mi(sual).com

-Zara Vanglaini
via Email

[Tunlai Aizawl titi pakhat,Siberia Hell chungchang, Thianpa Zara'an bihchianna thuziak min rawn thawn ve a,tahhian ka rawn chhawp chhuak ani e]

A khuhhawnna :
Biak In-a mipa naupang tlarathu rual kan nih lai a, kan pastor-in Hremhmun hlat zawng tehkhinthu a sawi kha ka la hre rengmai. “Cowboy rorum deuh mai pakhat hian pastor pakhat chu aluhchilh a,” a tia lawm, kan pastor chuan. “Chu cowboy chuan, ‘Pastor, Hremhmun hi engtia hla nge?’ a ti pawr chhak a,pastor chuan, ‘Tlangval, Hremhmun chu hla lo te a ni, hmanhmawh hauh lova i kal paw’n i thleng thuai mai ang,’ tiin a lo chhang a,” a ti, kan pastor chuan. “Chu cowboy chuan remhmun a awm loh thu leh, Vanram pawh eng atan mah a tih lohthu a sawi hnuin pastor chu a chhuahsan a;pastor In awmna mual kawi lai a tlan pelh hnu lawk chuan a sakawr chuan khuar a dai palh a, achunga chuang, cowboy chu a vawrhthla a, chu cowboy chu a ka pawh chhawn lohin a thi nghal
a,” tiin a sawi a, kan pastor chuan, “Chu cowboy tan chuan Hremhmun chu pastor In bul lawkah a lo awm reng a,” a ti a, naupangho kha kan thaw ri sang sang a…

Hremhmun thu ka dawng!
Nikum July 19-a Taliban hovin South Korean Kristian thalai 23 an man hnu a, Afghan sorkar hnena an phut thilte nawr chhuahna’na hun tiam an pek vel lai leh, pastor pakhat leh IT lam mi thiam pathum ngawt an kahhlum hnu a, August thla thlenga Afghan sorkar an vau chher chher lai khan, August 7 zanah he kan Zoramah hian nasa takin ‘local news’ a thang vel a; muthilh hlana tawngvai tih mai loh chu, harh lai taka tawnghriatloha la tawng ve chhin eih lo, kei ngei pawh hian - “Zanin hian Taliban-te’n Korean an mante kha an that vek dawn a, lo tawngtaipui rawh,” tih thu hi ka dawng ve nawlh mai pek a!

Chu SMS min thawntu chuan thuhriltu pakhat hnen atanga a thu dawn a nih thu min hrilh nghalbawk a; thuhriltu leh hril lotu pawh ni se, hemi chungchang kher kherah hi chuan internet kawchhunga ka inliluh hnu lawk a nih vangin, ‘an that dawn lo’ tih thuah khan ‘Chiang-kai-sek’ ti khawpin ka chiang a, ka awih loh nghal rikngawt chu a tukah a awihawm lohzia ka hre nawn leh salh a! Kei mi sual, mi’n an uar hluai leh an bawh sup sup thil chu ho ti tlattu, mite thil buaipui luih luih chu eng hu-a ngai duh hauh lo lui ve tlat thintu hian ka ti fuh leh mial a.

Kum khat dawn a vei leh ta, thian pakhat hnen atang bawkin, hman hmana ta tawh, ka awih duh ngai reng reng loh leh, dawt muhlum mai a nihzia mi thiamte’n an finfiah tawh hnu, ‘Siberia rama Hremhmun laihchhuah thu’ tun hnaiah thuhriltu pakhatin mipuite hriatah ‘play’ in, Hremhmun laihchhuah a nih dante a sawi tlawr chiam thu min hrilh leh nawlh mai pek a; thu atthlak mai mah ni se, ka nuih pawh a za lo!

