MNF MLA ten bial ngai chuh leh
October 17th, 2008 12:32 pm | Politics | fela_fanai | 338 views|
|
2003 inthlanpuia MLA pahnih te chuan mual min liamsan ta a, Pu Sainghaka leh Pu Aichhinga te rilru a cham reng chungin tun tum inthlan chu kan hmachhawn a ngai tawh dawn. Congress MLA bial thinah hi chuan bye election neih a ni tawh a, MNF chuan MLA an neih belh. Pu Aichhinga bialah erawh inthlan a hnaih tawh avangin bye election neih a ta lo thung.
20. 11.2003 a inthlanpui kan hmachhawn a, November 29, 2008 hian inthlanpui kan hmachhawn leh dawn ta a, inthlan lo awm tur atan hian inpuahchahna pawh a kal chho mup mup tawh a, party hrang hrang te chuan inthlan lo awm tura atan hian bial tinah an aiawh tur la puang chiah lo mah se, rin zawn theih tur erawh thil a awm a, chiang erawh sawi fak theih a la ni lo. Constituency bial thar kan hmang dawn a, hei vang hian inthlan hmasa ang ngawt a thil chhut theih a nih loh rualin rinzawn theih chin erawh a awm tho a, bial thenkhat thai bo a ni a, bial thar anga ngaih theih bial a awm nual.
Inthlan kan hmachhawn turah hian MLA thar engzat nge kan neih theih ang a, sawrkar thar siam thei an awm ang em? Sawrkar intawm a piang ang em? tih chu zawhna lian tak a ni. Ruling lai MNF sawrkar MLA te hi an bialah an ding ngam dawn em? Opposition MLA te hian an bial hi an hum zo ang em? Lo thlir dawn teh ang.
Tun tum inthlanah hian inthlan hmasa-a bial awmsa awm tawh lo tur anga ngaih theih a awm a, chubakah bial pahnih ni thin, pakhata inchhungkhawm anga ngaih theih a awm nual a, bial then darh a awm nual a, khaw thenkhat an bial ngai ni lo bial danga belh a tam hle bawk. Khua, an bial awmna atanga bial danga sawnchhuah chu sawi sen pawh a ni lo. Serchhip, Saiha, Champhai, Lawngtlai, Aizawl Khawpui leh Lunglei khawpui huamchhung bik bial lo phei chu bial hming hi thlak deuh vek a ni a, Champhai bial thin bial hniha a then a ni a, Lawngtlai chu bial hniha then a ni bawk.
Bial zawng zawng deuh thaw siksawi a ni a, mahse, heng bial panga Tlungvel, Khawhai, Lungpho, Vanva leh |awihpui bial thin te ang em em a thendarh leh bo tur anga sawi theih hi chu bial tharah hian an awm meuh lo. Anni bak hi chu a bial anga thensawm vek hi chu an awm lo tih theih a ni a, a hming ang khan sawi theih chiah tawh lo mah se, an bial awmna thin anga sawi theih mai te an ni hlawm. Lokicherra leh Kawrthah bial thin te chu a hmingputute bial khata an awm dawn miau avangin bial khata chhunkhawm a tih loh theih loh ang.
Bial hrana awm thin Tlungvel leh Lungpho pawh bial khatah fin an ni a, Tuikum bial an ni tawh dawn. Bial hniha awm thin Lunglei chu bial 4 anga siam a ni bawk. Hetianga bial then a nih takah hian MLA thenkhat chuan an bial chu an chhuahsan a ngai ngei dawn niin a lang a, chung zingah chuan Home minister nilai, Lokicherra bialtu Tawnluia, Vanva bialtu C. Lalrinsanga leh |awipui bialtu Z.H. Ropuia te chu a langsar te an ni.
Aizawl bika ruling MLA te hi an bialah hian an ding ngam ang em tih hi zawhna lian tak a ni a, Mizoram khawpuia ber Aizawl biala MLA ngah ber ni chho char char te hi tun tumah hian eng dinhmun takah ding zo ang maw. Aizawl North I hi thendarh a ni chungin a tam zawk te chu he bialah hian an la bei dawn a, he bial MLA nilai Dr. Lalzama hi ding leh ngei tura ngaih a ni a, Chaltlang, Durtlang, Selesih, Leitan leh Bawngkawn te chu he bialah hian an awm.
