Ama’rawhchu Charity kan hriatthiamdan leh kan kalpui dan hi tlemin a felhlel deuh em aw? tih ka lo ngaihtuah ve mai maia. Sum fai, thawmhnaw, ei leh in adt inpek hi a hlu em ema, a dawngtute mamawh dan a zirin. Mahse case thenkhatah hi chuan sum hlawma inpek tawk tawk ai chuan an thawh tur awm te ngaihtuahsaka, nakin hun zela an intun nunna tur ‘engemaw’ ruahmansak hi a fuh zawk thin ka ring a ni. Thufing pakhat pawhin, sangha inpek ai chuan sangha man dan inzirtir a tha zawk, a tih kha.

Tin, NGO, kohhran leh mimal adt in an tanpui hi a that em em rualin,sawrkar pawh hian tihtur a nei vein ka hria. Tun hnaia Special Report group-a an lo post, naupang rethei tak, nimbu tui zuara a naute pahnih leh a pi, asthma vei chawmtu case angah te khan. Veng chhung mipui leh mi tlawmngaite tanpuina ringawt ring khan an khawsa kumkhua thei dawn lo. Chu ai chuan an unau (mipa naupang pathum) khan pawl sawmpahnih an nih thleng emaw an sikul kalna senso sawrkarin tum sak ta se, a pi kha tar pension emaw te ngaihtuahsak sela. Hetiang mi harsa zualte tan hian a thu hrimin free ration scheme te hi a awm reng reng lo em ni aw Mizoramah hian?

Chuan hriat tur chu, CHARITY pek a tul thin nachhan chu society ah intluktlanlohna a awm vang a ni. Khawtlanga cheng mipuite dinhmun inthlau lutuk vanga charity hi lo awm a ni a, thil pawi leh zahthlak angreng tak a ni. Mi zawng zawng intluktlanna society (egalitarian society) chu thil awm theilo tluk a ni a, ma’rawhchu mi rethei leh hausa inkar hla tial tial hian charity a ti pung tih hria ila a tha awm e. Khuareiah phei chuan mi thatchhia, mahnia inhaikuak aia ‘charity’ ringa nun tum ringawt te hi an la awm lovang tih a sawi theih loh. Ramtuileilo leh rilru lama rualban lo thleng hian mahni kea ding tura intanpui hi kan hnam alo changkan ang zelin kan tih makmawh a ni.

Engpawh nise kan dinhmun en hian ‘charity case’ kan la pung zel dawn chauh niin a langa. Mumal taka kan kalpui a tul a ni. A petu nih a nuama, a dawngtu nih a zahthlak thung. Thenkhat phei chu duhthlan tur an neihloh vanga zak leh kimki chung chunga dawng lo theilo dinhmuna ding te pawh an ni awm e. TV local channel ah te hian an hming, hmel leh address engkim kan tihlan sak thin si a, hrehawm an ti ve ngawt hian ka ring a ni.

Charity kan pe anih pawhin a langsar thei ang bera puangzara, mite fak leh chawimawi phut taka pe lovin rilru leh thinlung taka mi chanhai leh pachhiate tanpui kan duhna zawn atang zawkin pe thin ila; enganga dinhmun hniam pawh lo ni se an zahawmna (dignity) vawnhimsak tlat bawk ila a lawmawm ngawt ang. Chu chu ‘charity’ pek dan tur diktak a ni. In ti  ve lo maw?

Khawlo taka khawsa tawk an awm a…

Nui dun ker ker an awm bawk a…

Inthlim an awm a…

Dam lo awmpuitu lo melhno tawk lah bo lo…

Bombay Mizohican *chheih lam* nen ngata thla lo khawng tawk nen…

Kan la ngai dawn mange… tia’ng ema hun hlimawm hi hmang ho leh thei ang i’maw…?

