mi(sual).com

Congress:

An policy leh manifesto-te, corruption do kawnga hmalak an duh dante leh seat insem chungchangah-te rilru inhmu taka an indawr mek laia Congress tan harsatna an siam palh thei ang tih hlauva seat zawng zawng Congress tana an zuah vek chu an inpekna a ropui hle niin Congress chuan a sawi

MNF:

Hemi chungchanga MNF thuchhuahah chuan Congress leh MTP-te chuan thawhdun tumin thui tak an kal tawh a, MTP tlangnelna bial 5-te chu Congress hruaitute’n an keipui sahauh vangin an thawk dun leh thei ta lo niin an sawi

source: Zonet

Update:
A kimchang zawkin, Tawia’n a thian press mi hnen atanga a dawn:

MNF: MNF Party chuan tualchhung chanchinbu lar pawl tak, Vanglaini Editor Pu K.Sapdanga kaihhruai Mipui Tangrual Pawl(MTP) leh Pu Lalthanhawla kaihhruai Congress party te’n kan hma lawka MLA inthlan lo awm tura thawhdun an tumna chu MTP-in an tlangnelna Bial 5-te chu MPCC hotu lawk tak tak te’n an lo Keipui sahauh tlat avangin Vanglaini Editor-in MLA nih a lo tum vena zawng zawng chu a tlawlh ta a ni an ti a. An hmalakna chu Pu Hawla’n a tihhlamzuih sak taah MNF chuan angaih rualin, ‘Mipui Tangrual Pawl’ inti te’n party Unit leh Block etc. neih nei tha ti lo sia Congress Unit leh Block-te Vote hmanga MLA tlin an tum lawi si hi MNF chuan mahni tuh loh rah seng tumnaah a ngai a. Hetiang hi MTP-te hian an tum a ni tih a hriaitin Pu Hawla hian a nau puak ûk tawh hi a thlauhthla leh ta em ni, tih hi MNF zawhna a ni. An party thuchhuah in a tarlan danin Ni 20.10.2008(Thawhtanni)-a Pu K.Sapdanga’n chanchinthar thehdarhtute hmaa a thusawiah, tuna rorellai MNF Sawrkar chu chhelailet der anga a puh hi MNF chuan hriatthiam har a ti a. India rama chanchinbu rintlak leh belhchiandawl bera ngaih, India Today meuh pawhin Sawrkar inrelbawlna tha leh hmasawnna hnathawh tha berah a puang zo chauh va. Hetih laia MTP Chairman K.Sapdanga’n Mizoram chu siamthat (repair) tlak lo ang hial angaih thu a puan lai hian amah (Pu Sapdanga) hian MP Fund hmanga Zuangtui-a Lungrem hna a thawh leh CTS a lak dante hi tha a tiin felfai a ti reng em? NEDFI atanga Loan a lakte hi a rul tha reng em, tih hi MNF zawhna a ni tiin nimin khan thuchhuah an siam a. Pu K Sapdanga chu MP Fund hmanga hna thawh dawna thil tul leh Society-te hi a lo nei reng em? tih leh eng Society nge a hman tih hi zawhna pawimawh tak a ni bawk tiin Pu K Sapdanga chu zawhna an zawt a ni. Nimina an party thuchhuahin a tarlan danin Pu K.Sangdanga’n thuthar lakhawmtute hmaa a sawi ang hian, Mipui Tangrual Pawl inti si a, tun tum MLA inthlan kan neih tura ‘kan la inpeih lo’ a ti pawh hi hriatthiam har tak a ni an ti a. Democracy-ah chuan Sawrkar chu mipuite siam, mipuite Sawrkar, mipuite ta anih si avangin Mipui Tangrual Pawl tia hming invuah si te’n an la inpeih loh thu a sawi leh tlat si hi, an thusawi leh Ui bengah hlin tur a awm miah lovah MNF chuan a ngai a. Mipui Sawrkar din tuma inzuar ve lem si, MLA bial 5 chauh an hauh ngam dan atang pawh hian mipui huapzo pawl (party) an ni lo tih hi a chiang hle a ni an ti a. Hetianga Mizo mipui bum tuma hma lakna ang chi reng reng hi tun chinah chuan tuma’n ching tawh lo se, tih hi MNF duh dan a ni tiin thuchhuah an siam a ni.