Lalmanzuala chu he biala candidate a nih tur puang hmasaber a ni a, Congress nena thawhho tum MTP chuan he bial hi an beisei ve niin an sawi. Ramhlun ho zawng bakah Laipuitlang leh Aizawl Venglai te telna bial Aizawl North II hi Aizawl khawpui chhunga Congress bial neihchhun a ni a, MLA nilai Liansailova chu he biala ding leh ngei tura ngaih niin MNF hian an dah tur an la chiang chiah lo niin a lang a, UDA lam chuan Ramhlun North Kohhran Upa Lalthanliana chu dintir an tum niin an sawi thung. Aizawl North III-ah hian Edenthar, Electric Veng, Zarkawt, Chanmari West, Chanmari leh Hunthar te an awm a, K. Sangthuama bial thin East I huamchhunga mi te kha an ni a, Edenthar leh Hunthar te hi a thar te chu an ni.
MNF chuan an minister nilai hi an dintir leh ngei dawnin a lang a, UDA lam chuan Zarkawt tlangval, tuna Chanmari Veng VCP ni ta Rosiamngheta chu vawrhchhuah an tum niin a lang. Congress lam hian he bial-ah an dah tur hi an la chiang lo a, Lalthanzara (Patea) chu ding maithei a sawi a ni a, an thawhpui tur MTP chuan he bial hi an beiseia ngaih a ni bawk.
Aizawl East I hi a lehlamah chuan bial thar liau liaua ngaih theih a ni. Sairum, Neihbawi, Sihphir, Nausel, Sihphir Vengthar, Muthi, Bung IB, Tuirial jail, Tuirial, Zuangtui, |huampui leh Zemabawk te an awm a, he bialah hian party tin te hian an dah tur a la chiang thei chiah lo. Tuithiang, Saron Veng, Chhinga Veng, Dawrpui, Armed Veng, Chite Veng leh Armed Veng South te awmna Aizawl East II hi MNF MLA H. Vanlalauva bial a ni a, ani hi chu ding leh ngei tura ngaih a ni a, Congress atangin R. Lalzirliana chuan din a tum niin sawi a ni a, UDA lam aiawh tur ngaihruat tur pawh hriat mai a la harsa hle.
Lalrinchhana bial thin Aizawl West II a veng tam zawk te awmna tur West I bial pawh hi bial ngaihnawm tura ngaih theih a ni. He bialah hian Pu Rinchhana ding dawn tawh lo niin a lang a, K. Vanlalauva chu MNF chuan he biala ding tur hian hual nget tawha ngaih theih a ni. Chawnpui, Zotlang, Chawlhhmun, Luangmual, Zonuam, Govt. Complex, Tanhril, Sakawrtuichhun, Rangvamual, Sairang, Sihhmui, Sairang Dinthar khumkhawmnaah hian Congress lam chuan ZNP in an ban tak Andrew Lalherliaana chu an dah ngei hmel a, UDA lam chuan ZNP president, Lalduhawma an dah ngei hmel bawk, midang tel miah lo pawhin ZNP atana thlantlin te pahnih inbeihna hi ngaihnawm ngei tura ngaih a ni.
West II thin leh West I thina bial thenkhat te dahkhawmna Aizawl West II pawh hian ngaihven a hlawh hle, Tuikual N leh S, Dinthar, Vaivakawn, Dawrpui Vengthar leh Kanan te chu he bialah hian an awm a, he bial hi mual min liansanta Aichhinga bial hlui anga ngaih theih a ni a, hetah hian MNF chuan B. Lalthlengliana dah tumna a nei niin sawi a awm a, UDA lam chuan MPC president, Brig T. Sailo an vawrhchhuah hmel thung. Congress lam aiawh tur hian minister hlui Zoramsangliana chu ding tura ngaih theih a ni.
Aizawl West III ah chuan West lam biala tel ngai lo Mission Vengthlang chu an tel dawn a, anni bakah hian Khatla leh a fa hrin Khatla South leh Bungkawn bakah Nursery, Maubawk leh Lawipui te an awm dawn a, UDA chuan Col. Lalchungnunga an dah ngei hmel a, Congress chuan Lalsawta an dah mai rinna a awm a, bial thar chan a chan deuh tak avang hian ruling lam an la chiang chiah thei rih lo.
