Kum 2007 atang tawh khan United States-ah hian “vote thlak” thei dinhmun a insiam ve thei ni tawh mah ila ka phur tehchiamlo bawk nen ka ngaihsak ngailo. Thiante hnenah pawh ka tumloh thu ka sawi zeuh zeuh tawh thin bawk. Kum 2008 a United States President thlanna a awm khan, ram tan a mi tha a ni dawn a ka hriat vangin (a campaign auhla vang a ni ang), vote thlak tumna lam nei chuang hauhlo chuan ka nupui hnenah Barack Hussein Obama vote ngei ngei turin ka fuih. Ka fuih mai pawh nilo-in ka tur zawk mah awm e. Vote tumna lam neive lem rihlo mah ila, awmna ram atan chuan mi dik leh ram tan a tha tur ni a ka ngaih chu party politics a buailo-in kalo tan ve em em ringawt mai a nih chu.

A campaign auhhla a ropuiin a ukil nih hriat tak a tawngkam thiam Hussein Obama chu President a nita ngei a, a lawmluh ni pawh a pui hep hep teh e! Mahse, kum khat pawh a ral hma chuan kalo tanta kha inchhirna leh inngeina deuh ka neita tlat pek a. A rei zel a, mihring lem tak leh America ram chakna haw tak (he seem to hate strong America), khawvel a chak bik nih duhlo niawm taka engkim kalpui a ni chhota zel mai a ni. America hmelma Iran a thlawp a, remchang a hmuh apiangin America hmingin ngaihdam a dil a, middle east a America thiantha ber leh Democracy ram awm chhun chu a hawta em em mai a nih kha. Tichuan, kum 4 a ral dawn… 2012 a inthlan awm leh turah Hussein Obama a ding leh chu a lungchhiat thlak lek lek zawk a ni. Tin, hna a thawh hma a Nobel Peace price an pek khan a lawmman siamtute a ti nep sawtin ka hre nghe nghe. Hussein Obama leh Romney te chu ram tan a tha lo tur nia ka hriat ve ve vangin vote thlak lam ka ngaihtuah leh talo a, ka nupui pawh chuan a tu zawk mah chu a vote ta lo a, kan chhungkua atangin 2012 inthlan khan vote a tla talo a ni.

Kum 2016 inthlan lo awm tur chu Republican party a candidate an tam hle mai a ( mi 17), mi tha deuh hlir nia ka hriat anni hlawm nghe nghe. Democratic party candidate te erawh: pakhat chu kan awmna state, Maryland governor hlui, a mayor nihna a record chhe fahran, governor a nih pawh a record tha nei lemlo a ni. Pakhat dang lah chu Democratic hming a ding independent candidate leh Socialist a ni. An hmeichhe neih chhun lah chu dawt sawi avanga a hna lian thawh hmasak ber atanga an ban, record tha reng reng kum 30 vel chhung neilo a ni. Republican lamah chuan politics lam a hming la nei ngailo pakhat, frank tak mai, mi pawisawi palh hlauhna neilo a thil a nih ang ang a sawi chhuak phawng phawng mai chu an chuk rawn ta luai luai mai a — a chanchin chhui chian chakna ka neita tlat!

Donald J. Trump, New York billionaire chanchin chu behchian dawl nia ka hmuh theih ang ang ka chhiar ta char char a, chutih pah chuan Hillary Clinton leh Socialist Bernie Sanders chu ka chhui thiam ang tawk tawkin ka chhui ve bawk a ni. Donald Trump a record chuan min hnehta em em mai a, liberal chanchinbu leh professional politician ten an beihrawn nasat em avang chuan ram tan a mi tha a nih rinna ka nei zualta sauh bawk a ni. Amerian politician ho hi (Republican & Democratic), an campaign lai a pawisa tam tham thawhtute hian an thuhnuaiah an dah vek a ni ber a, chumi chu ram tan a pawi telh telh mai a ni.

Kum 2016 inthlan lo awm tura vote thlak tur chuan inbuatsaih a ngaihna zawng zawng chu ka tifel ve ta hluai mai a, mak tak maiin ka phur ve nek lehnghal a! Vote thlak ni, November ni 8, 2016 hma chuan vote thlak hma duhte tan state 37 leh District of Columbia-ah vote thlak hma (early voting) phal a ni a. Inthlan ni (election day), November ni 8 a ka hman dawnloh vang ni hauhlo chuan Donald J. Trump ka tan em vang chuan November ni 2 chuan vote thlak turin phur fahranin ka inkhalh chhuak ta a ni. A hma a voters registration tilo ka nih vang chuan polling station a duty te chuan Republican angin nge Democratic angin register ka duh minlo zawt a. Kei chuan, independent rih phawt ka duh thu sawi pah chuan, “tun tum chu in register pawh ka tumlo, Mr. Trump ka vote hmu tur a ni tho tho,” kan ti hram pek a, duty nu pahnih chu an nui nasa teh asin!

Inthlan ni, November ni 8, 2016 zanah chuan vote chhiar ka nghak ran mai a, state hrang hrang an chhiarte chu ka thlir zel a. Politics lam a lehkhathiam te chu Pu Trump-a chuan dawt a sawi chhoh tirta zel mai chuan ka lawmna an siam hle. Zing lam a liberal media hoin phurlo zet a, “Mr Tump is going to be the next President of the United States,” an rawn tih te, Pennsylvania state, Democratic party lam hmun him chu 100% vote chhiar tlin dawn tepah pawh chak zawk anla puang duhlo tlat maite chuan ka nuih anti za a, an che naupang chhia ka ti hle. Tih ngaihna thlawt an neihloh hnu, November ni 9 zing dar 2:30 a a tlin thu an rawn puang chiah kha chu “America-ah hian Kristian nih a nuam leh dawn e,” tihna te chuan ka rilru a luah nghal a, “Obama chhuak chiah anga ISIS lam hian America an rawn bei zui zat ang em le?” tihte pawh chuan ka rilru a luah tel ve bawk. Ka nupui muhil chu ka kaitho a, Trump a tlin thu ka hrilh chu, “Tinge a tlin hma atangin min kaihthawh loh…” ti chung chuan lawm hmelpu takin min rawn kuah (hug) a… “a tling ang ka tih reng kha,” a ti sap a.

United States of America a ka vote thlak hmasak berah hian ka tisual emlo turah ka ngai, ilo thlirleh phawt ang aw. Tihsual tak leh inthan leh tikah thlan nawn tawhloh a ni mai. Tihsual loh erawh ka inring hle thung.

Thubelh: University professor tam takte hi liberal zealots an ni a, chutiang zinga mi, North Carolina professor pakhat, Andrew Raynolds chuan Republican party chuan chakna an lak nasat em avangin USA chu democracy pawh ni tawhlo ( ” they win so much, it is no longer a democracy…”) hialin thu a chhuah a ni. California a hmu tello aniang e Democratic party chak lawrlakna a ni si a! Hairehai

Lawngtlai AOC bial a independent tling LR Dingliana hi MNF Ticket beisei chang ta lo a ni a, MNF lam ticket set sual dik tak a ni.
Cheural bial INC chakna hi Vote 1 a ni a, EVM vote ah an in zat (draw) chiah a, Postal Vote 2 tla ah pakhat in INC vote in pakhat in BJP a vote avangin INC a tling a ni. Tin, he bial ah hian mi 3 khaw dang/bial danga vote thlak tawh Cheural khua a thlak nawn leh an awm an ti a, a linglo lam hian an complaint a thu a kal mek niin ka hria.(Chiang fak lo, Vote thlak nawn erawh chiang).
Pu V.Zirsanga Paithar bial a INC a tling hi CEM nilai a ni a, sorkar athar ah Chairman a ni ang.
Sekulh bial Apetow-a hi a khingpui MNF candidate in Vote 350 vel chauh a hmuh avangin in hnehna sang ber a ni.
Bazar bial a tling Pu C.Sangchhunga hi Minister Pu C.Ngunlianchunga u a ni a, bye election a tling ta lo kha a ni. Hetah hian independent Pu C.Vantlungluaia hian MNF lam a puih avanga INC kha tla ta ni berin a lang.
Lawngtlai vengpui bial a tling ta Pu VL Hmuaka INC hi term hmasa MNF hneh lo tu kha a ni a, tunah hian CEM atan thlan a ni.
Chawngte P bial atanga thlan tlin Pu Andrew MNF hi term hmasa a MNF tling awmchhun Pu B.Lalduhsaka fapa a ni a, a pa in May 28 a a boral san hnu khan a bial mipui ten chah chhuak in an thlang tling ani.
Term hmasa ah khan INC 19 MNF 1 Independent 5 an tling a, independent 4 in MNF lam ah tangin Opposiotion ah an thu a, pakhat in INC a pui thung a, tun tum ah hian MNF lam puitu te chuan MNF ticket an chang vek a, pakhat chiah Lawngtlai Chandmary bial ah Pu C.Lalsawmzuala thlan tlin a ni a, INC lam puitu Pu Thanglawma Bungtlang bial chuan INC Ticket a chang lo.Term hmasa (2010-2015) tawp lam 2013 a Pu C.Ngunlianchunga CEM nilai MLA a thlan a nih tak khan a bial ruak Bazar bial atangin MNF party Pu Glory Lalropuia Chinzah chuan INC rorel lai (ruling party) hneh in thlan tlin a ni a, tichuan MNF lam hian MDC 2 an nei ta a ni.
Diltlang bial atanga thlan tlin Pu C.laltlawmlova INC hi, Pu C.Ramhluna MNF ticket changtu in MDC EM nilai INC ticket chang ta lo Pu A.lalngailova a ken na bial a ni a, Pu Ramhluna chakna nen pawh a hneh zolo a ni.
INC tling ta lam ah hian Election vawi khat face na an tam vak lo, MNF lam pawh mi thar 3 anni.

