mi(sual).com

An extract from LUNGLEN, April 2008
By Sangzuala Hmar

Dar engzat nge ka hre tawh mai lo, zan rei tak a ni tawh tih erawh chiang takin ka la hria, ka cellphone ‘message tone’ chu a ri tat tat a, vibrate-a ka dah avangin ka dahna dawhkan te chu A nghawr ri dar dar a, mumang nen ti deuh rei ruai hian ka phone chu ka la a, ‘1 new message’ tih lo inziak ka hmuh rualin ‘read’ tih chu rang takin ka hmet a.

“Dam m, SMS thian nh dh m?”
tih ringawt hi a lo inziak a, tunge a nih pawh ka hre lo, zan rei tawh em ema chutiang SMS mai mai min thawn chu ka haw ang reng hle a, ka delete a, ka mutsan leh nghal a. Rei pawh a la ni lo, ka muhil leh tan siar siar tawh tihah message tone bawk a rawn ri leh a, number ngai bawk atang chuan a sawi ngai deuh chiah a rawn sawi leh a.

“Ka rawn ti nawn leh, SMS thian nh dh em?”

a rawn ti leh a, khawilam mi mawl cellphone nei thar nge maw ni le tiin message chu ka delete leh a, ka mutsan leh a.

SMS hi ka’n uar lo mai mai khawp a, ka chhungte’n min message pawh hian ka chhang peih meuh lo, thiante ho zan tairek thleng thlenga SMS thawn ngar ngar peih an awm te hi mak ka ti hle thin. Ka nu leh pate ram pawnah an awm a, an hun neih remchan huna min biak an duh thin avang chauhvin cellphone pawh hi ka hum ve a ni, tumah ka be ngai lem lo, ka nuin min rawn biaknan a hmang a, chu bak chu keimah tak phei chuan ka hmang ngai mang lo tluk a ni.

Chutianga SMS lama tui lo em em maiin zanrei tawha SMS ka dawng ta mauh mai chu a mak ka ti ang reng hle, a mak ka tih lam ai mahin ka ning ti ila ka sawisual kher lovang. Ka phone chu switch off daih mai ka duh a, mahse ka nu te awmna ramah tukthuan ei hun vel a ni tawh a, min rawn biak duh thuta, min rawn phone-a ka switch off chuan a ngaih a tha lovang tih ka hlau a, ka off ngam ta lova.

Muthilh leh tuma ka mit ka chhin rualin chu number ngai bawk chuan SMS min rawn thawn leh a, a thu pawh a ngai chiah chiah a la ni a, tlar khat lek a ziah belh a.

“Ka ron ti non lh, SMS thian nh dh em, khongahin mn rply hrm th, khohr hnmtu k mamh tkzt a ni”

Ka chhiar a, delete leh nghal ka tum lai takin engemaw hian min mawlh a ni chek ang chu, ka inngaihtuah chian hmain a chhanna chu ka chhu ta mawlh mawlh mai.

“Vantirhkoh thlamuanna pe theiah mn nai nh chuan tsual ang, kei chu znrei toka i kaihthoh mi pangai mai2 k ni, a hrm2in ka sia ce m?”

Second rei pawh rial a ngai lo, reply ka dawng leh nghal a…

“Mn selo, kei pon se lo ce, hmeichhe rilru tot m2 mai ka ni, i thian nh ka dh, k hming cu Mikaella Cervantes, nang?”

“Julius tiin mn ko mai roh, tin nge ka no. i siat?”

“Hi Julius, min chhang a ka lom khp mai, ka ph no. tawp digit 2 ka thlak a, i no. a lo suak mai”

A vawi khatna atan ka la hmelhriat ngai hauh lo nula chu SMS hmang chuan ka titi pui ta a, SMS hmanga ka thian chhar tak hi ka tan chuan a hmasa ber a ni a, a tawpna a ni tawh bawk ang tih chiang takin tunah hian ka hria.

Zankhuain kan inkawm a, a chanchin a sawi a, ka chanchin ka sawi a, mahse thuk tak erawh chu kan inhrilh tawn lem lo, kawm a nuam em em a, a tawngkam a hawihhawm si a, a zan khatna atang chuan ‘tlai mah var ila kan in ning chuang hlei lo’nge’ tih ang deuh a ni, rei pawh kan la inkawm lo emaw ka tih chhungin zing dar 5 a lo ri der a, ka mangtha thuai a, sikul kai turin ka inbuatsaih ta nghal a, kan inhriat zan hmasa ber hian mut ka kham lo kher asin.

