ARC Coach Koitrenga kawmna
August 20th, 2007 4:02 pm | Sports | hmingsanga | 196 Views|
|
A hmel han en mai chuan pa naran tak leh Mizo pa tak a ni ve a. Mahse football player te enkawlna kawngah erawh chuan pa thluak tha leh fing tak a ni tih amah kan kawm chian hnuah kan hria. Independence Day Cup khelh zawh tak a champion team ARC coach, LS Koireng kawmna hun remchang tak kan nei a, vannei kan in ti hle.
Tunlaiah Mizoram sawrkarin hna nghet, thalaite a pek mumal theih loh laiin Koireng chuan Mizo footballer sawm panga zet chu a enkawlna hnuaiah hian an khel mek a. Heng Mizo footballer te hian hna mumal tak nei chungin football an khel thei a. Hetiang dinhmuna Mizo thalai sawm rual zet an awm theihna chhan chu Koirenga hi a ni tih loh theih lo.
Koireng chu tunge ?
Koirenga hi Manipur a piang leh seilian niin, naupang te a nih lai atanga football khelh tui em em a ni a. Kum 1987 khan ARC tan a khel tan a. A thiam em vangin India ram pumpui a Sipai hrang hrang hnuaia inkhel thiam te thlankhawm, Services an tih mai team ah pawh kum thum chhung ngawt a khel a. Indian Army XI team ah kum thum a khel leh a, hetih hun lai hian India ram chhunga football tournament lian, IFA Shield, Durand Cup, Governor Gold Cup, Kalinga Gold Cup ah te Army XI hming hian a khel zak zak tawh bawk. Services team hmingin Bangladesh ah te pawh lo khel ve tawh a ni bawk. National Instititute of Sports, Kolkata atangin, Football ah Diploma a zo a. A football career tawp dawn lam kum 1996 - 97 khan Services hmingin Santosh Trophy ah a khel leh a. Football khelh a chawlhsan hnu reilo teah a khelhna thin ARC ah kum 1998 atang khan coach nihna hna a thawk tan ta a ni.
ARC ah coach a nih hnuah hmasawnna chu hmuh theih in a lang nghal zawt zawt a ni ber a. ARC a enkawl hnu kum hnihna ah chiah India Sipai hnuaia Football team hrang hrang te inelna lian ber leh khelh hautak zet nia sawi thin, All India Army Championship 2000 ah chuan ARC chu champion a nih pui nghal a. Hei zet hi chu amah pawhin a hun tawng zingah a lawm ber pawl ni hialin a sawi nghe nghe. Vawikhat champion mai chu duhtawk a tum lo hle a niang, a zawn zatin kum li chhung kum 2000 - 2004 chhung khan ARC chu champion a nih pui chiang kher mai. Heng bakah hian India hmarchhak a Football tournament ropui ber a chhal ngam, Bordoloi Trophy ah ARC chu kum 2000-2001 leh 2002 - 2003 te khan champion a nih pui leh a. Royal Gold Cup, Nagaland ah 2002 leh 2003 khan a champion leh a. Kum 2003 khan a naute chu khawvel a football tournament upa ber dawt tu Durand Cup khel phak khawpin a hrual chho a. Eastern Command Football Championship ah phei chuan kum 2004 atanga kumin 2007 thlengin champion a nih pui tawh bawk. Tin, heng bakah hian Santosh Trophy ah Mizoram team chuan a enkawlna hnuaiah tum hnih an khel tawh bawk.
Mizoram football hi eng nge i hmuh dan ?
Koireng : Kum li, kum nga kalta atang khan Mizoram Football hi ka lo hmuh ve dan chuan nasa takin hma a sawn a. Junior level ah phei chuan hmasawnna ropui tak a thleng a. India ram club lian ah pawh Mizo tel an awm tawh a. India ram football academy tha zawng zawng tih theihah Mizo naupang an awm fer fur a. Tun atanga kum 2 emaw kum 3 emaw a vei leh chuan Mizo te hian Indian football ah ro an la rel ka ring tlat a, chu chu a thlen ngei pawh ka ring tlat a ni.
Tuna inkhel pui I Day Cup a local club te hi eng nge i hmuhdan ?
Koireng : Hmasawnna tur an la nei nualin ka hria. A chhan chu talent nei tha tak tak an an tam si a. Club organisation leh administration lam hi a fel fai tawk lo deuh emaw ni chu aw a tih theih. Thenawm state Manipur leh Assam club te nen khaikhin chuan hmasawnna tur a la tam deuhin ka hria. Club la hausak tawk lo vang pawh a ni thei tho bawk. Player chu an nei tha hlawm viauin ka hria.
Mizoram Football hian engnge a hmasawnna tur nia i hriat ?
Koireng : Ka hmuh dan chuan state league mumal leh puitling tak nei vat se, Hei hian Mizoram a footballer te phurna nasa tak a siam sak ka ring a.Football boruak pawh tun ai hian a san phah ka ring khawp mai. Tichuan a dang chu a in dawtin a rawn kal theih mai ka ring.
Tunah hian ARC ah hian Mizo Footballer engzat nge awm ?
Koireng : Tunah hian Mizo chu 15 lai an awm.
Heng te hi nangma lak vek em ni?
