Hringnuna kan duh ber engnge?
March 9th, 2009 6:02 am | more than words | Mizo Master | 328 views|
|
Ni khat chu American sumdawng hi Mexico chhim lam thingtlang khuaah hian a zin a. A len vahvelnaah chuan tuipui kama lawng chawlhnaah hian a ding khawmuang a. A dinna lawng chawlhnaah chuan sangha mantu pakhat hian lawnglêng hi a lo kar thleng ve chiah a. Lawnglêngah chuan sangha hrawl leh tui tak ‘tuna’ an tih ang chi hi engemawzat a thal deuh phang a.
American sumdawng chuan sangha mantu hnenah chuan, “I sangha man chu a tui hmel hlawm hle mai. Khang ang zat sangha man tur khan hun engzatnge i hman?” tiin a han zawt satliah a. Sangha mantu chuan, “A, a rei vak lo, darkar tlemte chauh a ni,” a ti awlsam mai a. “Hun tam zawk pein engatinge sangha tam zawk i man loh le?” tiin sumdawng chuan a zawt zui ta zel a. Sangha mantu chuan ha takin a chhang ve zel a, “Hei hian ka chhungkaw mamawh aia tam ka hmuchhuak daih alawm,” a ti mai a.Sumdawng chuan chu sangha mantu duham lohzia chu a ma nun nen a khaikhinin mak a ti an hle mai a, “A nih leh, hna i thawh loh chhung zawng zawngin engnge i tih thin hriat a va chakawm ve,” tiin a han zawt leh a.
Sangha mantu chuan nui chungin, “Ka fate ka infiampui thin avangin ka mu hma ngai lo va, ballgames-te kan thlirho thin a, ka nupui nen tuipui kamah kan leng dun thin bawk a, a chang chuan ka thiante tlawh turin ka leng chhuak a, guitar perhin kan zaiho thin,” a ti a. Sumdawng chuan mak ti tak hian a thusawi lai chu a lo pawt chat a.
“Thianpa, ngaihtuah chiang teh, Harvard atangin MBA ka zo va, tun aia hlawk tur hian ka tanpui thei ang che. Tun ai hian nitin i sangha man hun hi i tirei ang a, tun aia tam kha sangha hralhna man i hlêp thei dawn a ni.
I hlep chuan lawngleng lian zawk i lei ang a, i hlep tam zel ang a, i lawng pawh a lian ve zel ang a, sangha manna lawng tam tak i lei thei ang.
Chumi hnuah chuan i sangha mante pawh chu midang hralh chhawntir loin nangmah ngeiin i zuar ang a, sangha zawrhna dawr lian tak i din dawn a ni. Chumi hunah chuan a product, a processing leh a distribution zawng zawng i kutah a awm vek ang a, sangha mantu hausa tak i lo ni tawh ang. I hausak hunah chuan he tuipui kam thingtlang khaw te reuh te hi chhuahsanin Mexico Citya-ah emaw, Los Angeles-ah emaw, New York City-ah emaw i pem daih thei ang a, chutah chuan i sumdawnna pawh i duh chuan nasa zawkin i tilian zel thei dawn a ni,” a ti a.
Sangha mantu chuan ngaihnawm ti takin sumdawng thusawi chu a ngaithla dauh dauh a, sumdawngin a sawi zawh chuan, “Chutiang thleng tur chuan kum engzatnge ngai ang?” tiin a zawt a. Sumdawng chuan a rilruin a han chhut nauh nauh a, “Kum 15 atanga 25 inkar vel a ngai ang a, i thawhrim dan a zir a ni ang chu,” a ti a. Sangha mantu chuan, “Engtinnge ni zel ang?” a ti leh a. Sumdawng chu a nui ta hawk hawk a, “I hrethiam ve mai lo em ni? A nuam lai ber i thleng dawn alawm. A hun dik takah i company stock chu i hralh ang a, mi hausa tawntaw i lo ni tawh ang a, sum vaibelchhe tam tak i nei dawn asin,” a ti a.
“Vaibelchhia maw? Tak tak maw? Chung pawisate chu engtinnge ka hman ang a, engnge ka tih tak ang?” a ti leh a.
Sumdawng chuan hlim takin, “I sum thawhchhuah chên turin i chawl thei tawh ang mawle. Tuipui kama thingtlang khua, sangha manna hmunah i kal ang a, i tu leh fate nen infiamin i duh chen chen i meng thei ang a, i tu leh fate nen chuan ballgames-te in thlirho ang a, i nupui duhawm tak nen chuan tuipuikamah in leng dun ang a, i duh leh i thiante nen guitar perhin in zaiho mai mai thei ang chu. A nuam viau dawn lo’m ni?” a ti ta a.
Hringnunah hian engnge kan duh ber hi kan hre lo fo va, kan duh ber hi kan neih sa reng emaw, kan hnaih tak emaw a ni fo va, chu chu hre loin kan kal pel fo thin.
(Courtesy: Thlifîm magazine, March issue)
.
Han thiam...