Chuta tang chuan nitin zantin mai kan inkawm ta a, Mika SMS dawng lovin ni khat pawh ka awm lova, ka SMS dawng lovin Mika hi ni khat pawh a awm bik lo. Kan inngaina hle a, a taka inhmuh kan chakzia te kan inhrilh tawn thin, mahse SMS hmanga kan inkara engemaw awm danglam leh nuam tak mai chu tihchhiat palh kan hlau a, inhmuh chak em em mah ila inhmuh loh zawk chu kan pahnih tan a that kan ring a.

Ka phone ri hi engah mah ka ngai ngai lem lo, mahse hetia Mika nena kan inkawm tak hnu atang hian a mi deh dan a danglam hle, phone a rik reng rengin Mika a ni ang em tih chu ka thinlunga zawhna lo lang hmasaber a ni ta ziah mai. Ka chhungte min biak aiin a let tamin ka ngai pawimawh a, ka thian thate SMS ka chhan that peihloh chang pawhin Mika erawh chu ka tan tihmakmawh a ni.

Ngaihzawng mumal tak, han ngaih serious em em ka nei ngai lo, tin, mihring a zawnga romantic lo ber pawl ka ni ka inti ve thin, mahse ka nuna Mika a lo lan atang hi chuan SMS-ah ringawt pawh ka lo ‘romantic’ ve thei viau mai, chu chu Mika nena kan inbiakna atanga ka hriatchhuah leh ka zirchhuah hmasakber ni te hian ka hre thin.

“I thnlungah thian i komngeih em2 angin min pom la, chutiang bk chuan kei pon pom ag ce, i thnlunga i thian anga mn dahna pindan chu kalh la, Julius, a chahbi kha paihbo daih la, chuti chuan tuma’n an lakbo sak thei lovang ce”

tiin ni khat chu SMS min rawn thawn a, ka ngaihtuahna a ti thui hle a, ka lak ata tuin emaw min lakbo sak mai tur ang tein ka ngai hman a, rang takin ka phone ka hmet ve nghal a…

“Mihring nunah hian thil hlu tak hi a thlng khat hle, kn tana mihring hlu tak phei chu an lo kal zen2 lo, chutiang mi i tawng a nih chuan nghet takin kuah la, kaltir phal ngai suh ang ce”
tiin rang zet maiin ka chhang a.

“Chuti a nh chuan i tana hlu, lo kal khat m2 i ton chuan hmagaih n duat tkin enkol ang ce, entik hunah nge kalsan dawn ce th i hre si lo” tiin min rawn chhang a, a ngaihna ka hre lo hle a, ka thinlung a na zawkin ka hria, Mika-i’n min kalsan mai tur angin ka inngaihtuah a, ka bing deuh mum mum hian ka hria a. Chutah zet chuan ka inngaihtuah harh a, Mika ka hmangaih tawhzia chu ka inhrechhuak a, a message hmu lova ni khat lek pawh awm harsa ka tih tur ziate ka ngaihtuah chhuak a, ka nitin nunah hian a bet tlat tawh tih ka hria, ka thinlungah hian hmun pawimawh tak a chang a, a tello hian ka nitin nun a kim tawh lo a ni tih ka chiang. Hmaichhanah la intawng lo mah i la hmaichhana intawng tawhte aiin kan inkara hmangaihna leh inngainatna awm chu a thukin a ril zawk fe tih keimahah chuan a chiang hliah hliah tawh.

Mika chu ka SMS let leh a… Sap tawnga a fiah zawk takin tiin ka thiam ang tawkin ka chhu a…

“Dont come close f l8r ull jst pass by; don’t touch me f l8r ull jst let me cry; dont luv me f l8r ull jst leave me and won’t stay…”

Ngati nge ka thawn pawh ka hre bik lo, ka romantic over tawh a ni tih pawh ka hai lo, mahse amah ka ngaina a, ka ngaizawng a, ka tan engtiklai pawhin awm reng se ka duh, ka tan a awm lovang tih ka hlauhna ringawt chuan ka nun a tichau chu a ni reng tawh. Khati tehchiama ka luangliam ta kha mak ka ti a, mahse ka rilru chhungril ngaihtuahna a ni miau si.