Bible hian thil engkim deuh-thaw mai nih-phung leh zia hi a sawi lang a. A chhânna leh a siamţhatna lam thlengin a ziak leh vek bawk a. Zawlnei Isaia chuan, “Lalpa thu-ah chuan zawng ula, kim lo pakhat mah a awm lovang a, kawppui nei lo pakhat mah a awm lovang” a lo ti daih tawh a ni (34:16).

Chuvangin, Pathian ruat Hruaitu dinhmun pawh hian kawppui or side pahnih a nei a, Pathian ruat Hruaitute Hmuhsit leh Sawichhiat phal loh anga zirtirna a awm laiin, Hmuhsit leh Sawichhiat phal a nih dân a inziak ve leh tho bawk a ni.

2. “INDIRA GANDHI TLÂ MAWH SY”
Indira Gandhi Prime Minister a nih lai khân, Saihaah a lo zin a, Mara-mipui lo lawmtute chuan, “Indira Gandhi tlâ mawh sy” tiin an lo au rual dual dual a. Kawng kam velah-te pawh, an au hla chu ziakin (Poster) an târ nual bawk a. Aizawl lam aţanga a rawn hruaite zinga Pakhat kha an au hla chu an leh-tir a, Țawnglettu chuan, “Indira Gandhi tla rawhse” tiin an au a ni. An au-hla leh an Poster târ awmzia chu, “Indira Gandhi chu inthlan (election)-ah rêng rêng hian tla ngei ngei rawhse, tling tawh suh se” an tihna a ni e, tiin !!!

Indira Gandhi chuan mak a ti viau ni tur a ni. Saiha an thlen hnu chuan, Mara-ho zinga 1 chu a zawt ta a. Ani chuan, “Indira Gandhi dam reng rawhse” tihna a ni e, tiin a lo hrilhfiah ta a ni awm e!! Thil hriat fuh loh avangin, thil dik loh a sawi theih a, Hriatna a zim lutuk chuan, a inpal-hnawk theih viau bawk. A chungchânga “Duhsakna Au Aw” chu a ni lo zawng daihin hrilh mahsela Indira Gandhi hian a la nâ nghal ringawt mai lova, Thudik zawk leh thil dik zawk chhuina châng leh zawhna châng a hria hi a fing hle mai.

3. “SHIBOLETH” HAN TI TEH?
Mihringah chuan, Sawi tur sawi thiam lo, sawi loh tur sawi zawk a awm theih a. Țawngkam thiam leh lutuk a, engkim hre ber vek an awm leh bawk. Inti puitling over lutuk a, Upa cheta che an awm a, hetiang mi hi an ninawm. Puitling pui tawh, naupang chhe chêta che hi an ngei-awm leh-zual. Mahni nihna leh dinhmun leh thiamna a zir zela midangte zahder thiam te, midang lainat te, midang hrethiam te, midangte pheikhawk bun ve thiam te, midangte dinhmun-a indah thiam te hi ava pawimawh em!!!

Midangte dinhmun leh harsatna i hriatthiam pui loh chuan, engtikah mah mi ngaihsân leh ngaihsak i hlawh ngai lovang. Chaltlai tak taka midangte i ţawng-khum fo a nih chuan, miin an ţawngkhum ve che a nih pawhin i hnâr bâk i hmu lovang. In-sawifiah leh in-sawifihlim pawh tum la, i âwk thûk tial tial a ni mai. Chuvangin, i tihdân an zir thei a, i tihdânin an ti let ve thei che. He thu hi ava ţha êm, “Thil engkim miin in chunga an tih-a in duh tur ang apiang chu, mi chungah pawh ti ve rawh u” (Mt.7:12, Lk.6:31).

Bible-a kan hmuh angin, Ephraim-ho 42,000 zet an thih-phahna chhan kha “Shiboleth” tih an lam thiam loh vang a nih kha. Sawi tur sawi thiam lo, sawi loh tur sawi zawk ţhin, tih tur ti-thiam lo, tih loh zawk tur ti ţhin-te hi tihhlum vek tur ni ta se, tihhlum tur hi kan va tam dawn êm!!! (cf.Roreltu 12:6).

4. PATHIAN RUAT HRUAITU DIK TAK CHUAN…

4.1. SAWISEL & ÂNCHHELAWH A TÂWK ȚHIN
Sawisel tawk lo tur leh Ânchhe lawh dawng lo tur chuan Țhat-famkim a ngai a. Khawvela tungchhova piang zingah chuan ţha famkim chu an awm dawn si lo!!! Mihring chu tisual ţhin, bawhchhe ţhin, tlu ţhin kan ni. Kan tlûk tâk avanga kan tlûkna hmuna mu kumkhua tur erawhchu kan ni hauh leh si lo!!!

Chuvangin, Thufing chuan, “Mifing chuan Fakna aiin Sawiselna a lawm zawk ţhin” a lo ti hial. Sawisel leh Sawichhiat i haw tlat a nih chuan Hma i sawn ngai dawn tawh lo tihna a ni.

Hei hi a chhan chu, Sawiselna chuan Fellohna leh Chaklohna (sin & weakness) a hmuh-chhuah-tir a, Hmasawnna kawngah a hruai ţhin vang a ni. Hei hi a hria a ni ang, Lal Davida pawh khân, Simeia ânchhelawhna kha a ngai hlu a, a haw duh rêng rêng lo a nih kha!!! (2Sam.16:5-13). Sawisel tlâk tawh loh, Sawisel tur pawh awm tawh lo khawpa tlachhia, Sawisel peihawm loh mihring nih hi a zahthlâk zawk.

Miin an sawiselna che ţawngkam ila hriat chhung chuan lawm mai rawh. Nangmah-ah Beisei tur ala awm tihna a ni e. Church Reformer John Calvin-a khân, “Min sawiseltute hi kan Vantirhkohte an ni” a lo ti hial rêng a nih kha.

4.2. LUNGA VAWM A TÂWK ȚHIN
Theirah duh tak Thingkung chuan vawm a tawk thin. An vawm nachhan hi theirah an ei duh vang a ni. Thingkunga theirah ei tur chuan lawh emaw vawm-thlak emaw a ngai. Mahni Huan chhunga mi a nih loh emaw, a Thingkung ţona a rem loh viau chuan va lawn a, theirah va lawh chu a harsa a. Lunga vawm leh Sairawkherh-a perh-thlak a awlsam thin.

Chhungte ni lo pawnlam mite tân chuan theirah tlân duh-te chuan an vawm-thlâk leh an perh-thlâk mai kha an tih tur dik tak a ni. Theirah ei thei turin an vawm-thlak a ngai a, Theirah vawm-thlak beisei avanga Thingkung an vawm avang khan Thingkung kha an hmusit lova, an ti-nawmnah hek lo. A rah an tlan duh vanga vawm an ni mai.

Miin Lunga min vawm duh tawh lova, min Auh-Nawmnah peih tawh lova, kan Fellohna leh Chaklohna-te pawh min hrilh duh tawh lova, kan hmaia Hnap-khir bet te tak ngial pawh min hrilh duh tawh lova, kan Zipper in-zip lo-te hial pawh min hrilh duh tawh loh hun a thleng a nih chuan, keimahni-ah ei tur theirah beisei tur a awm tawh lova, beisei tur kan awm tawh lo hrim hrim tihna a ni zawk ang.

4.3. MIHRING RILRU A HMANG NGAI LO
Lal Davida nun atanga kan Zir-chhuah pawimawh tak chu, miin kan chungchâng thu-ah, thil ţha emaw, thil chhia emaw an lo sawi pawhin, ngaihtuahna sen hmasak ţhin hi a pawimawhin a finthlâk hle. Pawng-paw zuam, pawng-paw huat bur emaw, pawng-paw thinrim emaw, pawng-paw ba-sa ngam ringawt hian thil pawi a khawih ţhin. Zawhfiah tur zawh fiah a, in-enfiah tur kan neih te in-enfiah a, zir tur kan neih te zir a, sawifiah tur kan neih chuan sawifiah hi a lo ţha ber fo.

“I Thinrim lai leh Harsatna i tawh lai hian i Nihna dik tak a lan chian êm avangin, Tunge i nih chiah tih hriat tumin miin an châng reng che” tih hi a dik fu a ni. Lalna leh thuneihna i chan laia i ţawngkam leh chetdân te, harsatna leh buaina i tawh a, i thinrim laia i ţawngkam leh che-zia te khân i nihna dik tak chu nangmah ngeiin i rawn pho-chhuak ţhin a ni.

