Zoram tana ka vision
October 5th, 2008 7:56 pm | Politics, more than words | Zorunpuia | 396 views|
|
A tlangpui tak tak chauh lo tarlang ila, heng te hi a pawimawh dan indawt thlap thlap pawh a ni chiah chuang lo. Mithiam zawkte cho chhuah nan leh sawiho atan ni pah fawm se. Chutih laiin fakselna leh sawiselna pawh inthlahrung hauh lovin rawn tiri ula, siam that ngai lai leh felhlel laite pawh tihthat theih loh tur a awm lovang. Tin, a Mizo thei ang ber leh hriatthiam awlsam ber tura ziak a ni.
1. Power (Electricity)
Power hi khawvel hmasawn zelin a kentel zinga pawimawh ber a ni a. Power supply a that loh chuan engmah hi tihnun theih loh tluka POWER hmang khawvelah kan awm tawh a, kan la awm zel dawn niin alang. Hei hi hman hmana nei daih tawh tur kan ni a, tun thlengin kan la nei chauh hle. Atchilh kan hreh deuh a nih pawhin finchilh tlak a ni a. Hei hi kan ram hmasawnna bulpui ber tur pakhat a ni. Kan thenawm State dangte chuan Power an nei tha hlawm tawh hle. Zoramah chuan mithiamten company dinin industry, factory, IT Company etc.. ti dawn se, POWER a that loh avangin sum siam tak takna tur engmah a tih tak tak theih loh. Tlang leh Tlang inkara Ropeway te siam ve dawn pawh ni ila, Power a awm si lo. Khawvel thiamna changkang tak tak kan ral hriat te pawh hi Power nena tihnun ngai vek mai a ni tawh si a. Chuvangin Power duhthusama changtlung kan neih a hun tawh hle mai. I atchilh ang u khai.
2. Ei leh Bara Intodelh leh Ramri buai chinfel:
Mizote hi pi leh pute tanga Intodelh tak hnam kan ni thin a. Khawi sawrkar hnen atang mahin kut kan dawh ngani lo va, ei tur leh in tur kan beisei ngai hek lo. Keimahni tawkah kan taima em em vek a. Chhungkaw intodelh lo nih chu tuman an duh ngai loh avangin taima takin hna an thawk a, an kham khawp an thar ngei ngei thin. A tun ataka Central sum tel lova, nung thei lo dawn dawna in ngaihna thinlung hi engtia lo chhuak ta mai nge a nih? Kan thinlungah intodelh thei lo nia inhriatna vang a ni a. Tin, kan khawsak nunphung lo sang chho zel hautak vang pawh a ni thei. Amaherawhchu, Sawrkar kan lo neih tak hnuah chuan kan huanthlai leh thawhrah te chu mumal zawka enkawl leh hralh chhuah a lo nih theih nana enpui tur leh ngaihtuah pui turin Sawrkarin nasa takin ruahmanna a siam sak thei a. Sawrkar mawhphurhna chin leh huanthlai chingtute mawhphurhna chin hi hriat a, in tanpui tawn a pawimawh hle ang. Ei leh Bara kan intodelh ngat chuan kan ramri buai pawh huai takin kan do ngam tawh ang a, Silchar kawngpui dan chat kan hlau tawh hek lovang. Chutih hunah chuan kan ramri dik tak kan hum ngam tawh ang.
3. Zirna tihhmasawn:
Finna hi mihring makmawh ber pakhat a ni a, thiamna hi ram hmasawnna rahbi bulpui ber pakhat a ni. Chutihrualin quantity ni lo, quality erawh a pawimawh zawk. Kan rama Education System kan kalpui danah hian thil fel tawk lo a awm ngei nia hriat a ni a. Sawrkar enkawl sikul aia Private Sikul kan bawh tlat avang te, kumtin zirchhuak kan awm rualin mithiam erawh kan tlem hle thin te leh mahnia dingchhuak thei khawpa thiamna pawchhuak erawh kan tlem pharh dan atang hian kan zirna kalpui danah hian enfiah ngai a awm niin a hriat.