SMS hlirin kan inbia a, kan inngainatna erawh ‘text’ satliah ngawt a ni lo, khawia awm nge a nih, eng ang hmel pu nge tih ka hre hauh lo, mahse ka tan chuan ka chhehvela an hmel ka hmuh theih nula tam tak aiin a hlu zawk si. A aw hriat chakna ka nei thar leh ta a, inbe lova SMS ringawta inkawm kan remtih tawh sa chu bawhchhiat mai ka duh ta, kan inremsiamna chuan min dang zo lo, ka ngai ngawih ngawih a, a aw vawi khat tal han hria ila tih chu ka thinlung luahtu lian ber a ni.

Zan khat chu ka insum zo ta lo… ka phone chu rang em emin a la a, a aw no mawi tak nem dam thlap mai chu ka tan chuan thawm ri mawi ber a ni. John Keats-a’n ‘Unheard melodies are sweeter’ a tih te pawh ka zir ve tawh thin, mahse hemi tum kher kher hi chuan ‘heard melody’ chu ka tan chuan nasa takin a mawi zawk a, namen lovin ka thinlungah lawmna a thlen a ni.

“Julius, biak che hi kei paw’n ka chak thin alawm, mahse inbe lova SMS hmanga kan inkawm hi kan pahnih tan a tha zawk a ni, tun bak hi chu i inbe tawh lovang, SMS kha kan pahnih inkara thil awm bultantu a ni a, hmangaihna min siamsaktu a ni, min siamtu hi hrereng ila, a huang pawn lam i dai tawh lovang,” tia a aw mawi dam thlap maia a sawi chuan ka rilru a hmin nghal a, Mika rawtna leh ngenna chu ka pawm ta thlap a, be kher lova kan inkara hmangaihna awm chu chhawmnun zawk ka tum ta a ni.

“Unheard Melodies are Sweeter” tih chu kan changchawi a ni ta ber mai. Mahse nitin mai hian Mika aw chu hriat nawn leh ka chak a, a aw nem no tak kha ka bengah a cham reng a, Florence Nightingale-i aw dam tak maiin sipai damlo a ti dam thei tia an sawi ang deuh kha ka dinhmun ni berin ka hria. Ka hmangaih tak em em, ka la hmuh hauh loh, a aw pawh vawi khat chauh ka la hriat chu ka nun tidamtu, lungngaihna umbo theitu ang hialin ka ngai tlat. A aw hriat leh mawlh mai chu ka chak a, ka thlahlel a ni. Biak leh tumin bei nasa teh mah ila, ka phone a chhang lova, SMS hmangin ka lunglenna te chu rawn hnem a tum thin. A SMS ka dawnte chu a thinlung chhungril atanga rawn chhuak niin ka hria a, amah biak chak luat avanga rilru hrehawmna ka neih thinte chu thu thawn hmang chuan min paihbo sak a, ka lunglenna ata chu min rawn khaichhuak ta thin a ni.

“Mel za tam tkin mn dng ph a ni thei, m’se ka thinlungah hian i om kumkhua ang. Mit ngeia hmh ce ka chak, mahse ka hmuhloh avng ce hian ka thinlunga hmun poimoh tak i chan hi chhete pon a nep phah lo, i tan hian e’tiklai pohin ka om reng ang” tiin zan khat chu SMS min rawn thawn a, hetih hunlai hian thla hnih dawn SMS kan inthawn tawh a ni. Mika chuan min ti lawm hliah hliah a, a laka beiseina sang zawk ka neih thinte chu ka mamawh tawk zelin min pe a, hmuh ka chak a, biak ka duh a, mahse hmuin be kher lo mah ila ka tan engtiklai pawhin a awm reng a ni tih min hriattir a, chu chuan amah ka hmangaihna a ti zual a, amah ka ngainatna a ti thuk a, hmuh ka chak avanga ka lunglenna te chu min hnem thin.