Koireng : Aw keiman ARC ka enkawl hnua ka lak vek chu an ni ve a lawm.
ARC i enkawl hmain Mizo khel an awm tawh em ?
Koireng : Ka enkawl hma khan pakhat chu a awm ve e
Mizo Footballer te hi engvanga la vak nge i nih ?
Koireng : Mizo footballer te hi ka hmuh dan chuan an huaisen a, talent an nei a, fighting spirit an nei tha bawk in ka hria. Khawi hmunah pawh inkhel ila, Shillong a ni emaw, Delhi a ni emaw an zam hmel ka hmu ngai lo a. Pressure hnuaiah pawh an khel ngam a. Player dangte hi chuan pressure zawh loh an ngah a, enkawl an hahthlak in ka hria.
ARC an zawm hian eng rank atangin nge an tan tlangpui ?
Koireng : An state aiawh a Santosh Trophy emaw National Games a an khelh chuan direct in Havilder rank kan pe nghal a. Chutiang an nih loh chuan Sepoy atangin bul an tan a. Thla 9 chhung sipai training an paltlang vek a ngai bawk.
Mizo player i lak teuh hian in hotu te lam atangin sawiselna a awm em ?
Koireng : Awm lem lo. Mizo an ni emaw Meitei emaw an tam avangin sawiselna a awm ngai lo a. An tha a nih phawt chuan tute pawh nise sawiselna a awm ngai lo. A tha chu a tha an ni tawp mai. Football te chu a thiam leh tha tha te dinhmun a tha a ni mai.
I player te hi eng rank nge tam ber ang ?
Koireng : A tam zawk chu Naik an ni a, lance naik pawh an awm nual bawk a. Junior Commission Officer pawh pathum lai chu an awm ve mek bawk.
I team ah Mizo player hi eng ang pawimawh nge an nih ?
Koireng : Tunah tak hi chuan kan player pawimawh leh kan rinrawl te chu Mizo footballer ho te hi an ni a. ARC team tichak tu leh kan innghahna ber an ni pawh ti ila a dik awm e.
I Day Cup hi eng nge i hmuh dan?
Koireng : Min lo dawnsawn dan leh a tournament an kalpui dan hrim hrim hi a nuam in a fel fai tha hle in ka hria. Match official te pawh state pawn lam mi kan nih avanga min duhsak lo bik chuang miah lo a. North East state danga tournament kan khelh changa induhsak lohna leh a khawtual mi nih loh vanga harsatna awm thin ang kha, kan khelh tawh chinah chuan kan la tawng lo a, a lawmawm khawpin ka hria.
Infrastructure kan neih ve te hi engnge i hmuh dan ?
Koireng : Mizoram ah hian state dangin infrastructure an neih ang hi nei ve ta ni ula chuan India ram ti hmang thatu in nih ngei ka ring. A bikin Football leh boxing ah ngat phei chuan tun ai hian inthlen san ka ring khawp mai. Mahse in hmun hma neih te hi a beitham in a changtlung lo a. State puitling ve riang ruang si, infrastructure in nei tha tawk lo a. Talent chu a awm a, mahse heng talent nei te inzirna hmun tur tha in nei lo hi h chu a zia lo deuhin ka hria.
Hmingsanga,
Thanks for your contribution. Please quote the source of this interview.
May be related
- Mizo tlangval telna an champion leh ta!!!!!!
- BMA Football Tournament
- Independence Day Football a hmuhnawm
- Mizo footballer state pawna insawnchhuak te
- Independence Day Celebration Football Tournament
August 20th, 2007 at 5:28 pm
korenga kha ani maw?ka la hriat reng che Fire brigate ground ah khirkhiap(criket)khel a lo en lai in ,enge i ngaihdan?ka ti a,”Stupid game”ati kan nui nasa khop mai…Criket(Khirkhiap)ka hmusit vang a ni loo…..
August 20th, 2007 at 6:24 pm
koitrenga ngaihdan cu k thlop, cricket is a ’stupid game’!! fitness poimoh loh hmel si, look at virender shewag, inzamam etc.. dul puar pup chungin a thiam2 an la ni zui… game-ah ph k chhiar meuh lo!!
August 20th, 2007 at 7:14 pm
Ben, amah Hmingsanga intv na nih kha. An chanchinbu a mi a nih ka ring..tiin ka’n chhansak ang e!!!!
August 20th, 2007 at 10:06 pm
@hrangkekuala: Thanks. A nih chu ka ring. Which media btw? Sent an email. I got a holiday response
August 21st, 2007 at 1:16 pm
Hmingsanga nge nge!!!! Bravo!!!!!
Koireng-a hi chu ka hriatna a rei tawh. Ka thianpa Thanglungmuana sipai tang pawh football ah a luh dawn khan a sawm in a sawm ve ngat. Mizo pa ang hiala ka ngaih a ni ve a. Mahse Mizorama a rawn kal khan ka be ta lo….
August 21st, 2007 at 8:13 pm
Misual ho , Edenthari?kha khoi atang in nge ka tihrik lehdawn?khawngaih in min hrilhthei in awm lo maw……..a aw khan chams a nei tlat.Nizan ,theres someone in my head but its not me,maybe in pu babutea!