Miss Aduhi duhthusamin hunserh ah thlalak hmasak te te a ni a. Hemi zawha hian Miss Aduhi’n bawm hawnna a nei a. A zavaia tling khawm chu 31,300 niin member thahnem ngai tak (hming sawi lang kher lo i la) in za bi a kim nan cheng 700 a rawn thawhbelh a, damdawiinah cheng 500 a rawn luh belh bawk a. Tichuan a vai chuan cheng 32,500 (Sing thum sanghnih leh zanga) a tling khawm a ni. Sum tla zingah hian a thirnawi cheng 1200 ngawt a tel bawk a. A ropui hle.

Kal khawmte hian sem dan tur rel nghalin Hospital hmun khat a 2000 den den a mi 16 hnena sem an rawt thlu a (Mi panga in cheng 2100 an dawng). A tawpah Durtlang Presbyterian Hospital rem ti tlangin ZerO leh As_Khiangte motor ah chuanna nei ve lo chuangin a then ke hnih nei nen chawhnu herah Hospital panin inphurh chhoh a ni a. (Hospital luh hma lawk hian kan Admin Sandman a chu a mittui lo tla ru Miss Aduhi’na man nghe nghe )

Hospital thlen hnu hian ward hrang hrang hrang ah lut kualin nurses/sisters lo duty hnenah a ruk a zawtin charity sum thawhkhawm chu hlan in kum dang atang an lo tih thin ang bawkin a rang thei ang ber a kalsawn policy bawhzui a ni. (Awm zui chi a ni lem lo bawk) Report kimchang chu comment lamah chhunzawm ta mai i la. Thlalak ber kha in ngaipawimawh sia…

Bawm hung tura thleng hmasa te

Miss Aduhi’n bawm a hawng e!

Sandman an a lo endik pui vel a ni.

Bunchhuah a ni ta!

Admin pahnihte thahnem ngai lutuk khi!

Tangka thir ropui chu!

Inchhiar siak luai luai mai le!

Hospital kawt ah…

A hnuaia thlalak hi chuan caption a ngaih ka hre lem lo!

Hna an hlen ta e!
Bonus

“Eng pawl nge in nih ve a?”
“Pawl pawh kan ni chiahlo, MISUAL HO kan ni e,”

Kan fiamthu emaw ti a mak ti deuh hehaw a min en hnu ah kan han hrilhfiah a, hrilhfiah zawh hnu chuan an han nui ve leh rih a. A tam zawk kha chuan an hrethiam vak chuanglo tih a lang reng. Misual ho kan ni miau a, kha bak khan han inhrilhfiah vak ngaihna a awm tlat lo, a thiam pawh kan thiam heklo. Mahse an hriatfiah kher kha kan rilru a lian leh kan tum ber a ni lo. An harsatna chhawk zangkhaitu a lo nih tak hlauhin ti a kan sum thawhkhawm te pek kha kan rilru a lian ber chu a ni.

Nu pakhat chu damdawiin khum ah rilru hah takin a lo mu a. Amah ai mah a rilru hah tur zawk an pa chu an khaw lamah pawisa zawng turin a haw mek a ni. Nu ber chu a inthlahrung em em tawh a, natna in a tlakbuak mek bawk si. Chu a natna ai mah a na zawk chu tuar a la nei a ni. Chu a na tuar chu a hmel ah chuan zawh buai ngai lovin chiang takin a lang reng mai.

Krismas dawn a ni a, hmun hrang hrang a awm ten mahni khua ah, chhungkhat te leh thenrual tha te nena Krismas hmang turin an haw khawm mek a. Naupang ten Krismas dawn a nih avangin thawmhnaw thar leh thil thar eng eng emaw an nei a, puitling pawh an bang bik chuanglo. Chutih lai chuan hemi te chhungkua hi chuan an fa te balloon leina tur pawh an nei lova, chu mai a la nilo, doctor ten damdawiin atanga chhuah an phalsak hnu pawhin an mahni inenkawlna senso tur leh damdawiin atanga an in khulhchhuah na tur takngial pawh pawisa an neilo.

