an hmu biklo (mi diklohna kan sawi hian kan diklohna kan hmu tello thin a, midangte kan sawi a te pawh hian an diklohna an hmu bik chuanglo)

♫A saw raltiang lentu zo bawn saw,

Chhingmit titlai tu tuk loh ram chhah kar saw.
Mi ngeng pasaltha, lung ti leng tu.

Bannel ram dai, lungdum tu ♫

Kan pi leh pu te chuan sa tinreng hi Buannel ngaw atanga rawn piang ah an ngai thin a. He ram ngaw mak tak mai hi ram hla tak, thlen phak mang loh a awmah te kan lo suangtuah thin anih chuan kan ti sual duai dawn a ni. Hei le kan pi leh pu te hrilhfak Buannel ram chanchin chu le:

BUANNEL ram hi khawchhak lam Run leh Tiau inkar Lentlang  awm a ni a. Tiau atangin mel 20 vel a hla a awm a ni. A hnaih ber khua chu Hmunluah khua a ni a, hemi atang hian mel 7 vel a hla a ni. Lentlang tluan a tlang chhip filawr deuh deuh te chu hmar lam atanga chhiar in Kelchal tlang te, Muchhip tlang te an ni. Lentlang sang lai tak chu hmar lam atangin chhim lam zawngin tlang dung a kal ruah mai a. Buannel thlen dawn hian thuang thum in a kal a. Tlang dung inkarah chuan ruam zawl rai phul nuam tak mai hi a awm a. Tlang chhip sang lai chu ngaw dur khup mai chatuan a tuma kih ngai loh in a hual tlat mai a. Phul leh ngaw inri naah chuan sih pasarih hi a awm a, chung sih atang chuan tui fim tak hi an luang chhuak hlawm a, chung tui luang chu hmun khatah a infin khawm a, chuchuan lui te a siam a, phul lai takah chuan a luang tlang a, furah pawh a nu ve ngai lo. He lui te hi luang zelin Tiau a fin nghe nghe a ni. He phul sir hual vel hian pangpar chi hrang hrang Hawilo par te leh Dingdi te chu phun tu awm ang mai leh enkawl tu awm ang mai hian awmze nei takin an vul chek mai a; tin, tlang purun ‘Runpheng’ an tih te pawh a tam hle bawk a, a phul hual chuan Chhawkhlei a awm leh vek bawk a, helai hmun hi alawm kan pi leh pu te hun lai ata tawh Buannel an tih Lasi te tualchaina hmun ni a an lo sawi thin chu.

He phul hmun hual hian ngaw dur pui mai hi a awm a, he ngaw ah hian thing lian pui pui chu thim khup khawpin a ding a. He ngawpui hi a ni ‘Buannel ngaw’ an tih chu. He ngawah hian alawm tunhma chuan sa chitinreng mai a awm an lo tih thin chu ni. Sai tluang te hi patling pil pil hian a thlur riak ruak mai thin a, sazuk, sai, samak leh tumpang te thleng in an awm thin a ni. Sava pawh arawn tih loh chu vapual, vakul, vacha, vavu, vahrit, vahai, vakhua, kawlhawk leh riakmaw te thlengin an awm vek thin a ni an ti bawk. A ngaw hi chhunah pawh a thim khup mai a, a tlang chhip sang lamah chuan thing hi mihring chen lek lek a ni thung a, patek hian chhah tak tak mai in a bawm khat vek a, thingkung patling pawm tiat tiat pawh hi patek han kheh chuan chawnpuar tiat lek te an ni chauh zel. Chumi dawt a phul ah chuan Mizo pangpar chi hrang hrang hi a vul chek reng mai a ni. Buannel ramah hian thalah chuan romei a zam chiai reng a, fur ah thung chuan chhum in a bawh deuh reng thung a ni. Ruah hi a tam em em mai a, hmun danga a sur loh pawn helai ah hi chuan a sur deuh reng thin. Tin, helai Buannel phul hi alawm Lasi huan an tih thin chu; englai pawn enkawl tu awm ang mai hian a fai hlarh reng mai a ni.