Tin, India rama lehkhathiam tamna ber nia chhal ngam ni si, lehkhathiamna anga hna hmuh erawh harsat tlat mai kan nihna hian kan zirdan phungah dik tawk lo a awm a ni ngei ang. State danga an neih Engineer College te, Medical College leh IT lam zirna kan neih theih nana hmalak leh chumi tichangtlung tura theih tawp chhuah chu a hun tawh hle ngei ang. Number 1-a kan sawi tawh angin POWER erawh kan mamawh san phah hle mai thei. Kan University tihchangtlun erawh a pawimawh tual tual ang.
4. Inkalpawhna tha neih:
Thingtlang kawng te hi a chhe em em vek mai a. Motor thlen theih lohna a la tam em em. Kawng awmsaah pawh ruah tui a tlak hlek a, kal theih lohna kawng lah a tam. Hnam fing zawkte chuan khawpui kawng tlukin Thingtlang kawng an ngai pawimawh a, a fur a thalin theih tawp chhuahin kawng siam pawl an tih tir thin a. Thingtlang ho nawrna emaw ngenna emaw avanga siam sak ni lovin, Ram rorelkhawlte kuta awm leh an tih ngei tura dah a ni. Hei hian Ei leh Bar kawngah Thingtlang mi te nasa takin a tanpui ang a, chakkhai dapna kawngah leh nitin nunphung bakah Zirna thlengin nasa takin hma an sawn phah ang a. Khawpui nun leh Thingtlang nun pawh rei lo teah angkhatin a awm thuai ang. Inkalpawhna a that chuan khawpui chhunga awm mi tam takin thingtlang deuh atanga Office kai leh hnathawka khawpui pan pawh kan ching thuai ang. Inkalpawh thatna apiangah ram a changkang thin. Tun ai hian Bairabia kan rel kawng te pawh tih changtlun ni se, Track lian tak tak Assam atanga rawn luh ngai lo hian Rel nena tlawm zawka phurh theih tur tam tak a awm ngei ang.
5. Insumdawn tawnna:
China chuan Burma ram hausakna nasa takin a tel a, a ram economic pawh nasa takin a that phah nia hriat a ni. Mizoram awmna hi ramri hrul teah a ni a. Insumdawn tawnna atan pawh Chhim leh Hmarchhak lamah a remchang hle. Hei hi ngun zawka zira hmasawn pui lawih theihna turin Import leh Export ah Mizoram hi sumdawnna hmun pawimawh takah kan siam thei a. Khawvel ram hausa nia kan hriat ho reng reng hi ram dang nena an in sumdawn tawnna atanga sum thawk chhuak an ni tlangpui. Thlawhtheihna hmang kher lo va, leihnuai atanga insumdawn tawnna hi ramin hma a sawn pui nasa em em thin a. A bik takin Lawng leh Railway hmang tangkai ni se.. Bangkok, Hongkong, etc. vela harsa taka kan hmuh hi Lawng nen awlsam takin kan chawk lut thei a, chu chu Phai leh ram dangah kan thawn leh thei ang a, sum tam tak kan la lut thei dawn a ni. Hei hian Tourism huam rih mai se. Ram tam tak sum lu chu Tourism hi a ni a. Chu miin an ken tel chu Restaurant, Hotel, Handlum etc.. atanga sum lut leh ram dangmi te sum hmanral chu an ram tan malsawmna a ni thin.
