mi(sual).com

MPC-in ‘Rorelna Dik Lo Do Kum’ Puang : ZNP-in MNF leh Congress Tel Lo Sawrkar Duh

Aizawl, Jan 11: Nimin khan kum thar 2007 atan MPC leh ZNP chuan an pisa hawnna inkhawm an nei a, MPC chuan resolution siamin kum 2007 hi ‘Rorelna Dik lo Do Kum’ah Pathian hmingin an puang a, ZNP President chuan MNF leh Congress chu an sawrkar lai sawisel ve vein an tel loa sawrkar siam turin mipui an ngen. MPC Vice President Col.Lalchungnunga Sailo chuan an kum puan bul tan nan Mizoram larsap hmuh thuai a nih tur leh Mizorama rorelna (sawrkar) kal zel tlak a nih loh avanga larsap hnenah chuan President’s Rule ngenna memorandum theuh luh a nih tur thu leh chu chu a taka an bawhzui zel tur thu a sawi. ZNP President Pu Lalduhoma chuan a party chu kum 2006 chhung khan MNF thil tih dik lo hai chhuak nasa ber a nih thu a sawi a, Congress pawh an sawrkar kum 10 chhunga CBI ko lut duh lotu hmasa leh an sawrkar chhunga ram tana rotling hnutchhiah mang lo an ni a ti a. MNF chuan ram tana rotling engmah tih an nei dawnin a lang lo a, an tih ve chhun Tuirial Hydel Project lah an tikhawlo vek a ni, anni pawh hi kum 10 chhunga CBI ko lut ngam lo bawk an ni a ti. Mahse, ZNP chuan CBI an ko lut ngam dawn em tih erawh a sawi lo.

MPC kum thar pisa hawnna inkhawm chu Executive Gen. Secretary Dr.Kenneth Chawngliana’n a kaihruai a, a tupa Pu Sanglura Sailo a boral avangin Brig.T.Sailo chu a tel thei lo a, Col.Lalchungnunga Sailo, Pu K.L.Lianchia, Consultant leh Pu C.Lalsawivunga, MPCY Vice President ten thu an sawi. Pathian thuchah sawitu Rev.C.Lianhmingthanga chuan kohhran leh political paryty tinte leh eizawnna hrang hrang kaltlanga Pathian biak dante inennawn fo tul a tih thu a sawi a, Lalpa Pathian tih mi hnam chu an eng a thawl e, tih angin Pathian biak dan a dik phawt chuan Zoram mipuite an eng a thawl ngei ang a ti.
ZNP office hawnna inkhawm Vice President pu C.Vulluaia’n a kaihruai, hunserh Pu James Dokhuma’n a hmanah hian party president chuan Chief Minister Pu Zoramthanga thusawi a chhanna nia ngaih theihin Right to Information (RTI) Act chu kaw chhung enna a ni a, thuahfaina a ni lo a ti a. RTI Act hmangin an kaw chhunga thil awm hrang hrang kha ‘kan va hmu ringawt a ni’ a ti.

Pu Lalduhoma chuan kum hluia office khar nia Vice President Pu C.Vulluaia’n kum 2006 chu ZNP tana kum tha lo tak anga a sawi letling thawk tih theiha sawiin electric man sang lutuk leh in hmun lo ram chhiah sang lutukte chu ZNP-in kawngzawh leh total bandh te an siam avanga an duhthusam ni lo mah se mipui phurrit zual sutkian ni ta angin a sawi a. RTI Bill leh Budget Management bill ZNP MLA neih pahnih chauhin Assembly-a an putluh chu hnawlsak ni mah se sawrkar laipui nawrluihna avangin Mizoram sawrkar chu ti lo thei lo dinhmuna ding angin a sawi bawk. Municipality Bill an putluh pawh hnawlsak a ni nain MNF sawrkar chuan loh theih lohin a buatsaih mek a ni a ti a, Office of profit Bill tha tak neih nana sultutu pawh ZNP bawk a ni a ti. ZNP chu tu pawh sawrkar se thil tha an tih chuan a pui thin nia sawiin ram tana thil tha lo titute erawh chu tumah an hlahthlem dawn lo a ni a ti a, document nena MNF sawrkar thil tih dik lo haichhuak nasa bertu chu ZNP a ni a ti.