Taliban-ho vangin Mizote hi a hnam pum mualphoin kan mualpho teuh ther ther hle tawh a; finfiah tum chuang lo, mi’n an sawi avanga pawm nghal ringawt thin Mizo bawk kha kan ni leh ta! Hei, tunah pawh, dawt thu mai mai sawi lo tur a, khawvel mite zing atanga ‘koh hran’,Kristian-te zingah Hremhmun laihchhuah thu a ri leh ta a; thuhriltu pakhatin khawvel dawt thuthang mai mai thu tak khuka a khukpui chiam thu leh, mipuiin chaw tak emaw tia an lem duak duak thu ka hre leh ta - zahtlakin!

Thu vavuk:
An tuibur hmuam khawngkhawbai chung pawh kan hnial hneh loh tur mihring hi khawvela kan awm chhung hi chuan an awm ve reng dawn a; ‘Tawngthei sabawp chang rawh,” kan tih rual a,”Ka hleh ve nghal ang che,” min tih zawm nghal zat thei tur khawpa tawngkam varak tui thiam hrim hrim pawh hi veng tinah hlui khat daih hi chu an awm ve hrim hrim. Chutiang mite tawngduh lutuk chuan a dik a dawk pawh thlu lovin, an thu hriat ang ang chu han pik chhuah puat puat hi an ching khawp mai a, dawt leh thu tak inkar ngaithla tur hi chuan chhete tal hriatna lama han pen zauh ve deuh hlekte hi a ngai thin a lo ni.

Internet-a ‘Christian News New Zealand’ tihah chuan Siberian scientist pakhat, Hremhmun hmuchhuak niawma insawi inpuanna an tarlang kulh mai pek a, ‘vur rama Hremhmun hmuchhuak ta mai chu’ ti chungin ka han chhiar pawr pawr a, he scientist hi tawngtaipui a ngai hmel viau-in ka hre ta tlat pek a; a thusawi awihtute lek phei chu thlarau lamah hian an ‘nil’ hneh dawn khawpa hriatnate ka nei chawpchilh zui nghal bawk a.

Bible hi chhiar chhuah tam lamah a innghat lo va, a hman chhuah tam dan leh rinna nasat danah a lo innghat a nih hi, tihte ka ngaihtuah.

He scientist hming an tarlan lah hi, Mizo thawnthubu phuahchawp luih ngial ngial a, ‘a changtupa hming chu Thanga a ni a’ tih ang vela belhchian dawl lo sa nghal chhumbung tet tut tak mai hi a ni a, heta an scientist hming an tarlan pawh hi - Dr Azzacov tih ringawt zuk ni a!Scientist zinga hming tawi ber pawh a ni mahna!Chu an Dr Azzacov chu geological group hotu a ni awm e. Siberia huamchhungah (Siberia an ti ringawt a, hetiang hmun pawimawhte chu a hmunhma chiangkuang taka sawi awm tak!) Lungalhthei khur ang deuh hian (engvanga lei lai khuar ta chiam chiam nge an nih an sawi lo leh pek a!) lei chhungril kilometers 14.4 zeta thuk an lai a (a thuk awm khawp mai: khawvel leilung thuk lai ber, Pacific tuifinriata Mariana’s Trench an tih khu kilometers 11 chauh a ni a; khawvela lungalhthei khur an laih thuk ber, Carletonville,South Africa-a TauTona lah khu tun thla thlenga an laih hnu-ah pawh 3,902 meters a la ni leih leih chauh a!), Mariana’s Trench leh TauTona thuk lai ber pawha an hriat ve phak loh kha, he Siberia rama eng khur emaw atang hian an hre ta a ni awm e. Mihring hrehawm tuar au te thial ruan ruan mai thawm an hria a, thlarau sual hnathawh vanga au nuaih nuaih an ni bera an hriat thu an sawi a, scientists rual leh hnathawktute chuan Hremhmun laichhuak anga inngaiin, hlauin an khur ta chiam mai pek a nih chu!