Krismas dawn hnai a fa te lawmzawng leina tur chu sawiloh, damlohna in a tlakbuak mek, mahni in khulhchhuahna tur pawh nei tawhlo nih chu a va hrehawm ngai dawn em! An pa chuan an khaw lamah pawisa dap in a hawsan a, a va hmu ang nge hmu lovang tih chu ngaihtuah tham tak a tling a ni.

Chutia rilru hah taka an lo in dawmkun lai chuan ngaiteh, Misual ho pawisa thawhkhawm keng a misual rual lo lut te chuan chu an pawisa ken chu a dawng ve tur niin an ngai hmiah mai. Tichuan duty room ah chuan ko lut in an pawisa mamawh ang zat chiah chu hlan an ni ta. A va ropui em!. “Kan va lawm tak em, Lalpan malsawm che u rawh se,” tih pahin a kut nem tak mai, natna avanga chaklo tak chuan min han chibai a. A biang ah chuan mittui a lo luang ngiai ngiai a, na a tih vanga luang a ni lova, lawm  avanga luang a ni zawk si a. Kan in chibai zawh chuan ka misual thian te chu ka va en a, insual pui ah cho ila “YES” mai thei tur Kawlhawk te lai lai kha a tahbelh zualpui ah an lo tang lehnghal a.

Hei hi chu mi pakhat kan pek chanchin chauh a la ni a. I sum thawh hmang khan mi tam tak an hlim a, lawm avangin an mittui a tla a ni. Misual nih a nuam a, hrehawm ber chu lawm avanga lungchhia hnukulh insum kha a ni. Han tah ve hawm hawm lah kha mahni tawk a pa in ti ve tak ho te khan kan hreh deuh bawk si. Khami ni khan thil tam tak ka zir chhuak a. Mi te tanpui ngai nilova, mi te tanpui thei tu a ka tang thei kha a ropui ka ti a. Mi harsa tak tak te rilru chiang takin ka hmuh pui ve theih phah ta. Lawm nachang ka hriat zual phah a, nun awmzia ka hmuh chian phah bawk.

Sawi tur chu tam mahse duhtawk mai ang aw. Kumin chu Charity sem ka rawn hmanpui ve thei tawh dawn silo che u a. In sem hunah khan min lo hre ve reng a ni ang chu. MISUAL dam reng rawh se.

Khawiah ?

Sana, Computer leh a kaihhnawih zawrhna —
Aizawl Watch House, Dawrpui.

Online-a thawh duh tan hei, Pu maawma msg. ka rawn copy/ paste tawp e. Dik lo leh chiang lo, harsatna a awm chuan comment-na lamah kan inhrilh fiah mai dawn nia… a ti. ~~⇩~~

{{{ Dollar dawnna kha a hman theih rih loh tlat mai, net banking hmang duh chuan Hdfc a/c no. 18142000000999, A/C holder: Aizawl watch house. IFSC code HDFC0001814, chuan… Paypal hmang duh chuan email id: opa@cttc.in }}}

Le… thahnemngai takin kan vela mi lungngai mangang, fahrah, dam lo rethei tak tak te tan liau liau a ni tih hriain theihtawp i chhuah leh ang u hmiang. Nikum khan thawh duh si – remchan lohna eng eng emaw avanga thawh hman ta lo, “Nakumah chuan ka thawh ve thei tawh em ang chu maw…” ti vawng vawng te, a thawhte zingah pawh an sum thawh khawm avanga mi harsa, lungngaia indawm kûn mek te, dam lo inenkawlna tur neih tawh loh vanga rûm mek te bianga — lawmna mittui lo luang an hmuh meuh chuan “Nakumah chuan tun aia tam thawh ka tum ang” ti a, hnuk-ulh teuha intiamte kan awm nawk a nih kha. Kha’ng kan thu sawi/ intiam tak te kha hre thar leh theuh ila, he charity hi a va hlawhtling lehzual dawn em! Kan thian, kan thawh puite hnenah pawh a theih anga zauin sawi darh ila…

Ka lawm e.
Lalpa’n malsawm che’u rawh se.