4.4. ÂNCHHELAWHTU LALPA TIRH A NIH A PAWM
Lal Davida kha, Simeia khân ânchhia a lawh a, hmusit takin thisen chhuah hmang leh Beliala fapa tiin a auh-nawmnah a, lungte-in a vawm a ni (2Sam.16:5-13). Mahse, Lal Davida hian, Pathian thiltum leh remruat a hre tlat. A fellohna leh a sualna-te avangin Pathian tirh Simeia hian a hmusit a, ânchhia a lawh a, lungin a vawm a, vaivutte-in a theh tih a inhria a, Lalpa Zilhauna a ni tih a pawm hmiah. A ţawngkam chhuak leh Simeia chunga a Thiltih-zui dân aţangin Davida hi a inhmu-chhuak chiang hle a, a nun pawh a insiam-ţha nghal ngei ang tih a lang (2Sam.19).

Mi tam tak chuan, harsatna kan tawh a, miten min diriam a, min hmuhsit a, ânchhia min lawh a, lunga min vawm a, min auh-nawmnah te hian mahni in-enlet na-châng kan hre lova, insiamţhat na-châng kan hre ţhin lo. Pathianin malsawmna leh thil ţha hmanga min koh-chhuah zawh tawh loh avang leh min siamţhat theih tawh loh avangin harsatna leh chhiatna hmangin min kova, min tlawh mêk a ni tih hriat-chhuah a hun tawh hle.

Fakna hla chuan, “Mihring siamţhat nân khawdur a ngai a ni” a ti a. Khawvel lama kan lawmna leh hlimna leh malsawm kan dawn-te hian kan nun siamţhat aiin, nawmchenna leh duhâmna lamah te, midangte hmuhsitna leh hnuaichhiahna hmunah-te min hruai zawk ţhin.

Thuneihna te, In leh lo ţha te, sum leh pai hausakna te, ei leh in ţha leh hriselna-te pawh hi hman-sual theih leh Pathian min hlattirtu leh suala min hruaitu an ni thei tih a hriat chian avangin Israel fate kha Pathianin warning a pe mawlh mawlh a nih kha (Deut.8:11-20, 31:20, 1Lalte 21).

5. DAM TUR CHUAN NÂ TUAR A NGAI
Lal Saulan, Israel fate au-hla “Saulan a sang sang a that, Davida’n a sing sing a that” an tih chu thudik tak a nih laiin a haw êm êm a, a nât pui tlat zu nia!! Davida huat phah nân a hmang zui hial lehnghal!!! Cancer nâtna tihlum thei tur chuan Chemo khai a ngai a. Chemo hian cancer zungzâm kha a zu that ţhin a. Chemo khai erawh hi chu mi tam takin an tlin lo ţhin. Mahse, Cancer nâtna aţanga dam an duh chuan, an nâtna that-theitu Chemo kha tlin lo chung chung pawha an khai luih a ngai ta ţhin a ni.

Tin, nâtna serious leh Cancer nâtna angah te hi chuan Nâchhawkna hniam (Paracetamol mai mai) pêkin awmzia a nei lo, a chhâwk mai mai thei tawh lo. Nâchhawkna chak chi a chiu leh Chemo vawi engemaw zât khai a ngai tawh ţhin. A Dam lo pawh khân a tuar hle ţhin a ni. A nâtna a nât dân leh a zual dân a zirin damdawi (tihdamna) pawh a sâng ve zel ţhin. Thil hote kan tihsual chuan, hote-in a sawi fel theih, thil serious deuh kan tihsual chuan serious deuhva sawi fel a ngai ve thung.

6. NGAIHTUAH-ZUI ATÂN
Thing rah duh apiangin vawm a tâwk duh bik. Thudik tak hre tur chuan hun a duh rei ţhin. Bel ri ring apiang hi a ruak a ni chawk. Sawiselna leh Sawichhiatna, Ânchhia leh Hmuhsitna ânka te hi hmasawn nân, harh nân, inhmuhchhuah nân hman a ngai. Sawisel tlâk tawh loh khawpa chhia nih a hlauhawm zawk. Sawiselna, Sawichhiatna, Lunga vawm, Vaivuta theh, Auh-Nawmnah te hi hmang ţangkai ang che.

Ram hruaitu emaw Sakhaw Hruaitu emaw Auh-Nawmnah hi a Dik a, a Dik lo thei bawk. Auh-Nawmnah ngai khawp khawpa awm loh chuan, an Au-Nawmnah kher lo mai thei. Kawng lehlamah chuan, Auh-Nawmnah ngaia awm kher lo pawh, Miin an lo Au-Nawmnah ve mai thei bawk. Auh-Nawmnah hi a Dik leh Dik loh lam aiin, Ka thiltih hi a dik em? Thil ţha leh thil dik ka ti em? Insiamţhat nân ka hmang em? tih hi a pawimawh ber.

Sawi deuh top teh ang. Central sawrkar leh kan thenawm State te hian Refugees zawng zawng deuh thaw te hi Mizoram hlir an kawhtir le? Chhan eng nge ni an le.

Nimin lam a Union Minister Rajnat Singh a’n Reang Tribal ho Mizoram a ho tur leh kan sawrkar poh in tha tak a lo dawng sawng tur in a tih kha.. (https://www.business-standard.com/article/news-ians/rajnath-singh-asks-militants-in-northeast-to-shun-violence-115021401086_1.html)

Reang Tribal (Bru) ka hriat te chuan Mizo an in tih ngai pawh ka hre lo a!!!

Eng poh nise, tripura a awm te, kan mizo chipui te, Bru te poh nise tunhma atang a awm a ni a, Tripura a ram tlem khu / khi Mizoram thin a ni a sin. He thu hi kan Chief Minister te hian eng a ti nge an hai der tlat le….

Ni kum Auguest a chhuak daih tawh a poh heng hi tar lan a ni tawh bawk. (https://www.theshillongtimes.com/2014/08/03/tripura-seeks-centres-intervention-to-repatriate-bru-refugees-to-mizoram/)

(https://www.tntmagazine.in/mizoram-state-government-not-in-favour-of-conducting-census-on-chakma-population/)

Mizorama mipui tam berin Politics kan hriatthiam dan chu- thuneihna leh lalna inchuh (Sorkar siam) hi a ni. Politician kan tih zinga tam tak pawh hian chu chu an ngaihdan niin a lang. Engti zawng pawha thuneihna chan hi an tum ber a ni. Chumi atana a chaw chaha kan hman ber chu Development a ni a. Policy kan insiam that siak a; policy tha neih aimaha kan la ngaihpawimawh zawk chu, ‘Engin nge mipui hip ber ang?’ tih hi a ni. Congress-in NLUP an sem a, party dangte chuan sawisel reng chungin a aia tam sem dan an duang chhuak thap mai a ni. Hnam leh Ram erawh chu kan agenda-ah hian a tel pha lo em em a. Opposition an nih laiin mipui te rilru thawi nan vei awm tak te chuan an insawi thin a, a tak takah erawh chuan kan thinlungah veina a awm pha lo a ni. Hei leh chen kan thenawm nena kan ramri kan ngaihthah theih danah hian chu chu a chiang reng mai a ni.

State ramri chungchanga kan sorkar ten an duh ber chu- an sorkar laia buaina a thlen loh hram hi a ni. Thil eng emaw lo alh chhuak hlek a awm chuan official te tlantir vat vat a, hmehmih vat vat, remna siam thuai thuai leh thil a pangngai anga dah theih hram (status quo maintain) kha an tum leh duh ber a ni. Mizo mipui te thinlung erawh chu a dam chuang miah lo a ni. MNF hunlaiin Vairengte daiah MZP-in Zorun an sa a, zankhat pawh a riah hmain Mizoram sorkarin a thiahsak leh nghal a ni. Politics in a tum, HNAM HIMNA leh ZAHAWMNA te chu an tihchhan a nih hmel loh. ‘Kan lal chhung hi chuan buai rih lo e,’ tih chiah an ngaihtuah a ni. Tunhnai Congress hunah pawh hian kan buai chinfel dan chu kan hmuh theuh a ni- official te tlantir vat vat a, a ngai anga awm tura ‘remna’ siam vat vat kha a ni mai.

Politics kan hriatdan hi lal khelh a nih tlat avangin heng party te kutah hian kan hnam hi a him lo a ni. Mi hnam hruaitute leh kan hnam hruaitute inan lohzia entirna pakhat chauh han sawi ila- 1995 velah khan Arunachalah Chakma leh Hajong te hnawhchhuah tumin Student Movement a chhuak chiam a. A lo chhuahna chhan chu Election Commission-in Electoral Roll-a thun tura a tih vang a ni. (Chakma refugee te hi kan hriat theuh angin 1964 vela Arunachalah hian lut an ni a, tun thleng hian roll-ah an la thun ve lo a ni). Hetihlaia an State-a thuneitu chu Congress sorkar, Gegong Apanga hote an ni. Anni chuan Student te kha an vuain an man ve lo a ni maithei. Sorkarin a tih zawk chu- Electoral Roll-a Chakma te thun ai chuan Election hi kan Boycott ang, Kan nihna an zawng zawng, MLA leh Minister te, bakah, Central lam nena an inzawmna zawng zawng, an party nihna thlengin, kan bansan ang, an ti a. Chumai bakah, MLA hote kha Delhi-ah kalin Boat Club-ah nawrhna an zuk nei a ni. ‘Election Commission-in thun rawh u, a ti alawm’ tih vanga State pawna pemchhuak Tuikuk te kan umzui a, E Roll-a kan thun hram te nen chuan ram leh hnam chu a inhim hleih ngawt ang le. Hetiang mite kuta kan ram leh hnam hi dah zel thei kan ni em?