Pu Lalduhoma chuan mipuite chu tha thar nena theihtawp chhuaha hma la thar tura chahin ‘Min puih zel dawn phawt chuan tun hma aia nasain hma ka hruai ang” a ti a. Kum tam tak an lo vahvaihpui tawh nia a sawi an policy chu Zoram chuan a la mamawh reng a ni a ti. ZNP chu en chhin theih leh enchhin tlaka awm a ngaih thu a sawi a, “ZNP chu a mala kan sawrkar phak lo a nih pawhin ZNP MLA-te tel lovin tumah sawrkar an siam thei tur a ni lo. ZNP chu wine thar, a dahna savun peng pawh a thar kan ni” a ti.

Pu Lalduhawma chuan Congress chu an sawrkar laiin lehkhabu pali “Sualna Khurpui, Chhuanmang Rorel, Dan Bawhchhepa leh Eiru Thubuai Lianber tihte a chhuak a ni a ti a. MNF sawrkarah ‘A Phek Lehlam tih leh Puanhnuai Thil’ tihte a chhuah veleh tawh a, heng lehkhabu chhiartute hian MNF thlak nan Congress tha an ti thei ang em ? MNF chu rorel zel turin an duh ang em tiin a zawt.

AMFU-in Kumin Hian Project Rs.23,32,00,000 Hmangin Kalpui Dawn

All Mizoram Farmers Union President Pu R.Lalduhawma chuan kum 2007 mautam kum hi din chhuahna atana mipuiten tanrualna leh thawhhona tha neihna kum atana hmang turin a ngen. Nimina kum thar atana AMFU office hawnna inkhawmah thu sawiin Mizoram a din chhuah theihna tur chuan Pathian malsawm tlaka dikna leh huaisenna mahni hmazawn theuha hlen chhuah a ni a ti.AMFU pisa hawnna inkhawm hi Pu Lalhlawhliana, Vice President chuan kaihruaiin Upa R.Laltluanga, Treasurer chuan Pathian hnena inhlanna a nei.

AMFU Gen.Secretary Tv. H.Nguthanmawia chuan report pein Khawzawla YMA duty-ten grape juice an man chu AMFU Gen.Hqrs. hma lakna avangin YMA-te chuan a man chawiin an tichhia a ni a ti. Kum 2007-ah AMFU chuan sawrkar nena hma an lak tharna tur bakah project pathum a ruahman a ni a ti a. Hengte hi WADI Model Project, Mamit District (NABARD bultum) te, IWDP (India sawrkar Planning Commission bultum) leh Sustainable Farming Project, Saiha District (India sawrkar Planning Commission bultum) te an ni a ti a. Hei bakah hian project kal lai mek IWDP/Haryali, Lunglei District (DRDA bultum) atang tein kum 5 chhung programme atan Rs.23,32,00,000/- vel hmanga hma lak a ni dawn a ni a ti.

AMFU Gen.Secretary chuan Serchhip-ah pa chi siamna khawl leh Cold Storage chu AMFU hma laknaa bul tan tura buatsaih mek a ni a ti a. Agriculture Director neih thuai an duh thu leh Director atan Dr. O.P.Singh chu kut hnathawktute tan thawhpui a harsat avangin dah tawh loh ni se an duh thu Chief Secretary hnenah thlen a nih thu a sawi bawk.

Aizawl Permanent Bench Judge Thu Tur High Court-in Ruat

January ni 8 atang khan Guwahati High Court Aizawl Bench-ah Judge Justice A.B.Pal chu a thu a, ni 12 January thleng a thu ang. Guwahati High Court Chief Justice chuan January ni 15 atanga March ni 30, 2007 thlenga Aizawl Bench atana Judge tur (bench) a ruat a,February ni 26 atanga March ni 1 thleng leh March ni 3 atanga ni 9, 2007-ah chuan Division Bench Justice H.N.Sharma leh Justice A.B.Pal an ni a, a dang zawngah chuan single bench Justice A.B.Pal a ni.