6. Khawpui(City) zauh:
Khawi ramah pawh khawpuiah mihring an pung tulh tulh a, lirthei pawh a tam tulh tulh thin. Chu chu keini pawhin kan HMABAK a ni. Mahse, aizawl zauh erawh kan harsat hle a, kan kawngpui zauh phei chu thil theih loh tluk hiala harsa leh chep a ni. Amahearwhchu, he Aizawl khawpui hi nasa takin kan zauh thei a. Lengpui leh Luangmual thleng hian Aizawl khawpuiah kan siam thei. Chumi tur chuan Sawrkar Office lian tak tak thingtlangah pawh awm se, an hnathawh a ngai reng tho ang tih tur ho hi khawpui pawnah sawn chhuah vek ni se. Central Jail leh Thana thleng hian khawpui lailia a awm a ngai miah lo. Chutianga Sawrkar building pawimawh leh Office lian tak tak te khawpui pawnah sawn chhuah an nih chuan kan khawpui chu kan nitin sumdawnna hmun atan a thawl hawk ang a, nasa takin mipuiin nitin sum lak luhna tangkai zawkin kan hman theih phah ang. Kangmei thelh motor tan a samkhai phah bakah rikrum thil atan pawh nasa takin kan him phah ngei ang. Tin, khawpui pawn leh khawpui chhung inkalpawhna kawng a that phah bakah rei lo teah khuain a zawm ang a, khawpui a zauh phah thuai dawn a ni. Khawpui chhunga electric hrui leh telephone hrui inzam hnawk lutuk pawh felfai zawkin leihnuaiah a phum theihin a rinawm.
7. Dan leh Thupek:
Dan leh thupek hi a khauh tawk lo em em vek mai a. Hei hi power corruption vang pakhat a ni thei ang a, chutih rualin mipuite pawhin dan leh thupek awmzia kan zirchian a hun tawh hle a, zirna sikul te ber atanga bul tana University thlenga kan in zirtir a hun tawh hle. Mi ramah chuan Tlawmngai Pawl ten mipui thlavang hauhin thil sual titu tan pawh a thiamthu sawi theihna hun remchang an siam sak zamah thin. Kan ramah erawh NGO ten Dan leh thupek an kengkawh zawk emaw tih mai turin Sawrkar rawih leh hmanrua Police leh a kaihhnawihte zam a rang tawk lo va, chutihlaiin hotu lam dik tawh lohna avangin an nihna dik tak hmang hlei thei lo tam tak an awm. Sawrkar a chak chuan heng te hian an mawhphurhna theuhah rinawm takin an thawk ang a, NGO leh mipui chet lak hmain boruak a fel thuai thin ang. Hlei nei lek lo va, dan leh thupek dik taka kenkawh hi a pawimawh hle.
8. Zohnahthlakte tan Mizoram:
Chhinlung chhuak Zohnahthlak unaute hi Mizoramah kan tam ber a, hnam dang awm ve te chu Tuikuk leh Chakma an ni deuh ber a, Vai leh Nepali tlem tih loh chu. Amaherawhchu, State pawn leh ram pawnah Mizo hnahthlak unaute hi thahnem tak an awm a. A hrana mahnia ro inrel theia an awm loh avangin harsatna leh buaina an tawh chang a tam em em a, ei leh bar kawngah te, politic avang te, an chhehvela hnam dang te lakah te etc.. kan unaute thlavang hauh a, tanpui an mamawh ang a, tanpui leh chhawmdawl hi Inpui luahtu Mizoram hian mawhprhuhna lian tak a nei tih hria a, rilru zau tak pua, pa ber chan dinhmun changtu a nih hria a, Mizo hnam chawivultu leh venghim theitu a nih avangin tun ai hian nasa zawka hmalak ni se, kumtin Tukuk leh Chakma an pung thur thurna hmun te hi Mizo hnahthlak unaute ngeiin luah ta zawk se, kan ram leh hnam venhimna kawngah pawh tun ai hian kan chhawr zawk ngeiin a rinawm.