UDA : United Democratic Alliance (UDA) chuan mipuite’n kumin Assembly Inthlanpui atana thawkho ngei ngei tura an rin Congress leh MTP te inbiakna a hlawhchham ta chu pawi an tih thu thuchhuah siamin an puang. An thuchhuah hian Congress lam hian MTP te Bial duh te kha a pe thei dawna alan avangin MTP lam pawhin beiseina sang tak nen Congress nena indawr chhunzawm an thlang ta emaw kan tih laia hetia Congress lamin MTP mi leh sa te dinna tur atana Bial khat pawh alo pe leh duh si lo hi UDA chuan Congress ze dik tak a lo lang chhuak ta ah a ngai nghet hmiah a ni an ti a. Neutral mipuite bum nana mipui lawmlut hut hut anga Media lama intarlan chiam te, mipuite retheihna denchhena cheng nuai khat tawktarh te, Good Governnance duh ber ni awm taka insawi chunga good governance tuipui tu ni a insawite thlauhthlak leh te hi ramhlui politics niin Mizoram hmangaihtu tak tak te’na an tihduh hauhloh tur a ni an ti a. Mizoram tichhe mektu party mal lalhrawtna tihbo duhlotute tih-awm tawk lek anih avangin neutral mipuite chuan hetiang party hi i hnawl leh ngam ang u tiin thuchhuan an siam a ni.

Congress:

MPCC chuan MTP nena an thawhhona chungchangah an policy, manifesto leh corruption dona kawngah leh seat insem chungchangah inrem taka an awm laia harsatna an tawk palh ta chu pawi an tih thu leh MTP lamin a zavaia seta an kian ta vek chu an inpekna ropui an tihzia leh an hrilhhaizia thuchuah siamin an puang. Hetianga tan thawhho dawn tak lo chung pawha MTP ten, “Sorkar tha a din hma chuan MTP a chawl dawn lo ” an la ti chu an puitlinzia leh Mizoram tana an inpekna ropuizia tralannaah an ngaih thu an sawi bawk. An thuchhuah hian MTP leh an thawhpui MDM,YMM ten zoram dam lehnana an inpekna leh sorkar tha din anih theih nana hma an lakan chu an zah thu leh an ngaihsan thu an sawi a. Zoramah Political change lianpui an rawn siam te, hmanlai politics kalsan a, politics tuithar, corruption awm lohna sorkar tha a siam theihna atana media leh thildang kaltlanga an hnathawhte chu chhuanawm an tih thu an sawi bawk. Congress party thuchhuah hian MTP te chu chawl lova kalzel tura an duh thu te, eng sorkar pawh khalhngil leh finchhuah ngai reng anih thu an sawi a.Pathian leh mipuite zara sorkarna an chang thei anih chuan sorkar tha din ngei an tum thu an sawi bawk.

Similar Posts

• MIPUI TANGRUAL PAWL Press Release
• Sorkar tha a din hma chuan MTP a chawl dawn lo
• Kalphung thar vrs Sawrkar Thar
• MTP thlawpna Y4M-in hnukdawk
• MTP chuan Congress an thlang ta

Recent entries

• Watch 16,000 videos at MTV Music
• Poll date changed
• Sun TV to launch FM station in Mizoram
• Khawngaihthlak leh lainatawm
• Suzi Quatro - 48 Crash - 1973
• One negative thing about Mizo!
• Mizo tawng hi
• On his mother’s grave
• Zoawi Mizo takin
• Health Department-ah Promotion Buai?

This entry was posted on Tuesday, October 21st, 2008 at 7:59 pm and is filed under Politics. You can follow any responses to this entry through the RSS 2.0 feed. You can leave a response, or trackback from your own site.