Mi thenkhat chuan Hmasawnna ‘Development’ hi Politics ni berah kan ngai niin a lang. Hmasawnna chak hi thil engkim chinfelnaah kan ngai niin a lang. Hei vang hi a ni ang, Central fatlum tih te chu inzawrhna tha takah kan hmang thin a ni. Amaherawhchu hmansawnna ringawt hi Politics a ni lo tih kan hriat a pawimawh leh khawp mai. Ram thenkhat, hnam thenkhat, ram hmasawnnain a nekchep em em te, ram hausa, a ram leilungfate rethei em em si te pawh sawi tur kan hria ang. Kan hmasawnna hi mi tlemte vanneihna leh a tam zawk te ‘hlawhfa’ maia min siamtu tur a ni thei a. Kan hnam nihna leh kan hnam nunphung min hlohtir vek theitu a nihna lai te pawh a awm thei a ni. RAM NUAM leh HNAM ZAHAWMA min siamtu atan Development hi chu a pawimawh. Amah lawng lawng hi chu Politics ber a ni lo tih kan hriat a ngai.

Chutichuan, kan ram politics-ah hian ‘change’ a ngai a ni kan tih hian, ‘Anni aiin kan tha zawk ang, Corruptionah kan fihim zawk ang, sum kan hailut hnem thei zawk ang’ tih mai ni lo deuh, politics lungphum- Ram leh Hnama innghat Politics, engkim aia Ram leh Hnam dah hmasakna- HNAM DINCHHUAHNA, HNAM HIMNA, HNAM ZAHAWMNA HI A TUM A NI TUR A NI. Thildang zawng zawng hi chu a pahnihna vek a ni. Ram leh Hnam tan hian ‘Vision’ kan nei a: RAM NUAM, RAM ZALEN, RAM THIANGHLIM. HNAM CHAK, HNAM HIM, HNAM ZAHAWM nih hi kan tum a ni a. Chumi ram thleng tur chuan tih tur(Mission) kan nei zawk a ni. A tobul fuh tawh lo, a nihna tur ang tak ni tawh lo kan politics hi chu, mitharin rilru thar nen siamthat tumin bei bei mah ila, puan mawih tawh, puanthem thara bel ang chauh a ni ang. Chu ai chuan, bul tanna dika bul tan that leh hi a ngai a ni.

BJP a rawn len chhoh tirh khan, Aiyodhya-a Ram Temple sak (Ram Janmabhoomi) kha thupui bera an rawn neih leh India mipuiten kan lo hmelhriat tanna a ni. Hindu party-ah ngaih loh theih an ni lo. Politics hi a tobulah a dik loh chuan a ler lamah dik kan beisei ringawt thei lo. Zirtirtu te hi hnam siamtu an ni kan ti thin a; zirtirtu kan lak dawn erawh chuan a thiam thiam ai chuan, Ruling Block President fapa te kha lak an ngai tlat thin a. Sorkar sikul Primary levelah te chuan, khawpuiah phei chuan zirlai tur pawh kan inhmu ta mang lo a nih hi. Sawi tur tam tak awm mahsela, sawifiah kan tum ber chu Politics innghahna lungphum dik leh dik lo hian a kal zelna tur kawng hi a hril nghal a, thil engkim mai inthlunkhawmna chu politics hi a ni, tih hi a ni.

HNAM LUNGPHUM

Mizo thalai, kum 20-40 inkar kan thih nasatzia hi kan vei theuhin ka ring. A na, a pawi, an uiawm mai ni lovin, ‘Reproductive age’ an ni a, politics takin hnam tan a pawi hle a ni. Mihring awmphung pangngai a nih loh avangin a chhan pawh kan ngaihtuah thin ngei ang a; puh tur tam tak pawh kan hre ngei ang. Chung thil tam tak zinga pakhatah chuan- a bulpui ber zawk pawh a ni maithei- Innghahna bulbal nei lo hnam kan nih vang hi a ni ngei ang. Innghahna bulbal neilo hnam han intih chu na kan ti maithei, mahse a dik tlat si.

Innghahna-Culture: Hindu te chuan an sakhua leh an culture hi kum sangbi teh meuh lo inphun nghet tawh an ni a. Hnam hnuaihnung ber atanga chi tha ber, rethei ber atanga hausa ber khuan an nunphung kawng tinrengah khuan, eng hun leh eng hmunah pawh enge an tih tur an hria a ni. Sakhaw biak dan, chhungkua, khawtlang engkim maia an tih tur kha ramri kham fel sa vek an nei a ni. Keni hi chuan tuna kan rama kan inbenbel pawh hi kum sangbi khat pawh a la ni lo a. Hnam nunphung (Culture) innghahna ber pakhat kan sakhua, Christianity kan vawnna chu kum za awrha upa chauh a la ni a. India ramah kan awm a, nunphung leh khawsakna, hmasawnna kawng tinrengah khawthlangho kan entawn a. Transitional period-ah kan la awm a ni tih entirna tha tak an sawi thin chu kan inneih danah hian a ni. Kan Mizo danin man leh mual kan inhlan a, sap tihdanin kawrfual leh veil nen, Kristian serh leh sang danin biak inah kut kan insuih a. Inthen nikhuaah te Mizo dan kan hmang leh a. A duh chuan India dan nena chawhpawlhin India Christian Marriage Act an hmang bawk a. He entirna atang hian hnam nun ngelnghet kan la nei lo tih hi a chiang hle a ni.

Innghahna-Hnam: Mi hnam te chuan innghahna tlak, thlamuanpui tham hnam an nei. Israel te leh American te hi lo en ta ila, khawvel khawilaiah pawh awm sela an sorkarin thlen phak loh a nei lo. An sorkar ropuina leh chakna zawng zawng kha mimal pakhat nunna phenah khan a awm a ni. Keini chuan kan sorkar kan en a, hnam himna leh damna chungchangah chuan thlamuanpui tur kan hmu lo a ni. Kan hnam lah chu Mizoram chhung ringawt kan en phei chuan kan tlem em em a, thlamuanpui tham kan ni hlawl lo. Vairengte kan pel a, kan ti em em a; kan ram chhugah pawh hian kan thlamuang chuangin a lang lo. Trade licence, relkawng, state boundary, International boundary, tourism, ILP- min tithlamuangtu aiin min tithlaphang rutu an ni a. Hnam lian, hnam chak, hnam ngelnghet chu ni ila hetiang hian kan dawih bik lovang. Hnam insuihkhawm kan sawi hian, hnam dinchhuahna atana a pawimawh ang chiahin mimal hian kan behchhan tur leh thlamuanpui tur hnam hi kan mamawh a ni. Mizoram chauh kan ngaihtuah thin avanga hnam tlem hi kan ni a. Kan chipui Myanmar, Chin Hills, Bangladesh leh India ram State hrang hranga awmte nen hian kan inpumkhata kan inunau hi kan hnam tan leh mimal tin tan hian a pawimawh em em a ni. Hnam hi identity min petu a ni si a

Innghahna-Sum leh Pai: Economics stability hi rilru ngelnghet leh thlamuanna min petu tur a ni bawk a. Mahse kan ram dinhmun kan en chuan- siam chhuah nei lo, thar chhuah nei lo, kan ni a. ‘Nil’ der em chu a ni lo ang chu, buh ei tur pawh thlahnih daih chu kan thar ve niin kan hotuten an sawi. Bawng, vawk, ar, sangha kan lalut a; thlai engkim, vawkchaw dawl leh vai anthur thlenga lalut hnam kan ni a. Heihi ram leilung kan neih loh vang emaw, buh bal that theih lohna thlaler ram te ni ila chuan hriatthiam theih pawh a ni ang. Mahse chutiang chu a ni loa, ram leilung kan nei a, thei leh thlai engkim a that duhzia kan hria a ni. Lo neih hahthlakzia, ram tih chereuna a nihzia, buh chin hlawklohzia hi kum sawmthum panga vel kan sawi tawh a. He kum sawmthum panga chhung hian buh hi kan la thar tam phah miah lo a, thlahnih tla reng kha kan la thar a ni! Kum sawmthum sawmli liam ta atang khan, mi tam berina kan eizawnna loneih chuan hma a la sawn miah lo tihna a ni a. Chu chu thalaitena kan innghahna kan nu leh pa te dinhmun chu a ni. Thlamuanna min petu tur economics stability kan nei lo. Thalaiten hna hmu turin eng party emaw belh fuh ngaiin kan hria a, a belfuh ve lo tan chuan beisei bo hlauh a ni a. Thawhrim ai chuan party belh fuh a hlawk zawk a; kan inkaihhruai dan dik loh avangin kan rilru a no em em bawk. Tichuan, sau takin han sawi ta ila- innghahna bulbal nei lo kan nih vangin kan thalaite nun hi a tlolo a ni. Hei vang ringawt pawh hian bultanna dika kan politics hi kan tan leh a ngai a ni.