Tlipna: Heng ka han tarlan tak te hi a hnukpui tak tak chauh a ni a. Hei thupui hrang hrang hian peng tam tak leh zar tam tak a nei thei awm e. Chung te chu kan sawifiah vek seng dawn lo va. Lehkhabu chhah tak tluka sei a nih dawn avangin chuti lam chu chhiartute zeldin atan ni rih se. Kan nitin nunphungah kan awm mai mai hun aia kan hnathawh hun a lo tam zawk a, khawtlang leh kohhrana kan hun tam tak kan khawhral aia kan hnathawh nana kan hun leh tha kan seng tam zawk hun hunah kan intodelh ang. Chutianga mipui mimir thawh tur leh hlawk ve thawkhat tak hnathawh tur kan lo neih theih nan a chunga kan tarlan tak te khi a bulpui tak tak chauh an ni.
October 5th, 2008 at 8:11 pm
Pu Zorunpui i ti lawmawm e i vision zatve angtal hi ti hlawh tling thei ila chuan hma kan sawn tur hi ania;Central in thahnem ngaiin pawisa min pe a; mahni tan pumbilh kan tum zel mai si;mi corrupt lutuk kan hria chian pawh engtinmah kan ti ngambawk silo; Sawrkar thar lo ding leh hi eng sawr karpawh nise;power leh retheihna umbo, an thupui ni phawt tehse. Mahni hmasialna na dah boin; mite tan a kan ram hruai tu te hian rilru han seng teh u.
October 5th, 2008 at 8:14 pm
Zorunpuia vision chu ka tawmpui khawp mai. Mahse politician heng thil pui tak taka vei an awm tlem tawh nak alaiin a awm chhun pawh kan vote duh lova, chu ai chuan tawngkam thiam deuh deuh, District, pawisa, rangva, etc sem hum hum, kan vote elh teuh mai ang. Ziak tupa sawi ang hi chu dream ah bak kan hmu lovang.
October 5th, 2008 at 8:14 pm
Ni e, awmze nei tak, tum nei sa renrawnin ram hruai se, kum 10 chhung chuan khi tah khi tah a ni ringawt mai ang. A tlachawpa ram hruai naw naw thin hi zawng bansan a hun tawh. Kum 100 lo la awm leh tur an ngaihtuah pha chiah lo a nih pawhin kum 50 lo la awm leh tur tal hi chu ngaihtuah phak se, thil ropui tak tak an thawk ngeiin ka ring tlat a ni.
October 5th, 2008 at 8:45 pm
Power hi chu tih hmasak ber ngai chu a va ni tak em!!
October 5th, 2008 at 9:28 pm
dik lutuk, power awmloh chuan khoi ah mah kan kal thei lo ang… eng mah kan ti thei lo ni ber mai.. kan pu te hian an lo ngaihtuah har ka ti khop mai.. kan lo mawl thin awm ka ti vel mai2 zel a
October 5th, 2008 at 9:38 pm
@zorunpuia, hotute nge nge, in ngaihtuahna pawh a puitling e, a tha khawp mai.
Fiamthu lawks:
A fa te nu pakhat fiamthu duh deuhiin a kap a, “In pa hovin thangkhat lian rubber kung in buaipui a, in unau thial khawp pawh in la thar si lova’ a tia, nui nasa kher mai 
Pu Zualthauva khan Rubber huan a nei a, a fak nasa thin khawp a, “Zoram din chhuahpui theih tur khawpa pawimawh a ni, rubber te hi awm lo se, nu chhul tang te pawh hi an tang hlen reng dawn sin” a ti a, election day a YMA thingpui lumnaah nui dur dur thin ka la hria
October 5th, 2008 at 9:58 pm
@kanidar, hehehe, ka hre tawh thin Pu Zualthauva chanchin kha.. A ni kha mi pakhat chu a ni ve reng reng e.. Lengpui Airport an buaipui tirh lai pawh khan Choak bak a tum lovang, a ti a. Kha khan a siamtute thinlungah pawh chona nasa tak a pe a ni ngei ang. Hei Lengpuiah chuan kan thlawt lut ta vut vut chu a nih hi tiraw..