“A ruktea tuma hriatpui hauh lohva hmagaih ce hi ka tn chuan a harsa ve thin Mika, a tka inton miau loh chuan ka rilrua awm angte hi i rilruah a awm ve angem tih hi ka chiang thei lo lh thin, thuthon ringot hi chuan min hmangaihna hi ka hmuchiang thei thin lo, mahse kei chuan Mika ka hmangaih che a, ka hmangaih reng ang che”

“Tongka ngeia ka hmangaih che han th hi ka chak asin Julius, se hmagaih luattuk ce hi ka hlau, ka rilru hi min hliam ang tih ka hlau hliah2 a, ning lova min hmangaih zel theihna tur hian ka tawngtai thin asin”

tia min chhanna chuan a laka ka beisei zawng zawng a ti famkim a, a bak mamawh ka nei tawh lo hian ka inhria.

“K tong ce hi vannei ka inti a, Khuannu remruat a nih ngei kei chuan ka ring tlat, i kianga kumkhuaa awm hi Khuanu’n ka tana a ruat loksa diam niin ka ngai tlt, ka om thei lo a nih po’n kei chuan tumah ka dem chuang lovang, khovel lo la awm turah tal Khuanu hian hmn mn ruatsk ka ring tlt a ni”

A tira ka chhan duh lawk loh kha tunah chuan ka engkima engkim a ni a, a hmel hmuh chakin ka kur a, ka pachanna a chaurau a, ka intihpa ve thinna tihnemin a awm thin. A hmel hmuh ka chak em em a, inhmuh ka rawt apiangin aw dam thliam mai hian “Ka hmangaih, hmanhmawh lovang, kan la inhmu em em ang,” tih hi a chhanna a ni zel si.

Hmaichhanah inhmuin intawng lo mah ila kan inkara hmangaihna chuan nitin mai hian hniak thar a nei a, intawng lem lo mah ila kan inhmangaihna a nep chuang lo, nep a hnehin a zual zel zawk ni hian ka hre thin. SMS hmang chuan hmangaihna thu kan inhlan zel a, kan thinlung thlunzawmtu chu SMS a ni a, kan inthawn mawlh mawlh a, engtik ni-ah emaw chuan kan la inhmu ngei ang tih ring chungin chu hmangaihna kawng chu kan zawh dun zel a.

Krismas a hnai hle tawh a, khua a thiang a, ka khua a har hle a, a hma zana kan inbiakna kan la chhunzawm lo, ka phone ka phawrh a, ka hmangaih Mika chu thu ka thawn leh ta a, mahse chhanna reng reng ka hmu thei ta lo, ka ngaih a tha lo hle a, mahse a prepaid card a zo a ni’ang tiin biak tumin ka phone a, mahse chhanna reng reng a awm thei si lo. Ka ngaih a tha lo hle a, SMS sawm dawn lai ka thawn ta tho a.

Pasal a nei ang a, min hrilh duh si lo a ni’ang, a phone a tibo ang a, a chhartuin min chhang duh lo a ni’ang… thil awm thei zawng zawng chu ka ngaihtuah kim dapin ka hria.

Urlawk ni tlaiah ka phone message tone a ri ral ral a, rang takin ka en a, ka hmangaih Mika SMS a ni tih ka hre nghal a, mahse a thu min thawn chuan min thawng na hle a, ka thisen kal a tawp ta mai emaw tih tur khawpin thawk harsa ka ti a, ka phone kenna kut pawh chu ka ti chhe thei lo ni ber hian ka hria, ka chhiar nawn thin, ka hrethiam lova, ka lungawi lo a ni…

“Khovlah hian mihringte hi kn dh ang leh kan suangtuahna angn kn om thei lo, a chang chuan kan hmangaih m2 then kan hlauh ngawih ngawihte kan then a nai a, a chhan soifiah harsa tk a ni fo, kn hmangaih loh vang emo mn hmanaih let loh vang a ni khr lo, hetiang hunah hi chuan mangtha na tawngkam hi ‘ka hmangaih che’ tih a ni thin”

Enge a awmzia, enge sawi a tum, min hmangaih a, mahse engatinge min mangtha kher a tul, engmah chiang fek fawka sawi a nei si lo, a thu min thawn chuan min ti hrilhhai a, min ti mangang a ni. Chhanna fiah tak ka duh tiin message ka thawn let a, mahse chhanna ka dawng si lo, ka phone lahin ka phone a la thei si lo.

