A ni hmasa zawk hi hun hnihah then a niin chawhma lam hi Inaugural Function a hun hman a ni. Chawhma dar 10:30 a tan tura ruahman a ni na a; khuallian, Pu R.Romawia, Hon’ble Minister, Art & Culture Deptt. Govt. of Mizoram rokhawlhna avanga a rawn thlen tlai deuh avangin chawhma dar 10:54-ah tan a ni.

Pu R.Hmingthanzuala, Director, Art & Culture Deptt. Govt. of Mizoram in kalkhawmte chibai min buk in hun a kaihruai. Chumi hnuah Secretary report Pu S.Lalnunpuia, General Secretary, Mizoram Library Assn. (MLA) hnen atangin ngaihthlak a ni. Report a a lan dan chuan: Mizoram Library Assn. hi Dt. 23rd. October, 1987 (Zirtawpni) ah din a ni a; President hmasa ber chu Pu C.Lianzama, Librarian, Mizoram State Library, tuna Dy. Director, Art & Culture Deptt. (rtd) a ni. Tuna OB nilai te chu:
President : Dr. C.Lawmzuala
Vice President : Pu Lalramliana
Gen. Secretary : Pu S.Lalnunpuia
Asst. Secretary : Dr. Lalbiaksanga Hnamte
Treasurer : Pi Julie Lalthlanthangi
Fin. Secretary : Dr. Lalremsiami te anni a; Executive Comtt. Member hi 14 an awm bawk. (A hnuaia kan tarlan lawmman dawngtu hrang hrangte pawh hi Secretary report a lang vek tho anni)

Chumi hnuah LPS Youth Icon pahnihna R.Lallawmsanga (Amama) chuan thiam takin ‘Lelte nunnem’ tih hla a sa a; kalkhawm te beng a ti tlai hle.

Chumi hnuah Pi Thanhliri, Secretary, Art & Culture Deptt. Khual zahawm ni bawk chu thusawi tura sawm a ni. Thu a sawi hma hian thilpek hlan a ni bawk. Pi Thanhliri chuan kalkhawmte hi kan hun hman mek ti hlawhtling ngei turin min chah a ni. Tin, Library enkawl dan tha: lehkhabu hming, member chhinchhiah lehkhabu hawhtute ziah bakah lehkhabu hawhtu te mai bakah lenglut hrim hrim te chhinchhiahna (Visitor record book) fel taka nei tur leh lehkhabu nilo, bungraw dang eng chi pawh fel taka vawng turin librarian te min sawm bawk.

Dr. Zomuana Joute, Librarian, Govt. Aizawl North Collage leh Dr Rosa Lalthlanmawii, Asst. Librarian, Govt. Aizawl West Collage a thawk mek ten Library & Information Science subject-ah Ph.D (Doctor of Philosophy) an nei thara; heng mite chawimawina thilpek hlan leh anni.

Khuallian hun a lo her chhuak taa; thu a sawi hmain ngaihhruina thilpek hlan leh phawt a ni.Khuallian Pu R.Romawia chuan lehkhabu tha tak Pu Rawna leh Pu Chhuanvawra ten reference atana tangkai tak tur chi an siam chu a fak hle a; a chunga tarlan tak Ph.D thar te chungchang sawiin hna hmuh nan mai hmang loa, an dawn ang ngeia thawk turin a fuih.

Library hlut zia leh amah ngei pawhin a hlut zia uar takin a sawi bawk. Tin, library chu finna dahkhawmna hmunpui a nih thu sawiin “Lehkhabu tha tak tak haichhuak peih apiang mi fing an ni thin.Library neih that hi hnam changkanna kawng khat a ni,” a ti a; lehkhabu atanga miten finna an lo chhekkhawl chu vawnghima hmang tangkai lehzual turin kalkhawm te min chah bawk. Seminar hman tuma in puahchah khawchhak lam unaute kawng dan avanga lokal theilo chungchang sawiin pawi a tih thu a sawi a; kawng dang tute a dem thu a sawi bawk.

Hemi hnu hian library enkawl tha te lawman sem zui ani a; district tina lawmman bakah Aizawl bik hi City area a hrana tih a ni bawk. District wise a lawman an siam chhan chu khawpui lamin lawmman an hui vek dawn nia an ngaih vang a ni. District tinah hian lawman 1-5 na thleng siam a ni a; Aizawl city area bik hi lawman 10 siam a ni thung. Lawmman sem thei tur hian hruaitute hian questionair 485 an thawn chhuak a; heng zingah hian 350 in zawhna hi an chhang a ni. Hetatang hian lawman la thei tur awm an thlang a; heng ho hi a hmunah an tlawh vek bawk a ni. Amaherawhchu, Saiha leh Lawngtlai district atang te hian chhanna lut a tlem avangin lawmman Lawngtlaiah pahnihna thleng leh Saihaah pathumna thleng chauh siam a ni.

Lawmman pakhatna hian certificate leh pawisa fai Rs 7,000/-, pahnihna in certificate leh pawisa fai Rs 5,000/-, pathumna in certificate leh pawisa fai Rs 3,000/- an dawng a; palina leh pangana hian certificate an dawng thung.Aizawl khawpui chhung bikah chuan lawman pakhatna atanga pathumna te hi certificate leh pawisa fai pek anni a; palina atanga sawmna hi certificate pek anni thung.

Lawmman pakhatna theuh dawng tute hi lo tarlang ila:
Aizawl City – Chanmari Branch YMA Library
Aizawl Dist. – Chawngbuaia Memorial Library, Jt. YMA, Saitual
Lunglei Dist. – Bazar veng Branch YMA, Lunglei
Kolasib Dist. – Kawnpui Chhimveng Branch YMA Library
Champhai Dist. – Khawzawl Vengthar Branch YMA Library
Serchhip Dist. – East Lungdar Branch YMA Library
Mamit Dist. – Vangpui Branch YMA Library, Zawlnuam
Saiha Dist. – New Colony Branch YMA Library, Saiha
Lawngtlai Dist. – Vathuampui Branch YMA Library

Tin, category hrang hranga lawman te sem nghal a ni bawk a; hetiang hi lawman latute anni:
1. Higest budget allocation for library – Chhimveng Branch YMA Library, Mamit ( Anni hian cheng nuai chuang budget-ah hian an dah a ni.)
2. Highest total collection of book – Chanmari Branch YMA Library, Aizawl ( Anni hian lehkhabu 9624 lai an nei a ni.)
3. Highest total average collection og books – Mauchar Branch YMA Library (2013-15 chhungin lekhabu 867 zet an nei a ni.)
4. Highest total new collection of books – Chawngbuaia Memorial Library, Jt. YMA, Saitual ( Anni hian 2013-15 chhungin lehkhabu 1292 lai an lei thar a ni.)
5. Highest total donation of books – MJA Public Library, Aizawl ( Anni hian kum 2013-15 chhungin lehkhabu 867 lai an dawng a ni.)
6. Highest total library book repair/binding of library books – Chaltlang Branch YMA Library, Aizawl ( Anni hian lehkhabu 3433 lai an siam tha a ni.)
7. Highest number of books issued – Chanmari Branch YMA Library, Aizawl ( Kum hnih chhungin lehkhabu hawhtu mi 7549 lai an awm a ni.)
8. Highest number of library visitors – Rebublic Vengthlang Branch YMA Library, Aizawl (Kum hnih chhungin tlawhtumi 2645 lai an awm.)
9. Highest Number of adult enrolment as library members – Chaltlang North Branch YMA Library, Aizawl ( Puitling member mi 1336 lai an awm.)
10. Highest Number of children enrolment as library members – Khawzawl Vengthar Branch YMA Library (Naupang member mi sang bawr vel an awm.)

Mizoram pum huap atan hetiang hi result a ni:

1. Chanmari Branch YMA Library, Aizawl
2. Chaltlang Branch YMA Library, Aizawl
3. Bethlehem Vengthlang Branch YMA Library, Aizawl
Result puan zawhah hun hman meka zirtur leh Secretary report kimchang chuanna booklet sem a ni a; he booklet kawmah hian khawvela library lian ber US Library of Congress thlalak a lang kulh mai a; a mawi hle. He booklet an sem hi library-a dah tura tih a ni a; a chhiar ve duh chuan mahni library theuha ngaihven mai chi a nih hmel.

Zaithiam Amama’n ‘Rose par rimtui’ tih hla a sa leh a; a hma ang bawkin a zai tha leh hle. Amaherawhchu, booklet thlir kan tam deuh a nih hmel, boruak a dai duk mai!

Vice President Pu Lalramliana’n lawmthu a sawi zawhah kan chhun chawl. Chhun chawah hian thingpui leh chhang tuihnai tak kan ei a; kan tlai tlang viauin a lang.

Chawhnu hi dar 1:35-ah tan leh a ni a; Pi Carol VLMS Dawngkimi, Exe. Comtt. member, MLA & Jt. Director A & C in min kaihruai. Chairman hian, mi inang lo tak tak kan ni chungin thahnem kan ngaih chuan degree nei ho aia kan nep chuan loh tur thu in min fuih hmasa.

Chawhnua paper present tu hi Dr. Lallaisangzuali BA, MLISc., Ph.D, Exwe Comtt.member, MLA, Asst. Librarian (Sr. Grade), Central Library, Mizoram University a ni. Thupui chu ‘Role of public library in Mizoram : Issues & Chalenges’ tih a ni. A ni hian thuhmaah Mizo tawng ziah dan diklo awm chungchangah hriatthiamna min ngen a; a ngen ang erawh chuan ziah dikloh a vang hle thung.

A ni hian kan library enkawl mek te tan eng hmasawnna nge kan chhar chhuah ang tiin rilrua inelna thianghlim leh tha pu vek turin min sawm. Tun dinhmunah Mizoramin public library kan neih dan a tarlang a; hetiang hi kan dinhmun a ni:
1. State Central Library, Aizawl -1
2. District Library (Aizawl, Lunglei, Champhai, Kolasib leh Siaha) – 5
3. Govt. Recognised Rural Library – 485 te a ni.

“Mipui vantlang tana bengvarna min petu a ni a; ngaihpawimawh hi kan tih makmawh a ni. Lehkhabu chhiar tur mai bakah building tha leh panna awlsam te a pawimawh hle.” tiin mi anglo (kal theilo) te tan whellchair a kal theih tura ruahman a tul thu a sawi bawk.

Lehkhabu leh thildang kan lakkhawm te hi library ti hausa tu leh a din chhan pawimawh tak a nih avangin state library pek a innghat mai lo a neih belh dan ngaihtuah ve turin min sawm.

USA president ni tawh ten ‘Presidential Library’ an neih vek thu sawiin lehkha chhiar uar deuh deuh turin min ngen a; tunlaia changkanna (IT lama hmasawnna) nasa tak avanga lehkha chhiar hlamchhiah mai lo turin min sawm bawk.

Thu ziaktu lar Sir Richard Steele tawngkam ‘Insawizawihi taksa in a mamawh ang bawkin lehkha chhiar hi rilru thlitfim nan a pawimawh’ thu a sawi bawk.

A thusawi zawhah hian sawiho tur pali a dah a; he hunah hian Hortoki Vengthar, Hmuifang, Khuangphah, Chaltlang, Khawbung, Ramhlun Sport Complex ami leh Tanhril Branch atang tein pakhat theuh an ding a; lehkhabu chhiar tur an induhthawh thu te, Pathian Thu tam hle ringawt mai a fuh tawk loh thu leh mahni duhzawng neih a chakawm thu bakah naupang lam lehkhabu an duhthawh thute an sawi hlawm a; building-ah duh anga tha an neihloh thu te sawiin an harsatna te an sawi hlawm.

Tichuan, a ni khatna chu chawhnu dar 3:45-ah kan tin.

A ni hnihna hi hun thuma then a niin traning nana hun hman a ni. A hun hmasa ber hi dar 10:04-ah tan a ni a; he huna chairman Pu Thankima, Exe. Comtt. Member, MLA & Librarian, Aizawl Theological Collage chuan traning a kalte hi State Library leh library dang te tlawha mamawhte sawi hreh lo turin min sawm a; a thlamuan thlak hle.

Thupui thenkhatnaah hian ‘Accessioning of library books’ tih thupui chu Dr Lalthanmawii Sailo, Exe. Comtt. Member, MLA & Senior Asst. Librarian, Pachhunga University Collage in min zirtir.

He hunah hian Pi Thanmawii chuan library nihphung sawiin ‘Library hi lehkhabu dahkhawmna tih ni mah se, lehkhabu dahkhawm ringawt hi library a ni chuanglo,’ a ti.

Thil hrang hrang zir a ni a; seal chhut dan leh register vawn dan a sawi te chu zawm theih a duhawm hle.
A tlangkawmnan tuna kan zirlai hi hemi chungchang librarian-ten thiam tawklo deuha min ngaih avanga buatsaih a nih thu a sawi tel bawk.

Hun renchem thuah kalkhawmte hi chhuak chuanglo in hun hnihna hman leh nghal a ni a; he hun hi Pu F.Lalenga, Exe. Comtt. Member, MLA & Librarian, Women Politecnich in min kaihruai a ni. Kan tan hma deuh hret bawk a; session-ah a local lo bawk nen, a rawn tlai dawn emaw tih hnuah a rawn thleng a; hun a vawng dik char char hle.

‘Classification of books’ tih chu Pi Lalhriatpuii, Exe. Comtt. Member, MLA & Librarian, Law & Judicial, govt. of Mizoram chuan thiam takin min zirtir.