R. Tlanghmingthanga chuan election a hmachhawn tirh atanga thlantlin a la ni ziahna Aizawl South I a chhuahsan dawn niin sawi a ni a, he bial hi bial siamthar a nih hnua bial danglam lo ber a ni hial ang. ITI Veng, South II lama an bet tih mai loh chu veng dang chu he bialah hian an la awm vek. UDA lam chuan inthlan hmasa lamah pawh he bial lo chuhtu K. Liantlinga chu an thehchhuah leh ngei hmel a, Congres lam chuan bial awm ta lo Khawhai bialtu thin Lalrinliana Sailo chu dah an tuma ngaih a ni a, anni bakah hian Independent candidate an awm ngei dawn tih a chiang tawh bawk.
MNF chuan Vanlalzawma MP chu he bialah hian dintir an tum niin thawm a awm. Mission Veng, Kulikawn, Venghnuai, Dam Veng, Thakthing, Salem, ITI, Mualpui, Tlangnuam awmna bial Aizawl South II hi bial danglam tak zawng a ni. MNF lam atangin he bial inchuhna hi a na hle niin sawi a ni a, bialtu nilai R. Khawpuithanga bakah R. Tlanghmingthanga chuan he bial hi chan a beisei niin sawi a awm a, he bial beiseitu-a sawi Lalhlimpuii erawhin bial dang a en niin an sawi thung.
UDA chuan Kulikawn presbyterian Upa, Denghmingthanga dah an tum niin sawi a ni a, Congress lam chuan Mission Veng mi Col. Sangzuala an dah ngei hmel bawk. Aizawl South III hi Aizawl district bikah chuan bial thara khua / veng tamna ber a ni ngei ang. Sateek bial thin bakah Aizawl South II a tel thin khaw / veng 6 ngawt an tel. Home minister nilai Tawnluia chuan he bial hi a vil mek niin sawi a ni a, Congress lam atang hian hun rei tak atanga he bial thlithlaitu K.S. Thanga chu ding tura ngaih a nih laiin MTP lam an kian maithei niin sawi a awm tel bawk. UDA lam atangin he bial han bitum chawt hriat mai a harsa hle.
Aizawl City area chhungah hian MNF hian bial sarih an nei a, bial 8 ni thin kha bial 11 a then a ni tawh a ni.
MNF bial dang te
Chief Minister nilai Zoramthanga chu a bial Champhai chu bial hnih a then ni tawh mah se, tun tumah hian a khawi mah mah hi a chhuahsan hmel loh niin a lang a, heng bial hnihah hian a ding kawp ngei tura ngaih a ni a, hei vang hian bial dang a en vak hmel loh. Saitual lam pawh CM hian a thlithlaia sawi a ni a, mahse, Champhai bial 2 a pakhat zawk thlana bial dang en hi rem theia a lan loh avangin khaw dang a hawi hmel loh.
Dr. R. Lalthangliana pawh hi a bial Lunglei North hi thendarh a ni a, hei vang hian a North hmingpu ta hi chu a chhuahsan hmel a, Lunglei khawpui chhunga a bial thin veng tam zawk beh takna Lunglei West lam a belh tak hmel a, he bialah hian Vanva bial thin te chu rin luh a ni ta a, he bial thar hi Education minister nilai bial tur a nih ngei hmel.
Z.H. Ropuia bial thin |awipui hi a bo tawh tih theih a ni a, chuvangin loh theih lovin bial dang a melh a ngai. A biala khua te then hran an nih dan hi thlan ber tur pawh harsa khawpa beh kual tir a ni a, a bial thina khua te chu Lunglei South, South Tuipui, Lunglei East-ah te dah an ni hlawm a, Lunglei South-ah hian ding tura ngaihna a nghet ber a, chutihlaiin a thatna-a ngaih S. Vanlaiphai leh Muallianpui te South Tuipui lama an beh tak avangin he bial hi a thlir tel niin sawi a awm bawk. Mahse, S. Tuipui bial-a khaw tam zawk leh mihring tam zawkna te chu Hnahthial bial kha a nih avangin F. Lalthanzuala bial anga ngaih a ni a, chuvangin bial thar chan chang Lunglei South ah hian iptepui a ban mai hmel.
