Hringnun hlimtea i hman ve nan…
February 11th, 2008 5:06 pm | more than words | ZOaTlau | 228 views|
|
Heti hian Remkimi Cherput hla tharah chuan…
When you go home, When you go.. home tell them of us
Zingtian bawar zaitin thiam a lo zai
Zanmu tho ru hmelma ral a hrang e,
Ram hmangaih val rualte’n raltiang an kai ta e
Chhailai lungdi tawn leh ni tur tiamin,
Biahthu an hlan aw intawng leh ang maw
Mahse chhuihthang val an ti hian biahthu a hlan ta
When you go home, when you go home, tell them of us, and say hringnun hlimte’n i hman ve nan, fam khawpui ka lawi ta e
Hrailengte’n Zuapa tangah pawmin
Biahthu an hlan lamang let leh turin
Mahse hmangaih mamte, duhthu i sam sual ta maw
“Bawihte i nu nena hringnun hlimtea in hman ve theih nan vawiinah hian ka nunna hlan ngam hiala ka thawh a ngai a, ral rama kal te chu kei pawhin ka chak hlei nem…” tiin chhungkaw pa ber chuan ral ram chu a pan lo thei lo. A pawmlai leh a fapa duat lai tan chauh a ni lo, a khawtlang tan a ni, ral lianin an fate bawiha an chantira an in leh lo an hal a, an nuai chimit mai loh nan pasaltha chuan a nunna hlan ngamin a fehchhuah a ngai a, chutih hunah chuan ani indonaa kalte’n thu an chah thin chu, “When you go home, tell them of us, and say for their tomorrow we give our today…” midangte’n hlim taka nun an hman theih nana nunna hlantu chu ava’n hlu tak
em!
Hringnun hlimtea nupui fanaute’n an hman ve theih nan Chhattisgarh lam pan a ngai, pa berin sawrkar hna a thawk a, nupui fanaute’n pa ber thawh zar zovin ei leh bar an nghei lo. Chhungkaw pa ber rilruah chuan nakin zela ka fanaute’n rual an awh loh a, hringnun hlimtea an hman theih nan eng hna pawh ka thawk hreh tur a ni lo, tiin. Thawhhreh a nei lo a, hlimtea a nupui fanau an len theihna turin ‘thih’ a hreh hek lo.
Naxalite hel hrakkhawkheng awmna hmun ralti lam chu a pan a, ‘lu zuar an ni mai’ an tihna hmunah chuan zuk kalin Remkimi Cherput album ami tur hla putruina a rawn puanchhuah dinhmuna ding tain, “When you go home, tell them of us Hringnun hlimte’n i hman ve nan fam khawpui ka lawi ta e…” tiin. “Hrailengte’n Zuapa tangah pawmin biahthu an hlan, lam ang let leh turin, mahse hmangaih mamte duhthu i sam sual ta maw…” Zuapa chuan hringnun hlimtea i hman theihna turin fam khawpui a lawi ta e.
American tlangval, chhungkaw khawsak pangngai tak tan chuan indonaa kal hi thil chakawm tak chu a nih a rinawm loh. An ram ei leh bara a intodelh avangin nitin he ram hausaah hian pem ruk tum an awm a, man tawk lah an tam, nunna chan phah pawh chuti bawk. Hetiang ram nuama cheng, America flag chhuangtu ni bawk tan chuan mahni ram chhuahsan chu thil chakawm a ni thei ang em? Mahse 9/11 chuan American thalai rilru nasa takin a sawinghing a, Middle East Muslim firfiak huatna leh ram tana ral mut chakna nei an pung thur thur a, chu’ng zinga tlangval pakhat chuan Marine a zawm phah hial a.