World Bank Tanpuinaa Hnathawh Technician Education Project Thlirlet
Nimin khan Tourist Lodge Chaltlangah World Bank tanpuina hnuaia Technician Education Project III kal mek hlawhtlin dan thlirletna inkhawm (joint review mission meeting) vawi 11-na neih a ni a, Higher & Technical Education Minister Dr.Lalzama’n a hawng. He meetingah hian Ministry of Human Resource Development hnuaia senior officer-te bakah World Bank atangin Task Team hruaitu Prof.S.K.Srivastava hovin official-te an tel a, NITTTR, Chandigarh, Kolkata, Bhopal leh Arunachal Pradesh, Andaman & Nicobar Islands, Tripura, Meghalaya, Jammu & Kashmir, Nagaland leh Sikkim state atangin he project hnuaia mawhphurtu mi thahnem tak an tel.

MCS Officer Boral

Pu H.Vanlalsawma, 42 s/o Pu H.Thangkhuma (L) chu nimin dar 9:20 a.m. khan anmahni in Zotlang, Aizawlah lungphuchawl-in a boral a, vawiin chhun dar 12:00-ah anmahni inah vuina inkhawm neiin a hnuah thlanmualah vui liam a ni ang. Pu Vanlalsawma, kum 1990-a MCS, Under Secretary, Rural Development department hian a nupui Pi Laltlanthangi (Teteii) leh an fapa 4 a kalsan a, an fapa upa ber chu 1st.Yr.BA zirlai a ni. Pu Vanlalsawma hi SDM, Mamit, LAD Ssst.Director, BDO Bunghmun, ADC Aizawl leh EAC Aizawlahte a la awm tawh a ni.MCS Association chuan an memberte chu vawiina Pu Vanlalsawma vuinaah hian kim taka kal tur leh Association Blazer ha vek turin an hriattir.

ZNP-ah Mi 94 Lawmlut

Nimina kum thar atana ZNP Office hawnna inkhawmah mi thar 94 an lawmlut. ZNP Press release chuan hengte hi Tualpui, Saron, Bungkawn veng leh Aizawl North II atangin an ni a ti a. Kum 2006 chhung khan ZNP Gen.Hqrs.B inkhawm vawi 12, Executive meeting vawi 8 leh National Council Meeting vawi 3 leh joint meeting vawi 2 neih a nih thu Gen.Secretary Pu K.Liantlinga’n a report.

Press Release Tihdikna

Sawrkar press release nimina kan rawn chhuah “Mautam tam lo thleng mek atan Pangang Vulh a la tlai lo” tiha Khawvang khua tan tih kha Khamrang khua tan tih tur a ni a, press release siamtu lam tihsual a ni.

AMFU-in Jenny Chawimawi

AMFU chuan nimin kum thara an pisa hawnna niah boxer Jenny R.Lalremliani, World Boxing Champion hnenah chawimawina thuziak leh Rs.1,000 an hlan a, Jenny hi Shillong lama a awm lai a nih avangin a nu leh a pa hnenah AMFU President Pu R.Lalduhawma’n a hlan

May be related

• MSA, Bangalore Hruaitu Thar ( 2007-2008 )
• DMZP Hruaitu thar te
• HMA hruaitu thar
• Mizo Aw News Oct. 31
• Mizoram Politik Lungphum

Recent entries

• Rev CCmawia thih chungchanga thil mak 13
• Congress leh MPC thawhho tum
• Mukesh Ambani - The world’s richest
• Is your mobile original?
• Tv. Lalmuanpuia(The great Dancer)
• Too many shows?
• David feat Joseph Alu - When a Child is Born
• Who is the person who shouts in church?
• Watch Youth Icon 2007 Live!
• UK Zofate

This entry was posted on Thursday, January 11th, 2007 at 1:22 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.