Sangau bial a awm tawh dawn lo a, Lawngtlai East a ni tawh dawn. He bialah hian H. Rammawi hi a din leh ngei hmel a, khaw dang a hawi lo tura ngaih a ni. He bialah hian Lawngtlai khawpui chhunga veng tam tak rin luh a nih tak avang hian thil erawh danglam thei a ni. Lawngtlai West lam hi Lawngtlai bial thin ang zawka ngaih a ni a, mahse, he biala Lawngtlai khawpui chhunga bial tam tak kha lehlamah an kal ta thung. Bialtu-a ngaih H. Vanlalthaliana dinhmuh hi a derthawng hle a ngaih theih a ni a, he bial hi chang tawh lo thut thei dinhmuna dinga sawi te pawh a awm a, mahse, bialtu nilai a nihnaah erawh chuan a buk erawh a la rit hle tura ngaih a ni.
Rashik Mohan Chakma an MDC nih a duh zawk avanga bye elction an neihna Chawngte kah tun atang chuan Tuichawng bial a nih tawh dawn a, he constituency bialtu nilai A.B. Chakma hi ding lhe tura ngaih a nihlaiin West Tupui kan tih tawh tur, Tlabung bial thin lamah kal zawk tura rinna a awm tlat thung.
Bial bo ni tawh tur dang Vanva bialtu C. Lalrinsanga pawh hian bial thar a dap chu a ngai ngei dawn a, a bial thina khaw tam tak behna Lunglei North lam hawia ngaih a ni a, he bialah hian Burapui bial ni thina khaw tam tak pawh rin luh tel a ni bawk. He bial hi Deputy speaker hian a vil uluk hle a ngaih a ni.
N. Vanlaiphai bial kha a awm tawh dawn lo a, Khawhai bial thin khaw thenkhat te nen Hrangturzo bial an ni tawh dawn. N. Vanlaiphai bialtu thin D. Thangliana hian he bial hi a vil chhunzawm zela a lan laiin tunhnaia maia district hmu thar Khawzawl awmna bial nitur Tuichang lamah pawh kal thut thei niin an sawi.
Lalthlengliana bial Mamit-ah hian khaw tam tak rin luh belh a ni a, Lokicherra, Kawrthah leh Phuldungsei bial thin khaw tam tak chu he bialah hian beh tir an ni a, mahse, he bialah hian bialtu ngai hi MNF chuan an dah leh ngei hmelin a lang.
Bilkhawthlir kan tih thin kha Serlui bial a ni tawh tih sawi leh phawt ang, he bialah hian bialtu nilai anga ngaih Lalchamliana chu ding leh ngei tura ngaih a ni a, he bial pawh hi bial thendarh loh ber zingami a ni. Speaker hian Aizawl lamah bial a melh a sawi a ni bawk.
Bial hmingthar tur chu
Tuipang- Palak
Saiha - Saiha
Sangau - Lawngtlai East
Lawngtlai - Lawngtlai West
Chawngte - Tuichawng
Tlabung - West Tuipui
Buarpui - Thorang
Lunglei South & North- Lunglei hi bial 4 a then a nih tak avangin East leh West a awm belh a, bial then dan bawk a hma nen chuan a danglam hle.
Tawipui - A awm tawh dawn lo.
Vanva - A awm tawh dawn lo.
Hnahthial - South Tuipui
N. Vanlaiphai - Hrangturzo
Khawbung - East Tuipui
Champhai - Champhai hi bial hniha then niin North leh South a then a ni.
Khawhai - A awm tawh dawn lo.
Saitual - |awi
Khawzawl -Tuichang
Ngopa - Lengteng
Suangpuilawn - Chalfilh
Ratu - Tuivawl
Kawnpui - Tuirial
Kolasib - Kolasib
Bilkhawthlir - Serlui
Lokicherra & Kawrthah - Bial khata chhunluh an ni tawh dawn a, Hachhek bial an ni tawh ang.
Mamit - Mamit
Phuldungsei - Dampa
Sateek - Aizawl South III
Serchhip - Serchhip
Lungpho & Tlungvel - A awm tawh dawn lo. Heng constituency hmingputu khaw pahnih te hi bial khatah an awm tawh dawn a, Tuikum constituiency-ah an awm ang.
Aizawl - Constituency 8 ni thin chu 11-a then a ni tawh dawn a, bial pawh sawidanglam a tam hle.
An hming thar chu kan han ti hluai mah ila, thensawm an nih miau tawh avangin a dik thei chiah lo, a hming tumtu thin khua te awmna bial hming ang a nih mah zawk ang.