Irag buaina chu a zual zel a, Muslim firfiakte ‘control’ hmunah chuan American sipai tangkhang an awm avangin chhanchhuak turin an feh chhuak a, an beiseiaia nasa daihin he hmunah hian chhiatna a lo thleng nasa a, America thurualpuite’n hel pawl an man an nghaisak dan an han hmuh chuan American sipai thalai rual ngaihdan a ni thei ta lo. Geneva Convention-in awmzia a awm lo, tharum thawhin he hmunah hian lamtang leh lamtang an inrikrak rap rap a, Muslim hel sawisak hlum mai tur chu an han chhanchhuak leh lai rih a.
Firfiak pawl hlir awmna hmun hlauhawm an paltlangna kawngah mihring an inhloh hnem hle a, “9/11 avanga he hun thleng hi ka ni a, hetiang mai maia ka tawp tur hi ka ngai ngam lo a ni,” tiin American tlangval chuan hel pawl kuta an thi mang mai tur a duh loh thu chu mittui parawl kuangin a auchhuahpui a, mahse a bula thu chuan, “Vawiin hian i bei(fight) tha em em a, hetianga huaisen taka i beihna hi nangmah ngeiin i chhungte i hrilh dawn nia…” tiin a lo hnem a nih kha.
Mahni ka ngeia, “Vawiin hun in neih theihna atan hian thih ngamin ka bei a, a dam pawlah ka rawn tang a ni,” tia pasaltha huaisenin mahni khua leh tuite hnena han sawi ve ngeite hi an chakin a rinawm. Mahse chu thlan lungah chuan eng nge in ziak? Anni chu an haw tawh dawn si lo, kha hmunah khan Hringnun hlimtea an chi leh kuangte’n an hman ve nan fam khawpui an lawi ta a ni si a, nunna in pek aia hlu eng thil nge awm thei chuang ang, chu pawh mahni duhthlanna ngei leh nghal chu.
Ralkhat atanga silai leh indona hmanraw tha pui puia insai chu hlauhawmin tihbaiawm viau mahse awm hmuna chemsena inpawmchilh ai chuan a ziaawm na chen chu a awm ngei ang. Fei kibar nei leh chempui hlai hlep hlawp hmanga ral han beihte chu a rapthlakin hetiang indona hmachhawn tur hi chuan ‘thingserh’ sah hial a lo ngai thin. “Thingserh” sata ‘ka khua leh tui tan a tawp thlengin,’ titute hi pasaltha huaisen mahni vawiin khawtlangte naktuk atana hlantu damlai hmuhtheihte an ni thin. Chutiang mi huaisen tam tak chu Zofate hian kan lo nei tawh a, tam takin chu ral beihna hmunah chuan an ‘thutiam’ chu an lo hlen tawh a, Jimmy L Chhangte te anga “thamrallo mitthla” kha chu Zofate hi chuan nei ni ila chuan Taitesena, Chawngbawla, Vana Pa etc. te mai ni lovin, he Mizoram nuama hringnun hlimtea kan hman ve theih nana fam khawpui lo lawi tate hming zawng zawng kha Aizawl khawpui laili takah hian han ziah tlar thut mai ava chakawm em!
Kan pasaltha kaltate khan he hmun hi min lo hruai thleng a, ram zau tak neia ‘hnam’ ni ve thei hial turin he ram hi min lo hauh sak a ni si a, an tel lo chuan he ram hi ‘inch’ khat pawh kan hloh a thiang tawh lo. An thlarau kan zah lo a nih chuan zah tur dang kan nei dawn em ni? He ram humhalh hian chhak leh thlang, chhim leh hmar ral an lo do a, “|hang leh tharte’n min dem lutuk ang e,” tiin thang leh tharte tan he ram tan hian nun an lo hlan tawh. American Presidential Candidate apiangina an thusawinaa an sawi uar em em chu, “America ram hi hetiang a lo nih theihna atan hian min thlahtute’n nasa takin an lo bei tawh a, generation dang lo la kal turte tan tiin hei leh chen hi an lo thawk tawh a, keini pawhin chu thu chu kan chhawmnung zel tur a ni a, nakin zela lo la cheng turte’n min dem mai lohna turin hma kan lak zel a ngai a ni,” tih hi a ni a, keini pawhin kan ram hi kan sawisak chhiat maia hnamdang hnena kan hlan then mai chuan nakinah thlah lo la awm turte’n min la nuih mai dawn a ni.