Buannel hian chanchin mak tak tak angah mai a; heta pangpar leh purun te hi lak chuan a ngaw atang hian a chhuah pui theih loh reng reng an ti, Lasi in an veng tlat an ti a ni. Tin, a lai a lui te luang hi a nu ve ngai lo va, a khuah chah theih miah lohva; tin, a kawng hran sial a luan kual tir tum pawhin a theih miah loh a a luanna ngaiah bawk a luang leh mai thin an ti bawk. Hetiang anga ram ngaw tha leh mak dangdai hi khawvel hmun dangah hian awm ve tak ang maw?  A hmunah hian han kal ve ula khawvel thil engmah hian in rilru a luah lovang, mak ti in in hawi anga, in thawk dan thleng in a danglam anga, damchhung khawsak lungkham na, sum leh pai, silh leh fen, ngaihzawng leh khawvel thil ropui te in rilru ah a lut hek lo ang. Siamtu kutchhuak ropui zia a tak in in han hmu ngei ang le….Vawikhat dam manah Siamtu kutchhuak ropui zia hmu turin in lo han kal ve ngei dawn nia.

THU BELH: Buannel tih hi mi thenkhat chuan ram ngaw chhah sa tamna hrim hrim sawina a ni te te pawh an ti thin a, tin thenkhat leh chuan ramngaw chhah lai a phul hmun, ramsa ten no an neihna lai hi ‘Buannel’ chu a ni e an ti bawk a, heng an sawi dan hi a dik e a dik love ka rawn ti lem lova mahse tuna ka rawn sawi Buannel ram hi chu a tak tak a hmun bik awm ngei a ni tih hi Zofate hriatah hian han tarlan ve hrim hrim hi a tha in ka hriat avangin ti hian ka rawn post a ni a. He post Buannel tih ka rawn ziah hi Meichher leh MUP Magazine hlui vel leh mi hran hran ziah ka rawn lawr khawm te leh keimah in a ka ka lo hriat ve dan te atanga ka rawn phuah khawm a ni a, dik hlel deuh leh felhlel deuh a awm anih pawhin chhiartute hriatthiamna ka rawn dil nghal a ni e. Buannel a kal tur hian Burma ram chung International boundary  piah lam anih avangin tunhma deuh kha chuan a buaithlak viau mai thin a. Champhaiah chhoh phawt a, chutah Tiauah kal a, Tiau atang chuan Hmunluah lam pan a ngai tawh a. Kal phalna hi helam atanga han dil hian awmzia a nei tehchiam lova. Champhai lam a Police ho ten Burma sipai border a duty ho an dil sak a an in biak rem dan a zir ani mai a. Tin, thenkhat chuan Police lam pawh ruai chuang lovin an mahni kal kal in an kal mai thin a ni. Tun hnuah hi chuan sipai hotu te hi pawisa tlem azawng te an pe ve a, tichuan lehkha an lo siam sak a a kal mai theih tawh ni in an sawi.  Mahse kal tur tan chuan Champhai Police te hriatpuina ngei a kal a tha, engemaw buai awm thei anih avang in.

*He ka ziak ‘Buannel’ tih hi Zofa zawng zawng Buannel tih hming sawi a lungleng thin, thinlung a Pasaltha te ram vak lai mitthla thin, kan pi leh pu te nun hlui hrechhuak thin ZOFA LENG ram tin ami te tan a bik takin ka hlan e.

BigDaddy Hmahmatea
(R.Lalhmangaiha)
Kulikawn

Uttar Pradesh khawpui Lucknow-ah khuan ka putea (ka nu chhang chiah) hi missionary-in a awm ve a, chu hmuna zin chu vawi tam ka tum hnuah remchang takin kalna chance ka nei ta hlauh mai, chumi chungchang chu ka sawi tum ber a ni lo bawk a ‘tichuan hlim takin Lucknow-ah chuan ka zin ta a’ tiin duhtawk phawt mai ang.