He hunah hian presentation screen a chian loh avangin a hma anga boruak muk lutuk ang kha a nilo hle mai a; resource person a’n uang zeuh nen a hlimawm dangdai hle! Tin, a zia hi a danglam hle mai a, paper en lo a amah en tlat turin min ngen thung. ‘Economics chu uikawm zirna’ tia a sawifiah mai chu mipuiin dik kan ti hle in a lang.
He hunah hian lehkhabu thliarhran dan chi hrang hrang te kan zir a; a hlawkthlak hle. A sawi mai chuan chianglo kan awm nual mai a; hall hnuaia Chanmari YMA library kan lut chuan a ti fiah hle in a hriat.

Hemi hnu hian kum 2017 & ’18 hruaitu turte RO, Pu K.Lalruala, Dy. Director leh Chanmary Branch YMA hruaitute kaihhruaina hnuaiah kan thlang a; nomination 22 an awm a; heng ho hi kan hriatchian lehzual nan stage hmaah dintlar tir anni. Mi paruk thlan chhuah anni a; heng mite hi kan thlang tling: (vote tla hi 332 a ni a; (Amherawhchu, inthlan kalhmang tih than loh dan a nih vang nge vote thi a awm nual thung!)
Dr C.Lawmzuala
Pi Julie Lalthlanthangi
Pu Dr. Lalbiaksanga Hnamte
Pu Lalramliana
Nl Dr. Lalremsiami (Central KTP hruaitu hlui kha) leh
Pu S.Lalnunpuia te. Anni hian post tur an lo insiam rem mai dawn a ni.

Inthlan zawhah hian kan chhun chawl a; chhunchawah hian thingpui bakah chow leh fried rice duh zawk zawk thlan theihin kan ei tlang leh a, nimin lam a mi ai mahin tui kan ti tlang in a lang.

Hun hnmuhnung ber hi Pi M.Lalthantluangi, Exe. Comtt. Member, MLA & Librarian, RIPANS a ni a; resource person hi Pu V.Vanlalzawma, Exe. Comtt. Member, MLA & Asst. Librarian, NIT a nia; thupui chu Library management and maintenance tih a ni.

He hunah hian lehkhabu ni chiah lo hemi ina a mamawh bungrua leh hmanraw dangte ziah fel dan te, lehkhabu hawhchhuah dan chhinchhiah dan te, member list ziah fel dan te, member card siam dan te, sub-comtt. din ngei a tul thu te, budget siam ngei a tul thu te, thil dang atana hman pawlh a fuh tawk loh dan te hi a pawimawh leh kan zawm mai theih thil chu a nih hmel.

Paper present tu in hun a hman zawhah sawihona hun hawn a ni a; mi engemawzatin zawhna leh an thil tawn hrang hrang te an sawi a; a bengvarthlak hle. (Sawihona hi hun hmasa lama paper zirhonaah hian a awm vek a ni.)

Hemi hnu hian Dr. Lalremsiami’n thahnemngaih thuah Sialsir Branch YMA in library an enkawl dan tha a tih thu a sawi a; chairman in Founder President Pu C.Lianzama a duhzawng thu sawi turin a sawm a; a lunglen thu leh tun thlenga he pawl a din avanga a lawmthu te a sawi.

Hemi hnu hian kan seminar & traning chu kan zo ta a ni. Banah hian kalkhawm ten mahni awmna branch hlat dan azirin DA kan dawng vek bawk a ni. Hei erawh a lawmawm viau rualin thingtlang lam branch thenkhat chuan an information dawn nen a inang lo deuh nge ni? an lungawi loh thu sawi hriat tur a awm zeuh zeuh thung.

2nd. Thursday: Kolasib Venglaia Taitesena Hall-ah Horticulture Exhibition cum Fair buatsaih a ni a, parliamentary secretary K.Lalrinthanga’n a hawng. K.Lalrinthanga chuan, ram dang aṭanga thei lak luhte Mizorama a to zawk chuang lo chu ngaihtuah chian a ngaih thu sawiin, “Anni chuan tihtakzetin thawn chhuah tham an buaipui avangin man man zawkin an hralh thei a, an taimakna leh an tumruhna kan entawna kan zir a ngai a ni,” a ti. Exhibition-ah hian stall 13 a awm a, thlai chi hrang hrang pho chhuah a ni.

3rd. Friday: Nalanda Institute of Advance Studies (NIAS), Mizoram Building & Other Construction Wor¬kers Welfare Board (MBOCWWB) leh Mizo¬ram Youth Commi¬ssion (MYC) ten inremna an ziah-naa hming ziaktu MYC-a under secreatry Lalsawmzuala chu suspend a ni. NIAS, Kolkata nena MoU ziah leh an zirna-ina Mizo zirlai 32 tirh thlak chungchangah hian Mizoram sorkar chuan MoU-a hming ziaktu Rotluanga, MCS, LEIT Director hlui chu a lo suspend tawh bawk.

4th. Saturday: Captain NM Gupta Trophy vawi 31-naah Mizoramin Army Green chu Lalfakzuala goal hmanga 1-0 a hnehin an champion. Lalsangzuala Hmar hote hian nomawi leh cheng nuai nga an dawng a, final-a goal awmchhun khungtu Lalfakzuala chu hero of the match-ah thlan a ni. Captain NM Gupta Football hi inelna upa tawh tak a ni. Silchar DSA-in an buatsaih ṭhin a, India hmarchhak state club an tel tlangpui.

5th. Sunday: Synod Mission Board-in Electric Veng Kohhran biak-inah missionary tirh chhuah inkhawm an buatsaih a, Synod moderator Rev. Lalzuithanga’n missionary-a chhuak thar tur mi 50-te Pa¬thian hnenah hlânin a tír chhuak.

6th. Monday: Mizoram hmun hrang hrangah lirtheia himna chawlhkar, Road Safety Week hman ṭan a ni a, Aizawla IPR Auditorium-ah hawn a ni. A hawnna inkhawm hi Transport minister John Rotluangliana leh Health minister Lal Thanzara ten an hmanpui. Road Safety Week vawi 28-na pual Aizawlah two wheeler rally neih a ni a, two wheeler 100 vel an tel.

7th. Tuesday: Champhai RD Block huam chhunga village council-te tan Champhaia IPR auditorium-ah ni thum awh tur Village Development Plan zirhona ṭan a ni.

8th. Wednesday: Mizoram Fish Festival hmasa ber chu Chief Minister Pu Lal Thanhawla chuan Vanapa Hall-ah a hawng. He hunah hian Pu R. Lalzirliana, Minister Home, Agriculture, etc leh NLUP Nodal Minister ni bawk chu khualzahawm a ni a. Fisheries Minister Dr. B.D Chakma, Deputy Chief Whip Pu R.L. Pianmawia, Parliamentary Secretary Pu Hmingdailova Khiangte leh Parliamentary Secretary Lt. Col (Rtd.) ZS. Zuala te an tel bawk a. Fish Festival hi National Fisheries Development Board (NFDB) buatsaih niin ni thum chhhung a awh dawn a ni. Thupui ah “Fish for All” tih thlan a ni. He festival hian a tum ber chu mipuite hnenah sangha hi chaw tha leh hlu a nih zia tarlan a, tunkai thiamna hrang hrang hmanga hlawk zawka sangha tharchhuah dan te vantlang hmelhriat tura chhawpchhuah te leh, sangha tharlam ei tam leh sangha ei tur chi hrang hrang siamte leh a siam dan vantlang hmelhriat tura chhawphchhuah leh vawrh lar a ni.

9th. Thursday: Mizo zinga M.Th zo hmasa ber, Mizoram Presbyterian Kohhrana pastor hriat hlawh, Pastor a nih piah lamah vantlang tana a hnathawh hrang hrangte avanga India rama civil mite chawimawina sang, Padma Shri hial dawng pha, Rev.Dr Lalsawma (87) s/o Rev. Langlura chu Aizawl Hospital-ah a thi a; a nupui Lalnuntluangi leh a fapa pali leh fanu pahnih a kalsan.

10th. Friday: Ar vulhtute’n hlawk zawka ar an vulh theihna atana ruahman, Integrated Management System (Kelkang Model) for Poultry for 3rd & 4th Phase NLUP chu chief minister Lal Thanhawla’n Serchhip DC conference hall-ah a tlangzarh. Integrated Management System (Kelkang Model) for Poultry-ah hian ar vulhtute chu vawi leh khatah an ar note dawn tur pe vek loin vawi thum pek an ni dawn a ni.

11th. Saturday: Model Veng Branch KṬP chuan Synod Hospital tan thisen unit 33 an pe a, a petute mipa 32 leh hmeichhia pakhat an ni.

12th. Sunday: Presbyterian Kohhran Hmeichhiaten February 10, 2017 zan aṭanga Pastor bial Inkhawmpui an hman chu a tiak.

13th. Monday: PRISM president Vanlalruata leh general secretary RL Liantluanga te chu PRISM office, Upper Republic-ah police-te’n an man a, bail-a chhuah leh nghal anni.Man an tawh chhan hi Kau Tlabung case chungchanga court thuchhuah an zawm loh vang a ni.

14th. Tuesday: Association for Voluntary Blood Donation (AVBD) chuan Mizoram hmun hrang hrangah Mizoram State AIDS Control Society (MSACS) nen ṭanghoin Valentine’s Day pualin thisen pek rûnpui an buatsaih a; thisen unit 987 pek a ni.Valentine’s Day puala thisen pek rûnpui buatsaih hi kum 2010-ah tih ṭan a ni a, a tirah chuan mimal leh ACH Blood Bank-in an buaipui. Kum 2011 aṭangin AVBD bultuma tih ṭan a ni a, ACH Blood Bank leh Synod Hospital tan thisen pek ṭhin a ni. Kum 2014 aṭangin district dangahte pawh tih ṭan a ni ta zel a ni.

15th. Wednesday: Mizoram sorkara minister of state Lalrinmawia Ralte leh Mizoram Youth Commission (MYC) chairman T.Sangkunga te chuan , NIAS, Kolkata-a zirlai tirh chungchangah chief minister Lal Thanhawla hnenah minister aṭang leh MYC chairman aṭanga bânna an thehlut.

16th. Thursday: KṬP Day a ni a, he ni pual hian hmun hrang hranga KṬP branch-te’n hun an hmang. KṬP Day hi branch ṭhenkhat chuan vantlang tana thil ṭha tihna hun atan an hmang a, branch eng emaw zat chu khawlai tifaiin an hnatlang a, biak in leh a chhehvel tifaia hnatlangte pawh an awm.

17th. Friday: Mizoramah political party thar, Zoram Reformation Front (ZRF) chu Kulikawnah din a ni. Hruaitu lailawk turte hetiang hian an ruat nghal. President chu Vanlalngaia a ni a, working president chu Rorelliana a ni. Vice president chu F.Hmingthanga leh JF Rothangliana te an ni a, treasurer chu F.Lalrintluangi a ni. General secretary pathum an awm bawk.

18th. Saturday: Lunglei College Venga Penticostal Youth Department chuan, Lunglei Civil Hospital tan thisen unit 13 an pe a, a petute mipa 10 leh hmeichhia pathum an ni.

19th. Sunday: Bonny Lalrindika h/o Lalrunmawii, Ramhlun Vengthar chu CMC, Vellore-ah cancer avangin a thi. Bonny Lalrindika hi Mizoram Synod office-ah Assistant co-ordinator a ni a, Presbyterian kohhran upa niin Pathian thuhriltu sawm hlawh tak a ni a; sports journalist ni bawkin hun rei tak The Aizawl Post chanchinbuah infiamna chanchinthar a ziak ṭhin.

20th. Monday: Mizoram Youth Commission (MYC) chairman T.Sangkunga’n MYC Chairman nihna aṭanga banna a thehluh chu chief minister Lal Thanhawla’n a pawm sak.NIAS, Kolkata-a zirlai tirh leh thil dang avangin Lalrinmawia Ralte leh T.Sangkunga hian minister of state leh MYC Chairman an nihna aṭanga banna chu February 15 khan Chief Minister hnenah an thehlut a ni.

21st. Tuesday: Lalrinmawia Ralte-in Minister of State aṭanga bânna a thehluh chu chief minister Lal Thanhawla’n a pawmsak. “A bànna rawn thehluh kha pawmsak loh chi a ni lo, a zahawm hle a ni. Felfai taka chhui a nih theihna atan a báng a, a bân loh chuan chhui an nihin puhmawhna a awm dawn a, a tih âwm rêng a ti a ni,” tiin CM hian chanchinbu mite hmaah a sawi.

22nd. Wednesday: MLA Vanlalawmpuii Chawngthu chuan a bial chhunga East Lungdara BRC Hall leh Keiṭum V/C House-ah puantah training-te hnenah puantah khâwl leh ṭanpuina sum a sem. Ṭanpuina hi East Lungdar, North Vanlaiphai, Bâwktlang, Lungkawlh, Bungtlang leh Keiṭum khuaa mi 70 hnenah sem a ni.

23rd. Thursday: Undivided Zemabawk Joint NGO Committee chuan,Ṭhuampui leh Tuirial inkar NH-54 kawng¬pui chhia avanga lungawi loh lantir nan zing dar 7 atangin kawng an dang a; mipui thlawp a hlawh hle. Sorkar lamin aw an neih mail oh vang erawh chuan kawngpui dan hi chhunzawm zel an tum.

24th. Friday: Nihnih awh Mizoram puma YMA library enkawltute tana Chanmari YMA hall-a 11th. State Level Library Seminar & Traning for Rural Libraries neih chu a tiak ta. He hunah hian khuallian chu Pu R.Romawia, Hon’ble Minister, Art & Culture Deptt. Govt. of Mizoram a ni a; mi hrang hrang hnen atangin paper present a awm bawk. Library tha thlan result puan nghal a ni a; Aizawl City area bakah Aizawl telin district tina ti thate thlan annih bakah rampum huapa ti tha result puan nghal a ni bawk a; hetah hian Chanmari branch YMA thlan anni. Hruaitu thar atan heng mite hi thlan nghal anni: Dr C.Lawmzuala, Pi Julie Lalthlanthangi, Pu Dr. Lalbiaksanga Hnamte, Pu Lalramliana, Nl Dr. Lalremsiami leh, Pu S.Lalnunpuia te.