Food Security– chungchang hi han sawi zui hlek ila-khawvel hian eitur a tharchhuah tlem chuan keini chang ni lovin khawvel hi a buai thei dawn a ni a. Eitur man hi a san chuan ram rethei te, hnam rethei te, mirethei te hi a tuar hmasatu kan ni leh dawn a ni. Khawvel sik leh sa inthlak danglam zel avang hian- tuilian vang emaw, khawkheng vang emaw pawhin tuna buh leh bal tharchhuaktu ram te hian thar lo ta se…emaw, indo vang emaw, harsatna dang vang te pawhin eitur hi kan ramah hian lo lut lo ta sela, eitur thar chhuahna tur ram tha tak nei hian, kan ram kan cheibawl loh vang chauhin tampui mitthi kan lo tuar ve ringawt dawn a ni. He ram tha tak min petu Pathian chu a zahawm ngawt ang le! Kan Bible chuan, ‘Lal pawh thlawhhma ring mi a ni’ tih kha min lo ziah sak diam tawh a ni. Kan thlaichi, local variety te hi i vawnghim ang u. Chi chhuah ve thei tawh lo, hybrid te hi innghahna chi a ni lo. Changkha rah dawng no nalh em em mai, han chhumhan a DDT nam huam mai te in ei fuh ve tawh ngai em? Kan hriselna thlenga khawih pawi thei hi kan la lut vak vak a ni maithei a ni. Kan mamawh khawp chauh hi chu kan ramah hian i thar ve ang u. Chutiang tur chuan a nawlpuia lo kan neih pawh a ngai lovang, a tuimi ten lo an nei ang a, sorkar erawh chuan ram leilung chu eitlak turin a cheibawl mai dawn a ni. Heihi hnam politics-ah chuan ‘basic needs- food, shelter, clothing’ kan tih ang deuha telve tlata ka ngaih a ni a, thildang tih daltu tur ni lovin.

HNAM RILRU

Pawl hrang hrangah te, kohhran hrang hrangah te, party hrang hrangah te awm darh thin mah ila, kan zavaia min la phuarkhawmtu chu kan hnam tanna rilru hi a ni. Hnam thil a nih tawh phawt chuan kan pawl hrang nihna rilru te dahthain kan tangrual thap thei thin. Hetiang hi ni mah ila mi tam tak chuan he hnam thuthlung kengtu party hi awm tawh chuangin kan hmu lova, MNF leh Indian National Congress-a awm hi a danglamna pawh awmin kan hre tawh lo; chuvanga Congress leh MNF leh ZNP, MPC tea awm darh mai mai kan ni a. Pawl tinah hian hnam rilrupu thahnem tak hi an awm vek a. A tam ber phei chu MNF a la awm te an ni nghe nghein ka ring. A that vang emaw, mahni hlawkna tur vang emaw lam pawh ngaihtuah lova, hnama rinawmnaa ngaia MNF a la awm tlat te pawh hi tam tak an awm a ni. Hengte hian NLUP dawn ve te chu an duh loh vang pawh niloin, hnama rinawmnaa an ngaih avanga NLUP te pawh lo hnawl ngam te an ni ve a ni. An hotute aia hnama rinawm hi an tam mai. Chutihlai chuan kum 10 an lo sorkar tawh chhunga an party zia leh an hotute ziaah hnam thuthlung kengtu zia erawhchu hmuh tur a awm tawh chuang lo. Hetihlai hian hnam rilrupute hi mi rethei leh harsa te chauh an ni lova, mihausa te pawhin hnam hmangaihna hi an nei nasa hlei hlei thei ve tho. Mihausa ram zau tak tak nei te pawh hian, hnam tan a nih chuan an ram te hi an surrender duai duai thei em em ang.

Chuvang chuan a la beidawnthlak loha, hnam rilrupute hi kan la inpawtkhawm thei a, thil kan la thlak danglam thei a ni. Politics dik lo avanga thil chhe tawh siam tha leh tur chuan politics dik a ngai a. He hnam rilru atang chauh lo hi chuan kan inpawtkhawm thei tawh lo thung ang. Hnam hmangaihna rilru chauh hi kan politics siamthatnana kan ingnghahna awmchhun ani. Chuvang chuan hnam rilrupute hi kan intelkhawm ngei ngei hi a tul a ni. Tunah hian bul kan tan erawh chu a ngai a. Tunah hian bul kan tan lo a nih chuan nakin lawkah chuan hnamrilrupu te hi chharkhawm tur pawh kan awm lovang tih a hlauhawm. Politics hi sumdawnna emaw kan tih vek hunah chuan bul tha hi tan ngaihna a awm tawh lo ang a. Hnam hian boral lam a pan tihna a ni ang. A la theih lai hian kan tih a ngai a, kan la theih lai hian tih a ngai bawk. Tuna keiniho hian engmah ti lo ta ila, ‘ka theihlaia engmah ka lo tih loh vangin hei hi a thleng a ni’ ‘ka theihtawp tal ka lo chhuah loh vang a ni’ kan la tih hun hi a thleng lovang tih hi a sawi theih loh. “Keini hi kan ngawih renga khawvar kan nghah mai chuan, hremna kan tawk mai ang…”

ENGVANGIN NGE TUNAH KEINI HIAN

Ram hi Lalpa ta a ni a. “Roreltu hi Pathian ruat a ni” tih ringtute kan ni a. Roreltu hi Pathian ruat a nih chuan, a rorelsak mipui te chungah chauh ni lovin, a ruattu Pathian chungah pawh mawh a phur bawk a ni. Hemi rilru nena ram rawngbawltu, Pathian tihmi, ama mimal nuna Pathian be pawp leh Pathianin a hruai theih mi ram hruaitu kan mamawh a ni.

Pathianin hnam hi a hruai dawn a nih chuan, a hruai theih mi mihringin hnam a hruai a ngai a ni. “Roreltu an sual chuan Pathianin mipuite a hrem thin” kan ti awlsam leh mai thin a. Mahse, “Roreltu an sual chuan mipuite an tlu thin.” tih hi kan sawi dan tur ni zawk awm tak a ni. Israel te chanchina kan hmuh chian em em chu, lal a that chuan mipui ten Pathian lam an hawi a, lal a that loh erawh chuan mipuite kha an tlu mai a ni. Pathianin Mosia hmangin, thilmak tam tak nen Israel fate Aigupta ram atangin a hruaichhuak a. Thlakhat leh a chanve vel an kal hnuah, Mosian Dan laa ni sawmli sinai tlanga a thangsan hlanin, Arona hoin sebawngno lem an lo be hman der a ni. Solomona fapa Rehoboama lal laiin, lal Jeroboama khan Israel hnam sawm te a hruai hran khan, “Jerusalema Pathian be tura an kal thin chuan Davida chhungte lakah an lung a leng leh ang’ tih a hlauh avangin sebawngno lem pahnih a siam a. ‘Heihi in pathian, Aigupta ram ata hruaichhuaktu che u kha a ni’ a ti a, mipui chuan an be mai a ni. Chutiang zelin lal a sual chuan mipuiten an bawhchhia a, lal sual pali panga hnuah lal tha pakhat rawn chhuak sela, mipuite kha Pathian lam a hawitir leh thei mai zel a ni.

Khang hunlai khan Puithiam te, Zawlnei te pawh an awm reng tho; Pathian thu an tlangaupuiin vaukhanna thu te pawh an chhakchhuak reng tho a ni. Mahse lal khan a pawm miau loh chuan an sawtpui vak lo niin a lang. Zawlnei te leh Puithiamte ngaihnepna lam ni lovin, Pathian khan hnam kha chu lal leh roreltute hmang khan a hruai niin a lang tlat a ni. Chuvang chuan Pathian tihmi mihring hi hruaituah kan neih a ngai a ni.

Hruaitu hi kan zawng a, kan dap rilru a; kan van a ni. Hruaitu tur tha hi chu nei ila, tiin mi tam tak hi hruaitu tha zui tur chuan kan inkau a ni; mahse kan duh leh kan beisei ang hi kan hmu mai si lo a. Kan nghak a, kan thlir a, mahse nghahchhuah tur a awm leh awm loh pawh hi kan hre chiah lo. Thil kan duh chuan, mi thil kan dil chuan a dawnthleng lam kan lo buatsaih ve phawt te pawh hi a tul thin a. A dawnthleng tur hi lo buatsaih phawt mai ila, Pathian hnenah kan dil ang a, Pathianin min pe mai ang tih hi i ring ang u. Party politics ah hian Pathian a inrawlh ka ring lo, hnam politics-ah hi chuan Pathian a inrawlh thin a ni. Tuna kan ram leh hnam dinhmunah hian Pathian hi a inrawlh a ngai takzet a. Pathian lam kan hawi a, Pathianin min tihdam kan ngai a ni, a nih loh chuan kan boral thei takngial dawn.

