Piangsual Kan Awm Tawh Lo’ng
April 18th, 2008 1:10 pm | more than words | Zaia | 125 views|
|
Hmanah chuan Mizote zingah rualbanlote chan hi a chau em em thin. Khawtlang nuihzatbur an ni a, an chhungte ngei ngei pawhin mi pangngai enkawlin an enkawl ngai mang lo. An tan dam man a awm lova, he khawvel hi an awmna tura Pathian siam ve tho ni mahse an chenpuite hnen atangin lainatna an hlawh khat a, an dinhmun atanga khawvel an thlira an chan a chauh tawh vei nen, khawtlanga an chenpuite diriam an hlawh leh zel bawk si!
Mahse chu hun chuan mual a liam a, rualbanlote duatna leh lainatna kawngah ‘thiam sang’ Zofate pawh kan harh chho mek zel. Chu dinhmun atang chuan mi pangngaite pawhin an talent neihte pholang a, eizawn nana an hman theihna tura ’stage’ buatsaih sak an nih chuan, khawvel nihphunga nun khawchhuah harsat zawkte phei chuan an talent an hman tangkai ve ngei theih a tul a, an inpholanna tur hun leh hmun buatsaihsak ve an ngai a ni.
Larna emaw, hmingthan emaw, sum leh paia hlawkna emaw um zawnga thlir tan chuan rualbanlote tana hetiang hun siamsak hi kawng tha ber leh thlannahawm a ni kher lovang. Mahse rualbanlote khawngaih leh hmangaihna atang chuan an tana hmun siamsak chu a ngai ve si a. Kolasib-a mi thahnemngai intelkhawmte chuan ‘Zo Vohbik’ duang chhuakin, rualbanlote tan zaia intihsiakna hun leh hmun an siamsak ta.
Mitdel, kebai, bengngawng, kut bul leh rilru lama mi phak lote an ding tlar a. Chu’ng zingah chuan kebaite tana a bika siam nawrlirh (wheelchair) a chuangin an sirah chuan pakhat a awm ve bawk a.
‘Piangsual kan awm tawh lo’ng, Jerusalem tharah..
Hlim takin kan zai ang, ‘Haleluiah’ tiin,
Aw, ka ngakhlel em mai!’ ……………… tiin an zai rual dal dal a.
An thiam hran lo. Zaipawl ropui pawh a ni lo. Mahse an zai chuan a entute leh lo ngaithlatute thinlung erawh a hneh a. He khawvela beiseina nung chhi phak tawh lote’n an rilru leh tihtakzeta piansual awm tawh lohna Jerusalem thar an ngaih hla an han sa zet chuan nutling a vel a, patling hnuk a tiulh a ni.
I mit chhing chungin i thingrem chhunga i kawr leh kekawr kha lachhuak la han ha teh. A nih loh pawhin maimitchhing chungin i thenawmte inah khan han leng lut chhin teh. A harsatzia leh a hrehawmzia hrilh nawn i ngai lovang. Chu chu hun rei lo te chhung atan chauh a ni lehnghal. Dam chhunga khawvel eng hmu tawh lo tur leh chhungte hlim leh nui hmel pawh thliarhrang thei lova han awm mai tur chuh! Thim leh engin danglamna a neih loh va, awmzia a neih tawh loh chuan he khawvel hian i tan awmzia engnge a neih ang??
“Thim leh engin kan tan awmzia a nei ve lo,
Tap chungin Lalpa chenna ram kan thlir.
Kan pawnto nun a reh hunin,
‘Tira mei kai’ kan bang tawh ang..”
He hla hi ka hre ngai lo. Nang pawhin i hre tawh a nih pawhin i la hre tam kher lovang. Mahse he hla hian hmu ve thei lote dinhmun a hril chiang em em a. Midang ringa kawnga kal thin an nihziate, chu nun hrehawm tak a reh theih nana mittui tla chunga Lalpa chenna an thlir thin thute nen. He hmu thei thinlung hian mit nei lote ngaihtuahna a hriatthiampui lo thin a; midang kai thinte ngei pawh hian kaih ngaite dinhmun kan hrethiam phak tak tak lo. Khaw hmu lo, mitdel ngeiin a thinlung chhungrilah thildang a awm lo tih hriat tak maia he hla a sa lai han hmuh a, han ngaihthlak chuan thinlung a vit bik a sin!
Hmu theia ka awm hi thil nihphung pangngai emaw ka ti thin a, hmu theia min siamtu Pathian hnenah lawmthu ka sawi khat em em. Hmu ve thei lote tana khawvel thim turziate, an tana dam reng chunga damlaite nun tawmpui phak loh hrehawm turziate ka dawn ngai lo. Nunkhaw nuam zawk an neih ve theihna tura an tana ka neih ang ang thehchhuah ve pawh rilruah ka nei ngai lo.