Tun dinhmunah hian ‘eirukna’ chu kan ram min ei hek mektu chu a ni ta si a, generation lo la awm leh turte hian tuna kan eirukna nasa tak avang hian an la tuar ang a, kan thla an la hau mai ang tih hi kan hlau bang lo tur a ni ta lawm ni le. Kan ram hi tun dinhmunah chuan khawih ‘hek’ chu a har deuh tawh ang, civilization ropui chhiat tanna ber chu ‘chhungril’ a ni, tih a ni a, tunah hian kan chhungrilah kan ram leh hnam chu ei chhiat mek a ni a. He eirukna hi em ni kan thlah lo la kal zel turte tana hringnun hlimte’n i hma ve nan kan tih taka chu. Eirukna avanga hausakna hian chhuan hnih bak a daih i ring em, kan Zoram, luchhum banchhum huama ‘thingserh’ sat ngam pasalthate lo sahzau saah hian eirukna chuan ro a rel ta si a, eiru lo ngam “thingserh” sat ngam kan awm em? Kan awm hunah kan thlah chhuan za tamte’n hringnun hlimte’n an hman ve nan fam khua kan lawi ve ta ania’ng chu.
May be related
- Peih ta hrim hrim chu
- English tak hi chu aw!
- Mizo in Stockholm
- MVI Road TAX pekna counter a changkang!
- SBI main branch a hnathawk te hi
February 11th, 2008 at 5:10 pm
He thu hi Kohima a Bristish sipai tu tih hriatloh sawi, lungphun a an ziah a ni :D…. When you go home, tell them of us that we give our today for their tomorrow…
February 11th, 2008 at 11:51 pm
Naxalite hel te hi ral emaw hmelma ang hrima en tur an ni lo va. A ram leilung fate leh kuthnathawktu pawl an ni a. An ni hian India sawrkar lakah phut an nei a. Hei hi Central lamin a pek duh loh avanga nuar leh hel chauh an ni a. Tin, kuthnathawktu emaw Loneitute emaw ho hian an tan em em a. Misual ang hrima beih chiam chiam leh Tihchimit tuma beih vak kher a ngailo a ni. Engtichiahin nge kan Mizo tlangvalte hian an va nawr kan hre lo. An duty piah lamah chuan che chuh a ngai hranlo fo ang. An ni pawhin lo inven leh an ram leh a leilung venhim chu an duty a ni.
MNF hunlaia India Sipaiten Mizote chunga an chet ang bawk dinhmun kha tuna an dinhmun hi a nihna lai a awm ve tih hriat tel fo tur a ni.
Chuvangin kan Mizo Sipaite hian a lo a luat leh a chuangliama chet chuh chiam chiam ai chuan, sawrkarin an tih tur a ruat chin chiahah rinawm takin duty mai se, an nunna atan pawh a him ang a, inthah ve ve theihna hun remchang leh dinhmunah pawh ding se, inlainat tawnna nen an in enliam mai ang tih hi ngaihdan chikhat a ni a.
Thil dang chu sawi rih lo mai ila..
February 12th, 2008 at 1:56 am
Ziak tha hle mai. Ka duhna lai ka rawn qoute:
“|hang leh tharte’n min dem lutuk ang e,” tiin thang leh tharte tan he ram tan hian nun an lo hlan tawh.
He eirukna hi em ni kan thlah lo la kal zel turte tana hringnun hlimte’n i hma ve nan kan tih taka chu?”