25th. Saturday: Lunglei West bialtu MLA Chalrosanga Ralte chuan Buarpui tui lâkna tur leh NABARD sum hmanga Ṭhuampui-Sertlangpui kawng siam tur a enfiah.

26th. Sunday: Synod Executive Secretary Rev. B.Sangthanga chuan Sihphir Venglai Presbyterian English School (PES) a tlawh a; chawhnu kohhran inkhawmah “Say YES to Jesus, say NO to evil” tih thupui a hmangin Pathian thu a sawi. PES zirlai naupang ten thiam takin Pathian fakna hla an rem bawk. Presbyterian English School (PES) hi kum 1992 atang khan kalpui tan a ni a; tunah hian 129 zet a awm tawh a ni.

27th. Monday: Aizawl Adventist Hospital-a naupang ward (paediatrics ward) siam thar chu Health minister Lal Thanzara’n a hawng. Lal Thanzara chuan, naupangte hriselnain nghawng thui tak a nei a, chhungkua, khawtlang leh state economy din¬hmun thlengin a khawih tih sawiin, “Ram changkang tehna pakhat chu Infant Mortality Rate (IMR) hniam a ni a, kum 2016 chhung khan nausen pianghlim 84 leh nau hringtu nu panga Aizawl Civil Hospital-ah thi an awm. IMR tihniam tur hian ṭan lak a ngai,” a ti. Aizawl Adventist Hospital-ah hian khum 50 awmin, Intensive Care Unit (ICU) leh Neonatal Intensive Care Unit (NICU) changtlung tak a awm a; naupang dahna tur bik ward thar hi Rs. 8,70,000 senga sak a ni.

28th. Tuesday: Mizoram CSS Hindi Teachers Asso¬ciation (MCHTA)-in sorkara thil phût an neih chungchangah Mizoram sorkar leh MCHTA-te’n inremna an siam a; inremna an siam hnuah MCHTA-te’n sorkar kar nana February 27 tlai aṭanga chaw an nghei chu an titawp nghal. MCHTA ho hian hemi hma hian kawng hrang hrangin lungawilohn hi an lo lantir fo tawh a ni.

2nd. Monday: Nimin kha kumthar ni ni mah se, Pathianni a nih avangin kohhran tam zawkin kumthar lawman ruai vawiin lam hian an theh hlawm.

3rd. Tuesday: Kumin atana sorkar pisa hawn ni hmasa ber a ni a, amaherawhchu, office-te hawn ni mah se, pisa kai an tam lo. Aizawl khawpui pawh ṭum dang aiin a la reh hle a, lirthei leh mihring vei vak an tlem bakah, dawr inhawng lo eng emaw zat a la awm a ni.

4th. Wednesday: Mizoram Upa Pawl (MUP)-in an General Headquarters building-a Diamond Jubilee Mo¬nument an siam chu Social Welfare minister PC Lalthanliana’n a hawng. Social Welfare Minis¬ter chuan, MUP chu pawl zahawm tak a ni tih sawiin, “Thil ṭha lam sawi kan uar a, a ṭha zawnga khawtlang nun kai¬hruai turin MUP-te an pawimawh a ni,” a ti a; MUP chu Mizo fate thla¬muanna a nih thu a sawi. MUP hi January 4, 1957 ah a ding ṭan a, tunah hian area 81 leh unit 603 ah member 60,000 an awm mek a ni.

5th. Thursday: All India GV Mavlankar Shooting Championship handicap category-a gold medal latu Kapṭhianga chu stroke vangin a thi. Kum 42-a upa Kapṭhianga hi sipai niin kum 2001-a a rawn haw lam chu motor chesual vangin a kawng hnuai lam a zeng a, hemi hnu hian All India GV Mavlankar Shooting Championship-a pakhatna a nih bakah All India KSS Shooting Championship leh National Shooting Championship handicap category-ah silver pathum leh bronze pakhat a la tawh a ni..

6th. Friday: Kolasib District Wildlife Crime Control hnuaia sub-unit ten an man, sanghal sa rêp chu an manna hmun, Thingdawl Hmarveng Bazarah YMA Sub-Headquarters, Kolasib president C.Liankunga’n a hâl ral.

7th. Saturday: I- League, kum 2017 session tanni a ni a; Mizoramin club kan neih chhun Aizawl FC pawhin khelin Barasat Stadium, Kolkata-ah mual neitu East Bengal nen inkhelin 1-1 in an inhneh tawk.

8th. Sunday: National Sub Junior Football Championships North East Zone qualifying khelh mekah Mizoram Sub Junior team chuan Manipur 2-1 in an hneh. Bokakhat Stadium-a inkhelah first half-ah goal a lut lo a, second half-ah Manipur hian penalty aṭangin goal khung hmasa mah se Mizoram hian Lalrokima (68′) leh Lalnunsanga (77′) te goal hmanga chhangletin hnehna an chang. Mizoram hian Arunachal Pradesh an hmachhawn leh dawn a, hnehna an chang a nih chuan final round khel turin an tling ang.

9th. Monday: Isua Krista Kohhran Ṭhalai din champha ṭum 41-na a ni a, Mizoram puma IKK ṭhalaiten vantlang tana thil tha tih nan an hmang a; Central Ṭhalai thuchhuak angin Social Work Day atan hman a ni.

10th. Tuesday: Guwahati aṭanga Mualkhang Gas Bottling Plant pana tlan gas phur bullet MZ-05 – 6589 chu Pualhrang lui lei zawh thelhin lei hnuaiah a tla thla a, bullet khalhtu Kajal Das (27) Silchar chetsualna hmunah a thi.

11th. Wednesday: Mizorama missionary hmasa pahnih – Rev. JH Lorraine (Pu Buanga) leh Rev. FW Savidge (Sap Upa) ten Mizoram leilung an rah ní, Missionary Day a ni a, Baptist Church of Mizoram kohhran hrang hrangte’n an lawm. Missionary Day-ah hian BCM kohhran hrang hrangte chu chhun leh zanah inkhawmin, Pathian thuchah an ngaithla a; tlaiah Missionary Day lawmna ruai an ṭheh hlawm a ni.Sap Upa leh Pu Buanga te hian January 11, 1894-ah Sairang thlanga Changsil kai an rawn thleng a ni.

12th. Thursday: Transport secretary Dr Franklin Laltinkhuma chuan notification tichhuakin, two wheeler khalhtu leh an mi phurhte’n lukhum (helmet) an khum ngei tur a nih thu a puang.

13th. Friday: UDPA minister Zo¬dintluanga hoin a pisaah sorkar official leh company hotute’n meeting chhâwng an nei a; hmasawnna hna thawhna tur project pa¬hnih an sawiho. Meeting hmasa zawkah Aizawl khawpui chhunga streetlight chhit mek leh thawm ṭhat loh 5,741 chu kawlphetha renchem zawka chhit theih LED light hmanga thlak vek dan tur sawiho a niin meeting chhawng hnihnaah hian Aizawl khawpui leh Mizoram hmun hrang hranga sarâng (plastic) lam thil chhia ni khat chhunga ton 20 chuang fê tling khawm hman ṭhin, tuialhthei siam chhuahna atana hman dan tur sawiho a ni thung.

14th. Saturday: Ramthar Veng Bial KṬP-ten Synod Hospital tan thisen unit 46 an pe a, a petute mipa 41 leh hmeichhia 5 an ni.

15th. Sunday: Baptist Church of Mizoram chuan NCCI Pathianni an hmang a, tualchhung kohhran tinah chawhma inkhawmah hun hmangin, thupui chu ‘Inpumkhatna’ tih a ni. BCM hian kum 2007-ah NCCI an zawm a, chumi hnuah NCCI Committee member an nih ve ṭhin avangin kum 2016-a BCM Assembly chuan NCCI Pathianni hman an rêl a, tun tum hi an hmanna hmasa ber a ni.

16th. Monday: Kolasib-a CZ Higher Secondary School leh Diakkawn High School-ah Systematic Voters & Electoral Participation chungchang¬ah ‘Empowering Young and Future Voters’ tih thupui hmangin zirlaite chu inthlan chungchang leh vote neih hlutna leh vote thlak a pawimawhzia zirtir an ni.

17th. Tuesday: NH-54, Phunchawng leh Sairang inkarah 709 truck chesualin, kawng thlangah a lum a, a khalhtu R.Zamawia (45) leh handyman Lalremthanga (19), Govt.Complex veng ve ve chu a hmunah an thi. Truck hi RTP Enterprise ta a ni a, Mamita bungrua an dah zo, Aizawl pana an lêt leh lam niin, driver leh handyman chiah an chuang a ni.

18th. Wednesday: Kolasib leh Aizawl inkara tlân maxicab, RT chu Sakawrhmuituai leh Lungdai inkarah chesualin kawng thlangah thui tak a lum a; a khalhtu Lalchhandama, Kolasib Salem Veng a hmunah thiin, mi dang hliam an awm nual. Maxi cab hi K.Lalrinliana (MLA hlui), Kolasib ta a ni a, a chetsual lai hian mi pakua an chuang a ni. Thi leh hliam te hi Sihphir khawtlangin buaipuiin driver thi hi kuang an siam sak bawk.

19th. Thursday: Aizawl Civil Hospital (ACH) a Designated Micropic Center (DMC) chu Rogi Kalyan Samiti (RKS) Governing body chairman Kannan Gopinathan, Aizawl DC in a hawng. He hun hi ACH Doctors’ Seminar room-ah neih a ni a; ACH Medical Superetendent Dr. KL Remsanga’n a kaihruai.

20th. Friday: State Bank of India, Siaha branch chuan corporate social resposbibilities atangin Siaha District Hostital a hman turin strechter (inzawnna) leh whell chair pali ve ve an pe. Thilpek inhlanna hun hi Siaha DC Coference hall-ah neih a ni a; DC Harleen Kaur-i’n a hmanpui.

21st. Saturday: Mt. Carmel School, Chaltlang chu bungraw chuh hman lohin a kang a; sikul kang ral hlut chhawng hi cheng nuai 35/- vel niin chhut a ni. Hemi chungchangah hian Bawngkawn PS-ah FIR thehluh a ni.

22nd. Sunday: Kristian Thalai Pawl (KTP) pastor bial hrang hrang te inkhawmpui Zirtawpni zana tan chu a tiak. Tunah hian Mizoram pumah pastor bial 197 awmin KTP branch 837 a awm a; member 2,33,896 (mipa 1,43,657 leh hmeichhia 90,239) an awm mek a ni.

23rd. Monday: Zirna in lem (fake institution) nia hriat, Nalanda Institute of Advance Studies (NIAS), Kolkata-a Mizo zirlai 32 tirh chungchangah ZNP ṭhalai te chuan zirlaite, an hma lam hun tihchhiat nia ngaiin MYC pisaah thil sawipui tumin an kal a; mahse, MYC Chairman leh officer-te an lo awm loh avangin an dinna ngai, MYC chairman T.Sangkunga chu báng turin an la phût reng tih lantir nan MYC Chairman pisa kawngkhar chu an kalhsak a; police-te’n an hawng leh nghal.

24th. Tuesday: Champhaia Excise & Narcotics department enforcement-te chuan Champhai Zotlangah heroin gram 102 (hawng 6) leh a neitua puh Hlunkhawkhai (40) s/o Thawngngam (L), Khampat, Myanmar leh Lalhruaithanga s/o Hranghleia, Lianhna, Myanmar nia inchhálte an man. Heroin neitute hi NDPS Act tlawhchhanin thubuai siamsak an ni.

25th. Wednesday: August 10, 2013 zana Zohmangaihi (49) d/o Ramfangzauva thattua puh, a pasal Lalremruata Ralte (39) s/o Lalchunglura, Zarkawt chu Aizawl District Court-a inlan tura tih a nih avangin MHIP general headquarters hruaitute leh Zarkawt Branch MHIP member-te Court tualah an kalkhawm. MHIP gen.hqrs. president Lalthlamuani’n a sawi danin Lalremruata Ralte hian bail a dil a, Lalremruata chu bail-a chhuahtir an duh lohzia lantir nan Court tualah an kalkhawm a ni.

26th. Thursday: India ram pumah Republic Day vawi 68-na lawm a ni a, Mizoramah pawh hmun hrang hrangah lawm a ni. Aizawlah chuan Lammualah hman a ni a, Governor Lt.Gen. Nirbhay Sharma-a’n hnam puanzar pawt pharhin, parade contingent-te’n hnam puanzar chibai an bûk a chháng lêt. Governor chuan, India ram mipuite duhthusam – mahnia rorel thei, mipui tana thawk, hnam leh sakhuanaa inthliarna awm lohna leh mipuite kuta thuneihna, ram neih theihna tura India danpui duang chhuaktute zah a, hre reng turin mipui a chah.

27th. Friday: New Delhi-a cham mek School Education department enkawltu minister H.Rohluna leh parliamentary secretary Joseph Lalhimpuia te chuan Sorkar laipuia Ministry of Human Resource Development (MHRD) hotu te chu Mizoram SSA-a thawkte’n kum 2016-17 hun rei tak hlawh an lak theih tawh loh thu hrilhin, hotute chuan cheng nuai 7,228/- sanction order an lo pe chhuak.