Dawihzepte dawt thu:
‘Dam ka peih tawh lo, ka Lalpa hnena chawlh hlan mawlh a ni, ka nghahhlelh ni,” tia iak iak thin tam tak hi, khawpui a lo rik a, tek a’n tlak rik rum rum hi chuan hlau thlabar mangangin, “Awi, ka nu!” tih leh ta chiam chiam thin an an ti! Dawt pawh va ni suh. Siberian scientist-te hian Hremhmun kawng dik an zawh fuh palh ta hlauh a nih chuan, sawi theih ka nei lo ang a; Vanram fan thu ai chuan an thu rawn hawn a ngaihnawm nep zawk ngei bawk ang. An lei laih khuar lah chu, khawvela lei laih khuar thuk ber a nih loh paw’n, thuk ber zinga mi niawm tak a nih laiin, khawvel hian record-a chuang pha hial awm khawpa lei laih thuk chu a hriatpui ve tlat lo va, a mak dan a thuah hnih ngawt mai! A scientist-te ber ber paw’na an thil hmuhchhuah finfiah tum ta lo va, kel phung tap chim hmu ang hrim a, bak lenga an tlanchhiat ur ur hnu a, an thu hriat derthawng tak, thu dik ber niawm ang hrima mi thenkhat hriata an han nemnghet ngam hi chu an Hremhmun laihchhuah thu ai mahin a mak zawk hial awm asin.

Mihring mangang te thawm hria a, Hremhmun laichhuak ta ang hiala inngai thei khawpa Hremhmun hnaihtute chu, mei rimte pawh rawn nam chhuak hiam huam tur an nih laiin, chu lam rim reng reng chu an thu tlangaupui-ah hian a ri lo va, scientist ve ta lem chuan, puk chhunga ri insawhkhawk theih dante tal pawh ngaihtuah chhuahthiam awm tak a nih laiin, dam chunga Hremhmun fang mai thei an nih thu chu tlangthantir an duh emawni tehreng, an Hremhmun laihchhuah thu chu an sawi chamchi ta mai a, “Chu thawm mak tak kan hriat chuan, mak tiin kan khat a, kan hnuai lawka kan laih pawp hmabak leh tura thawm hlau chuan kan thlabar ta chiam mai a,” tiin Dr Azzacov chuan a sawi a. He doctor hian khawvel lai tak chu a kawrawng reng niin a sawi ngam hial bawk! (Lei chhungrila magnetic field vanga lei hipna awm thu te, chumi hmanga nungchangte paw’n pem hun an neih theih dan te, Newton-a ‘Law of Gravity’ chungchang te hi Geography-ah khan ka lo zir ve tlut tlut tawh thin a, thil kawrawngin hipna a neih thu erawh zir ka la hmabak a ni awm e!).

Dr Azzacov chuan an Hremhmun chhehvel chu a lum hle tih a sawi a. Fahrenheit celsius degrees 1,100 atanga 2,000 vela lum a ni a, an beisei aiin chu hmun chu a sa a, khawvel laimu-ah Hremhmun mei inhlap alh zuai zuai a awm ngei a nih an rinthu leh, scientist dang tam takte paw’n lei chhungrila ri an hriat ngai loh thawm hlauhawm tak an hriat tak chiam chiam thu te; microphone tha ber ber chi nena an ngaihthlak ngial hnua hlauh loh theih loh aw-rawl a nih thu te; mi sang tam tak mangang au tial ruan ruan mai thawm chu hlauhawm rapthlak an tih thu leh,an project hnathawh mek chu chhunzawm ngam rual a nih tawh loh thu te a sawi ta chiam mai a ni.

Bawm ak thu:
Thawnthu phuahchawp nalaileng, ‘Zovi bu’ tih ang velte kan lukham chuar ve tat lai atang daih tawh khan, he Siberia rama Hremhmun thu hi thawnthu phuahchawp a ni e, tih chawp pawh ngai lovin an lo inhrilh kual ve sap sap tawh a,1990 vel bawr khan he Hremhmun thu hi khualthuthang leh bawm ak thu mai mai a nihzia an lo inhrilhhre kilh kelh vek tawh a. Mizo chanchinbu thenkhat kawma ‘Biate MST bus-in ramhuai a phur’ an han tih hluah thin lai ang mai han, 1990 vel bawra chanchinbu thenkhat chuan he Hremhmun thu hi sum chalai nan tak an lo hmang ve tawh a ni.