February 12th, 2008 at 9:45 pm
@Zorun
Kan Mizo sipai te khan sawrkar in ti tur a a tih chin bak piah lam lam a an beih thawm keichuan ka hre lo. An Off duty neih ve ni ah an bazar a, an bazar zo kha pvt motor hire in an camp lamah an kir a.. hetah hian landmine an chil puak ta kha ani mai a….. keichuan ka chhuan zia mai chu.. bakah Naxals te hian pawisawilo nunna engzat nge an lak tawh? chutia tih ah chuan Bin Laden te poh an Allah in ti tura a tih avanga Jihad puanga thil tha tak ti ah a in ngai ve thova…chutiang zelin extremist/terrorist org dang dang poh. Naxals ho poh an thil demand kha India/khawvel tan a tha ber lo ani mai a. i sawi anga kan pawmzam zel dawn anih te chuan kahwvelah hian misual an om thei nang!!!!
@Ku Zoa: ziak tha lehpek hle mai….
Hnam Pasaltha te thisen chuan min au ve……….
February 12th, 2008 at 9:54 pm
@majESTY_YTSEjam, i sawi hi a dik em em. Ka tarlan ang hian Mizo Sipai te hi an che hleihluak e, ka tihna a ni chuang lo va, an vanduai tih chu tlang hriat a ni. Mahse, hun lo kal zelah fimkhur phah nan leh hmelma ang hrima an beih chiam chiam a, tihchimit vek an tum chuan an che chhe zawk zel ang tih zawk hi ka tarlan tum ber chu a ni.
A ram neitu te an nih piah lamah mipuiin an tan tlat hi Sawrkar pawhin tih ngaihna vak a hriat lohna ber chu a ni. A bik takin an khawsakna khua leh thingtlang ah phei chuan an tan ru em em tih hriat tur a ni a. MNF hunlai nen khan khaikhin ila a dik ber ang. Mahni ram leh hnam venhim nan chuan miin thih a ngam tih hriat tur a ni a. Officer pakhat duty ve pakhat chuan kal phal lohna kawngah an kal.. a ti a.. eilo tak tak an tam hle. An kal tak tak a ni. Hetianga miin thudik a sawi hian thihna a thlen tawh avangin sawi chiah an ngailo mai thin a. Mahse, a himlo chin kan hriat renga kan kal luih chuan kan la thi zel dawn a ni.
February 12th, 2008 at 10:08 pm
@Zorun
Naxalite hran na hmun/state a awm ka ni a, an chanchin chu ka hre tam khawp mai. tih chimit vek tum chi ani ka ti lo a, mahse an thil demand hi thil tha ani lova. tin pawisawilo mihring tam tak hnenah tanpuina etc hnehchhuh a laksak an chin avang te, vantlang thil eg: telephone tower,irrigation project, power plant etc… tih chhiat an ching a, mipui, sawrkar/force lam tan chuan hnawksak tak chu an ni. MNF ho poh an thil tih ah khan kan fak tehchiam loh hi maw…..ka pu leh ka pa te sawi dan phei chuan kan in halsak kan ni a, mittui tla zawih zawih a mahni in kang thlir chu hreawm an ti khawp. an duh ang ngei khan independent ta ngat ila kan lo retheih zia tur mai chu(h). kan MNF unau te pawh tunah chuan India sawrkar hnuaiah a kut dawh chak chak an nih leh tawh hi……..
February 12th, 2008 at 10:20 pm
A lawmawm hle mai a hmuna awm ngeiin mi rawn chhang a. I sawi ang hian finchhuah a, inhal lem lo taka an duty rinawm taka an tih chu kan duh sak vek hmel. MNF hunlaia Vai sipaiten Mizo hmeichhiate an pawng sual a, Mizo in an hal a, pitar leh putar te an vua a, khua an khawm a, ramtuileilo vin mi tam tak an siam ang em kha chu a thleng lo turah ngai ila. Kristian kan nihna hrerengin, hmelma te hmangaih taka hnawksak lemlo taka an awm ka beisei a ni. Chu chu A mizo ang a, a Pathian thu bawk ang chu.