28th. Saturday: Central YMA-in Mission Veng YMA North Branch hnena Mission Veng Branch YMA tih hming a puttir duh lohzia lantir nan, Mission Veng YMA South Branch chuan an huam chhunga Mission Veng Bazar leh in hrang hrangah puan dum an zár. Mission Veng YMA South Branch thuchhuah chuan, Central YMA thutlukna chu Mission Veng chhung boruak tichhe thei a ni tih sawiin, thutlukna sût leh tura an ngenna CYMA-in a tihlawhtling lo chu pawi an tih thu leh an lungawi loh tak zet thu an tarlang a, “Mission Vengah YMA branch pahnih kan awm avang hian veng mipuiah lungawi lohna leh inenhranna a awm ngai lo. Mission Veng kan ni vek tih hi kan rilru a ni. North Branch lamin Mission Veng hming pumbilh bik an tumna hi engtikah mah kan rem ti ngai lo ang,” an ti.

29th. Sunday: Isua Krista Kohhran (IKK) hmeichhiaten hmun hrang hranga pastor bial inkhawmpui January 27-a an hman tan chu a tiak.IKK-ah hian Mizoram pumah pastor bial 14 a awm mek a ni.

30th. Monday: World Leprosy Day Aizawlah hman a ni a; he hun hi Synod Conference Centre-ah pawh hman ve a ni a; Health minister Lal Thanzara’n a hmanpui. Inkhawmah hian Mizoramah phâr vei enkawl lai mi 25 an awm thu tarlan a ni. Health Minister chuan, phár natna chu hluar viau tawh lo angin lang ṭhin mah se, natna vei hmuh chhuah tur a awm zel ṭhin tih a sawi a, “Kum 2015 chhung mai pawha khawvel pumpuiah phár vei thar mi 2,10,000 an awm hian, he natna hi buaipui tham a nihzia a tichiang hle. India ram hi khawvelah phár natna hluarna rama an sawite zinga langsar ber a ni,” a ti.

31st. Tuesday: Kumin atana hmasa ber ni turin zenghri danna pek beihpui thlâk ṭan a ni.He prog. hi Health minister Lal Thanzara’n Aizawl Civil Hospital (ACH)-a Surgery OPD kawtah a hawng. Kumin chhungin Mizoramah naupang 1,40,288-te zenghri danna pek tum a ni.

2nd. Friday: Boichhingpuii lehkhabu ziah ‘Mizo la deh leh ze thlan’ tih chu I & PR Auditorium-ah Art & Culture Minister, Pu R.Romawia’n a tlangzarh. Lehkhabu hi Rs 580/- leh 450/- man te a ni.

3rd. Saturday: International day for persons with disability a ni a; Zoram Entu Pawl leh Ferrando Integrated Woman Development Center-Peace Home huaihawtin Falkawn Cultural Center-ah hman a ni. Bialtu MLA Pu KS Thanga, MLA, Parliament Secretary ni bawk in a hmanpui. Infiamna hrang hranga intihhlim a ni a; tlaiah ruai an theh nghal.

4th. Sunday: Khawvel huapa Kristiante ni pawimawh “Bible Sunday” a ni a, Mizoram Baptist Kohhran pawhin he ni hi urhsun taka hmangin, Chawhma Inkhawmah Headquarters atanga programme siam angin Kohhran tinah hun hman a ni. Kumin Bible Sunday thupui atan “Pathian Thu chu a nung a, thil a tithei.” (Hebrai 4: 8-13) tih hmangin thuchah ngaihthlak a ni. Thupui thlansa hmangin Tawngtai rual neih a ni bawk.

5th. Monday: Serchhip District Disaster Management Authority (DDMA) leh mega mock drill neihna tura mawhphurtu hrang hrang te chu DC room-ah mock drill an neih dan tur sawiin an thu khawm. Anni hian lei chhung kms 30 a thuka 7 magnitute a na in bazaar, Higher Secondary School leh DC complex a chhiatna thleng angin lem an chang dawn a ni.

6th. Tuesday: Ni thum awh tur, Assembly Session chu tan a ni. Session tan ni hian session leh session inkara MLA lo ni tawh thi ta te an sun a; zawhna leh chhanna hun hman a nih bakah sorkar thil pawimawh tam tak an sawi.

7th. Wednesday: Mizoram Tekwondo Fight League-ah Ramhlun Sporting Club chuan league round-a an hneh loh hnu Kolasib Fighter chu 38-26 a hnehin an champion. Mizoram Tekwondo Fight League champion team hian Rs 50,000/- an dawng a ni.

8th. Thursday:Thawhlehni a Zokhawthara tan ZOFEST 2016 chu a tiak. A tiak nia khuallian Chief Minister Pu Lal Thanhawl a chuan Mizo tawng (Duhlian tawng) chu Mizote phuarkhawmtu a nih thu a sawi.

9th. Friday: LPS Cable Network buatsaih Youth Icon chu a hmawrbawk a ni ta a; K.Lalthlamuankimi (Mami), Rulchawm nula chu Icon atan thlan a ni .
Youth Icon thar hian Rs 1,50,000/- leh trophy bakah mimal thahnemngaite hnen atangin thilpek engemawzat a dawng a; Music video Chiangtea Videography, Sihphir in an siam sak bawk dawn a ni.

10th. Saturday: Governor, Lt. Gen. Nirbhay Sharma (rtd) chu sorkar thil pawimawh hrang hrang te ti turin New Delhi panin a zinchhuak.

11th. Sunday: Tunkar Thawhlehni a Durtlang Presbyterian kohhran biak ina tan, Mizoram Synod inkhawmpui vawi 93-na chu tluang takin a tiak ta.Inkhawmpuiah hian probationary pastor thawk lai 19 chu Moderator Rev. Lalzuithanga’n pastor atan a nemnghet a, pro.pastor atana lak thar mi 17-te a dahnghet bawk. Kum 2017-18 Synod budget atan Rs. 2,49,45,63,00/-. Mizoram Presbyterian kohhran hnuaiah hian Kohhran 1,197 awmin kohhran upa zat 5,253 anni a; kohhran member zat hi 6,11,241anni bawk. Moderator thar atan Rev F.Lalrinnunga a ni.

12th. Monday: Comerce & Industries chuan Khawbungah an deptt. hnuaia NLUP thlangtu mi 140 hnenah cheng nuai 21.62/- an sem. He hun hi bialtu MLA Pu T.Sangkunga’n a hmanpui a ni.

13th. Tuesday: Dawrpui Veng Branch KTP te chuan an kum 61 na pualin Civil Hospital tan thisen unit 37 an pe. Thisen petu te hi mipa 36 leh hmeichhia 1 anni.

14th. Wednesday: Edentharah road roller chesualin kawngthlangah meter 200 vel a lum a; a chuang zinga naupang, Elija Ramchullova (11) s/o F.Hrangzela chu a hmunah a thi nghal. Operator hian hliam a tuar bawk.

15th. Thursday: Indian Medical Assn. (IMA) Mizoram State Branch ten Aijal Club-a Annual Conference an hmannaah kum 2017-‘18 President atan Dr. Vanlalruata an thlang.

16th. Friday: Mizoram Gorkha Youth Assn. (MGYA) chuan Synod Mission Development Traning Hall, Bualpuiah inkhawmpui an hmang. Parliamentary Secretary Hmingdailova Khiangte in a hmanpui. Inkhawmpuiah hian Zoram hmun hrang hrang atangin member 200 chuan an tel a ni. MGYA hnuaiah hian sub-headquarter pakhat awmin branch 16 an awm a; member hi an vain 3476 lai an awm a ni.

17th. Saturday: Zemabawk North Branch YMA chuan Civil Hospital tan thisen unit 41 an pe. Thisen petu te hi mipa 33 leh hmeichhia 8 anni.

18th. Sunday: Mizoram Presbyterian kohran hrang hrang te chuan kumin chhunga a hnuhnung ber atan Sunday School an kal a; naupang lamin exam nan hmangin kohhran thenkhat chuan kaikim lawman an sem bawk.

19th. Monday:Tuipui D bula Chhimtuipui lei (suspension bridge) lirthei tlan theihna chu Chief Minister, Pu Lal Thanhawla’n a hawng. He lei hi Mizorama suspension bridge sei ber a niin meter 200 zeta thui a ni. Lei siam hna hi November ni 19, 2012 khan tan a ni a; December ni 13, 2014 a a chima, mi pakhatin nunna a chan phah hnuah September ni 27 khan zawh a ni. He lei hian ton 4 (Kgs 4000) chin zo thei tura ngaih a ni.

20th. Tuesday:Zarkawt branch KTP te chuan Synod Hospital tan thisen unit 37 an pe. Thisen petu te hi mipa 34 leh hmeichhia 3 anni.

21st. Wednesday: India rama footballer tha berah Jeje Lalpekhlua s/o F.Liankima, Hnahthial chu thlan a ni. Jeje hian hmingthatna bakah Rs 2,50,000/- a dawng a ni.

22nd. Thursday: Aizawl Municipal Corporation (AMC)-in Aizawl khawpui chhung hmun ṭhenkhata a thlawna internet wifi hman theih tur (free wifi) an ruahman chu Govt. Aizawl College-ah AMC mayor PC Lalhmingthanga’n a tlangzarh. PC Lalhmingthanga chuan, Aizawla free wifi dah chu AMC inthlan dawna an manifesto zinga mi a ni tih sawiin, January 2016-a Board of Councillors meeting-ah kum 2016 chhunga peih hman turin thutlukna an siam tih a sawi.

23rd. Friday: Chief Minister, Pu Lal Thanhawla chuan a directonary fund atangin Chrismas thilpek atan district pariata home, damdawi in, hnuchham enkawlna, tar chawmna leh chanhai enkawlna hrang hrang 78 te tan Rs 2,58,700/- a sem chhuak.

24th. Saturday: Chalfilh Group YMA hruaitute chuan Darlawnah petrol 2000 litter vel phur 407 truck atangin an man. Petrol hi Manipur-a hralh tum a ni a; duty te hian Manipur-a luh tir phallo in a duh chuan Darlawn leh a chhehvela tiral turin petrol neitu Thlamuana, Khanpui khua chu hrilhin a duhlo a nih chuan Aizawl lama phur let leh turin an hrilh. An hrilh angin a neitu hian litter-ah cheng sawmriatin a hralh ta a ni.

25th. Sunday: Kristian te kutpui Krismas ni a ni a; Mizoram chhunga kohhran hrang hrang te chuan hlim takin an hmang hlawm. Ruai nena theh pawh an awm nual.

26th. Monday: Aizawl New Market-a Zir Zir dawr chu a kang a; bungrua cheng nuai 15/- man hu a kang ral.

27th. Tuesday: Kohhran Thianghlim hnuaia Youth Evangilical Front, Aizawl West Group-ten Solomon Temple, Chawnpuiah blood donation camp an nei a; thisen unit 377 lai an pe. Thisen petute hi mipa 243 leh hmeichhia 134 anni.

28th. Wednesday: Champhai district-a Lungphunlian khua chuan Pathian hnena inhlan thartna hun an hmang a; tlaiah ruai an theh nghal. Lungphunlian khuaah hian Presbyterian leh Salvation Army kohhran te an awm a; chawhma lam hun hi Salvation Army lamin changin kawngzawh, bethel runpui leh lungphun a ni a; Presbyterian kohhranah banna hun hi siam a ni thung.

29th. Thursday: Serchhip Chanmari Branch YMA ten Rajya Sabha MP Fund hmanga library building an sak thar chu YMA Sub-Headquarter Serchhip Finance Secretary S.Thangngaizuala’n a hawng. Rs 3,00,000/- senga sak he library building hi a dung feet 18 leh a vang feet 12 a lian a ni.

30th. Friday: Tuikual luiin Tuithum a finna thlen hma deuhah mipa naupang, Lianthansang (5) s/o Thenneihchhing, Lamka, Manipur chu thia char a ni.

31st. Saturday: Tlabung MZP hruaitute chu Tlabung bul, Khojoysury khuaah an kal a; Chawiulung khua atanga Khojoysury a Mizo bazaar kalte Chakma tlangvalten an tihbuai chungchangah ti tawhlo turin an hriattir.

Hetiang a nih tak avang hian a changtu department lam insawithiamna pawh a lo lang ve nghal zat a; a tira a siamtute tih dikloh vang leh computer-in a man fuh theihloh vangah te an puh mai a nih kha. A changtu minister lahin VC/LC hotute a puh hmiah mai bawk!

He thil hi a mak ngawt mai! A buaipuitu khawtlang hruaitute hi chuan uluk theihtawpin an buaipuiin a rinawm a; chuvangin, department lam inthlahdah vangah mipui chuan kan puh deuh ber niin a lang.
Pian ni leh thla inang thum mai leh pian kum diklo nasa lutuk te kha chuan computer chianloh vang a nih nghawt hmel loh hle a ni.

Tih dikloh a awm tih hriat a nih hnuah sorkar (LC/VC) lam chuan siamthat hna an buaipui ve nghal a; mahse, mipuiin pawisa kan seng leh kher kha a mak ngawt mai bawk. An tih dikloh siamtha tur an nia, mipuiin kan tuar leh daih mai kha a mak ngawt mai. A tam lemlo bawk a, phun kan tam lo mai pawh a.

Hmeichhe hming dah hmasak an duhna thinlung kha hriat a chakawm khawp mai bawk. Card holder-ah chhungkaw nu ber dah tur a ni a; an awmloh chuan fanu/tunu/……tih a ni chhawng duat mai kha a mak a ni.

* Kumthar kan lawm zo chauh a; a am fal chuan an la nawn hial awm e. Zing khawvar hma deuhin Zoram chu lirnghingin min nuai. Hemi tum hian chuan a na lemlo niin a lang. Kum chanve em pawh kan thlen hmain na deuh zawkin min nuai leh a nih kha.