October 5th, 2008 at 11:04 pm
CM atan Pu Zorunpuia ka rawt e!! Nia,power hi ram hnuk pawimawh berte zing ami a ni. Kan sorkar lah hian ram hnuk tak tak lam khawih lovin an party worker te leh contract ringawt an ngaihtuaha.Kan education kalpui dan pawh hi. SSA project hi tha ka ti,literacy % a India rama sang ber nih tum pawh a la tha zel.Mahse mithiam rual chherchhuak tura higher & technical edn kan hlamchhiah leh si chuan engnge a awmzia ni ang.Higher edn pursue tur pawhin infrastructure mumal kan nei hlei thei lawi si lo.Hmasawn hi kan duh tak tak lo ni deuh hian ka hre thin.
October 5th, 2008 at 11:10 pm
@muantea, lolzzz
SSA Project thi a fuh dawn viauin a lang na a, an kalpui danah hian thil felfai tawk lo deuh a awm nia hriat a ni a. A pawi thin hle. Kan college tam tak atangin kumtin BA, BSc, B.Com etc.. zirchhuak za tle meuh kan awm kumtin a, mahse Phai rama company liana thawk tur erawh chuan kan tling ther der si lo te, mahni pawha in hai kaw hleithei tlat lo kan nihna te hian mithiam ni lova, lehkhathiam kan nih vang zawk em ni dawn? a tih theih hialin ka hria.
October 6th, 2008 at 12:31 am
CM tur lam kha chu ni e, kan chiang tlang tawh turah ngai i la… Hei i vision a ropui hle mai hotupa chu. Kan ram hmasawnna tur hnukpui tak takte an ni hlawmin ka hria kei pawh. Heng bakah hian Mizoram chungchang ka ngaihtuah apianga ka rilrua lo lang tel ve fo chu “Social reform” hi a ni. Hei hi kan hlamchhiah ang tih ka hlau ve thin.
Kan politician te hian an thiam lo fo va ka hriat ve chu kum nga chhung leka tihhlawhtlin an tum nia an sawi hi a hrawlin a tam thei lutuk a. A engamah ti mumal si lo hian kum nga a ral leh mai thin. Infrastructure lian tham pakhat emaw bitum se, chutah chuan in concentrate deuh se, hmasawnna hi a kal chak zawk ang em aw, ka ti. A dang hlamchhiah tur a ni chuang dawn lo va, hmasawnna hna pangngai kha a kal reng tho dawn a, te ka tia…
October 6th, 2008 at 12:45 am
Hotupa “Social reform” hi ka ngai pawimawh bawk khawp mai. Mahse, hei earwh Kohhran leh NGO te mawhphurhna deuh a ni em aw ka ti.. Tin, mipui mimir moral hrim hrim hi reform chu a tul teh meuh a. Mahse, hei hi chu ram kalsiam inrelbawlin a kentel tlat ni theiin ka hria.
Bus conductor a awm loh vanga Bus fair pe lo nge ka nih a, Bus fair chu pek tur a nih vang zawka pe ka nih? etc.. te pawh hi kan social value ah hian nasa takin a inphum ni te pawh hian a hriat. Hruaitu khauh tak chu kan mamawh dawn niin alang e. Beram te kan darh sarh ta em mai.
October 6th, 2008 at 1:54 am
Ok, i ngaihtuahna ka hrethiam e hotupa. “Mizoram mamawh” ti deuh tawp zawnga ka lo thlir vang kha a ni ber a. Tin, sawrkar paw’n hei hi chu a ngaihthah loh a tha khawpin ka ring. Mizoram Social Defence and Rehabilitation Board te kha sawrkar hnuaiah a awm thinin ka hria a. Heng te hi tihchak leh hman tangkai lehzual a tha mang e.
October 6th, 2008 at 2:20 am
Ram hruaitute hian kei aiin Zoram tana tha chu an hre zawk fe a nga,chung ho ai chuan Zorunpuia hian a hre leh zawk fe a va ang ve aw.A pawimawh dan indawt thlap thlap in point te chu a la rawn siam ta diat diat zui a!