Hmeichhia avang hian ka rilru ka la tihah ngai lo, ngaihzawng mumal leh bulfuk tak pawh ka la nei ngai lo, nula leh tlangval inkara hmangaihna hian mihring rilru a ti na thei ngai ang tih ngaihna reng reng ka hre lo. Hmangaihna vanduai an tihte hi nula leh tlangval inkara thil awm thei tak tak lo ang lekah ka ngai thin, mahse a taka han tawn meuh chuan a hranpaa hrilhfiah leh chuang ka ngai hauh lo mai. Mika kianga awma, SMS hmanga kan sawidun thin hmaichhana sawidun aia chak leh thlakhlelh ka nei lo, ka mangang a, ka na a, ka damna Mika chuan min chhang tawh si lo.

Urlawk ni chawhnu lam a ni tawh a, ka thiante chuan an ngaihzawngte nen Krismas hmuahna party siam tumin mamawh an lamkhawm a, hlim em emin hunpui hmang turin an inpuahchah mek a, Mika-i’n min rawn chhan mial takin tiin ka phone chu engtiklai pawhin ka hum a, beisei loh ka phal si lo, beiseina chu a hlawhchham chu a ni deuh ber tawh bawk si.

Tut…tut…tut…tut…tut… “D’Cafe-ah inhmu ang, chawhnu dar 3 ah aw…” Ka pian a hnu lama ka hlim ber tum a ni ang ti ila ka sawi sual ka ring lo, Mika message chu ka chhiar nawn leh a, a ri te’n ka chhiar a, darkar chanve ngawt hun la nei tih in hre mahila D’Cafe lam chu ka pan a, a rawn thlen hma ngeia kan intiamna hmuna lo awm ka duh.

D’Cafe chu ka va thleng a, kan inhmuhna tur hmunah chuan nula kawr dum ha hi a lo thu vang tawh a, min rawn melh a, a kiai sek a, Mikaella a ni tih ka hre nghal a. Darkar chanve laiin ka hma si a, min la thlen khalh cheu chu a mak ka ti hle a, a ngainat em em rose par senno ka kensak chu ka pe a, ngawi rengin a la a, a hnim vang vang a, a kianga thu turin min sawm ta a.

A mitmeng dum fiah em em mai chu ka suangtuahna rama ka hmuh fo tawh kha a ni a, a mitmeng hian thu sang tam tak a sawi ni berin ka hria, a hmui sen duk tai deuh hlar si te chu ka tan chuan thlir kham chi a ni lo, a sam dum hlap mai, a dar lehlama a chhawlleng inzam thla diar maite chuan a hmelthatna chu a belhchhah a, a mitah chuan hmangaihna ka hmu bawk, mahse a hmel mawina zawng zawng belhkhawm chuan lungngaihna a hring chhuak tlat lawi si, mahse chu lungngaihna hmel ka hmuh chu ka haider lui a, ka hmangaih Mikaella kiangah chuan lungawi takin ka thu ta a.

“Julius, hun rei ka nei lo tih ka hrilh hmasa duh che” tih chu a tawngkam chhuak hmasa ber a ni ta tlat mai. A aw tham no mawi em em chuan lungngaihna lam thu a sawi lo, mahse a lungchhiatthlak em em lawi si.

“Mika, ka rawn thleng ve chauh a, kan huntiam pawh a la ni lova, kan huntiam thleng tal chu hun min pe la”

“Ka duh alawm Julius, mahse hun ka nei lo, i kianga awm hi ka duh a, ka thlahlel ngawih ngawih a, mahse hun ka nei ngang lo a ni, inhmuh ka rawtna chhan hi thil pahnih chiah a awm Julius, hun hlimawm tak min pek avangin lawmthu hrilh che ka duh a, min hmangaih avangin ka lawm a, kei pawhin chatuanin ka thinlung chhungril berah ka dah tlat ang che, Julius, min hrethiam la ka kal ang e…”

Ngen luih chi a ni lo tih a mitah ka hmu a, chiang takin ka mitah min en a, ngun em emin kei pawhin ka en a, a mitah chuan thil danglam tak a awm hian ka hria, a hmel mawina chu sawifiah theih loh khawpa mawi a ni a, a hmelthatna chu hai rual a ni lo, mahse a hlim lo a ni tih chu chiang takin ka hmu thei.