He lirnghin hunlai hi kan hriat angin Nilaini zanah a ni a; mi tam tak chu kan inkhawm lai a ni in a rinawm. Inkhawm lai pawna chhuah tum kan tam viau awm e. Khawlaia awm lahin biak in an pan thung thu sawi tur a awm nual bawk. “biak in pawh ringlo” tih ang zawnga thu vaivir duh tawk an awm a, ‘zurui leh pawna awm zawkin biak in an rawn belh hram hram laia kohhran mi zawk han tlan chhuah daih mai chu’tiin ngaihdan kherkhiap taka sawi duh pawh an awm nual bawk niin a lang. A mawh lo e.

Enganga thlarau lama chang sang pawh ni ila, thihna emaw accident hi cho chi a ni lo a, mahni sahimna zawn hi mitinin kan mawhphurhna a ni. Dawihzep uchuak tak erawh a awmtheih tho awm e.

*Sorkar laipui chuan India ramah pawisa chheprelh leh pawisa lem tam lutuk tih ziaawm deuh beiseiin cheng 500/- leh cheng 1,000/- note te a ti thi a; mipui kan buai phili hle.

India ramah hian pawisa lem hi a leng vel nasa viau mai a; an man thu pawh chanchinthar lamah kan hre chamchi a nih hi. Chutih rualin, pawisa chheprelh, chhiah awl duh avanga bank a dah loa, mahni ina lo kawl mai an tam hle niin a lang. Hetiang ho hian bank ho hlawh hmuhna ve an tihbo nual avangin sorkar tan chuan thil pawi tak a ni.

Thui tak ruahmanna an kalpui tawh chu a rinawm a, hetia, thawklehkhata an ti thi(?) thut mai hi mipui chuan kan tuar hle. Mahse, thil tha zawk chhuah na tur chuan buai deuh rap rap pawh a tul chang a awm thin a, chuvangin, he thil hi chuan rah duhawm zawk a chhuah ngei a rinawm. Opposition party lam pawhin demna chu auchhuahpui tho mah se, an thlawp ve viau tho niin a lang.

Sorkar laipui hian cheng 500/- leh cheng 2,000/- note an ti chhuak nghal a; hei hi chu hman lai aiin a hlailo deuh zawk a ni. Hetih laia a lem a chhuak hman hi erawh thil mak tak a ni.

* LPS Cable network chuan a tumngana atan Youth Icon a buatsaih leh ta a; hetah hian K.Lalthlamuankimi (Mami), Rulchawm nula chu Icon atan thlan a ni. Rulchawm nula hian a duhthusam hlawmtlinna a chan rualin, lawm luat avanga hnukulh leh lungchhiain lawmman a dawng.
Youth Icon thlannaah hian mi zanga chuang lai an tel a; hetianga han tlin theih hi chu thil ropui tak a ni ve hrim hrim mai.
Kum 2012-a H.Lalrempuia hnua Youth Icon hmasa leh ber, kum 18 mi Mami hian a sang pathum zinga a elpui R.Lallawmsanga (Bethlehem Vengthlang) leh Eunice Lalngaihsaki (Republic Vengthlang) khumin Icon lallukhum a khum a. Judge panga point pek leh mipui vote-ah a sang ber.
Khawsak awlsam lo tak hnuaia pi leh puin an enkawl sei len Mami chuan, “Engtin nge pakhatna ka nih theih zawk? A mak lutuk!!” a ti.
Youth Icon pangana chuan Pathian leh a pi leh pu hnenah lawmthu a sawi a, a nih chak em em a ni ta mai chu a duhthusam a takin a thleng tih a sawi.
Mami hian intihsiak a hmachhawn chhungin lengzem leh lenglawng hla nem lam, rilru hneh thei chi a sa tlangpui a, inelna hnuhnung ber Top 3 Contest-ah ‘Hmangaihna Rinawm’ leh ‘Hling Zinga Rose Par’ a sa.
2006 atangin LPS Vision-in zai thiam thlanna ‘Youth Icon Contest’ a buatsaih tan. Mami hi hmeichhe zinga Youth Icon ni thei pathumnna niin Zoramchhani (2006) leh Malsawmtluangi Fanai (2007) hnung a zui a, mipa zingah R.Lalhmangaiha (2009) leh H.Lalrempuia (2012) chuan hlawhtlinna an chang tawh a ni.
Grand Finale hi official sponsored Zoplast neitu Lalhmangaihzuala Pachuau leh a nupui Lalmuanpuii bakah, Mizo Zaimi Insuihkhawm Pawl (MZI) Treasurer Helen Zaithankungi leh General Secretary Isak Malsawmtluanga’n a hmunah hmanpuiin lawmman an sem.
Youth Icon thar hian Rs 1,50,000/- leh trophy bakah mimal thahnemngaite hnen atangin thilpek engemawzat a dawng a; Music video Chiangtea Videography, Sihphir in an siam sak bawk dawn a ni.

2nd. Wednesday: SBI digital branch thar, ‘sbiINTOUCH’ tia vuah, Chanmari, Aizawla mi chu chief Minister Lal Thanhawla’n a hawng. sbiINTOUCH hi khawl changkang ber ber hmanga thuam a ni a, independent (mahnia inrêlbâwl) branch a nih ang leh digital branch a nih angin hnathawk pawh mi pahnih chauh dah a ni.

3rd. Thursday: Haulawng khua chuan an khuaa Zokhuma Memorial Field-ah an khaw kum 100 tlin an lawm a, minister Zodintluanga leh PC Lalthanliana ten an hmanpui.Tun dinhmunah Haulawng khuaah hian in 527 ah mihring 2229 an cheng mek a ni. 

4th. Friday: Association of PHE Officers chuan officer pangate kaisan lawmna hun, Water Treatment Plant Site, Dihmunzawlah an hmang a; PHE minister Zodintluanga’n hmanpuiin, officer-te fuihna thu a sawi.PHE engineer kaisangte hi – Lalmuanzova (chief engineer aṭangin engineer-in-chief-ah), C Lallunghnema (SE aṭangin CE-ah), Zodinthari (EE aṭangin SE-ah), Lalzuimawii (SDO aṭangin EE-ah) leh, C Zothantluanga (SDO aṭangin EE-ah)-te an ni.

5th. Saturday: Lalenkawli (20) s/o Chuakunga, Kolasib Salem Veng chu Rengtetlanga bawlhhlawh paihna bul kawng thlangah thia chhar a ni.Lalenkawli hi November 3 tlai aṭangin chin hriat loa a bo a ni.

6th. Sunday: Khawvel Sunday School Ni a ni a, Mizoram Presbyterian Kohhran chuan puitling lamah Pu Mûka chanchin an zir a, naupang lamin CT Studd-a chanchin an zir thung.Khawvel Sunday School Ni hi United States-a Tabernacle Presbyterian Kohhrana mi, Dr George W.Bailey-a rawt chhuah nia sawi a ni a, kum 1907-a World’s Sunday School Association Convention, Rome-a neihah leh kum 1910-a Washington Convention-a an sawihona May 22, 1910 aṭangin hman ṭan a ni.

7th. Monday: Pachhunga University College-a Department of Statistics leh Sampling and Official Statistics Unit, Indian Statistical Institute, Kolkata ṭangkawp chuan PUC-ah ‘4th Workshop on Official Statistics in North Eastern States’ tih hmangin zirhona an buatsaih a, Higher & Technical Education minister R.Romawia’n a hmanpui.

8th. Tuesday: Kolasib College-a Schedule Tribe hmeichhe zirlaite tana hostel sak thar, ‘Kumtluang Hostel’ chu chief minister Lal Thanhawla’n a hawng. Chief Minister chuan, hostel neite chu sorkar dan zawm vek tura beisei an nih thu a sawi. Hostel building hi chawng li a ni a; dormitory, a enkawltu awmna, chowkidar awmna, common room, multipurpose hall, lehkha zirna, eirawngbawlna choka leh chaw einate a awm. 

9th. Wednesday: Black money leh pawisa lem tam lutuk tih ziaawm theih nan Central sorkar chuan Rs 500/- leh Rs 1,000/- note-te chu a ti thi. Hetih rual hian Rs 500/- leh Rs 2,000/- note thar te tih chhuah nghal ni.

10th. Thursday: Mizoram Government AdHoc Aided High School Teachers Association (MIGAHTA) chuan Chanmari YMA Hall-ah Special Conference an hmang a, chief minister Lal Thanhawla’n a hmanpui. Special Conference-ah hian resolution pathum – chatlak loa hlawh an lak theih vanga Mizoram sorkar chunga lawmthu sawina te, tuna an hlawh lak mek basic pay leh half allowance chu full alowance anga pe tura sorkar ngenna leh, an damloha medical reimbursement bill phalsak ve tura sorkar ngennate an pass a ni.

11th. Friday: Mizoram tlawha rawn zin, Union Railways minister Suresh Prabhakar Prabhu leh minister of state for Railways Rajen Gohain te chuan Governor Lt.Gen. Nirbhay Sharma leh chief minister Lal Thanhawla an kâwm a; thil pawimawh hrang hrang an sawipui.

12th. Saturday: Chhinga Veng, Dawrpui, Electric Veng, Saron Veng leh Zarkawt branch YMA-te thawhhona, YMA Joint Duty-te chuan ruihhlo October 4 leh November 11 inkara an mante chu Dawrpui School kawtah an hâl a; hei hi ṭum hnih ruihhlo an hâl ralna a ni.

13th. Sunday: Centrar sorkar in tunhnaia pawisa note lian a tih thih avangin bank lam thawkte an buai hlea; hei vang hian nilengin duty pangngai angin hna an thawk.

14th. Monday: Sairang police-te chuan an thudawn bawhzuiin Mualkhangah gas khawih chingpen tum lai Zaikunga (38) s/o Zanawka, Teiliangmura, Tripura chu nangchingin, an man a, thubuai an siamsak.

15th. Tuesday: Mizorama a hmasa ber turin Urban Development & Poverty Alleviation (UDPA) department chuan internet hmangin e-office an kalpui ṭan dawn a, UDPA minister Zodintluanga pisaah a hawng. UDPA Minister chuan, paper chhah pui pui kenkual a ngai tawh dawn lo tih a sawi. UDPA department hian e-Office Lite a hmang dawn a, hmangtu (user) 250 an awm thei dawn a, department-ah user 76 leh Secretariat-ah 15 awmin, user 91 an awm ang.

16th. Wednesday: Mizoram University-a Mizo department chuan,Vanapa Hall-ah Lalzuithanga kutchhuakte zirhona, ‘National seminar on Creative Writings in commemorate the birth centenary of Lalzuithanga’ tih an buatsaih a; Art & Culture director R.Hmingthanzuala’n a hmanpui. Lalzuithanga hi kum 1916-ah a piang a, kumin hi a kum 100-na a ni. Lalzuithanga chuan thawnthu (novel) pariat leh lemchan thawnthu leh hla eng emaw zat a phuah a, a manuscript hmuh zawh loh pariat a awm bawk.

17th. Thursday: PRISM office-ah Mizoram Peoples Conference (MPC), Zoram Decentralisation Front (ZDF), Zoram Exodus Movement (ZEM) leh PRISM hruaitute’n joint meeting an nei a, kum 2018-a Assembly inthlanpuiah candidate neih an rél.

18th. Friday: Mizoram police-a CID (Crime) hnuaia Special Narcotics police-te chuan Ch. Chhunga Truck Terminal, Rangvamualah Sumneihngula (43) leh a nupui Nomenthluaii (42)-te hnen aṭangin heroin hawng 15 an man a, heroin an man hi tualchhunga hralhna ang chuan Rs. 7,50,000/- hû a ni.

19th. Saturday: Information & Public Relations department leh Mizoram Art Development Society (MADS)-te chuan, Annual Art Exhibition khârna leh high school leh middle school tana ‘On The Spot Painting Competition’ an buatsaiha tiṭhate hnenah lawmman an sem a, minister Lalsawta’n a hmanpui. On The Spot Painting Competition-ah hian high school section-ah zirlai 25 leh middle school section-ah zirlai 39 an tel a; certificate bakah pakhatnain Rs. 5,000/-, pahnihnain Rs. 3,000/- leh pathumnain Rs. 2,000/- an dawng a ni.

20th. Sunday: Mizoram Synod hnuaia Campus Ministry chuan Kolasib Diakkawn kohhranah hun an hmang a; He hun hi Diakkawn kohhran hnuaia Kristian Chhungkaw Comtt. bultuma hman niin, thupui atana thlan ‘Zirna leh Moral Reform’ tih chu Rev Lalchungnunga, Director in fiah leh ngaihnawm takin a sawi.

21st. Monday: Meizûk sim hnua vaihlo dona kawnga hma latu pawl, Tobacco Quitters of Mizoram (TQM) chuan Aizawl Press Club-ah an pawl din champha vawi thumna an lawm a, Health minister Lal Thanzara’n a hmanpui.

22nd. Tuesday: Chalfilh bialtu MLA Dr. Ngurdingliana chuan a bial chhung Phullenah leh Suangpuilawnah NLUP a sem. Dr. Ngurdingliana chuan, “NLUP-ah hian cheng vbc. 288/- leh NEDP-ah vbc. 250/- kan dah a, hei aia tam hi nakkumah kan dah leh dawn. NLUP hlawhtlinpuitute chu NEDP hmangin kan tanpui chhunzawm zel dawn a ni,” a ti.

23rd. Wednesday: Mizo scientist kan tih mai, India rama civil mite chawimawina sang Padma Shree dawng tawh leh Central YMA president hlui, C.Rokhuma (100) h/o Lalrinthangi, Mission Vengthlang chu a thi.

