mi(sual).com

Tek tla ri tuar tuar karah chuan thli a thaw vuk vuk a, ruahpui baw hawk chuan chu in chepte chu a chim ral vek mai ang tih hlauhawm khawp a ni. A sur rei tual tual a, a tam tial tial a, a tui tual tual emaw tih mai tur a ni. Chutiang taka ruahpui vanawn sur nasa pawh chuan chu in chhe te chu a len chhe dawn lo a, a chung a pawp hek lo. A ri cherh cherh a, khua chu tha se tlai ni nem chu a ni ngei tawh ang, mahse ruahpui hrang tak chuan chu in chu nasa taka deng dawt dawtin tuihawk te chu nasa takin a luang a, chu in derthawng hmel tak chu a far lo a, tui luang lut a awm hek lo.

Khua a vawt deuh sur a, in chhunga awm tan chuan rizai hnuaia mut lum mai loh chu tih tur dang a awm lo, current a awm hek lo. Laltin ung tawh tak chu chhi chungin a chhunga tlangval lungleng tak chuan cowboy bu ngaihnawm ti em em mai hian a chhiar a, tape te chu han nei pha ve sela chuan Elvis-a hla For The Good Time te kha a’n ngaihthla ang a… suangtuahna khawvelah chengin.

Don’t look so sad, I know it’s over
But life goes on and this old world will keep on turning
Let’s just be glad we had some time to spend together
There’s no need o watch the bridges that we’re burning

Lay your head upon my pillow
Hold your warm and tender body close to mine
Hear the whisper of the raindrops fallin’ soft against the window
And make believe you love me one more time
For the Good times

tiin a tukverh chhe tawh takte chu a va en tawk tawk ang a, vengsang nula chhuanvawr a lo ngaihven ruk em emte kha a suangtuahna khawvelah a rawn lut ang a, chu in tlawmteah chuan in thlahlel takin an inkuah dun ang a, ruah sur buan buan te chu mawi ti takin an ngaithla dun tur a ni a, mahse chutiang ngaihtuah pha tur chuan a finna te’n a pha lo mai a ni lo a, a neihin a pha hek lo.

Tapchhakah chuan zawhte dum a meng tle kar a, chu zawhte chuan thuka vut lum chu chuhin ruahsur chu hre lo awm fahranin meilung chu a ngheng ar ar a.

Mahni chauha khawsa a ni a, vawk leh ar a vulh si lo a, atan ruahpui vanawn sur hun chu hahchawlhna hun pawimawh tak a ni lo thei lo. Tek tla chuai chuai te chuan a tv chu a tichhia ang tih hlauhna chang a hre reng reng lo ni mai lovin tv te chu an venga pa hausa berin en a phal changa a en ve zauh tum lo chu a la hnimhnai lo. A tana pawimawh ber mai chu cyclostyle-a chhut cowboy bu hlui tawh tak mai chu a ni a, a changtupa leh red Indian indona turu tak tui taka a chhiar thei chu atan chuan ‘duhaisam khawvel’ a ni ringawt mai.

Rap chungah thing a hak ngah tawk tawh avangin ruah sur chu a lungkhawm vak lo a, lo lamah hnuhhram a zawh tawh avangin ruahtui a tlak tam chuan thlaiin a ngeih a ring mai a, a ngaih a tha veng veng a ni ber mai.

Chu ruahpui vanawn sur chuan ban zai reng a rel thei lo a, chu tlangval pawh chuan a cowboy bu chhiar mek chu chawlhsan a tum bik hek lo.

Khawpui lamah chuan mite an hausa chak em em a, Nike, Reebok etc. dawra mi ngat an inthuam thin tih lam a ngaihtuah ve lo. Nitin eirawngbawlna gas a harsa tual tual a, khawpui mi an mangang tih a hre hek lo. Town bus tawt taka chuan hrehawm zia te, traffic jam kara car nalh tak takin awmzia a neih loh ziate chu a ngaihtuahna khawvelah chuan vawi te khat mah a la cham chhin ngai lo.

Ruah sur tluk tlukin a kawta barrel lian tak a dah, a chim khat dawn tih a hriat ngat phei chuan ‘life is beautiful’ ti kher lo mahse atan khawvel hi a mawi a ni.

NB: Ruah sur lai lem chu dah ni theise lawmawm ngawt ang…

May be related

• Ruah sur nasat avanging harsatna namenlo
• Bhavan Buhfai mipui hnenah!
• Rap vs Rock
• Mizoram Tam Nasa
• ‘Zu’ Zunzam

Recent entries

• Civil Hospital OPD floor 3-na estimate ah tel lo
• Zav Airways to replace Alliance Air in NE
• Mizoram hi pakhat chauh a ni tur a ni
• Athanga croons ‘You belong to me’
• Another Mautam video
• The Apple
• Happy Valentine’s Day!
• Stilettos can improve women’s sex life
• Rev Chanchinmawia thihdan lehkhabu
• Project reference mamawh

This entry was posted on Wednesday, July 11th, 2007 at 6:16 am and is filed under more than words. You can follow any responses to this entry through the RSS 2.0 feed. You can leave a response, or trackback from your own site.