Lo hrethiam tehreng ila
May 18th, 2007 3:02 pm | more than words | rka_49er | 224 Views|
|
Hmangaihna la na chi tak ka nih leh nih loh phei chu a hriate chuan an hre khawp mai, ka sawi a tul pawh ka ti kher lo. Khuanu ruat, ruat loh tihte pawh an sawi ka hre fo. A ngaite in nizan chu kan bang tlai leh pek a, ka len chhuah hma ka chaw ei lai ngeiin ‘Kasauti’ bawk an letling leh a. En duh lo mahila kan awmpui ten an en duh chuan a ’sound’ ka hre tho tho.
Prena-i’n engtin chiah nge a sawi ka hre ta lo. Dam chhunga mittui sen ai chuan reilote mittui sen a hlawk/that zawk thu vel a ni a sawi. ‘Kasauti’ hian thu tha deuh deuh hi a ‘quote’ chhuak fo! Chungte chuan Pu Tluangte Hnamte (Fam) min hriatchhuah tir a. Midangte angin hre reiin bel lo mah ila chawimawina nopui lo deuh kan dawm dun zing mai thei.
A nin a ’serve’ a, keiin a news duh leh thil dangte ka lo download sak thin. A boral hnuah ‘Lengzem’ chanchinbuah he ‘thulairil’ (poem) hi an rawn chhuah a, tun thlengin ka rilru a la khawih a ni. Mihring hi damlaia induhsak lovin, dam loh hnuah hian a tui tha tha in hlui a, in hmangaih thar hi kan ching a. Kan hmangaih, duhsak nupui/pasal, unau, nu leh pa etc. te hi kan dam lai ngei hian hmangaihna in lan tir hi a tha a, Siamtu min siam dan pawh ni ngeiin a lang.
Lamtluang chhui dun hnuhnun ber a nih tur lo hre tehreng ila
Hlim tein khuangruah sur kan dodai dun ang a
Nghet taka kuahin ka thlah phal lo ang chia
Thlipui ruahpui paw’n min hnawt tiau zo lo’ng
Lamtluang chhui dun hnuhnun ber a nih tur lo hre tehreng ila
I anka dawng tawh ngai lo tur ka ni ang tih lo hre tehreng ila
I tawngkam chhuak zawngte kha thinlunga vawngin leh
Thangril khawhar lai tea chham chhuak lehin
Mi hnemtu atan ka hmang thin tur a
I anka dawng tawh ngai lo tur ka ni ang tih lo hre tehreng ila
Ka thinlung rohlu ber chu nang i ni a
Englai mahin mi hnuchhawn ngai lo a ni si a
A nghaihna hre lo, atthlak takin dam reng turah ka dah chia
Mahse a hun a lo thlen a, ka inrin loh lai tak khan
Hnutiang min chhawn ta mai si a
Kan zan hnuhnung ber tur a nih lo hrethiam tehreng ila
Khawfing chat ngai lo turin Pa ka ngen ang a
I lam hawia i hmel mawi ka thlir lai khan
Ka hmangaihna a dai ngai lo tih ka hrilh tur che a
Lo hre tehreng ila, lo hrethiam tehreng ila aw
Lo hrethiam tehreng ila chuan maw
Hmangaihna zawng zawng ka hlan thar leh tur che nia
A nupui a sun hnua a phuah ni awm tak a ni.
May 18th, 2007 at 3:40 pm
Ka pawm zang tak ani.. apply tan nghal teng.. khawvel hi nuam deuh ang!!!
May 18th, 2007 at 3:56 pm
Khati maia mual min liam san dawn tih lo hrelawk te tehreng ila, Amah Pu Tluangtea Hnamte kha hmuh tumin hun tha ka zawng anga.
Ka thawhpui Mali hnenah khan amah a hmuh huna ka ngaihsan thu min lo hrilhsak tura ngen ta lo khan, keimah ngeiin a damalai khan chibai in ka ngaihsan ziah thu kha ka lo hrilh tur a.
Mahse a hun a lo thlen a, ka inrin loh lai tak khan
Hnutiang min chhawn ta mai si a
Khati maia mual a liam dawn tih kha lo hrelawk tehreng ila aw
May 21st, 2007 at 11:16 am
Pu Tluangte hian a nick name ah hian ‘A’ a dah ngai miah lo ‘Tluangte Hnamte’ tia ziah a ni thin.
Vanglaini kum ? lawmna denchhen a souvenir an siama an naupanglai ama ziah te leh pu Vanneihtluanga ziah te, a boral hnua pu Vanneihtluanga’n a ziah belh te kha a ngaihnawm a, mihring dangdai an tih zinga tel pha niin ka hria.