24th. Thursday: Art & Culture department leh Central YMA-in Lammuala ni hnih awh hnam lâm intihsiakna, 12th. Chief Minister’s Running Trophy in YMA Cultural Dance Competition 2016 chu khar a ni a, chief minister Lal Thanhawla’n lawmmante a sem. Lâm pathuma tiṭha ber chu Ramthar North Branch YMA an ni. CM’s Running Trophy in YMA Cultural Dance Competition-ah hian tel turin YMA branch 56-in hming pe mah se, branch 38 chiah an lám thei a, chu’ng zinga branch pali chu Aizawl páwn aṭanga tel an ni. YMA branch-te chu Cheraw (Kântluang), Chawnglaizawn leh Tlanglâmte hmangin an intihsiak. CM Running Trophy in YMA Cultural Dance Competition hi kum 1993-ah nei ṭan a ni a, kum kar thlakin neih ṭhin a ni. 

25th. Friday: Kohhran Hmeichhe Ni a ni a, Presbyterian Kohhran Hmeichhiate’n bial leh kohhran mal huapin an hmang. Kohhran Hmeichhe Ni hi kum 1997-ah hman ṭan a ni a, November thlaa Zirtawpni hnuhnung berah hman ṭhin a ni. 

26th. Saturday: Aizawl SP hnuaia District Special Branch (DSB) chuan Chanmari, Aizawlah Metamphitamine mûm 10,021 leh a neitua puh David Vanlaltluanga (38), Chanmari, Aizawl nia insawi an man. DSB hian Meth hi Chanmari-Chaltlang road-a motor chhunga a leitu tur hnena an inhlan chhawng tur nangchingin an man a ni.

27th. Sunday: Mizoram Baptist Kohhran ni pawimawh, ‘Rualbanlote Ni’ a ni a, he ni pual hian Baptist tualchhung kohhran tinah chawhma inkhawmah hun hman a ni. Rualbanlote Ni thupui chu ‘Miin i chunga an tiha i duh tur ang apiang chu, mi chungah pawh ti ve rawh u’ tih a ni. 

28th. Monday: MNF ṭhalaite chuan Mizo Hnam Rûn kawtah Lunglei DC Lalzarmawii’n November 25, 2016-a circular a chhuah copy an hâl. Hetih lai hian, Lunglei DC chuan circular thar chhuahin, November 25-a circular a lo chhuah tawh chu sût (cancel) a nih thu a tarlang. Lunglei DC circular hâlnaah hian MNYF president K.Vanlalvena chuan, “Kan sorkar hrawn mek hi sipai sorkar ang maia mipuite zalenna rapbet zawnga thupek déngkháwng tak tak chhuah chíng sorkar a ni,” a ti a; “Circular hi nimin zinga chhuah a ni a, November 26, 2016, Inrinnia chhuah angin an back date a ni,” a ti bawk.

29th. Tuesday: F.Lalhmangaiha, Hualngohmun chuan sakramen uain thlitna khawl a siam chhuah chu Synod Conferencesex Hall-ah Synod moderator Rev. H Lalrinmawia’n Pathian hnenah hlanin a tlangzarh. Sakramen uain thlitna khawl hi kawlphetha hmang lo, kuta khawih ngai a ni a; ṭum khatah second 5 vel chhungin sakramen tray pakhata no awm zawng zawng (no 30) chu a rualin a thli khat thei a ni.

30th. Wednesday: Aizawla awm 39 Assam Rifles chuan, Scorpio MZ-01 M-1563 aṭangin pawisa tam tham tak leh motor khalhtu Sawmthanga (48) s/o Thangkeia leh motor-a chuang Stephan Kama (21) s/o Thangkepa, Bawngkawn Lunglei road-a cheng nia insawite an man.

2nd. Sunday: India hnampa, Mahatma Gandhi pian champha a ni a, amah hriatrengna leh zahna lantir nan sorkar hotu liante’n Zodin Square-a Mahatma Gandhi limah pang¬par an dah. India Hnampa zahna lantirnaah hian Governor Lt.Gen. Nir¬bhay Sharma-a’n pangpar dah hmasa berin, chief minister Lal Thanhawla’n a dawt a; a hnuah Legislative Assembly speaker Hiphei, Home minister R.Lalzirliana, minister dang te, parliamentary secretary-te leh MLA te, Chief Secretary, DGP leh sorkar officer dangte’n zahna pangpar an dah a ni.

3rd. Monday: UPC (North East India)-a ṭhalai pawl, PYD-te chuan Mizoram hmun hrang hrangah Social Work Day an hmang a; Aizawlah chuan thisen pek rûnpui neih niin, thisen unit 143 an pe.

4th. Tuesday: India rama thlawhna service liante zinga mi, SpeceJet chuan Mizoram a rawn thlun zawm ve ta a, Lengpui Airport-ah Governor Lt.Gen. Nirbhay Sharma-a’n a hawng. SpiceJet thlawhtheihna hi nitin Kolkata leh Guwahati aṭangin a rawn ṭum ang a, khawpui pahnih pan hian a thlawk chhuak ṭhin dawn a ni. Spicejet hian Aizawl/Lengpui hi khawpui an thlun zawm 44-na a ni a, chungte chu India rama khawpui 38 leh ram pawna khawpui parukte an ni. Ni tin flight 317 an nei ṭhin a; Boeing 737NG thlawhna 29 leh Bombardier Q-400 thlawhna 14 an thlawhtir mek a ni. Aizawl bikah hian Q400 a thlawk dawn a, passenger 78 a phur thei a ni.

5th. Wednesday: National Wildlife Week vawi 62-na pualin Environment, Forest & Climate Change department-in Wildlife Run an buatsaih. He hunah hian Kulikawn leh Chanmari aṭanga tlan ṭanin, Lammualah an intâwkkhawm a; Lammuala inkhawm tawi buatsaih chu Forest minister Lalrinmawia Ralte-in a hmanpui a ni.

6th. Thursday: Sateek Branch YMA chuan Aizawl Civil Hospital tan thisen unit 34 an pe a, a petute mipa 32 leh hmeichhia pahnih an ni.

7th. Friday: Lalhminghlua (19), Thingsai chu Shillong-ah motor-a chetsualnaah a thi. Lalhminghlua hi Shillong Lajong Football Club-a khel a ni a, Ningani zan khan a chuanna bike leh motor an insû a, NEIGhRIMS damdawi-ina lak a nih hnuah a hliam tuar loin a thi a ni.

8th. Saturday: Champhai Kahrawt branch KṬP ten an diamond jubilee pualin mipa 24 leh hmeichhia 24-in Champhai District Hospital-ah thisen unit 48 an pe.

9th. Sunday: Mizoram Presbyterian Kohhrana inkhawmpui lian ber dawttu, Presbytery Inkhawmpui, Octo¬ber 6, 2016 zana ṭan chu a ṭiak. Inkhawmpui hi Mizoram Synod hnuaia Presbytery 47-ah neih a ni a; Synod hnuaia Presbytery dang palite chu Mizoram páwna awm an nih avangin an remchan hunah inkhawmpui an hmang ve ang.

10th. Monday: World Mental Health Day a ni a, Aizawlah hmun thuma hman a nih bakah, district dangahte pawh hman a ni. Kumina thupui chu, ‘Dignity in mental health – Psychological and mental health first aid for all’ tih a ni.

11th. Tuesday: Lalhmingmawia Chinzah s/o C Tinkara, Sangau-I chu khuaiin a zûk a, a hliam tuar loin a thi. Lalhmingmawia hi an khua aṭanga km. 7 vela hlaah fasuar siamna tur hmanrua la tura a kalnaah khawi¬vanrial bu tawn palhin, an zûk rawn a, khua panpui a nih laiin a thi a ni.

12th. Wednesday: Disaster Management & Rehabilitation (DMR) department leh Geo Hazards International – India ṭangkawp chuan IPR Conference Hall-ah ‘Practical Applications of Neotectonics & Quarternary Geology in Geological Hazards Assessment training an buatsaih a, Governor Lt. Gen. Nirbhay Sharma khuallian a ni. Training hi DMR secretary Zothankhuma’n a kaihruai a ni.

13th. Thursday: Lunglei Zohnuaia Digital Planetarium sakna tur hmun chu parliamentary secretary Joseph Lalhimpuia’n a tlawh a, ram dinhmun a enfiah. Planetarium hi cheng nuai 350/- sênga sak tum a ni. Digital planetarium hi arsi pian (shape) anga sak tur a ni a, ṭum khatah mi 60-in an en theih tura ruahman a ni. Planetarium sakna tur hmun hi Zohnuai High School leh Zohnuai Primary School-II ten ram an pek a ni.

14th. Friday: Mizoram sorkar, Information & Public Relations (IPR) department leh Mizoram Journalist Association (MJA) ṭangkawp chuan IPR Auditorium-ah Zoram Tlangau editor Lalbiakthanga Pachuau, kum 90 chuang tawh chu India rama chanchinbumi thawk mek (working journalist) upa berah an puang. Working journalist upa ber puannaah hian accredited journalist tharte hnenah accreditation card sem nghal a ni.

15th. Saturday: Aizawl lam pana tlan XUV car MZ-01 M-8604, Lalremruata (26) s/o F.Lalchamliana (L), Bungkawn, Aizawl a mi khalh chuan Damdiai, Maubuangah kawng sira awm mi pali a hnâwl a, an zinga Zopari w/o Remthanga chu damdawi inah a thi.

16th. Sunday: Bible Society of India (BSI), Aizawl Auxiliary Youth Committee buatsaih, Salvation Army Aizawl Temple Corps-a Inrinni zana BSI zaipawl hrang hrangte puala ‘Choir Convention’ neih chu a tiak. Choir Convention-ah hian BESY Choir bakah, Mizoram hmun hrang hranga BSI puala zaipawl din 18-te an tel a; zaipawl hrang hrangte chuan Pathian fakna hla an rem a ni.

17th. Monday: Agriculture directorate con¬ference hall-ah World Food Day hman a ni a, Agriculture minister R.Lalzirliana chu khuallian a ni. R.Lalzirliana chuan, khawvel hmun dangah chuan World Food Day-ah mipui zirtirna lam hawia hman ṭhin a a nih thu sawiin, “Mihringte hi ei leh in tel loin a nun theih loh a, mi tinin retheihna leh rilṭamna tuar lo se duhthusam a ni. Khawvel mihring awm pakua zela pakhat hi ei tur tlachham nia chhût a ni a, kum tinin naupang tam tak ei tur ṭha hmuh loh vangin an thi ṭhin,” a ti.

18th. Tuesday: UDPA minister Zodintluanga chuan a pisaah Aizawl Municipal Corporation (AMC)-a councillor-te a kâwm a, AMC councillor-te chu mayor PC Lalhmingthanga hoin an tel. He hunah hian Aizawl khawpui tihhmasawnna tur scheme, Atal Mission for Rejuvation and Urban Transformation (AMRUT) hnuaia hmalak dan tur an sawiho.

19th. Wednesday: Romuanpuii Zadeng lehkhabu ziah, ‘Pûk Dangdai’ tih chu MZP pisa-ah MZP Chanchinbu editor Lalvansanga Pautu-in a tlangzarh.

20th. Thursday: YMA Rorel Inkhawm hmasa ber chu R.Dengṭhuama Indoor Stadium, Mualpuiah neih a ni. He hunah hian Zo hnah¬thlakte tun aia inpumkhat lehzual theih nana hmalak bakah thu dang engemawzat an rêl a; kum 2017 kumpuan atan ‘Ram leh hnam humhalh’ tih an thlan bakah, kum 2017-a YMA General Conference neihna atan Champhai Zotlang an thlang.YMA General Conference chu kum tin neih a ni tawh dawn lo a, General Conference neih loh kumah Rorel Inkhawm neih ṭhin tura tih niin, kumin hi tarlan ang khian rorel inkhawm neih hmasak ber a ni.

21st. Friday: Central YMA presi¬dent a záwna ni rei ber, B.Daniala (70) h/o Krosthangi, Ramhlun South chu Greenwood Hospital-ah stroke vangin a thi. July 3, 1946-a piang B.Daniala hi Central YMA-ah kum 1983-1989 chhung leh 1989-1993 chhung president a ni a, CYMA president chanvo chelh rei ber a ni. CYMA-ah vêk kum 1977-1983 chhung assistant secretary a ni a; Ramhlun branch YMA-ah president leh mawhphurhna dangte a chelh tawh bawk.

22nd. Saturday: MNF party chuan Mizoram hmun hrang hrangah MNF din champha vawi 55-na an hmang. MNF din champha hi unit hrang hrangah hman a ni a, inkhawm leh ṭawngṭai rualna hunte an hmang a ni.

23rd. Sunday: Mizoram UPC koh¬hrana hmeichhe inkhawmpui lian, LAD General Conference vawi 22-na, October 21, 2016 zana Champhai Zote-a ṭan chu a ṭiak. Conference hi pan¬dal-ah neih a ni a, palai riak lut mi 1,578 niin, rorel palai chu mi 850 an ni. Kum 2017-ah General Conference neihna atan Bilkhawthlir bial leh kum 2018-ah Mamit bial an thlang.

24th. Monday: Pípúte Sûlhnû Humhalhtu Pawl (PSHP), Dung¬tlang hruaitute chuan Raj Bhavan-ah Governor Lt.Gen. Nirbhay Sharma an kâwm a; Dungtlangah culture centre sak an duh thu an sawi chu Larsap chuan, theihtawp a chhuah dawn thu sawiin a lo chhang.

25th. Tuesday: Melvyn Vanlalhlimpuia lehkhabu buatsaih, ‘General English Volume-2, Zoṭawnga English Zirna’ tih chu Aizawl Press Club-ah minister C.Ngunlianchunga’n a tlangzarh. He hunah hian C.Ngunlianchunga chuan, changkanna ûm pha turin sap ṭawng thiam a pawimawh thu a sawi.