Lucknow meuh thleng ta chu khawvel thilmak pasarih zinga lang ve fo Taj Mahal, khawvela thlan in ropui ber te zing a mi, hmangaihnaa sak chu thlen ve hram ka duh. Puteate’n min kalpui hman silo. Remchang min dap puiin Etawah lama Mizo pastor hnathawk in Lucknow-a meeting pawimawha a rawn kal chu remchangah ka zui ta a, Etawah atang chuan Taj Mahal awmna Agra khua chu hnai te a nih tawh bawk avangin chuta thlen chu ka tana thil remchang tak a ni reng mai.

‘Etawah atang chuan Taj Mahal chu ka va tlawh ta a, a manhla ngei mai’ tiin duhtawk leh phawt ang. Ka Taj Mahal tlawh zo chu kan pastor-te inah bawk chuan ka innghat leh a; a tuk zinga kan pastor-te nena kan inbiak hmasak ber chuan ‘Nizanah kannu nen kan lo sawi dun a; Delhi hi tlawh la kan duh. Remchang I hmu tawh kher lo maithei a,’ min ti a nih chu. Puteate kha chuan anmahni’n min kalpui theih siloh avangin kal lo mai turin min duh kha a ni a.

Tichuan Taj Mahal pawha min hruaitu ringthar pakhat nen chuan New Delhi pan chuan kan inhawl chhuak leh ta a nih chu. Tlai dar 3:15 ah New Delhi khawpui chu ka lut ve ta rup mai. Auto Rickshaw la nghalin India Gate, Qutub Minar leh Parliament House-te kan tlawh a; a nuamin a hlimawm ngei mai. Parliament House-a thla lak an phal lo kha chu ka thinrim ngawt mai. Ka thinrimna hmun a changkan tak hle ah erawh ka lawm phian lawi . AIIMS Hospital pawh lut chiah loin pawn atang chuan kan thlir thuak tak e.

Rel Station-ah zanriah kan ei a; ‘chu chu in duh em?’ an tih ang kan lo aw zel avang chuan ei khama kan bill chu sang tak a ni. Keima pek vek tur a ni si, uiawm duh khawp mai. Amaherawhchu a tui em kher a, a pawi erawh ka ti em em lem chuanglaw.

A tuk zing hma taka Delhi khawpui chu chhuahsan leh mai tur kan nih avang chuan ka kalpui pa chuan pawisa min ren pui deuh nen station a mut mai a rawt a; mahse, kei rilru chapo ve tak mai chuan Delhi kal ve ta lem a chuti maia mut chu ka duh der lo thung. Mutna hi Pathianin hahchawlh nana min pek nuam ber a ni bawk a; ka duhtui viau thin reng a. Hotel man tlawm kan hmu fuh hlauh a; Delhi-ah zan ka riak ve ta zan mai. Lehlanga kalna hi zinah ka ngai meuh lo thin. Mahse, hei, zan ka’n riah ve tak hial chu.

A tuk zing dar 6:40 ah Delhi khawpui chu ‘tawn leh ni awm thei hian ka mawi silo’ ti chungin ka thlir liam ta a. Cham chhung hun reilo teh mahse, Delhi zin chu ka ni ta hrim hrim e. A vawikhatna chu.

AC atanga pawn kan chhuak chiah chu rilru in ‘Helai hmun hi khawvela hmun changkang ber pawl, khawvela mi hausa hoin nuam an tawln hmun chu a ni si a maw?’ tiin a lum em avanga nuam tilo tak chungin ka ngaihtuah a.

Mizoram House chu taxi in kan thleng phei ta. Kan lut a; min lo melh tu chu an tam khawp mai. Mahse, tuman min lo be lo kha mak ka ti. Receiptionist counter-ah chuan chinchang ka zawt a; min hrilhfiah hnu chuan kan room turte min kawhhmuhin kan innghat fel ta a; a lo awm sate erawh an hawihhawmin biak an nuam thung kher mai. Zirlai Mizoram lam pan tur, kalna khaihlak avanga tangkhang an lo awm nual mai a; awm an ti nuam letling phian. Heng ho hi Mizoram House a staff pakhatin rel ticket hmuhsak a tiam avanga tangkhang anni. A hmuhsak hleithei leh si lo a/a to uchuak lutuk a; an duhlo a ni. Zu erawh an duh khawp mai, naupang te te paw’n an khiat khawlh khawlh reng mai zawng a ni e. ‘Phaia indah tur pawh hian fimkhur a va ngai em!’ tih ka ngaihtuah phah. Naupang pakhat phei chu amah hre ngailo mah ila, a chhungte a’n sawi takah chuan an motor no nen lam ka sawi thei ta mai, zu chu a nghei phah ta hlauh a. Mak ve angreng.