October 6th, 2008 at 6:13 am
1) Power neitha tur hian India Govt hi PC Alexander a ho in Reforms an ti a chuta a poimoh ber chu Power hi sumdawna a ni, Govt hi enabling agent a ni anga, power buaipuitu hi Corporattion a leh vek tur a bakah a thar chhuaktu leh a leitu te inkar a rate bithliah turin Power Regulatory Authority an din. Tunah Mizoram leh Manipur in kan intawm din ve mek a ni.
Tuna Mizoram Govt hnuaia P&E dept a thawk te hian corporation a inleh hi an delay, an profit and loss a chhutchhuah theih loh. Sum an ren bawk hek lo, CE post 3 te chu an la create belh ta deuh deuh(Ka estimate dan chuan Rs 100Cr aia telm lo power an lei Rs 50 Cr poh an la lut lo, other expdr ah Rs 100 Cr chuang an la hmang zui kumtin Rs 100 Cr vel loss ang an ni, mipui sum chala tu atan chuan an tha lo hle). Kawng hi kan la bo em a ni. CM chu ni ila Corporation ah ka let vat anga heta lut duh leh duh lo ka thliar vat ang. Tuna Er awm mek te hian an duh loh pohin, Corporation khan over head expdr a ngah dawn lo a ni mai, Er graduate thar ho recruit mai tur.
3) Zirna hi kan Industry bulpui hnukpui a ni tih hmasawn a ngai khop ka tawmpui che zorunpui. SSA hian kan zirna a tichhe mek hei hi kan arrest loh chuan a poi khop ang.
Ka duhdan chuan tun a thawk mek ho hi Golden handshake in retire tir deuh vek ila bultan that a ngai. Mitdel sai en ka ang rih em mai. Meng fiah kak hmu pha ho zirtirtu ah kan lak thar a va tul tak em.
Sysem change ila -Below average tan ITI level zirna tihchangtlun te average ho tana Diploma level zirna chi hrang hrang siam te, above average te tan foreign scholarship pek te, merit vekin han tithei ila, competition a va nasa dawn em.
A sei dawn ltk duhtawk phots mai.
October 6th, 2008 at 6:22 am
Zorunpuia vision tihlawhlting tur hian sum a ngaihnem hle tax kan khawn ve a ngai. Mobile phone bill kan pek atang hian education cess Govt of India in a la chuta trang chuan SSA fund hi lokal a ni, nang leh keia thawh khom.
Chuan engtinge zorunpuia vision tihlohtling tur chuan sum kan hai luh ang, kut kan dawh dawn em ni - hnai love, chhiah kan la ang. Tax lak dan hi a hranpa a la sawi ho tham a ni. Thu khal thutak lai ril chu a ni. Abakah tul lova Govt, PSU leh private te hian sum kan ren tur a ni. Govt in vehicle an titlema expdr a tlem leh chuang si lo. Hnam changkang apiang an inren. Parents paid a mobile handset to deuh deuh kan hmang te, titi nana phone kan hmang te hi a va zahthlak em hnam changkang in an ti ngai ve lo. Tuikuk bazar thil zuar duh a lamkhuang a kit a firewood atan a zuar an tih kha kan ang lutk.
October 6th, 2008 at 7:30 am
Khi Thenphunga a tar a tar a sawmchhuah ngai lovin vision thatak nei an awm reng khi. nangmah lo pawh khi Mizo zingah an tam ang.
Chuan chhiah lak hi ka thlawp khawp mai, Income a tang hian 30% hi chhiah han pe ve mah teh u, politician ten sum diklo deuh hleka an hmang ni a in hriat chuan i treu hlar ve mai ang. Tunah chuan sawrkar in sum eng angin waste mah se mipuiin pawi tihna em em pawh an neilo, an thawhchhuah pawisa ani lo miau a. Politician hmaichhanah eng vangin nge ka thawhchhuah sum hi diklo taka i hman, ti ngam tur chuan Chhiah i pek angai.