MNF khan independent lo sual chhuak se kan that pui lohna tur a awm chuang lovang. Kan retheih leh hauhsak chu keimahniah a innghat ang chu. In dang tir kan nih phei chuan kan rethei lo thei nang. Tu fa mah hausa sa takin a indang ngai chuang hleinem. Tuna kan dinhmun en hian a lungawi thlak chuang em ni? pawisa hman tur a awm laiin kan moral lamah kan tlachhe tho chu a nih hi? Ram khat ang te chuan awm teh reng ila, taimakna leh thawhrimna chu kan ta a ni zel ang a. Rethei mah ila, kan hnam a him ang, harsa mah ila, kan taimak phah ang. Kan khawsak lo harsa deuh pawh ni se, kan la rinawm zel ang. Khua a lo rei ang a, Mizo Country a han awm te chu chakawm deuh a sin. Khawvel ram tinah Mizoram Embassy a han awm ve ang a. Kan ram awmna lah hi a laili riau leh nghal a. China in min tlawn ang a, India pawhin min tlawn lo thei lo vang. Bangladesh leh Burma tan pawh Mizo country chu biak chhiat rual a ni dawn si lo va. In sumdawn tawnna hmun ropui tak pawh kan ni thei a sin.
Engpawhnise, MNF rammu te thisen kha kei chuan ka zah em em. Mizo hnam tana beitute an nih avangin.
February 12th, 2008 at 10:20 pm
Mizo in (hun awl/theih chuan)ram dang a kan thil chin kan in hre vek….a fel fal bik kan nih hawt loh chuan….
February 12th, 2008 at 10:47 pm
Keichu Mizo country kha nei ta ngat ila chuan tuna kan hruaitu te tho hian min hruai anga, kut kan dawh tho ka ring.
Chuan kan khua (AP govt.) chuan PWG(main naxal operator out here) te an banned na kha an hlip a, peaceful taka an thil duh tharum tel lo a an ngiat an phalsak(public property an tih chhiat erawh chuan man an ni).
Ka ngaih ve danah chuan Maoist(*read* Naxal) ho hian an thil duh hi developing country(India te ang) tan chuan thil tha ber ani hauh lo. Khawiah emaw (hetah chuan srikakulam project kan tia.. a kal mek tho a) Power plant turu lutuk.. mi rethei (naxal ho demand dan chuan farmer ho hian lo neia ei zawn bak hna an nei lo) tan a thil chenfakawm lutuk tur an boycott tlat mai te.. etc… hei vang tak hian ania an thil demand hi a hlawhtlin loh na tur chu. Farmer ten irrigation tha an neih theih na tur chuan Power an mamawh a.. chu chu Naxals/PWG ten an phal si lo… sawrkar lu an ti hai tak meuh. a enkawl tu(officer te….. an district collector IAS officer thlengin) Ransom tam tak demand in an ru bo thul…. hei hi farmer/thingtlang miretheite tana hmakhua an ngaih vang ani thei tlat si lo alom. Political advantage atana political party tam takin naxalite ho an hman avangin tanpuina an dawng teuh teuh a… weapons lah an ngah phah. Hei vang tak hian lu an ti hai tak meuh. Lo neia eizawng ringot lo hian industry lamah mipui te kal sela ti a sawrkarin chumi khami area a industry liantham(lo neia ei zawn a thlansa phul kai a hnathawh ngai lova a hma a an sum lakluh aia tam an dawn theih na tur) din a tum thlengin an do zel si…….. heti ringot chuan ram hian hma a sawn don tlat lo alom. Sawrkar tan chuan do mai loh chuan…..
BTW @H.Vangchhia i soi khi keipoh ka lo hriat dan..When you go home, tell them of us that we give our today for their tomorrow… tih khi….
February 15th, 2008 at 1:05 pm
Ram leh Hnam tana nunna hlan te an ngaihsanawm hle mai. THEY TRULY GAVE THEIR TODAY FOR OUR TOMORROW……. kan theihnghilh lovang !!!!