Finfiahtu pawl tam takin Dr Azzacov leh a hote’n finfiah ngam lo va, hlaua an tlanchhiatsan tak, he Hremhmun hi hmuhchhuah ngei tumin an lo bei tlut tlut tawh a; finfiah chaka tuihalte chu he Hremhmun hian a hlau ang a, a thawm pawh chhuah ngam lovin, an meipui tuah-alh hluah hluahte chu tuiin an leih rem leh vel thin pawh a ni ta ve ang, finfiah tuma beitu apiang an hlawhchham zel mai! Dr Azzacov-a leh a hote ‘drilling project’ pawh hi Pathian hming lam chunga ‘Suangpuilawn kidnap drama’ chan ang mai maia dawt pholeng lek a lo ni a, hmanlai thawnthu phuahchawp, Norwegian sikul zirtirtu pakhat, Age Rendalen-a’n lei kua atanga bak ang deuh rawn thlawk chhuak a hmuh thu nena he thawnthu a chawmpawlh vel hnu phei chuan, rinna derdep mi tam tak chuan he bawm ak thu hi Sibuta thupek ang maiin an ring nghet ta tlur mai a ni!

Rendalen hian Christian television programme pakhat - Trinity Broadcasting Network-ah he Hremhmun chungchang hi a thawn a, USA-a a zin hnuin an lo kawm nghal chat a; mahse an ram lama a kir leh hnuin Rendalen ngei ngei pawh hian thu belhchian dawl lo a nih thu a sawi chhuak leh ta tho a ni. Chumi hnuah Dr Azzacov leh a pawlte’n Hremhmun kawngkhar nam hawng mai thei dinhmuna ding mek niin an rawn insawi leh a, dawt thu mai mai chu an inhrilhchhawng zel a; khualthuthang awih tawk an pung zel a, a tawpah mipui nawlpuiina kan hriat theih turin he kan Zoramah pawh hian thuhriltu thenkhatin he Hremhmun thu hi an han tlangzarh ve leh ta a, a hre hnuhnung apiangin kan lo awi ve leh ta zel a! Mi tam tak chu chu dawt thu vang chuan an chi-ai a, thu dik ziktluak lo inhrilh a, inzirtirna avang chuan he thil chhuichianna website -https://www.truthorfiction.com/…..tohell.htm chu ka luhchilh ve ta a ni.

He Hremhmun boruak hi a sat zual hmain thelh rem vat a tul a lo ni e. Hlauh awmze nei lo Mihring aia chungnung zawk awma hriatna nei tlat thin mihring vek kan nih miau avangin,sakhaw thil a nih tawh chuan kan chhungril a fan hma bik thin. Mahse keini chu Kristian kan ni a,Isua’n a din Kohhran huangchhunga awmte kha kan ni. He Kohhran hi Chatuan Lungpui (Isua)chunga innghat a ni a, he Lungpui hi kan innghahna tura din a nih miau avangin, inhumhim turin he Lungpui chungah hian kan chuang thin tur a lo ni. Lungpui chunga In sak chu a tlo a, thli leh tuifawn paw’n a nuai chhiat theih loh kha le!

Thlamuanna thu min chahtu bulah chuan hlauhawm a awm ve thei lo va, awmze nei lova hlauhna hi thil atthlak mai a chang thin. He Lungpui chung atang hi chuan khawchhak lungpui lum a hlauhawm ve lo va, sakawlh a tihbaiawm pha ve lo va, Hremhmun (tak tak) pawh an chhuk thlir veuh veuh mai thin zuk nia!

Tuna kan kan Kristian dan hi chu a politician rilru thin ngawt mai. Mite hian kan tawngtai thin a ni,tih hi hria se, ti chung si hian, kan tawngtai thin a ni, tih chu kan nun hian engtin nge a pholan? A chhia a tha pawh thlu tawh chuang lo va, mite’n an buaipui chu buaipui ve ta chiam chiam thin hnam kan lo ni maw? Engamah hmaa mangang a, beidawng ngawt thin ram kan ni em? Choak arawn chang tawn pawh hmusit hleithei tawh lo dinhmuna indirtir a, mahni hnam ze thlauh a,hnam dang tuifawna pil ruai ruai thin kan ni em?