A thuthmun atangin a tho a, min nuih saih a, “Julius, naktukah kan inah lo kal la, min rawn hmu ta che” tih pahin rawmawl var min pe a, chu rawmawla thu inziak ka chhiar zawk lai chuan Mikaella chu a lo awm tawh lo.
Krismas Ni a ni a, phur zet maiin ka tho a, Mikaella tana hmuhnawm tling khawpa mawia inchei ka tum avangin ka bei ngawrh hle a, ka thuam neih that ber ka ha a, rose par senno ka lei a, Mikaella te in lam chu ka pan ta a.
Gate ropui deuh mai chungah chuan “Cervantes Chhungkua” tih a inziak a, gate vengtupa kiangah Mikalella hmu tura kal ka nih thu ka hrilh a, mak ti hmel tak hian min thlek a, a hmel lah chu a ngui em em mai bawk si, intercom a la a, minute rei lo teah nu upa lam deuh tawh Mikaella ang zet mai hian gate a rawn pan a. Min nuih a, mahse a hlim hlawl lo. “Julius-a i ni tiraw, Mikaella nu ka ni a, kan lo beisei reng che asin” tih pahin inchhung min panpui a. “Mika hian i hming hi a sawi ngun lutuk a, kan chhungkaw member pakhat ang tluk hialah kan ngai che asin,” a ti a, a hnuk a ulh a, engmah a sawi zui thei ta lo. A ngaihna ka hre lo em em mai si, a hma ni chiah khan kan inhmu bawk si, tunah lah a nuin hnuk ulh teuh chungin Mikaella chanchin min hrilh ta mai bawk si.

An in ropui em em chu a reh ruai mai a, an chhung hnai tak tu emaw a thi a ni’ang tiin rin dan ka nei a, mahse ka rilru chhungril chu a zam a, ka khur ka khur ta mai.
Mikaella nu hnenah chuan: “Khawnge Mika-i chu, amah hmu tura lo kal ka ni,” tiin a nu chu thil awmzia hriatchian tumin ka zawt a. Mikaella nu chuan min kai a, pindan thim deuh ruai chhunga kuang mawi em em mai, pangpar mawi em em kara awm lam chu min panpui ta a. Kuang bulah chuan mi sawm emaw vel an awm a, a then an tap a, a then an tawngtai a, ka tiril a man a, ka khur a, lungngaihna chuan min tuam zui ta nghal a.

Mikaella hmuh ka tum lo, he kuang chhunga awm tur hian ka phal lo, ka pan hnai a, a hma ni chiaha a vawi khatna atana ka hmuh Mikaella, ka hmangaih-i chu ka hmu ta si.

Ka dang a ro nghal hulh hulh a, ka mit sulh sulh a, ka biangah mittui a luang, mahse ka la awih thei chuang lo. “A ni thei lo… mahse… nimin lawka ka hmuh Mika kha a la ni reng bawk si.”
A kuang sir leh a chhehvelah chuan rose par senno tam em em mai a awm a, Mika pangpar ngainat ber a ni tih ka hria, kei ngei pawhin Mika tana ka ken pangpar chu rose par senno a ni si.
“I lo kal thei a kan lawm hle mai, he khawvela Mika hun hnuhnung i rawn hmanpui thei a, chu mai bakah Mika hmangaih takin i lo kawm thin tih kan hria a, kan lawm tak zet a ni,” tiin ka hnung lam atang chuan pa valai tak, hmel fai tak hian min rawn hrilh a, Mikaella pa a ni.

“Julius” a ti a, a mittui a luang zawih zawih a, “Mika Bawihteii khan a chhuang che asin, a phone kha engtiklai pawhin a hum reng a, message a lo kal apiangin a hmelah rose par senno kan hmu thin, a hlim thin teh asin. Min kalsan dawn khan a phone kha a kuangah dah ngei turin min…” a sawi zo thei bik lo.

Ka tan awih mai theih a ni lo, he khawvel a chhuahsan atanga a ni thumna a ni tawh. A hma ni Krismas urlawk ni khan D’Cafe-ah kan inhmu si, eng chin nge ka tawn, eng chin nge ka mumang tiin ka inzawt a, Mikaella hmel ka en a, ka mumang a ni si lo, ngawi rengin chu thihna kut vawt chuan a vuan tlat tawh a, a kuang mawi em em chhungah chuan che lo chang lovin a mu reng tawh si.

