Chanchin Tha Ber Chu

April 12th, 2009 9:21 am | Religion | zualte-a | 116 views

ka khawlah he pu Zuata thu ziak hi alo awm ve hlawl mai a, hmana a sawi tawh mah ni se Pathian thu chu a hlui tak tak theilo e tiin ka rawn post ve e. Tin, amah ka dil thlap bawk e

Chanchin Tha Ber Chu - Rev. Vanlalzuata

Vawikhat chu Tennysona hi khawvel fang chhuakin a zin a, anmahni khua Lincolnshire-a a lo hawn hun chu a thiante chuan an nghakhlel hle mai a. A lo hawn chuan amah kawm turin an lo kal khawm a, “Eng nge i zinna lam chanchin thar min hrilh tur i nei em?” tiin an zawt a, a khabe liam changin an dâk dauh dauh mai a. Tennysona chu a ding hluai a, “thiante u, Isua chu a thi a, Isua chu a tholeh a, Isua chu a lo kal leh dawn a, amah ngaitute a rawn hruai ang,” a ti a, a thu leh ta ringawt a.

A thiante chuan, “thianpa, tuna i sawi kha chu i kal hma daiha kan hriat ve tho kha a ni a. I zinnaa i thil hmuh chanchin ngaithla turin kan lo kal a ni,” an ti a. Tennysona chuan, “thiante u, ka zinna ramah chuan mi ropui tak takte ka hmu a, Lal Isua aia ropui reng reng ka hmu lo va. Thilmak tam tak ka hmu a, Lal Isua aia mak reng reng ka hmu lo va. Thusawi ngaihnawm tak tak ka ngaithla a, Lal Isuan ka hnena a thusawi aia ngaihthlak zawk tur reng reng ka hre lo va. Ennawm mak tak tak ka hmu a, Lal Isua aia ennawm reng reng ka hmu bawk hek lo. Chuvangin khawvel hi ka fang chhuak a, chanchin thar ber ka rawn hawnsak che u chu Lal Isua chanchin hi a ni e,” a ti a, a thu leh ta a.
Tennysona thu hla hi tunlai khawvel hian kan mamawh hle mai. Khawvel hi a zim tial tial a, kan sitting room-ah khawvel kan khung a, remote control hmangin kan duh duh kan thlir kual zet zet ta mai a. Hmel hriat loh kar hlaa mite nen pawh kan inkawm (chatting) thei tawh a. Tuk tin leh zan tinin chanchin thar ngaihthlak reng tur kan nei a, kan mit leh kan beng a tlai ta ngei mai. Khawvel chanchin thar kan hriatte hian Lal Isua chanchin kan tuipui thin kha a rawn hliah tial tial a nih hi. Tun hma chuan kan fate pawhin Davida huaisenziate kha an rilruah an vawng a, tunah erawh chuan Bible-a mi huaisente aiin Television-a a changtupa huaisenzia chuan an nun a khawih ta zawk a. Kan sitting room-ah milem pathian kan lak luh chinah kan faten Pathian nung biak aiin milem biak an thlang ta a. Chuvang chuan chhung inkhawm pawh a sak ta talh mai.

Film hmuhnawm tak a chhuah lai chuan Biak In dar rite hi a hnawk kan ti deuh tlat ta mai a, inkhawm kan thulh phahna chhan te, inkhawm laia ban thuai thuai kan nghahhlelh avanga Pathian thusawi kan ngaihthlak that theih lohna chhante pawh hi milem biak kan duh zawk vang a ni. Hei hi kan pha thei lo va, pha mah ila, Lalpan kan thinlung a hria a, kan inpha hul zo chuang lo vang. Nimahsela ngun takin mahni nun theuh hi inchhût chiang ila, khawvel chanchinah hian tumahin lungawina leh hahdamna kan hmu lo tih chu inhrilh pawh a ngai lo vang. Kan Bible chuan chu chu sawiin, “Mit chu a thil hmuhah a tlai lo va, beng pawhin a thil hriat a kham hek lo… ‘En rawh, hei hi a thar a ni’ an tih theih reng reng a awm em ni? tiin min lo hrilh tawh a (Thuh. 1:8-10). Hetianga kan sawi lai hian khawvel chanchinte hi hriat loh tur kan tihna chu a ni hauh lo.