Ka unau, hmu theia i awm kha lawm la, hre theia i awm kha hlim rawh. Kebai lova i kal a, duh duha i lim thei kha lawmthu sawina tham a ni tih i hre tawh a nih pawhin lo hre nawn leh teh. Chu dinhmuna awm leh cheng mek i nih avang chuan rualbanlote tana i theihnate, i rosum te seng turin i Pathianin a duh che tihte pawh ngaihtuah hram teh. Piansual awm tawh lohna Jerusalem thar kan thlen hma pawha nun khaw nuam an neih ve theihna turin tih theih i nei a, tihsak duhna thinlung nen lo pen chhuak la, i rawngbawlna puanin han zauh ve ta che. Chu chuan he khawvelah hian nun hlimna a pe ang che a, vanah pawh i tan lawmman dah a ni ngei ang.
May be related
- Ka D
- Zei Book - Part 2
- A na asin…..
- Pasal neih chungchangah Ngengpuii a beidawng?
- Chhanlet loh hmangaihna
Recent entries
- Cover Girl - Mimi (Youth Icon 2007)
- Mizofed in petrol nei chhe ber
- Don’t wear ID cards out of the campus!
- Cheng Nuai Khat Sem Tur Hi…Dawt!?
- Long-march tan ta
- Rdi ft Reuben - I tan hmun a awm
- The Apple ho kha
- In sa tur tan phalna lak hmasak ngai dawn
- Book Of The Year 2007 “Zofate Zinkawngah”
- Cover Girl - Zothansangi
April 18th, 2008 at 2:08 pm
He taksa piansualna hi a lang theia kan hmuh te chu ni mah se, rilru piansualna hi a awm ve bawk a. Chutiang chu hmuh theih ni lo mah se, an khawngaihthlak em em a ni. Taksa piangsual te hi an rilru a sual tel loh chuan an la vannei letling zamah thei a. Hlim taka an chantawk khuarelah lungawi taka an pawm thiam phei chuan khawvela mi vannei ber an ni ve thei tho bawk a ni. Mahse, rilru piangsual te erawh an chantawkah an lung a awi zo lo va, midang te itsik leh do ranin an hun leh rilru te an hmang a. Chu chuan an nun khua a hreawm tir a, he khawvelah hian sum leh pai te nei ur ur mah se, an hlim thei chuang der lo zu nia..
April 18th, 2008 at 2:56 pm
Keini piangsual lova awmte hian Pathian hnenah lawmthu i sawi mawlh mawlh ang u.
April 18th, 2008 at 3:59 pm
Amen.
April 18th, 2008 at 7:49 pm
Pathian a awm tih pawh hre ngai reng reng lo ten … tawhsual (accident) tawh avanga Pathian hmuh phah theih hial nan te an han hmang thei hi chu kei chuan ka FAK in KA LAWMPUI let ling zawk deih! Piangsual rawh se ka tih nalam ani lova, an tawhsual tawh avang a an piansual kha chu a pawi em em a. Mahse, tawhsual tawh avanga Pathian hmuh phah nan te thenkhat in an hmang deih te hi chu ……”Malsawmna hlut tak kar a ti-sa a hre awm tawrh na elkhen” ni ah ka ngai tlat. Pian phung pangngai, tituai fel fai thlap Ba-al hma a bung-bu mai tur ai chuan … an Lal lukhum chu a thuah tam fee zawk in ka ring tlat!
April 18th, 2008 at 8:17 pm
Nice read!Piangsual/rualbanlote ngaihsak kawngah hian hma i sawn zel ang u.EPL kan en pawh hian,a tlar hmasa lam-ah hi chuan wheelchair a thu,rualbanlo/piangsual te an thut thup thin hi.
April 18th, 2008 at 10:28 pm
Ngaihnawm khawp mai!Ngatinge Pathian hian piangsual a mihring kan pian hi a phal aw,ka ti thin!
April 18th, 2008 at 11:17 pm
Ka rilru khawih zawngtak! Piangsualah pawh mitdel hi hrehawm hmelber kati, an lainatawm ngawih ngawih…hmanah kan Biakin ah eng special programme emawni ah piangsualte anlo inkhawm a, “Piangsual kan awm tawh lawng, Jerusalem tharah” tih hla kha zaipawlin an sa dawna, an mahni zaipui turin thalai 4/5 min sawmbelha, an zai puitu tur kha ka tap nasa ltk a,ka zai thei reng reng lo! Pathian hnenah lawmthu sawi mawlh mawlh mai tur kanni.