26th. Wednesday: Mizoramah rei lo tê lìr a nghîng a, thil tihchhiat a neih hriat a ni lo. US Geological Survey tarlan danin, lirnghing hi Serchhip district hnuai km. 41 vela inṭan a ni a, magnitude 4.7-a náin a nghing a ni.

27th. Thursday: Chief minister Lal Thanhawla chuan Aizawl-Lunglei World Bank kawng kam, Sailam bazar-ah petrol pump thar Zozo Filling Station a hawng. CM chuan, kawngkam leh dawra petrol zawrh chu sorkar dan bawhchhiatna a nih thu sawiin, “DC leh SP-te’n he dan leh hemi chungchanga thupek awmsa chu khauh zawka an kenkawh a ṭul,” a ti.

28th. Friday: Central YMA hruaitute chuan Raj Bhavan-ah Governor Lt.Gen. Nirbhay Sharma an kâwm a; eirawngbawlna gas tihchingpen chungchanga an hmalakna leh ruihhlo an do dante an hrilh.

29th. Saturday: Upper Republic Branch KṬP-te Lawipu rama huan sâmfaia an hnatlan naah an chhun chawlh laiin Khawhpawp lui lian thutin mi pahnih a la a; pakhat zawk PC Lalhmachhuani (24) d/o Khawlchhuanmawia chu a hmunah a thi.

30th. Sunday: Sihphir Venglai Presbyterian kohhranah The Leprosy Mission hotuten rawngbawlna an nei. He hunah hian Upa Liansailova, Bungkawn Aizawl chuan thu a sawi a; Leprosy Choir bakah midang tlem azawngin an rawn tawiawm bawk.

31st. Monday: Aizawl Municipal Corporation huam chhunga Dawrpui Vengthar local council seat khat atana by-election chu neih a ni a, tlai dar 4 khan vote thlak zawh fel a ni.Vote hi polling station pathumah thlak a ni a, vote nei mi 2599 zinga 1515 in vote an thlak a, vote tla zat hi 58.29% a ni. He inthlanah hian MNF candidate Robert Zosangliana chuan amah hnaih bertu Congress party candidate Aldrin Zosangliana chu vote 95-a hnehin a tling.

3rd. Saturday: UPC (NEI) Ramhlun Kohhran biak in sak thar chu UPC North Mizoram District superintendent Rev. C.Lalrammuana’n hawngin, Pathian hnenah a hlan. Biak-in thar lawm nan tlaiah chawhlui an kîlho nghal.
4th. Sunday: Lallawmkima (19) s/o Heleni, Electric Veng, Aizawl chu Sihhmui leh Lengpui inkara Tlawng luiah a tlahlum.
5th. Monday: India ramah Teachers’ Day vawi 55-na a ni a, Mizorama sikul hrang hrang leh zirlai pawlte’n zirtirtute chawimawina hun an buatsaih.Teachers’ Day-ah hian Mizorama zirtirtu pahnihte chuan President Pranab Mukherjee hnen aṭangin zirtirtu ṭha chawimawina, National Award for Teacher an dawng.
6th. Tuesday: Mizoram Legislative Assembly deputy speaker hlui LP Thangzika (92), Lunglei Rahsi Veng chu a thi. LP Thangzika hi March 15, 1924-ah Rabung, Champhai district-ah a piang a, kum 1972-ah Mizo Union divisional president a ni a, kum 1972-ah Hnahthial bial aṭangin MLA-ah thlan a ni. Kum 1993-ah Hnahthial bialah bawk MNF candidate niin thlan tlin a ni leh a, Lunglei district High Powered Committee vice chairman a ni. May 27, 1998-ah Assembly deputy speaker mawhphurhna a chelh leh a; Assembly rorel inkhawm ṭum riat a kaihruai hman.

7th. Wednesday: Zoram Entu Pawl chuan khaw hrang hranga village health worker-te tan ZEP Conference Hall, Tlangnuamah RTI, PIL, ramhmul damdawi leh Su-Jok Therapy chungchang zirhona an buatsaih a, mithiamte’n thupui an sawi. Training-ah hian mi 35 an tel a ni.

8th. Thursday: Hailakandi SP PJ Goswami chuan Kolasib SP C.Lalzahngoa chu a pisaah a tlawh a; Assam sorkar tharin an state depa awm state-te nen boruak ṭha tak neih a duh vanga tlawh a nih thu hrilhin, thawhho dan tur an rel.

9th. Friday: Roman Catholic kohhrante chuan, kum 2016 Year of Mercy-a puan pualin Khawruhliana Kalvari Tlangah Kraws kawngzawh an nei a, Mizoram hmun hrang hrang aṭangin Catholic kohhran mi ṭhahnem tak an tel.

10th. Saturday: Aizawl aṭanga Zohmun pan Mizoram State Transport bus MZ-01 F-4011 chu East Phaileng leh Keprân khaw inkarah chesualin, kawng thlangah a lum a, mi panga an hliam. MST bus-ah hian mi 20 an chuang a ni.

11th. Sunday: Presbyterian Kohhrana pastor bial hrang hrangte chuan naupang Sunday School (Beginners, Primary, Junior, Sacrament & Intermediate) inkhawmpui an hmang. Naupangte chuan Pathian thu cháng leh thu inchhangte sawi rualin, fakna hla an sa bawk.

12th. Monday: South Khawlekah Suilianmawii (40) leh a fapa Muanpuia (5)-te chu an inah thia hmuh an ni. Anmahnin thattua puh, Isak Lalrinmawia (21) s/o Lalremruata (L), South Khawlek chu police-te’n an man nghal.

13th. Tuesday: Aizawl leh Lungleiah High School Games 2016 ṭan a ni a; Lungleiah chuan HPC vice chairman S.Laldingliana, MLA-in a hawng. Aizawlah chuan Aizawla khelmual hrang hrangah hman a ni ve thung.

14th. Wednesday: Centre for North East Studies and Policy Research (C-NES)-a thawk Sanjoy Hazarika leh Preeti Gill te’n documentary an buatsaih  ‘Rambuai Mizoram’s Trouble Years’ tih leh MZU-a Prof. Margaret Zama leh Dr C.Lalawmpuia Vanchiau ten rambuai laia Mizo ziak mite kutchhuak leh sûlhnute chhuina lehkhabu an buatsaih, ‘After decades of silence: Voices from Mizoram’ tih chu IPR auditorium-ah chief minister Lal Thanhawla’n a tlangzarh.

15th. Thursday: MNF party chuan Aizawl leh district khawpui hrang hrangah ‘Zu zawrh duh lohna kawngzawh’ an huaihawt. MNF president Zoramthanga chuan, zu chu Mizoramah tihrêm vek theih an inrin vanga khap duh an ni lo a, sualna tipungtu a nih vanga duh lo an nih thu a sawi. MLPC Act hman lohna district pahnih Siaha leh Lawngtlaiah chuan MNF-te’n poster an tár a, an pungkhawm ve bawk.

16th. Friday: BJP Mizoram Pradesh president Prof. JV Hluna chuan an party pisaah ‘BJP leh Kristianna an inrem em?’ (BJP leh Kristianna thua thu dik pholanna) tih lehkhabu thehlep (booklet) a tlangzarh. Prof. JV Hluna chuan, Mizoram mipui tam takin Congress party dâwt phuahchawp vangin BJP an hmuh dan a dik tâwk lo nia sawiin, “Booklet-ah hian thil nih dan leh thu dik tak tarlan a ni a. Booklet hmang hian Zoram mipuite’n BJP hi Kristianna dotu a ni tak tak em tih chiang takin an hre thei dawn a ni,” a ti.

17th. Saturday: Ruahsur nasa vangin Mizoram hmun hrang hrangah chhiatna a thleng a; Tlungvel khuaah chuan leiminin in pathum a hnâwl a, mi pangain nunna an chán.

18th. Sunday: Presbyterian Kohhrana Senior department-te chuan bial hrang hrangah inkhawmpui an hmang. Inkhawmpui hi bial tam zawk chuan intihsiakna atan an hmang lo a, bial ṭhenkhat erawh chu an intihsiak thung. Pathian thu leh hla leh thil dangte hmangin Pathian an chawimawi a ni. Kuminah hian MSSU hnuaia Senior department-ah zirtirtu 4,558 leh zirlai 30,191, an vaiin 34,749 an awm.

19th. Monday: Home minister R.Lalzirliana chuan pianphunga rualbanlo Vanrammawii (22), Armed Veng hnenah lehkha a zir chhunzawm zel theihna tura a hman atan taxi a hlân. Taxi hlanna inkhawm hi Lal Thanhawla Auditorium-a neih a ni a; Home Minister chuan, Vanrammawii hnena taxi hlan a ni chu tumahin an thîk a rin loh thu sawiin, “Kum 2009 aṭangin sorkarin Aizawl khawpui atan taxi permit kan la pe miah lo. Vanrammawii hi tuma’n an thîk ka ring lo a, amah ang hian mahni kea kal thei loin awmin, taxi thar neih phah dawn mah ila tumahin an duh ka ring lo,” a ti. Vanrammawii hi thla kua a nih aṭanga rualbanlo, kal thei lo a ni a; Class VII-ah Mizoram pumah pakhatna niin, HSLC-ah first division-ah a pass a, tunah hian Pachhunga University College-ah fifth semester a zir mek a ni.

20th. Tuesday: Central YMA hnuaia ruihhlo do pawl, SRS-te chuan Aizawla ruihhlo zuartu hlun tak, Thangchhungi d/o Rothianga, Ṭawipui South, Lunglei district chu heroin hawng khat nen, Vaivakawn Zohnuaiah an man. Thangchhungi hi SRS leh VDP te pawhin an man fo tawh a; thuneitute hnenah hlan ni ṭhin mah se, a táng rei ngai meuh lo nia sawi a ni.

21st. Wednesday: Council of Minister Chief Secretary conference hall-a chief minister Lal Thanhawla hoa ṭhukhawm chuan sikul kai hun chungchanga ruahmanna thar an pawm. Thlasik leh nipuiah sikul ṭan hun a inang dawn lo.An ruahman dan chuan thlasik (winter)-ah, October 15 aṭanga a kum leh February 15 inkara sikul ṭan hun chu zing dar 8:30 a ni a; nipui (summer) February 16 a-ṭanga October 14 chhunga sikul ṭan hun tur chu zing dar 8 a ni.

22nd. Thursday: August 27, 2016 zana Lunglei Zohnuai mi, C.Lalsawmliana (33) vit hlumtua puh Stephen Lalchawiliana hmel hmuh tumin Zohnuai veng mipuite Lunglei Court tualah an pungkhawm a; anmahni dangtu police-te nen an innawr buai a, Court building an vawm bakah, Lunglei Chief Judicial Magistrate quarters an suasam.

23rd. Friday: Home minister R.Lalzirliana chuan Sabual khaw hlui, Hmunhlui tlanga Mamit District Jail siam thar a hawng.Jail thar hi mi 114, mipa 70 leh hmeichhia 44 tàn theihna a ni a; Jail hung chhungah in pakua leh hung páwn lamah quarters 15 a awm. Jail Superintendent hoin thawktu mi 34 leh armed security guards (MRHG) mi 24-in an awm chilh dawn a ni.

24th. Saturday: MZP headquarter, Manipur chuan Churachandpur, Manipur-ah 43rd. Annual Conference cum Meritoriuos Award 2016 an hmang a; parliamentary secretary (School Education) Joseph Lalhimpuia’n a hmanpui. Joseph Lalhimpuia chuan, chief minister Lal Thanhawla’n ‘Political boundary-in min dang mah se, thisena kan inzawmnate leh kan inkungkaihna hi engmahin a dang lo a, tihchak deuh deuh a ṭul. Hnam dang hmuha kan mawi theih nan Zo hnahthlakte’n inpumkhatna ṭha zawk neih kan neih a ṭul. Zo hnahthlakte chu hmun hrang hranga kan ram aiawha awm kan nih avangin sorkar chu a tih ve theih lam leh a tih ve turahte kan tlanchhe lo,’ tih sawi tura a chah thu a sawi.

25th. Sunday: Vairengte field no. 2-a Mizoram UPC kohhran ṭhalai, Penticostal Youth Department (PYD)-in September 23, 2016 zan aṭanga General Conference an hman chu a ṭiak.PYD-te hian kum 2017-18 chhunga kumpuan atan ‘Rinawmna’ an thlang a; kum 2016-17 chhunga budget atan Rs. 17,96,000 an pawm bawk.Mizoram PYD-ah hian member 10,101 awmin, mipa 6,402 leh hmeichhia 3,699 an an ni a; member zinga mi 2,556-in zûk leh hmuam nghei tawh a ni.
26th. Monday: Mizoram People’s Conference (MPC) party-a executive vice president leh speaker hlui Dr Kenneth Chawngliana chuan Zoram Nationalist Party a zawm a, ZNP president Lalduhoma’n an party pisaah a lawm lut.Dr.Kenneth Chawngliana hi ZNP Political Affairs Committee thutlukna angin ZNP Vice President-ah dah nghal a ni.ZNP thuchhuah chuan, MPC Executice Vice President an lawm luh rual hian, Aizawl veng hrang hranga MNF leh neutral voter eng emaw zat an party-ah an lawm lut niin a tarlang.

27th. Tuesday: Union minister of state for Environment, Forest & Climate Change (independent charge) Anil Madhav Dave chuan, Governor Lt.Gen. Nirbhay Sharma leh chief minister Lal Thanhawla te an chennaah a kâwm.
28th. Wednesday: Mizoram Police, YMA Sub-Headquarters Champhai leh MZP-te ṭanghoin ruihlo do beihpui thlakna tura an din, ‘Ruihlo Dotu Champhai’ bul ṭan nan Champhai College auditorium-ah inkhawm buatsaih a ni.
29th. Thursday: Mizoram Ṭhalai Kristian Pawl (ṬKP)  chuan, MṬKP thurel bawhzuiin ‘Human trafficking chungchâng leh ruihhlo ṭhat lohzia inzirtîrna’ hun an hmang ṭan.ṬKP-te hian human trafficking changchung leh ruihhlo ṭhat lohzia inzirtirna an kalpui turah hian Social Welfare department an thawhpui dawn a ni.