Kan zawlnei ten an lo sawi thin, ‘thim thuahhnih’ tih te, ‘zoram khawvar’ tih te mi tam takin an buaipui a. Hengte hi a lo thleng ngei dawn pawh a ni ang; thuthluanga lo nghah thlen mai chi chu a ni lo. Kan hmalam huntawng tur chu engpawh nise kan lo inbuatsaih lawk hi a ngai tho tho mai, a zawlnei thu ngaihtuah miah lo pawhin. Kan hnam leh ram hi thangtharte tan kan kan lo buatsaih lawk a ni a. An tawn tawn tawng tura thlir liam mai tur kan ni dawn em mi? Tun hunah hian Zoram veitu tam tak an awm a. Mi tam tak hi kan ram leh hnam tana tawngtai hi an awm reng a, hruaitu min pe tura dil pawl pawh hi an awm reng bawk a ni. Pathianin kan mamawh tak hruaitu tur chu min pe mai ang tih hi i ring ang u. Kan dil a, a dawhthleng lo siam mai hi kan tih tur a ni e.

Ziaktu-Hmingthanzami 26 Jan 2015

UN ECOSOC ah tho hian United Nations Peoples’ Forum on Indigenous Issues (UNPFII) tih hi a awm ve a. Hei hi chu Indegeneous Issue bik sawihona forum a ni. UNPFII ah ZORO pawh member ni ve in UN conference ah palai an tir thei a ni. Mahse ‘observer’ mai ni-in ngaihdan an va thawh ve lemlo ni awmtak a ni. ZIUSA hi zohnahthlak NGO zinga UN a consultative status nei hmasa ber an ni hial awm e. Kum li(4) chhung UN Conference ah ZIUSA hian palai a tir thei tawh dawn a ni. Indigenous Issues leh Civil Society Issues hrang hrangah ngaihdan an thawh ve thei ang. Kum li hnu ah ZIUSA ten UNO ah “Activities Report” an pe lut ang a, kum li dang consultative status pekbelh theih an ni ang.

Zomiten UN ah Consultative Status an neih hnu ah a hmasa ber atan UN DPI/NGO Conference ah palai an tir nghal. He a vawi 65na UN DPI/NGO conference hi UN Headquarters, Trusteeship Council Chamber (Conference Building), New York, USA ah August 27 – 29, 2014 chhung khan neih a ni. Ram 117 atangin NGO 900 ten palai an tir theuh a. Palai 4000 chuang teh meuh an kalkhawm a ni. ZIUSA hmingin palai mi 30 conference ah an va kal thei a ni.

Zomi Innkuan USA hi US ram chhunga Zomi Community Organization lian ber a ni. Kum 2005 khan din ni-in 2009 khan US sorkar hriatpui an ni. Kum 2010 khan UN ECOSOC ah “Observer Status” an hmu a. Kum in ah Consultative Status ah an inhlangkai a ni. Hetia consultative status an hmu thei hi kan lawmpuia, an chhawr tangkai theih nan duhsakna sang ber kan hlan e.

Mizo te hi a tlangpui in kan zawldawh a, sawrkar hna chungchangah pawh kan ngawi kual ve mai mai in ka hria. Mizoram-ah chuan hna chu thawk lo mah ila, Mizoram lam a thawh dan tur ngaihtuah in hun rei ve tawh tak atangin ka bei ve tawh a, chutiang bawk chuan mi dang Mizoram lam a tawk lo te pawn in an tih ve tho pawh ka ring. MZU, MPSC, leh a dang te pawh ka rawn apply nual thin a, mahse ka hna dilna apiang atang thu mumal lo tak a hnawl ka ni fo mai a, RTI lam te pawh in ka tihpui ve tawh bawk a, mahse ka la hlawhtling chuang lo. Hemi ka rawn ziah lan duh kher na chhan chu, Mizoram sawrkar kan puh ngawt hi a dik em? Nge Officer thenkhat te hi kan puh dawn? Mi tam tak in application lak nan leh Speed Post ilo ah sum tam tak an sen ral ve tawh tho ka ring a, chu mai piah lamah chuan Qualification leh Required Experience an tarlan an tih danglam leh hnuhnawh thin hi dik in in hre ve em?

Hna zawng mek te tan a hriat reng tur a ka ngaih te ka rawn tarlang ve teh ang (Mizoram bikah).

1. No Money, No Backup : No Jobs
2. Govt. Jobs: No Chance (Mostly)
3. Qualification: Does not Matter

Ka BAD Experience:

1. MZU (Computer Programmer): Nikum (2013) thil daih tawh a ni a, kum 2012 khan Computer Programmer Post advertised a ni a, Qualification ah B.Tech/MCA or equivalent an duh a, Experience kha 2 Years in relevant. Qualification pawh an duh ang chiah ka nei a, experience pawh 5 years then thawn ka nei tawh bawk a, mahse eng mah min rawn hriattir hma in a Post Exam Result an website ah an publish hmiah a, RTI in ka han zawt fiah ve e ka ti a, chhuanlam te nawi tak in min rawn chhang let a, Post Qualification Experience Kum 2 tal neih a ngai an rawn ti a, tichuan fiah tak in ka Post Master Degree Experience te leh a dang te poh ka han thaw chho a, mahse chhuanlam dang an siam leh zel a, vawi 3 lai ka chhan let hnuah tih hian min rawn chhang let a “The University has the right to reject the candidate on any condition and you are treated as non-eligible candidate”, mahse a chhan an rawn tarlang duh chuang lo. Ka beidawng in ka chhang let peih tawh lo a, tun thleng in an Official website ah Computer Programmer post chu tu in nge hmu ta a, eng tikah nge personal interview te an conduct pawh an tarlang duh miah lo.
2. MPSC (Network Administrator / System Analyst / System Engineer): 20 September 2013 kha last date chu a ni a. Ni 30 June 2014 kha Rejection Letter ka hmu a, letter ah chuan Qualification Serial No.3 (5 Years Experience in Govt) kha ka fulfill loh thu min rawn hrilh a. Ni 1 July 2014 khan MPSC chu ka phone a, eng vang a reject nge ka nih tih ka zawt a, (Candidate zawng zawng deuh thaw reject an ni a), tichuan Central Government ah 5 and half years experience ka neih thu (as on last date of the application) ka hrilh a, tichuan ti hian min chhang let, “Mizoram Government hnuai ah khang Post ang chiah kha kum nga i thawh a ngai…!”. Central govt a Officer post contract a ka thawh hian an experience duh a phu hruk lo nge, tu emaw tan POST an khelkhaw le aw?
3. Etc, etc: Hna sang deuh leh sang vak lo dang tam tak poh sawrkar ah chuan ka apply nual a, mahse beisei bo tak in min hnawl hmak hmak zel.

Mi ram ah kan thawk a, selection ah an fair lo kan tih teh hian mizoram a recruiment selection chu a khum lo kher mai.

Free Corrution – Mizoram, 100% Kristian ram – Mizoram, a dik leh dik lo ka va hre duh ve…..??

Mizoram leiba chêng vbc. 5,455.95 a nih thu leh mi pakhatin chêng 50,008.06 theuh ba kan neih thu kan sawi zing ta hle mai. Bat neih duh lo leh nei ngai lo tia inchhâl mi fel tak takte pawh khân ba in lo nei reng zuk nia! Heti chung hian eng dang dâwn lovin kan la nui bâwk bâwk thei chu a ni si a le!

Vaibelchhe bi bat nei chungin minister leh parliamentary secretary-te hman tûr lirthei lei nân Rs. 3,41,50,000 an ruahman mai pawh ni lovin an chah thleng tawh zâwk lo maw? Thukhawchâng pakhat “Bumna ngaiah hmeichhia chu vawi sarih an bum nawn theih” tih thu hi in lo hre theuh tawhin a rinawm. Tûna kan dinhmunah hi chuan Mizoram mipuite hian hmeichhia pawh kan tluk lo tihna a ni.

Kan duh tak kan thlang chhuak tê têa an thiltih kan sawisêl leh vak vak a. Khawiah nge kan duhna kan tihlanna chu? Heti ang hi an ni tih hmân hmânah kan hre tawh a, an thiltih tam tak kan hmu a, ram tân hmasâwnna paw chhuak tak tak si lovin an thên an thên tih ka hria. Hmangaih tûr dik ‘Zoram’ hmangaih lovin anmahni an inhmangaih a, ram aiin lainate tânghma an hai zâwk a, ram aiin party worker-te an ngai pawimawh zâwk a, ram aiin thenawm khawvêngte an ngaihsak zâwk a, ram aiin an lîrthei an duat zâwk a, ram aiin an zawhte pawh an châwm thau zâwk asin.

Bumna ngaia bum nawn mai mai theih nutling leh patling kan lêng suau suau chu a nih hi maw. Mipuiten kan tuar a, kan rûm a, kan tap a, anni erawh sofa dûp nuam taka thuin eng eng uain emaw tawng nuam tâwkin an lem khawlh khawlh maithei asin. Kan duh tak kan thlang tling a, kan duhna chu sêl rual lohvin vote hmangin kan lantîr a, a hnu lama sawisêl leh chiam hi a hmeichhe thu lutuk. Mipa takin kan tuar tûr a ni a, huaisen takin kan hmachhawn ngam tûr a ni.

