Khampat Bung concert ka chhim ve a
Tetei Ralte
Ka bulah zaithiam pahnih an thu a, an ti ti niap niap a, ka hma chiahah MZP Gen Hqrs President a thu luah bawk a. Tlai khaw thim dawna chhuak chauh kan nih avangin Aizawl kan chhuahsan rual rualin thla de a hmuh theih nghal ti tih der a. Tluang taka tlanin zan dar 11 velah Khampat Bung venhimna atana suam tuaka hmala hmasa ber khua chu kan thleng hlawl a, zaithiam Ethel Varte, Tete Ralte, Jenny Colney leh MS Dawngliana Khiangte te chu zai tur langsar an ni mai a, mipui kan inkokhawm zo dawn em tih erawh a chiang lo.
May ni 23 chhun a ni a, “Aizawlah ruah a sura khalam engnge a an?” tiin min rawn phone a, keini lam pawh chu a men tuau tawh mai a, far fup fup thei dinhmunah a ding.
Serchhip Dist chhung MZP conference chu Town Hall-ah neih a ni a, Khuallian MP Vanlalzawma leh Khual zahawm PC Laltlangsanga te’n school naupang kalkhawm chu an fuih hlawm a, MP hian a luanliamna Oil bawk a sawi nasa hle a. Naupangte khan hrethiam pha chiah lo mah sela Oil chu Mizoramah a awm ngei a ni tih erawh an hriat a rinawm. MZP president ve thung chuan Youth Commission fiah fai takin a sawi ve thung.
Serchhip MZP Hqrs hian an district chhunga mi hmingthate chawimawina an nei nghal a, MZP President PC Laltlansanga chu khawtlang tana a thawhna avangin chawimawina hlan a ni a, Zoramchhani Youth Icon leh tun hnai HSLC exam-a topper pakhat chu chawimawina hlan an ni bawk.
Zirlai naupang kal-khawm an thahnem hle a, Serchhip hial Hall an nei rih lo a, badminton khelhna hmun chu “Town Hall” tia phuahin an hall hman ve mawp mawp a, zirlai naupang pung-khawm chu chu hall chuan a dawl zo lo hle mai a, zaithiam an zai ngat phei chuan pawna mite an tlankhawm tuam tuama hall kawngka leh tukverh zawng zawng chu hmai hlir a ni mai!
Chhun programme hi dar 1:30 velah hman zawh a ni a, zanlam programme hmang turin an inpuahchah leh sang sang a. Zan lamah hian P Lianhrima, LAD Director chu Khual lian atan hman a ni ve thung a. Anni hi May ni 23 chawhma lama rawn chhuak an ni a, mahse an motor chuanna a chiangkuang lo a, an rawn thleng hleithei ta tlat lo mai. Programme kha dar 7:00-a tan tur a ni a, he concert hi Khampat Bungpui tana tih a ni bawk nen tan a na angreng khawp mai. Dar 8 vel bawr ni tain ka hria, an rawn thleng thei ta hram a, khual lian telloa tan ngawt chi lah a ni si lo. Tlai ang reng takah chuan programme chu neih tan a ni a, mipui pungkhawm an sahawk nasa hle a.
Khampat Bungpui Committee aiawhin PC Biaksiama chuan thu a sawi a, a thusawi lai hian hnunglam boruak a ring hle a, concert en tura kal an nih avangin thusawi chu an tithei vak lo pawh a ni maithei, tum hnih thum lai khap hial an ngai. Khuallianin thu a sawi leh hnuah chuan concert neih tan a ni a, live band-in an zai aia rei zet mai inpuahchahna’na an hmang chuan ka mit a tikhawm hle.
Jenny Colney a rawn zai a, kan danglam chuang lo e, khawi hmunah pawh hian Mizote kan inlawmthiam em em vek tawh a ni tih ka hmu chiang. Mipui an khat si, an au ring bawk si, Tetei Ralte “Thadang” sa phei chu an bawr nasa mah mah a ni. Ethel Varte leh MS-a te pawhin lawm an hlawh ‘over’. Concert neih lai hian thawhlawm khawn a ni a, Khampat Bungpui tuiin a chim chhiat hlau tak tak mipui pungkhawmte chuan sum an thawh chur chur mai a ni.
Thil mak tak pakhat chu Khampat Bungpui awmna hrelo hi Mizo thalai zingah an lo tam khawp mai hi a ni a, an hming tarlang lo mai ila, kan zaithiamte zingah pawh Serchhip pelh Thenzawl kawngah Khampat Bungpui a awm emaw ti tawk an awm nawk. Serchhip tleirawl usher pakhat pawhin Lunglei lamah emaw a awm a ti bawk. Khampat Bungpui hi Burma ram, Chin Hills leh Manipur inrinna vel bawrah a awm a, hmana Khampat, kan pi leh pute phun kha chu a thi tawh a, tuna la awmte khi chu a zar atanga rawn chawr thar te an ni hlawm.
MZP leh zaithiam nena zin kan ni a, MZP Gen Hqrs ka rin ai daihin an lo felfai a, thil reng reng a nihna ang thlapin an ti ni berin ka hria. An financial secretary phei kha chuan thawh hi a hre mai mai khawp a, a zinpuite kaithotu a ni tluang deuh zak, mite mitmei veng tak leh zahawm takin an awm tluan thak a, ka fak hle nghe nghe a ni.
Nang leh kei hian Khampat Bungpui hi kan ngaihlu rengin a rinawm tlat, Mizo kan nih chhung chuan khi thingkung khian kan thinlungah hmun a nei lo thei lo. Chu thingkung chu tunah chuan i hriat angin chhe mai thei dinhmunah a ding ta a, nakin lawkah chuan kan venghim hmanlo a nih chuan, “He lai lui kamah hian Khampat Bung a ding thin,” tiin kan sawi mai mai tawh dawn a, chumi chu a thlen lohna turin tunah hian chak taka hmalak a ngai a, khi thingkung khi kan ngaihthah ngai lo a nih tih kan lantir a tul ve tlat. Burma sipai sawkar tan chuan thingkung pahnih khat ve mai a ni, keini tan chuan hnam ro a ni daih thung si. A humhalh turin nang leh kei hi kan penchhuak thei a, chu chu kan mawhphurhna pawh a ni ve tlat.
Page 1 of 2 | Next page