October 6th, 2008 at 9:25 am
@islander & Aryan, In ngaihdan ka tawmpui hle mai che u.
Tax lak chungchang hi a pawimawh hle a. Hei hi Sawrkar intodelh kan neih rih lohna hian thui tak a hril theiin ka ring a. Sawrkar a intodelh a, mipui kan intodelh chuan kan in chawm tawn tur a ni a. Tunah hi chuan mipuiin khawi atangin nge sawrkarin sum a lak luh, tih leh khawi atangin nge tanpuina lo lut tih hi kan hre ve vek a. Heng avang hian Tax han pek pawh, mahni ta lo anga ngaihna avangin kan hreh phah deuh niin alang.
Ram changkangah chuan Sawrkar sum lakluhna ber chu Tax a ni a. Keini ramah chuan Centrala sawi chhuah mai kha a nih rih avangin chu chuan mipui nunah nasa takin nghawng a nei a, chumi rah chu, thawk lem lo va, sum hmuh a ni rih ber mai. Hei hian kan Social leh Society value pawh nasa takin a nghawng ve bawkin ka hria.
October 6th, 2008 at 9:37 am
Mizoramah indirect tax leh direct tax hi kan chawi reng. kan zolo lek lek zawk ani.
October 6th, 2008 at 11:55 am
India ramah hian Tax pek leh pek loh lam a nilo, State dangah pawh tax an pe tha lutuk mahse Politician hovin an eiru tho! Tihngaihna vak a awmlo anih hi India ramah hi chuan.
Middle Class hovin tax an pe tha a, Industralist/Businessman lian hovin tax escape duh vangin Politician ho an tham char char mai anih hi!
October 6th, 2008 at 12:02 pm
Hmanni Pu Zoramthangan SEZ atan a MOU a sign ve ringawt kha chu a ngaihtuah thuilo ngawt mai, Tax pawh anla dawnlo ani awm e. Vaiho hnenah Mizoram hi a hralh zo takngial dawn alom mawle!
Assembly house ah Politician pakhat pawhin a Protest loh kha a mak khop mai, keimahni state aia lian Tamilnadu,Maharastra Politician hovin an buaipui tehreng nen.
MOU hi nuam tih vanga sign rik ngawt chi pawh a nilo!
Kan CM neih tawhah chuan MOU sign nuam ti ber ala ni awm e.
MOU Zoramthanga tih tawh ila a tha ang!
October 6th, 2008 at 12:18 pm
Sei fu mahse ka chhiar chhuak dap e. Vision i nei tha khawp mai. Aizawl City hi zauh ni lovin sawn ni zawk se ……….
October 6th, 2008 at 4:27 pm
Khawiah nge an sawn tak ang? Hmun rem hi vang deuh asin mizoramah hian. Khawthleng rem deuh mipui nuaih tel dawlzo tur chu avang duh khawp mai. Mahse sawn chu tha ka ti tho.
October 6th, 2008 at 5:09 pm
Vision or if only it could be …whatever…. tun ang a kan ram pawlitik a kal reng chuan dream on, dream on a ni tawp… and that is not a vision.
October 6th, 2008 at 5:13 pm
Vision nei tha e.Power hi cu pawimawh thlawt…Mizoram lam thiante nena online laklawh lai lai a,”current a awm lo,k chhuak mai” an ti hi chu hrilh hai thlak duh ve chiang a nia…lolz
October 6th, 2008 at 5:24 pm
That is not a vision
October 6th, 2008 at 9:29 pm
it’s a vision we all possess within us
but we no longer dare 2 think within us
we may write, moan n do wateva
but who is 2 sacrifice evrythin…..
4 a little bit of favour
.. a little bit of compensatn
… a little bit of cash
…. a little bit of wateva…..
October 7th, 2008 at 12:19 am
Vision nge Hisap nge Dream nge Thlasik mumang kan sawi tak le. Eng Idea leh Vision poh hi sawi sawi mah ila a tih hlawhtlin dan “A NGAIHNA HRIA” KAN NIH SI LOH CHUAN ZUHMUN TI TI ANG LEK A NI ANG.