Duh ila, duh suh ila ‘Amen’ kan pêk a ngai tho tho. Tûnah chuan kan nghah rih a ngai, mi fel tawng thei lo kan nih hlawm hi. Kum nga hnuah chauh tawng thei dinhmunah kan ding rih. Nang leh kei hian sawi ve tûr kan nei lo. Kei phei chuan ‘trîk’ pawh ka ti ngam lo. Nang pawh i lo sawi ve tûr a awm lo.

Mizoram in buaina lak ata remna leh muanna kan neiha, State inhmuna hlankai kan lo nih tak dan chungchang sawi dawn hi chuan Pu Laldenga hming hi sawirik lohtheihloh a ni a. A lailum luahtu ber a ni. Pu Denga hi mi pianhmang fel tak, India sipai rinawm tak lo ni tawh thin, chumi hnuah District Council (Mizo Union sawrkar lai) ah pawh Cashier hna thawka engemaw vanga bang leh ta, mifing leh thusawi thiam tak mai a ni a. Thenrual kawm thiam leh mi rilru hneh dan thiam tak a nih avangin mite ngaihnat pawh a hlawh hle a. Kum 1990-a London khawpuia Cancer vanga a thih pawh khan Zoramin an sun tak meuh meuh a. Zofa chhulchhuak boral zingah chuan suntu nei ropui ber a ni hial mai awm e.

Amaherawhchu, mi tam takin “Mizo Hnam Pa” ti hiala an faka an chawimawi lai hian sawiseltu leh hawtu a ngah em em a. Tun hnaiah phei chuan a tir atang rengin independent a lo sual tak tak hleinem, a hna atanga bantu Pu Ch.Saprawnga a itsik vang mai mai alawm a lo nih ti-a sawi a ri zing ta hle mai. Mitthi tawh chanchin thalo lam hailan hi thil nuam lo tak ni mah se, Zoramin history bias lutuk loh nana an hriat hi a tul ve si avang hian lohtheihlohvin zalenna hi a lo sual tak tak lo emaw ni le aw tih rin theihna point hrang hrang ti hian lo tarlang ila :

(a). District Council sawrkar-in an suspend hmain independent a sawimawi ngai lo.
(b). Mautam laia mipuiin District Council hruaitu te laka an vuivai lai chu remchangah lain a hna atanga bantu Mizo Union tih tlawm dan a zawng tan.
(c). Mautam laia mipui rilru la tura pawl an din MNFF chu political party MNF-a thlak an tum laiin a dinchhan thuah Pu Vanlawma te nen an rilru a inhmu thei ta tlat lova. Pu Vanlawma hi independent duh tak tak a nih avangin MNF atangin a ban phah hial a ni.
(d). Sipai hotu pension a ni a. Independent kan sual chhuah dawn lohzia a hrechiang sa em em a. Chuvangin, a thinlung tak tak chuan independent a khello niin a lang.
(e). Independent duh tak tak mi Pu Vanlalngaia, Pu Malsawma Kawlni, Pu R.Zamawia, Pu Lalnunmawia etc te nen an inhmu thiamlo zel.
(f). Mi langsar tak tak Rev.Zairema te, Brig Thenphunga Sailo te, Pu Ch.Saprawnga te, Pu Ch.Chhunga te, Pu C.Pahlira te, Pu Lal Thanhawla etc. ten zalenna a sual tak tak lo tih thu nasa takin an aupui thin.
(g). A hunlaia thalai tih loh nu leh pa, pitar putar tam takte chuan zalenna sualah an ngai thei lo.

(Note : Heng point hrang hrang ka rawn tarlante khi a hunlai boruak hrephak, senior citizen thenkhat hnen atanga chhanna ka lakkhawm a ni a. An duh dan angin an hming chu ka rawn tarlang lo mai ang. fela)

Hetianga Mizo Union District Council sawrkar leh patling lungfing zawkten rinhlehna an neih tlat avang hian zalenna sual chungchangah pawh Mizo leh Mizote rilru a rual loh phah niin a lang a. Lehlamah sawrkar tihchhiatna leh phuba lakna hmanga, independent movement hmachhuana politics inchirthehna atan mai maia zalenna sual ni-a ring tlattu tan chuan thil ngaihthat thlak loh tak tur a ni reng a. MNF lam tan pawhin Mizo Union Party chu zalenna daltu leh an hmelma lian ber a ni a tih loh theih loh. Tin, lehlam tanna ti nghet turin kan puithiam zahawm, mi zawng zawng zah leh ngaihsan Rev.Dr.Zairema pawhin, “MNF party hi phuba lakna atanga din a ni a, a tir atang rengin zalenna an sual tak tak lo” tiin huai tak takin a sawi piap piap thin bawk si a.

“Pu Laldenga, District Council Office-a accounts clerk hna lo thawk, suspend tawk mek chu…….”..page 2, R.Vanlawma, Remna Lamtluang Documentary Souvenir

“Tam a lo reh ta a, kum 1961 lam khanin kan lo ruahman angin Famine Front chu tam thu ni lova, politics pawlah leh theih a ni tawh ang em? Tiin Pu Manliana inah inkhawmna kan nei a, tah chuan beisei loh takin a dinchhan thuah kan inkalh thlu der mai. Pu Laldenga`n, “Mizo Union mipui hian Mizoram State hi an duhin a lang a, an hotuten Hill State an nawr tlat thung si a. Stae nawr turin pawl chu din ila, tiin a rawt ta tlat a”. Keichuan, “A tir atanga kan lo tum independence hi kalsan thei kan lo ni hleinem, tin keiphei chu zalenna tak tak atan lo chuan politics ah tel ka tum tawg lo asin” ka ti ta a, sawi zawm leh ta lo chuan kan tin ta ringawt mai a.” page 4, R.Vanlawma – Remna Lamtluang Documentary Souvenir & Ka Ram Leh Kei by R.Vanlawma

“Pu Vanlawma leh Pu denga te chuan MNF an din ho va. India sawrkar chhutchhiatna hmarua atan America tanpuinain Paper Mill siam an tum a. Chumi tura hma an lak zel laia Pu Vanlawma thusawi chu le, “Calcuta-a ka awm lai hian harsatna a lo awm ta tih kan lo hria a. MNF President Pu Laldenga chuan heng America puihnaa lehkha khawl siamte hi duh ve hle ni awm a ka rin, a rawtchhuah a ni ve loh avang nge min lawmpui ta hauh lo mai a. Calcutta-a ka awm lai ngei chuan MNF Secretary ka nihna chu an lo titawp a. MNF Committee ah pawh tel tawhlo turin an lo pass bawk a. Chu chang a ni lo, chung ka biak ho hnenah chuan, “Vanlawma te hi kan pawl aiawh a ni lo ve” tiin a hrilh hlawm tih kan lo hre leh ta a.”…(Hei hian Pu Laldenga`n Independent hi kawrah mai mai a lo hmang emaw ni le aw tih min rin tir thei rum rum mai …) page 8, R.Vanlawma – Remna Lamtluang Documentary Souvenir

“MNF Party leh ramhnuai sorkar policy pui ber chu zalenna a ni chung reng siin, kum 1966-a Mzioram buai dawn tep, February ni 28 tlaiah khan Rev.Zairema chu India sorkar nena kan inkara palai turin Pu Denga chuan a ngen a. Heta tang hian India nena inbiakrem chu Laldenga policy ber niin a ngaih theih”…page 40, R.Zamawia, Remna Lamtluang Documentary Souvenir.

“Brig.Thenphunga Sailo hian Saprawnga tarmit tawmin Laldenga a hmu a. Saprawnga chuan a damlaia a auchhuahpui ngam loh laiin Pu Thena erawh chuan Lal thuthleng a thut lai ngeiin a tawng siah siah mai a. Huaisen tak a ni.” Pek 88, Bih Chianna by Lalrinliana Colney

Pu Ch.Chhunga, “In zinga mi tumah hi Independence hmu tur hian conviction nei pakhatmah in awm bik lo tih hian a hriat a. Chuvangin, in thil tih tumte hi sut leh hram rawh u”…..Pu Laldenga, “Kan thil tum hi hnukkir leh ngawt mah ila, kan naute ho kutah ka thi tho tho ang. Chu chu min hriatthiampui a ngai a ni”…..page 83, Ch.Chhunga chanchin – James Dokhuma

REMNA LEH MUANNA HNUAIAH – MIZORAM STATE :

“Buaina chhum hi kiangin a mawi rih lo, tapa tlaini len a awl mang e” ti-a kum 20 leh thla 3 chhung lai tah leh hathialna hmuna kan awm hnuin, Mizoram chu India ram state 23-na ni turin India Constitution Art. 371 – G ah ziahluh fel thlap a lo ni ta a. Chumia inremna thuthlung, Memorendum of Understanding an tih Point 13 lai nei chu MNF leh India sawrkar aiawh te chuan Dt. 30. 06. 1986 zan dat 1:00 P.M. an chuan an ziak fel ta a. Chu inremna thuthlung ziah a nih avang chuan ni 20 February 1987 khan khatih hunlaia India ram Prime Minister Rajiv Gandhi chuan India rama State 23-na ni turin MIZORAM chu STATE PUITLING-AH a rawn puang ta a. Chu a puanni, ni 20 February chu MIZORAM STATE DAY a puan a ni ta. Vawiin hi a cham vawi 27-na chiah a ni.