March 9th, 2009 at 6:26 am
A ngaihnawm kher mai. Tlangram chhengchhe karah rethei takin cheng mah ila, ka hlima ka lung a awi tho anih chuan mihausa te ka awt hauh lo. Hlimna leh lungngaihna te kan ban phak lekah an awm ve ve a, kan chunga lo thleng apianga lungawi zel thei mi chu mi vannei anni. Tin, kut hnathawh tello chuan hlimna tak tak a awm lo. Sap ho pawh an party lai leh hlim taka an nui bawk bawk lai chauh kan TV atangin ka hmu thin. A tak tak ah chuan an hlim reng bik ka ring lo. Hmangaihtu nei ila, Hmangaih tur nei bawk ila, damin hrisel tha ila, hei baka duhthusam hringnun a awm thei lo.
March 9th, 2009 at 6:34 am
keipawh Hausa deuh mi hlim deuh nih ai chuan rethei deuh mi hlim lo deuh nih ka duh zawk
March 9th, 2009 at 6:41 am
Ni ngawtmai Hmangaihtu nei ila hmangaih tur nei bawk ila, Hna thawk theiin hrisel ila; pawisa ringawt zawng a khawhmulo, in thian thatna te in unaunate bo thak khawp a sum um, neih vang hlim phah chuanglo nih ai chuan tuna ka din hmun hi ka duh fe zawk thin, retheite mahni ila chhungkua hlimtlang taka awmte,chan tawk a lungawite hlutzia hi ka man chiang tawh Mihring dam hun chhung hi a reiloh teh reng sum bawi a tang ringawt tur chuan ka in phal thei lo ani.
Engpawh ti ila,kan nun ah hian Pathian hi Lalber fo sela Pathian nen chuan Hausak anuam a; retheih pawh anuam ka duhthusam hringnun chu Lalpa nen a len dun hi ani fo thin.
March 9th, 2009 at 8:34 am
Mihringte hian hlimna tluantling kan nei ngai lova, duhtawk chin leh lungawina tak2 kan hmu ngai lo, mahni tawka hmasawn zel nia kan inhriat lai chiah hian kan lung a awi thin.
March 9th, 2009 at 8:48 am
Lelte hi rawn upload thar ve thin se ka hlim teh ang le; Lalthara IAS te unau kan hmu rei ta —anni pawhin an ning ve tawhin ka ring. Vanlalsailova Sound System pawh a ri a that leh that loh hriat belh kan chak ve tawh hle mai! Pu C. Dinthanga hi a hritlang deuh em ni le aw? Dam vat teh se … rawn upload thar leh tawh se, sangha mantu ai hian kan suangtuahna ram a hlim daih zawk bawk ang.
March 9th, 2009 at 8:54 am
Sumdawng pa duhthusam chu Sangha mantu nun hman mek a ni bawk si a………
Hringnunah hian engnge kan duh ber hi kan hre lo fo va, kan duh ber hi kan neih sa reng emaw, kan hnaih tak emaw a ni fo va, chu chu hre loin kan kal pel fo thin.
A dik khawp mai, ka thlawp a che.
March 9th, 2009 at 11:02 am
Sangha mantu hian a thawk peih a a ngaihna a hre lo thung. Sumdawngpa hian a thawk peihlo a a ngaihna a hre thung.
Thawkpeih a a ngaihna hre bawkte hi an vannei ber awm e!
March 9th, 2009 at 11:09 am
A ngaihnawm dangdai hle mai. Paulo coelho-a novel ‘The Alchemist’ kha chhiar ve teh u,a dik ve khawp ania. Hringnunah hian Khuanu ruatsa hmalam hun hi kan nei theuhva. Chulam kawng chu kan zawn thiama kan pan thiam chuan a tha ani mai. Midang dream leh duhthusam anga mahni hringnun her rem tum hi hlimna ber anilo. Midang guidance lak a tul hun erawh a awm thei ang.
March 9th, 2009 at 11:35 am
Ril deuh taka han comment ka tuma ka thiam meuh mang si lova.
A ngaihnawm khawp mai. Mahse sangha mantu nun ang hi tunlaiah chuan a vang tawh a nih hi mawle. Hlep tam tumin kan inpel suau suau mai a nih hi.
March 9th, 2009 at 1:01 pm
Ziak sei em mai!!! Kei ang misual tharhlam tan siar suah peih om loh vet tei eeeeeee…
March 9th, 2009 at 1:18 pm
Ngaihtuahna a ti kal thui kher mai, hlimsang kohhrana zak thei lo pawl phei ni ila, pawl tharna ka chang tiin hun remchang hmasa a sharing tur ka neih phah mai awm e. Eng ang din hmun a ka din hian nge ka tan tha tur? Engnge ka tih tur? Pathian hian eng ti turin nge min siam? Eng ang mihring nge ka nih? tih ngaihtuah chung leh hmanhmawh lo leh rilru ngaihtuahna fimtak pu a kan nun kan hman hi a tha ber. Chutiang mite chu eng din hmunah pawh ding se an dinhmunah lungawina an hmu thin.
March 9th, 2009 at 11:59 pm
Ngaihnawm khawp mai.
March 10th, 2009 at 1:08 am
a sei an vang vanga chhiar a nuam khawp mai.. a hah dam.. tihtur hre si tilo kan tam a lom..hraitreng chung pawn.