Pachhunga College zirlai ho an rawn zin a; mak deuh mai chu receiptionist nu chuan, ‘House-ah kher hian rawn thlen in tum thin a!’ a lo ti nia, Mizoram House chu kan inah kan ngaih hlawm vang a ni tih a hrelo nge mi hnuaihnung zawk hi min hmusit pawh ka hrelo.

A thawk tute vai deuh vek anni mai kha chu a zialo deuh ka ti. Hlawh sang lo tak pawha thawk duh Mizo thalai an tam dawn vei nen. EPL en chak kan tam nen Criket an ti tuah hum reng mai ringawt pawh kha a ninawm.

Tuk khat chu mikhual lo thleng thar ka ka hmu a; enge a tih dawn tia ka zawh chuan (Delhi angah chuan engmah tilo a kal thu awm hek suh) ‘Visa ka buaipui dawn a’ a ti a. Keipawh visa buaipui tura kal ka nih thu ka sawi hnu phei chuan a phur ngei mai. Mawl hle mah ila kan aiin a la mawl ve lehchhawng niin ka hria. Visa dil tur chuan passport a ngai tih a hre ve na a; passport nia a ngaih erawh passport size photo a ni thung.

A insawi dan chuan Burma lam chhuak, Aizawl a khawsa a ni. Hemi tuma dormitory a awm ho hi zirlai ho tihloh kha chu visa lampang chungchang deuh vek kan nia; embassy hrang hrangah kan in kalpui liam liam hlawm a, fiamthu ten Bagha embassy, Lailapur embassy te kan ti a; kan hlim viau thin.

Kan Burma thiana embassy kal tur erawh hi chuan tuma kalpui a duhloh avangin amahin a kal a; a lo haw leha a thil tawn a sawi chu a nuihzatthlak tawp. Burma embassy tual chu a va thleng ve mai a; security an lo awm avangin man a hlau a; a rawn kir leh daih hi a lo ni a; ani aia house kan chhuahsan hma avangin enganginnge a khawsak tak zel ka hrelo. A ngaihtuahawm ve lehchhawng khawp mai.

Kan chaw ei laiin tumkhat chu ka hringnuna ka thlen san hmel ber hun a thleng, Burma lam mi bawk a ni a; Aizawl lama khawsa a ni tho awm e. Korean chhungkaw hnena awm a ni a; anni an hawn a hun tak si ah chuan awmna tur a hre ta lo. A lo inkhawl im em lemlo nge ni pawisa a nei ta lo. Delhi lama Mizo zirlai ten Aizawl a thlen na tur khawp pawisa an lo pe a; a kalna tur ngaihtuah paha house a cham hi a lo ni a. Chumi chuan hna min han dil tehreng a nih kha. Dorm a riak theuh theuh si kha min lo ngaisang phian zawk nge ni, kan thian pakhat phei chuan nui miah silo hian inti lal hmel tak hian a be kual vel a; nuih insum a har duh kher mai.

Khawpui vel chu kan fang kual a; tum hmasaa ka fan hnu pawh fang leh vekin ka la kal lohna The Dandi March, Red Ford leh Lotus Temple pawh kan tlawh leh bawk. Lum viau mahse a nuam leh viau tho e. Tichuan, kan tih tur tul hrang hrangte kan tihfel hnu chuan dam takin Delhi khawpui chu kan chhuahsan leh ta. A lehpek awm kha ka rin loh nen tun hi ka thleng ta a ni a; ka lawm kher mai.