He inremna a awm theihna tur hian Congress Party hruaitute chuan nasa takin an bei a. Hetihlaia Mizoram Chief Minister Pu Lal Thanhawla chuan inremna atan a lalthuthleng chu Pu Laldenga hnenah a hlana, hemi rual hian Cabinet Minister Pu Liansuama, Pu Rokamlova leh Deputy Minister Pu Hiphei pawhin an dinhmun an kian bawk a, an fakawm hle a ni. He lal thuthleng in kenna hi inremna kipui ber a ni. He inremna (Memorendum of Understanding) ina a ken tel pawimawh em em chu MOU Clause 8-a “Inner Line Regulations tuna Mizorama hman lai hi State sawrkar rawn lo chuan siamthat emaw tihbo emaw a ni lovang” tih hi a ni a.

Tunhnaiah Protected Area Permitted (PAP) hlip mah se, Inner Line Regulations hi chu danglam ve lo tura ngaih a ni a. Mizoram sawrkar rawn lo chuan thlak danglam theih a ni lo. Amaherawhchu, he min hungbikna hi kan chhehvel hnamdangte hian an ngaimawhin vawi duailo Constitution a kalh tiin sawrkar laipuiah an hek fo va, kum 2008 kalta pawh khan an hlip zuai hman a nih kha? Heta thil lo lang chiang em em chu he min hungbikna hi engtikah emaw chuan hlih a la ni ngei dawnin a lang a. Chumi hunah chuan kan thenawm sumdawng hausa tak tak te an lo inzarpharh ang a, kan ram leilung hi awpbeh an lo tum ngei ang a. Keini a chhunga cheng Zofate kan lo inhmakhua lawklo a nih vaih zawngin hnam anga boralna thlen thei der tur thil a ni si a, bengsika kan ngaihtuah tlan pawh a tul hle.

Laldenga thusawi “India nena inberem tur chuan keini hi a tlawm zawka kan tan ngam a tulin ka hria. An Prime Minister hnenah Mizoram hi India ram bung khat a ni tih kan pawm thu thlen ila,Mizoram state nawr zui bawk ila. Tichuan, kan inrem thuai ang”…page 41, R.Zamawia, Remna Lamtluang Documentary Souvenir.

“…Hetiang taka Pu Laldenga`n India Union chhunga inremna kawng a dap reng chung hian Mizoram zalenna sualna kawnga a aihnahpui, ramhnuai sorkara a khaipa leh mi pawimawh tak tak mi 81 lai chu Mizoram zalenna tihchhiat tum, India hnuaia Mizoram hruai luh tum, a dumpawl tiin a man khawmtir leh mek lawi si a…”…page 43, R. Zamawia, Remna Lamtluang Documentary Souvenir.

Remna leh muanna chungchannga MNF leh MPC inremlohna chungchang Pu Thena thusawi, “MNF party chuan a dik adawk pawh thlu lovin, thiam chi tinreng hmangin min bei ta vak mai a.PC hruaitute an that a, bus te an hal a. Pachhunga University College bus te an hal thul.” Page 119…….(Hemi chungchang hi Speeches and writing tih Brig.T.Sailo ziahah chiang taka tarlan a ni bawk). Sipai Chanchin – Brig.Thenphunga Sailo

“MNF hruaituten anmahni duhthlanna ngeiin India danpui chhungah India sawrkar nena inbiakrem an duh ta a”. page 175, Sipai Chanchin – Brig.Thenphunga Sailo

Mizo Union ten State aia Union Terittory an thlan zawk thua Pu Ch.Chhunga thusawi, “State hi zawng kan naute rammu-in an rawn hawn atan i khek ang u. Independence hi chu an hmu dawn lo tih a chiang a. Nakinah rawn haw chhan tur an neih loh hlauh chuan hnam pumpui tan a tlawm thlak dawn em maia. Pasaltha sairam chhuak an hlawhchham a, mahse haw kawngah sazuk sakhi an rawn kap haw a, kutbeng em lova an lo haw ang hian an sazuk sakhi rawn kah haw atan I zuahsak ang u”…page 128, Ch.Chhunga chanchin – James Dokhuma

TV ka tih nun phat hian NEWS channel ka en hmasa deuh ngei ngei. Chanchinthar tur vak awm a ka hriat loh vang chuan Travel channel-ah kan thlak a, ‘Greatest mysteries: Buckingham palace’ tih chu alo chhuak dawn tan chiah mai a. Thil dangdai lawm ve hrim hrim lo nih bawk nen ka thlir ta zel a, Mizo ten ‘Lalbanga‘ kan tih mai, England lal, King Edward VIII chanchin chu Dr.Kate Williams (historian) leh midang dangten an chhuina, documentary chu a lo ni a.

Ka lo hriat thin dan kha chu a chuai nei zawngin a ni thin, “A nuthlawi hmangaih luatah a lal thuthleng a kalsan,” ti zawngin. Chumi piah lam ka hriat loh a lo va tam em! American nuthlawi, thlawi 2 ngat a nei ta a nih kha.

Lalbanga kha Hitlera thian tha tak alo ni reng awm a. Dr.Kate sawi danah chuan, Hitler nen khan innel tak an ni awm e. Chutih lai chuan ani Edward lah chuan a American nuthlawi ngaihzawn zunah chuan a uai hneh em em mai bawk a. Lal a nih bakah, Church of England hotu ber a nih bawk avang chuan an dan-ah nuthlawi a neih a thianglo bur mai si, a mangang chuan an ram rorel khawlah ngenna a thehlut ta rawih mai a ni. Chu a ngenna, American nuthlawi neih a dilna lah chu hnawl a ni ta bawk si, a ramah lah Hitlera thian tan roreltu nih a har tan dawn mek bawk nen chuan nuthlawi chu neih phawt a, a nau Prince Albert, a hnu a King George VI nita chu Lal tir lailawk a, boruak daih deuh hnu a lal leh a tum thu chu chiang fek fawkin ka documentary enah chuan an sawi a ni.

King Edward leh a neih tak, Wallis Simpson:

Tichuan a lal thuthleng atang chuan chhuk thlain Duke of Windsor a ni chho tain, ‘Lalbanga‘ a ni ta a ni. Hetih lai hian Hitlera chuan lal tir leh a tum nasa khawp mai tih chu an sawi leh a. Hitlera chuan, pawisa fai million 5 a pe ang a, British ho hnenah Hitlera chu mi tha tak a nih thu leh a pawl Nazi chu thlawp tur a fuih turin a thlem ta a, chu em chu a la duh ta lova, thian an nihna erawh a bo phah thu sawi a ni lo.

Lalbanga chuan Hitlera thamna la duhlo mahse Spain a zin lai a lakhran an la tum leh fan a. Historiante chuan an sawi danin, Spain a zinlai chuan a thuihhruaite hriat lova ruk bova Nazi kalphung angina a ngaihtuahna sukthlek dan sawi danglam an tum a ni. Chumi chu hriain British Prime Minister Winston Churchill chuan Nazi ho khawih buai phak loh tur a hlaah, Bahamas ah governor a dah a ni ta a. Indopui a zawh hnu pawh chuan a lal thuthleng chu chang ta chuanglo mahse, sawrkar tan tangkaina hrang hrang neiin a thih thleng Wallis Simpson nen chuan inneiin, France ah an hun hnuhnung an hman zawh tak thu chu ka en a ni. Churchill khan Lalbanga chuan Wallis Simpson chu nei mahse pawi a ti lova, mahse “‘queen’ ni lovin Duchess of Cornwall ni zawk sela,” alo ti ve tawh thin bawk a ni. Hei hi ‘Greatest mysteries: Buckingham palace’ tih documentary a tang a ka rawn ziah a ni e.

Thlalak ka zawnna lam a ka chhar, thubelh:
Mithiam dangte sawi hmangah chuan kumpinu sawrkar khan an milian pakhat, Lord Norman leh Germany a Reichsbank president hlui, Hjalmar Schacht hmangin National Socialist German Workers’ Party chu a rukin tanpuina an lo pe thin tih sawi a awm bawk. He party hi a hunlai chuan German industry neitute thlawp vek a ni nghe nghe awm e. Khatih lai khan kumpinu ram a mi langsar zualte chu Hitlera thlawpna a inhnamhnawih an tam bakah, Neville “Peace in our time” Chamberlin te, Bank of England governor, Montagu Norman te leh langsar ber King Edward te chu an tel niin an sawi.

Adolf Hitler leh banker Hjalmar Schacht:

Hjalmar Schacht (veilam) leh Bank of England hotu Sir Montagu Norman:

Thubelh source: https://dont-tread-on.me/?p=2113