Mizo thalai ram hmangaih tak tak A NGAIHNA HRE BAWK kan mamawh. CM Minister MLA ni kher lo pohin kan ROREL KHAWL Government kan tihte hian an thu an lak chuan thil theih a ni ka sawi khi. Tlin politik leh pumpui politik ringot khel ho tan chuan thu ho mai mai a ni.
October 7th, 2008 at 1:50 am
Ni e, vision hi ka han vuah ve ngawt na a, a dik hlel deuh pawh a ni thei e. Engpawhnise, kum 20 kal ta khan heng kan sawi ho hi kan politician te hian an hmelhriat hlawm ngei chuan a lang a. Amaherawhchu, tih tak takna leh tum tak takna an neih loh avangin tun dinhmun hi kan thleng a ni a. Kum 20 chhung chu rei ve tak a ni. Power te pawh a pawimawhna leh tangkaina chu a hre zawk pawh an nih a rinawm. Mahse, thil hi atchilh kan hreh thin a, thil tha hi chu atchilhtu an awm a ngai ve bawk a ni.
Sawrkar laiin an sawrkar laia HAWN hman loh an hlauh thin avangin PROJECT puitling leh lian tham tih an harsat thin a. Mi ramah chuan kum 10 aia tam Project te an ti a, sawrkar pawh inthlak mah se, chhunzawm sak loh emaw chhunzawm duh loh emaw ang kha a awm ve thei lo va. A chhan chu mipui aiawha thawktu an nih vang a ni. Chu Project chu mipui tan a nih tlat avangin.
Kawlphetha te pawh Tlawnglui leh Serlui ah tui a luang huau huau a. Tlang chunga awm kan ni a, Thli a tha em em Windpo te pawh tih theih ve na tur a ni a. Sik leh Sa chungchangah kan vannei em em. Solar te pawh hlawkna tham nei thei tur chu kan ni. A tlachawp sawrkar hi chu thlang tawh lo hram ila, a tha ang e.
October 7th, 2008 at 2:57 am
Thianpa Runbawih: thli hmanga kawlphetha siamna pawh pakhat an bun a, an ti chhia a, an repair peih lo nge an repair miah loh hi… a sawi bak an peih lo. An hisap a, an suangtuah a, an kawk kual a, in sawi bora nan an hmang a, eng hna mah zawh thleng thawh awm leh lawi si hlawm lo. Mizoram ka hmangaih an inti vek bawk si… an hmangaih a nih chuan party dang thawh sa emaw bul tan sa te hi Mizoram tan a tha tur a nih chuan party feeling dah bo vese, thawh chhunzawm ve mai thin se, pawisa an ei zozai nen hian a hek nep deuh tur asin…tiraw?
October 7th, 2008 at 3:00 am
Theih nise, tham nawk nawk a, rah hrual nawk nawk te hi an chakawm mai thin…an guard te thlazar ah an hawi pir in an hawi champ viau zui..mipui thlan tlin tih in hre tha duh der lo hian…biak te hi an har phian zel bawk a….
October 7th, 2008 at 3:28 am
Nia tiraw, an sawi ka hre tawh thin a. Thli tha hmanga an siam kha, a der thawng hle niin an sawi a. Thlipui na tak vanga chhia pawh a ni chiah awm lo ve.. An ti rinawm tawk lo a nih a rinawm.
Nia, ram leh hnam tana chhenfakawm tur thil reng reng chu kan party bul tan a ni emaw ni lo emaw, mipui tana tha tur chu tih mai tur hi a ni a.
October 7th, 2008 at 1:10 pm
Zorunpuia chu engtik emaw chu MLA la ni ve la a tha ang……I Vision ang tuipui pha lo politician hi an tam khawpin ka hria…..A ngaihna hria kan mamawh a ni.