A tum thumna erawh a lungthu kimna a ni ta bawka; ka luh dan pawh a changkang ta deuh. Thlawhtheihna ngatin, chupawh foreign atang ngat lehnghalin mawle. Keini ang tawnah chuan insawitheihna tham a ni.

Airport kan thleng ta; checking leh thil tul dangte ka tihfel hnu chuan ka thlen in pa tur kan misual thianpa Lamji biak ka tum a; ka be thei ta tlat lo mai. Ka phone (fb) ah a address kimchang chu ka save tho a, mahse, internet ka man thei chuang bawk silo. A tuka thlawk chhuak tur ka ni chauh bawk si. Airport-ah hian tum aia rei cham tum ka ngah hle tawh a; tun tum pawh hian tum aia rei ka cham leh ngei dawnin ka inhre hman. Airport hotel a cheng sang thum vel senga riah ai chuan thutthleng vela mut mai mai a sum save ka duh zawk hman.

Ka beidawn hnuah address ka save na fon chu ka hawng thei hlawl mai. Prepaid taxi ticket lain Lamji te awmna lam chu pan ka tum ta. Mahse, ka taxi kalna tur driver chuan ka kal duhna lampang chu a lo hre hauh lo mai. Taxi pu dangte pawhin ka ticket an en dan dan hnu chuan an lo hre hlawm bawk silo. Refund leh mai tura min rawn anga refund leh tuma ka kal mek lai chuan driver pakhat chuan hriat theih mai a in beisei thuin min rawn ko leh ta.

A hmain Mumbai-ah prepaid taxi ka hman tuma min bum an tum tawh avangin talbuai ka hlau hle. Ka in ngaihtuah vang vang hnuin buai hlau tak chung siin ka in hruai tir ta. Mi zawt chawp zelin ka duhna hmun chu kan thleng ta hlawl mai.

Amaherawhchu, quarter kan thlen hnu pawha Lamji ka la biak theih chuanloh avang chuan bag hnuk hruih hruih chungin ka tei ka tei ringawt mai a. Tlang mi hmel pu pakhat lokal chu helaiah Mizo awm a hriat leh hriatloh ka zawt chawt mai a, a lo hre bik bawk silo. A house no te min zawt a, ka lo hre bik bawk silo, ka awmna hmun hi a diklo a nihte ka ring rum rum hman mai.

Mi kawtkaia ka mutthluk lup lup hnu chuan ka ril a tam deuh avang chuan a hmaa taxi in min drop na bula vai dawrah chuan chhang leh cold drink vel ka va lei a. Ka ti fuh ta. Chulai hmunah chuan Lamji nau chuan min lo chang reng a, a haw leh chiah hi a lo ni a, chu chu fon-in thianpa (misual) kher kher-a a lo lang ta hlawl mai. A hnuah ka thlen in tur Lamji nau chuan min rawn lam ta a nih kha. Ka van lawm tak em!

An inah min hruai lut a, ka insil thlan daih hnu chuan hlim takin kan ti ti a; chaw te eiin a hnuah kan mu zal a; ka chau deuh a ni ngei ang, ka lo muhil a; Lamji hnathawk bang hian min rawn ti harh a, misual lamah kan lo innel tawh bawk a; la inhmu ngailo ni mah ila in chibaiin kan ti ti a, rilru inpawh takin kan inkawm ta a, a hlimawmin zan kan tumtawi a ni ber mai.

Zan khat chauh riaka a tuk zing hma taka chhuak lehnghal mai tur ka nih avangin inkawmna hun kan nei reilo kher mai. Engpawhnise, an unau fel zia, ram pawnah pawh unau hnih chauha an awm chung pawha nitin chhung inkhawm an lo nei zat zat thin tih ka hriat khan an ngaihsanawm ka van ti tehlul em!

Vartianah airport panin ka chhuahsan leh ta a, airport atang chuan Delhi khawpui chu tluang takin ka thlawhchhuahsan ta a ni.

Aw, Delhi, tawn leh ni awm tak ang che maw.