October 17th, 2008 at 1:20 pm
deal fela: hei hi Evening Post a chhuak tur a ni em? Anih chuan Evening Post tih han dah tel tawh thin la, kan lo mail ang che khan.
October 17th, 2008 at 1:37 pm
A ngaihnawmin beng a tivar khawp mai. Rawn update zel teh u khai. UDA hi vision leh Zoram siamtha thei tura beisei awmchhun niin ka hria. COngress leh MNF hian vision leh tih hlawhtlin tum sa an nei reng em? an ni hi hetiang kawngah hian an reh riau mai a, an manufesto te pawh hriat a chak awm e a.
October 17th, 2008 at 1:38 pm
A bengvar thlak hle mai. Heti a nih chuan tuntum inthlan a nghahhlelhawm ta hle mai. Bial hima ngaih a awm tawh dawn bawk silo.
Vote thlak ve phaka awm pawh a chakawm e.
October 17th, 2008 at 1:40 pm
Bial hming thlak chu a confusing viau nangin a tha ang reng, constituency hming neih ringawt pawh kha khaw hrang hrang khan an in chuh thin kha ania.
October 17th, 2008 at 1:42 pm
Pu Tlanga chu R.Khawpuithanga bial a chuhpui dawn chuan an va innek mai awm ve..:)
October 17th, 2008 at 1:43 pm
MNF ho hi Geography ah an hniam khop mai an ti….
Champhai a veng thenkhat Geographically a hmar lama awm te (Vengthlang, Kahrawt) hi South constituency ah an dah a..chhim lama awm(Bethel, Zote) hi North Constituency ah zu dah pek a…Synod then dan Presbytery nen chuan in opposite chiah…
October 17th, 2008 at 1:47 pm
a va sei ve! ka chhiar chhuak rih lo mai
October 17th, 2008 at 1:52 pm
MNF buai a ni chiah paw’n ka hre lo.
eg. Vengthlang thlangah Venglai a awma; Vengsang chhakah pawh veng dang a la awm. A khaw hming putu tak phei chu khutah leilet zawlah a awm daih.
October 17th, 2008 at 1:54 pm
Venglai awmna chu i sawi dik..mahse..vengsang chhakah veng dang a awm tawhlo… A khaw hming chu Chawnchhim a nia….Champhai khi vaiho lo awm hnu atanga a put hlen tak a ni
October 17th, 2008 at 1:59 pm
Champhai hi Mizoram khawpui pawimawh ber tur niin ka hria. Chawnchhim leh a chhehvel te khi a rualrem bakah a hmun khi a nuam tlat a. Burma sawrkar te han inthlak se, in sumdawn tawnna hmunpui leh pawimawh ber a la nih ka ring a. Tun ai khian mihring pawh tam takin an pun ka ring. Aizawl te hi chu capital city a ni rih mai na a, a tawp tlat mai a. Sum lengvel tamna apiang hi khawpui chu a thang mai niin ka hria. Delhi leh Mumbai ang vel a la nih ka ring..:)
October 17th, 2008 at 2:14 pm
A bengvarthlak thin e,chutih rualin Bial hmingthar ho hi a then chu a lamdan(thluk) dan tur ka hre vek lo tih ka inpuang e
Bial inchuhin han intibuai deuh suau suau se,news an ti tam ve alawm….
Mahni veng emaw khua emawa tling hi pa tha,fel leh rintlak tak an ni tlangpuiin ka hria(ka mimal ngaihdanin)
October 17th, 2008 at 4:27 pm
Nia,a bengvarthlak mahse Bial khi an tidanglam nasa mah mah nih khi mawle. engzat tak in nge mahni bial vawnghim ang tih hriat a chakawm ve mai mai
October 17th, 2008 at 5:49 pm
Bial vawnhim a theih loh chu amanda. Keipawh Aizawl North I a awm ka ni thina, mahse tunah chuan Aizawl East kan ni leh daih tawh. Tunhma atangin min bialtute hi an sorkar tlangpui thina, mahse tunah chuan kan bial kha bial hniha an then sawm tak avangin a dik ber thei tawh lovang. Hei tak hian inthlan a ti nghahhlelhawm ka ti.
October 17th, 2008 at 10:27 pm
Sry Topic kan off loks:Chhana khawi vengah chiah nge i awm?? ka hre dawn tlats che in ka hria