“Nimin khan kan inhmu si a, engatinge, engtinnge?” tiin a nu lam hawi chuan ka tawng chhuak ta hlawl mai.
“Julius, hrethiam teh, Mika Bawihteii chuan nimin piah khan min kalsan tawh alawm,” tiin a nuin min chhang a. A ngaihna reng reng ka hre lo. “Naupang te a nih lai atangin lung natna a nei a, hlim taka a awm theihna turin theihtawp kan chhuah a, a hun tawp dawnah nangmah kaltlangin Pathianin a rawn pe a, nangmah avangin a dam hun chhung tura doctor-te sawi pawh thla hnih laiin a chuang tawh asin Julius…” a ti zui a.
“Mahse…” ka han ti a, sawi tur ka hre tawh chuang lo, ka swi tum kha an tan awih ve theih a ni tawh lo. A nu bawk chuan: “A kal dawn khan i chanchin kan zawt a, mahse keima’n ka hrilh mai ang, Julius-a chu min hmu turin a lo kal dawn alawm tiin min chhang a, kan rawn be ta lo che a, mahse a sawi ang ngeiin hei i lo kal thei a….” a ti a, engmah a sawizui thei tawh lo.

Ka mang a ang a, ka lungngai a, ka khua a har a, sawi tur ka nei tawh lo, Mikaella chu ka en ngawih ngawih a, a biang dai diak tawh te chu ka chul a, a hring a hranin ka hmu leh tawh dawn lo tih ka hriat avangin kumkhuaa ka thinlunga awm reng tawh turin ngun takin ka thlir a.

Vuina hun kan hman zawh chuan nitina a kalna thin nia a sawi an in kianga biak inah chuan ka tei lut a, ka tap a, ka tawngtai bawk a, ka phone ka la chhuak a, Mikaella tan SMS ka chhu leh a.

“Mika, mite tana inpkna hian hlimna mn pe thei a ni th mn zirtr a, mite chunga thatna lantir thinte hian midang lak atangn thatna chhiar senloh an dawng thin tih min hrilh, ngainat neih dan mn zirtr a, chuth hmagaihna omzia min hrilhfiah a, hmagaih neih dan min zirtir a, mahse Mika, kan hmangaih te’n min kalsan toh hnua awm dan tur min zirtir lo a ni, Mika KA HMANGAIH CHE” tiin.

Chhanna ka beisei tawh lo, mahse ka thlah thei lo a ni tih hriattir ka duh, a damlai khan ka hrilh hman lova, ama’n a sawi thin ang khan khawvel tharah kan la intawng leh thei a, chumi ka thlen ve hmaa a rilrua min lo hriatsak atan ka duh a ni deuh ber.
Rei lo teah ka phone a rawn ri a, ka thauah min man ka ti lo thei lo, ka mur sung sung a, beisei loh tur ka beisei avanga ka awm dan pawh theihnghilh niin ka inhria. SMS chu kan en a, Mika number ngei chu a ni si…

“Khovelah hian hmagaih kn nei thn, kn hmangaih te’n mn kalsan chuan kan thlah a ngai, khovel lehlm rama omte vawn tlat rng hian mihring a siamtha lo, ‘se Julius, Pathian kut erawh thlah suh ang che, a kut lehlamn min vuan a ni tih hrerng la, Amah chuan min suihzawm tlt a ni th lo hrerng ang ce” tih ka hmu a.
“Mika, he khawvela ka awm chhung hian ka theihnghilh dawn lo che a, ka thlah phal ngai dawn bawk lo che asin,” ka ti a, biak in chu ka chhuahsan a, khawvel thar ka thlen ve hun tur chu ka suangtuahnain ka thlir a, Mika hmel chu ka hmu nawn leh a.

May be related

• Fold your shirt in 2 seconds flat!
• Mizoram Protest Day in pictures
• Someday…
• 100 email subscribers
• Check your Airtel broadband speed

Recent entries

• Pa…!
• CBI leh Babutea
• Mizoram Kristian history research tur
• Pathian hi mipa nge hmeichhia?
• Good-O-Meter test
• Opening in Banks
• Ethel ft Manui - Medley
• Tih tur nei vak lo ho..!
• MNF decision on trust vote by next week
• Creed covers NGTV

This entry was posted on Thursday, July 3rd, 2008 at 2:05 am and is filed under more than words. You can follow any responses to this entry through the RSS 2.0 feed. You can leave a response, or trackback from your own site.