30th. Friday: Governor Lt.Gen. Nirbhay Sharma chuan, Raj Bhavan-ah Mara Autonomous District Council (MADC) sorkar hotute a kâwm a; MADC chhunga hmalakna kalpui mek leh hmathar lakna turte a sawipui. Meeting-ah hian MADC chief executive member RT Zachono chuan, an hmalakna hnuaiah dan chi hrang hrang 22  pass a nih tawh thu te, sum harsatna an tawh ṭhin eng emaw chen chu chinfel a nih thu te, hmasawnna project pakua zawh a nih thu te, school building 15 syyak zawh tawh a nih thu te, rural housing scheme hnuaia rangva hlawm 4,286 sem a nih thute leh, sum dehchhuah kawngah handloom leh handicraft, vety farm, quarry, fisheries leh marboat-te an hman ṭangkai thute a sawi.

2nd. Tuesday: Siaha DC kal chhuak tur R.Zarzosanga chuan DC thar, Harleen Kaur hnenah DC mawhphurhna a hlan. R.Zarzosanga hian ATI director hna a chelh zui ang.

3rd. Wednesday: Mizoram police-te chuan tualthah thubuai vanga mana Central Jail-a tang Lalrindika (26) s/o Vanlalchhunga, West Lungdar, July 9, 2016-a tlanbo chu West Lungdar aṭanga km. 6 vela hla Tlawng phai¬ah an man. Lalrindika hi January 31, 2016 khan a pa ú fapa thah thubuaiah man a ni a, a thubuai Court-a chinfel a nih hmain jail aṭang hian a tlan chhuak a, jail aṭanga tlanbo thubuai pek belh a ni.

4th. Thursday: Mualṭhuam leh Kang¬hmun handloom cluster-a puantah zir chhuakte hnenah Mualṭhuam community hall-ah puantahna in sakna tur leh puantah khawl sem a ni a, minister PC Lal¬thanliana’n a hmanpui.

5th. Friday: Suangpuilawn khua chuan an khaw khel¬mual¬ah Sapthei Kût an hmang a, Horticulture minister PC Lalthanliana’n khuallian niin a hmanpui. Sapthei Kut hi AH&Vety minister C.Ngunlianchunga, NLUP Implementing Board chairman JH Rothuama leh bialtu MLA Dr Ngurdingliana te pawhin an hmanpui a; tlaiah kût ruai an theh nghal. In 400 vel awmna Suangpuilawn khaw mite hi kum 20 vel chhung sapthei an lo ching tawh a, tunah hian chhungkua 40 velin an ching mek. An thar chhuahte chu MIFCO processing fruit, Chhingchhipah an hralh ṭhin a, kum 2015 khan quintal 400 vel an hralh a ni.

6th. Saturday: Saron Veng Indoor Hall sak mekah celling siam lai a chim a, ceiling siamtute zinga mi Vanneihkima, Bethlehem Veng chu damdawi-in thlenpui a nih hnuah a thi. Lalfakmawia, Bethlehem Veng leh Lalhriatpuia, Chite Vengte an hliam bawk.

7th. Sunday: Durtlang leh Zuangtui inkar Leitan Ramthar Veng Chhochhuah hmun¬ah car a chesual a, Lal¬rinawma Lianhna (23), Lunglei Serkawn a thi. Motor-ah hian mi pali an chuang a, midang hian hliam an tuar vek a ni.

8th. Monday: MLA Chalrosanga’n a bial, Lunglei West chhunga chhungkaw 20 tana Rural Housing Scheme aṭanga rângva bundle li ṭheuh a pek chu a dawngtute hlân anni.

9th. Tuesday: Inter¬na¬tio¬nal Day of World Indigenous People (Tual¬ṭo Hnamte Ni) a ni a; Zo Re-Unification Organisation (ZORO) chuan an pisaah an hmang. ZORO chuan reso-lution pass in, Zofa ṭhen darh leh awp darh¬te chu rethei takin India, Myanmar leh Bangladesh ramri hrûlah tlemtê têin, hmasâwn chak lo takin an khawsa mek niin an tarlang a, “India sub-continent vela Zofate chênnaah hian socio-economic & traditional and cultural centre dinin, khawvel zirna changkangte el pha, Zo International Uni¬versity leh damdawi-in changkang, medical college-a thuam, Zofate’n an mamawh zirna changtlung leh vantlang hriselna pe thei tur din ni rawh se,” an ti.

10th. Wednesday: Mizoram State Library chu MJA Public Library hruaitute’n tlawhin, lehkhabu pindan hrang hrang an fang. State Library-ah hian kumin July thla tawp thleng khan member 5,896 an awm a, lehkhabu 60,056 an nei mek. MJA member-te hi State Library-a librarian Lalramliana leh assistant librarian Zirsangzuali ten an lo dawngzawng a, thil pawimawhte an sawiho. Lalramliana chuan, an awmna hmun a fuh tâwk loh avangin tlawhtu an nei tlem tih a sawi a, “A thawktute hi chu kan nuam a, building pawh kan nei ṭha a; mahse, mipui tana a chhawrnahawm lo leh hmang ṭangkaitu an tlem hi hrehawm kan ti hle a ni,” a ti.

11th. Thursday: Higher & Technical Education minister R.Romawia chuan, Aizawl West College-ah NIELIT Study Centre a hawng. NIELIT Study Centre tharah hian college zirlaite’n sum tlémtê chawiin computer course, Certificate in Computer Concept an zir thei dawn a ni. Aizawl West College-ah hian zirlai 942 leh zirtirtu 38 an awm mek a ni.

12th. Friday: Zirna-in, sorkar department leh tlawmnngai pawlte library enkawltute pualin Mizoram State Library bultumin Chanmari YMA Hall-ah Librarian’s Day hman a ni a, Art & Culture minister R.Romawia’n a hmanpui. He hunah hian library-a lehkhabu chhiar taimate hnenah lawmpuina hlan a ni. Art & Culture Minister chuan, Mizote zingah lehkha chhiar ngut ngut aiin titinaa fiamthu nena ri huau huaute an langsar fo nia sawiin, “Lehkha chhiar taimate kan ngaisang lo a, lehkha ziaktute pawh kan ngaisang lem lo. Hemi kawngah hian zir tur kan ngah a, khawvel thiamna tuikhur in a, mi dang hnena thiamna petute ngaisan nachang kan hriat a ngai,” a ti. Librarian’s Day hi kum 2009-ah hman ṭan a ni a, Father of Indian Library Science an tih, Dr SR Ranganathan pian ni, August 12-ah hman ṭhin a ni.

13th. Saturday: UPC (North East India) College Veng biak-in thar chu UPC Aizawl East district superintendent Rev. Rosanga Kawlni-in a hawng. Biak-in hi nuai 36/- vel sênga sak a ni a, hnatlang thâ 700 chuang sen a ni. A dung ft. 45 leh a vâng ft. 32-a liana sak a ni.

14th. Sunday: Zarkawt Presbyterian Kohhran biak inah Mizoram Synod chuan missionary tirh chhuahna inkhawm an hmang. Inkhawm hi Synod executive secretary Rev. B.Sangthanga’n a kaihruai a; Synod Mission Board co-ordinator Dr Robert S.Halliday in inhmelhriattirna hun hmangin, moderator Rev. H.Lalrinmawia’n missionary-te a tirh chhuahna hun a hmang.

15th. Monday: India Independence Day vawi 70-na chu ram pumah lawm a ni a, Mizorama a lawmna pui ber, Lammuala neihah chief minister Lal Thanhawla’n hnam puanzar a pawt pharh. CM chuan thuchah sawiin, “Kan sorkar chhung chuan NLUP hi kan sem zel dawn,” a ti.

16th. Tuesday: Governor Lt.Gen. Nirbhay Sharma chuan, Aizawla Mizoram State Museum a tlawh a, a nupui Jyotsna Sharma leh an mikhual neih mekte’n an ṭawiawm. Larsap hian Mizoram State Museum-a gallery hrang hrang a fang kual a; museum pawimawhna leh hnam rohlu vawn ṭhatna kawnga a pawimawhzia sawiin, “Mizoramin museum chhuanawm tak a nei a ni. Hnam ropui apiangin pi leh pute kutchhuak, sûlhnu leh nunphungte ngaihsan nacháng an hre ṭhin,” a ti.

17th. Wednesday: Aizawl Municipal Corporation (AMC)-in Bazar Bungkawna kawngpui kânna tur, pedestrian overbridge an siam thar chu AMC mayor PC Lalhmingthanga’n a hawng. Bazar Bungkawna pedestrian overbridge sàn zawng hi metre 5 a ni a, metre 20-a sei, a chhuat zau zawng metre 1.5 leh a chung khuhna hlai zawng metre 2.7 a ni.

18th. Thursday: Mara Autonomous District Council (MADC)-a nominated seat luah turin K.Mahei-a (Congress party) chu rinawmna thu tiam tira lak luh a ni. MADC-a nominated seat-a ruat Khaitha chu tun hnaiah a thih avangin a hmun ruak hnawhkhat turin K.Mahei hi lakluh a ni.

19th. Friday: Union of minister of state for Railways Rajen Gogain chuan, Ailawnga pasalṭha Khuangchera thlân a tlawh a, zahna chibai bûkin, pangpar a dah.

20th. Saturday: Kolasib District Anti Tobacco Squad-te chuan Diakkawn Bazar, auto-rickshaw leh taxi stand-ahte squad drive an nei a, phal lohna hmuna mei zu mi pariat an man a, dan angin pawisa an chawitir nghal.

21st. Sunday: Baptist Church of Mizoram (BCM) ni pawimawh ‘Theological Education Sunday’ a ni a, Mizorama Baptist Kohhran biak-in tinah hun hman niin, thupui chu ‘Pathian thu thil tih theihna’ tih a ni.

22nd. Monday: Tun hnaia ruahsûr nasa avangin Lawngtlai Chandmary Venga Vannawlthanga in, Assam type, chhungkaw pathum luah lai a chim a, mi pakhat a hliam.

23rd. Tuesday: April 2015-a V/C inthlanpui ruala inthlan ve theih lohna, Khawzawl Electric Vengah village council bye-elec¬tion neih a ni a, tluang takin vote thlak a ni.Helai hmunah hian general seat pali leh reserve pakhat thlan a ni a; Congress party-in seat pali an la a, MNF thlawp independent candidate pakhat a tling bawk. Independent candidate tling hi hmeichhia a ni. He inthlannaah hian vote 72.21% a tla a ni.

24th. Wednesday: Serchhipa Legal Metrology hotute chuan Serchhip khawpuia retailer-te ko khawmin, buhfai leh thil dang hralh chhuahnaa an hman ṭhin bûklungte a dik leh dik loh an enfiahsak. Bûklung enfiahte hi an dik tlangpui hlawm a, thil tê tham siamṭhatsak erawh pahnih/khat an awm.

25th. Thursday: Lungleia Legal Metrology enforcement, Anti Tobacco Squad leh police-te chuan Zobawk leh Hrang¬chalkawnah joint operation an nei a, dawr¬kai 14 hnen aṭangin ram dang meizial báwm carton 33 leh packet 330 an man. Cigarrete an mante hi a báwm a inziak tur – MRP, manufaturer leh health warning inziah loh vang leh chhiah pe loa India rama lak luh a nih avangin The Legal Metrology Act 2009 (Package Commodities Rules 2011) hmangin man a ni a; Farstar, V cigarrete, Windbody, etc. te zuar lo turin sumdawngte a hriattir nghal a ni.

26th. Friday: Guwahati-a North East Tea Conclave & Expo 2016 neihah Mizo Tea (Ngopa Tea Pvt.Ltd.) chuan Queen of Speciality Tea Award an dawng. Conclave & Expo-ah hian thingpui fê siamtu 180 chuang an tel a, Mizo Tea hian lawmman pahnihna a dawng a ni.

27th. Saturday: Upper Republic Branch KṬP chuan blood donation campaign an huaihawt a, Synod Hospital tan mipa 26 leh hmeichhia pakhatin thisen unit 27 an pe.

28th. Sunday: Mizoram Journalist Association vice president hmasa ber C.Chhunbura (92), Mission Vengthlang chu lungphu châwlin a thi. C.Chhunbura hian Zoram Thupuan tih chanchinbu a enkawl ṭhin a, kum 1972-1974 chhung MJA vice president a ni.

29th. Monday: MZP sub-headquarters, Lungsen chuan Lungsena middle school leh high school zirlaite pualin essay ziaka inelna an buatsaih. Pawl 5-10 zirlaite puala essay ziaka inelnaah hian thupui chu ‘Ram leh hnam humhalh’ tih leh ‘Ṭanrual hi chakna’ tihte a ni a; zirlai 50 vel an tel a ni.

30th. Tuesday: Ni hnih awh tur Mizoram Assembly Emergency Session chu ṭan a ni a, Good & Service Tax (GST) hman a nih dawn vanga India danpui tihdanglamna tur pawm a ni.

31st. Wednesday: Mizoram Assembly emergency session, ni hnih awh chu chhunzawm a niin tih tawp nghal a ni. Session-ah hian ‘The Mizoram Motor Vehicles Taxation (Ammendment) Bill pass a ni.Ni hnih awh Assembly session-ah hian paper pasarih pharh a nih bakah, Assembly hnuaia Committee hrang hrangin report pali an thehlut a ni.

Mind blowing scenes of Tlawng River in Mizoram