Martin Luthera chuan, “I kut vei lamin chanchinbu keng la, i ding lamin Bible keng rawh,” a ti a. Chumi awmzia chu khawvel chanchin thar pawh kan hre ve tur a ni a, nimahsela kan kut ding lamin Bible kan keng tlat tur a ni ang. Mi tam takte chuan an kut khing hnihin chanchinbu an hum a, chu chu a ha lo chu a ni. T.V kan en a, film-ah a changtupa hming kan sawi thui thei hle a, Football kan en a, club chi hrang hranga kheltute hming leh an chanchin kan sawi thui thei hle a. Chutiang hriate chu dem lo ila, amaherawhchu chung thu chu hre hle si, Bible-a Galatia ziak awmna lai pawh kêu fuh thei lo khawpa Bible chhiar ngai lo kan nih erawh chuan, chu ngei chu thil tha lo a ni ang.
Chanchin thar ber chu Lal Isua chanchin hi a ni tih hi khawvel hi hriattir a pawimawh. Khawvel chanchin thar chu a hlui zung zung a, Lal Isua chanchin erawh chu kum 2000 zet a liam tawh hnuah pawh a la thar dawn chauh mai. Khawvel hmasawnna chanchin chu sawi sawi mah ila, sawi nin chin kan nei thin a, Lal Isua chanchin erawh chu a sawi tam apiangten an ning lo va, a sawi tlem apiangten an ning thung a. Thu mak sawi nin theih loh chu Kalvari chanchin chauh hi a ni. Darkar tina thar reng a ni a, chatuan thleng pawhin, ‘Thar a la ni engtik pawh,’ tih a ni reng dawn a ni. Hlaphuahtu ropui P.P. Bliss-a pawhin, “Thawnthu hlui a thar reng a ni, Isua chanchin min hrilh rawh,” tiin hla a phuah a.
Khawvel dang zelah hian ennawm te, hmuhnawm te, ngaihnawm te a tam tual tual a. Nimahsela a hmutute beng leh mit a tihtlai bak chu chhungril nun ngui tiharh thei reng reng an awm lo. A.K. Hankey-i pawh hi mi hausa fanu a ni a, a duhzawng apiang a nei thei a, engmah tlakchham nei lovin taksa thilah chuan a awm a. Nimahsela a thinlungah chuan pindan ruak, engmahin a tihlawm theih loh, khawhar ngawih ngawih a awm tlat mai a. Chu chu a neitu Lal Isuan a rawn luah chinah chuan a nun chu van hausaknain a khat ta a.

A hla phuah pakhat hi i thlir lawk teh ang –
A chanchin hrilh chu ka duh vana thil hriat loh chu,
Isua leh a ropuina leh a hmangaihna chu;
A chanchin hrilh chu ka duh, a dik tih ka hriatin,
Ka duhnate a tilawm, thil dang tihlawm theih loh
tiin a phuah a.

Thil dang reng rengin a tihlawm theih loh a duhna tilawmtu chu Lal Isua chanchin a ni tih a puang chhuak ta a ni. Lallukhum ropui ber pawh khum dawn ila, a khumtu lû a nat miau si chuan nuamin kan khum hauh dawn lo va. Chutiang bawk chuan khawvel ro thil hlu zawng zawngte hi nei vek mah ila, thinlung lawmna min pe tel thei si lo. Kan thinlung ber hi a lawm loh chuan ro hlu ber pawhin awmzia a nei lo va, chu thinlung lawmna kim chu Lal Isua chanchin hi a ni.
D.L Moody-a pawhin, “Ka thil hriat zawng zawngah chuan Chanchin |ha hi a la tha ber a, chuvangin ka thil hriat zawng zawnga tha ber hi ka sawi tam ber ang a, ka nunpui ber bawk ang,” a ti a. Mahni theuh hi inzawt ve ila, kan thil hriat tawhah eng nge tha kan tih ber? Rukruk chingte tan chuan rukruk thiam chanchin a ngaihnawm a, mi duhamte tan chuan hlawk theihna thu a ngaihnawm a. Ruih theih thil ti thinte tan chuan ruihhlo chanchin hriat a chakawm ber bawk a. C. Wesley-a chuan a hla phuah pakhatah chuan –
Lal Isua hming min muantu hi,
Kan lungngaih tikiangtu;
Mi sual tan pawh rimawi a ni,
Min thlamuantu ber hi
tiin a phuah a.

Heta ‘Mi sual tan pawh rimawi a ni,’ tih hi a chhinchhiah tlak hle. Lal Isua chanchin chu mi sual berte tan pawh rimawi a ni a, hlauthawngte tan muanna a ni a, mi retheite tan hausakna a ni a, thi turte tan nunna a ni. Lal Isua chanchin aia chanchin thar leh chanchin hlu hi khawvelah hian a awm thei lo. Kan taksa a hrisel lai hian ngaihthah mah ila, a aia hlimpuite nei thin mah ila, natna khirh takin min tlakbuak hunah chuan khawvel chanchin kan hriatte hi chu chanchin hlui, hman tlak tawh loh an ni vek tawh ang. Chutih hunah chuan Lal Isua chanchin chauh hi chanchin thar (New News) a nihzia kan hre tawh ang a, mi sualte tan pawh rimawi a nihzia kan hai tawh hauh lo vang.

mi(sual).com