Mizo hi Pathian hnam din tho a ni a, kan hnamzia leh phak ang tawk tawka Siamtu fak leh chawimawi hi Pathianin a pawm ve tho ka ring thin. Mahni duh dana sapatal theih a, inthununna hnuaia kun rei peih lote tan Pathian thununna leh thupek phei chu zawm rei peih rual em ni dawn? A thu hrimah, a hnam pum ang hian mite’n min bum thei mai dawn ni-te hian ka hre ta a; thu dik danglam thei lo vuan chunga hmasawn tur kan nih lai a, luang thli chhem nghin ang maia kan han thle tawn chhen mai leh, he hnamin a hlawkpui reng reng loh tur thila kan han buai vak vak thinna-te ka ngaihtuah chhuak nawn leh a,ka tlawmngai tlat! Engati nge, keimahni leh keimahni hi kan inhralh leh thin? Mizo hlutna te,Kristian nun tak te hi keimahni chauh loh chuan,tuma’n an tibawrhbang dawn si lo. Pathian hian chhan tha tawk neia kan biak a duh ka ring a, thu thang dik lo mai maia koh eih ve theih a nih ka ring lo.

Keia ngaihdan mawl takah chuan,harsatnate pawh hi, a tawk lo tura Pathian hnena tawngtai ai chuan, harsatna hmachhawn dan thiam tur leh chakna nei thei tura Pathian hnena tawngtai hi a fuh zawk thin ka ring.Mahni thil tha tih sawi zut zut a, mahni chanchin behchhana Pathian thu sawi tlawr duah hi ka
ngaihnawm tih zawng a ni ve lo va, mite beih nasatzia hre chung a, entawn tura thawh chhuah ve nghal te; tawngtai ngawt lo va, a thawka thawk tura inpeih at reng mai te hi ka chek ngeih zawng tak a ni.

Martar ngam khawpa puanzarlawng hmanga Wales atanga Zoram rawn pantu, Zosapthara meuh pawh ‘a ro lutuk’ ti ngam khawpa thlarau chang sang inti, Mizo kha kan nih thin vang nge mawni, thlarau chang sang bik leh chang danglam bik nih lamah hian kan in-el ta deuh roha hriatnate ka nei ve mai mai thin a; sakhaw hmang vek hian thlemna a awm thei, tihte hi kei leh ka chhungte rin dan chu a ni.

Chutiang chu kan nih hlawmkhawm thin avangin,’Kristian, kal fimkhur rawh’ tih hla hi a saka sak liam mai mai chi a ni dawn lo chatuan a, kan fimkhur tlan a, kan duhtui zual deuh deuh a hun ta. Sawithaih theih leh, thu danglam sawi apianga buai phili ta chung thin Kristian kan nih chhung chuan Isua hnena kan zawhna dawn reng tura chu - “Rin tlemte u, engah nge in hlauh?” tih hi a ni reng ang.

May be related

• Hlep ruk hmangte Sam!
• In kiss kan ni em?
• Rilru doctor rawn kan ngai em?
• Zofa te leh kan kristianna
• Hriselna lam hawi post hi awm ve se

Recent entries

• Sweet Baby Jesus! (Part 1)
• R. Lalhmangaiha - Dairial chang hnu Zuapa
• 10 Skills to succeed at almost anything
• Leikapui zan programme
• Independence Cup 2008
• R.Lalhmangaiha - Nang ngaih azual
• Tamil Nadu to create 3 mn jobs in IT Sector
• A Mizo student disappeared from train in AP
• Humor me
• Man with no arms and legs

This entry was posted on Friday, July 4th, 2008 at 2:01 am and is filed under more than words. You can follow any responses to this entry through the RSS 2.0 feed. You can leave a response, or trackback from your own site.