mi(sual).com

“Mizorama chen reng ka chak lohna chhan chu ram hruaitu nikhualo neih reng hi ka ning, daily necessity tak ngial pawh ngaihtuah thei lo hi ka ning ta,” ti tawk an awm pawhin dem suh ang che, a chhan chu maw, a dik miau a.

“Rulngan pa ang zar a ni ang,” tiin hmui kawh phatin a sawi tan tan a, kum kua lai a ni ta, Mizoram khawpui ber Aizawl khaw chhung kawngpui, kawngpui satliah pawh ni lo, Bazar te, Hospital road te, Temple to Vaivakawng road te, sawi sen a ni lo, Ramhlun road te pawh, suar dai ang mai a ni zo ta. Ruah sur lai phei chuan tui khurte tam tak ang maiin hmun tinah tui a tling a, a sawia sawi ringawt hne awm zia a tilang a, “Heng kawng chhiaa ka tlan apiang hian ‘Rulngan pa ang zar’ tih tawngkam ka hre chhuak thin a, ka thin a rim thin,” tia hrilh mawlh mawlh che an awm changin mak ti suh ang che.

Ram hruaitute’n Badminton court chhuat te an hawng a, hall chhuat phah te an hawng a, lift te an hawng a, vaiho magic show te an hawn hman laiin Buhfai, Gas, Petrol, tui etc.-a manganna erawh an ngaihtuah hman lo ni berin a lang ta hial mai.

“Mizorama chen reng ka chak lohna chhan chu ram hruaitu nikhualo neih reng hi ka ning, daily necessity tak ngial pawh ngaihtuah thei lo hi ka ning ta,” ti tawk an awm pawhin dem suh ang che, a chhan chu maw, a dik miau a.

Engtinge niang?

Tuna Mizoramin a mamawh ber chu, kan sawrkar ding lai hian lo haw lo teh se, ‘Ram hruaitu lak tlak’ a ni lo thei lo. Tuna ram hruaitute hian an fapate eizawnna te, an party chhung boruak chhia te, an huan te, an nupuite lawm zawng an ngaihtuah nasa a, helamah chuan hma an sawn chak khawp mai. An ngaihtuah buai em avangin ram leh mipui tan ngaihtuahna an seng hman lo ni berin a lang ta, chhuanlam dang a awm lo. An mipuite an tam laiin an ngawi a, insawifiahna ‘chanchinbuah’ an rawn chhuah leh ringawt thin a ni lawm ni.

“Kan ram hruaitute hian kal ngaihna an hre hlawl lo a, an ‘calibre’ pawhin a pha hek lo, hetiang ringawta in hruai chu a zahthlak ta e…” ti tawk an awm hi i hrethiam tawh mai em?

Party lam pawh a ni lo, MNF rau rauah pawh hian tun aia ram hruai tha thei hi an awm a rinawm ta, nitina mihring pangngaiin kan mamawh pawh sawrkarin min pe thei ta lo. Mipui lam chu a theih chin chinah kan inhaikaw ve asin. Khawnge sawrkar hi a awm tak.

Cachar chuan Mizoram paltlangin Myanmar gas(domestic use) lei a tum tih tun hnai maiah PTI(India rama news agency rintlak ber pawl) chuan a ziak a, hemi chungchangah hian ama Mizo puite biak pawh hleih theih loh chu vaiin an lo be pawp leh ta a, CM Zoramthanga chuan Mizoram paltlang hi a phal thu a sawi niin an ziak.

Mite chuan an mipuite harsatna an hria a, chumi ’solve’ tur chuan hma an la asin. Cachar vai nuai tam tak pawhin harsatna lian tak an tawk lo a nih chuan Mizoram mipui nuai 8 vel te harsatna sutkian hi thil har a ni thei lo hrim hrim. Gas harsatna avang hian kan Supply Minister emaw, kan CM emaw hi state dangah an tlan phar dawr dawr tawh em? Chutiang thawm chu i hria em? Foreign dawr chu hla tak a ni, Central thleng thlengin Mizoramin Gas-a harsatna nasa tak a tawh thute hi zuk zualko ve se. “Minister chu ni ila ka tlan thla daih tawh ang,” i tih ngei ka ring, mahse minister leh a milian chin chuan special-in an la thei a, gas harsatna an hre lo.

Pa hmei i ni a, nitin eizawngin, private hnuaiah lehnghal i vakchhuak a, in lamah i nupui fanaute an awm ve a, gas i nei ta lo. Gas bur khat nei tur pawhin nilenga intlar i ngai a, i hna a tuar, chu mai a ni hlei nem, nilenga intlar pawhin an chang kher lo. Hei hi khawvel nih phung a ni hlawl lo, eirawngbawlna gas te hi chu kan harsat rual rualin dawra chini kan lei ang hian kan lei thei tur a ni, hei hi sawrkar tih tur dik tak chu a ni. Chumi ti thei tur chuan tunah hian hma an la tur a ni a, an la lo a nih chuan mipui pawh kan auchhuah a tul tawh.

Tunge mipui rawngbawl?

Sawrkar hi mipui thlan chhuah, mi zawng zawngin ro a rel theih loh avanga mipui tana rorela mipui pawisa te an kuta awma hmang tura tih an ni. He an nihna hi an hre lo a nih chuan sawrkar hi kan dem tur a ni. Chu chu democracy rama thil thleng tur dik tak pawh a ni.

Ni hnih thum ruah a sur a, kawng a ping a, petrol a awm lo a, kawng tin rengah harsatna kan tawk nghal ringawt hi sawrkar thiam loh a ni.

Chak khai lakna kawng pakhat chauh kan nei a, Brig T Sailo te hun lai khan Bangladesh te, Tripura te tlawh pawh thei tur kawng sial an tum niin ka hria a, kha hmalakna kha lo tihlawhtling sela chuan tun ang hian Cachar vaiho thuhnuaiah kan awm reng lo ang. Tuna kan sawrkar hian chutiang hawi zawnga hmalakna chu a nei tawh em? Teuh lo mai, a teuh lo mai hi a ni ringawt.

Kum kua a ni ta, kum kua, kum kaw chhung hian thawh zawh chu sawi loh, hmalakna a awm lo hrim hrim mai ringawt mai a ni. Khaw mawngpinga cheng kan ni a, hlet chhuah hi kan mamawh hmasa ber a ni, Millennium Centre sak ai te phei phei chuan kan mamawh lehzual zawk. A hlimhlawp lai chauh hi kan tihlawhtling thei a, kan tihlawhtling zung zung reng bawk. Millennuim Centre te hi kan mamawh reng em? Bazar thawmhnaw zawrhna hi kan mamawh thawkhat, ‘kan khawpui hmel a ti mawi’ tih vel mai mai hi kan ngaihtuah hmasak tur a la ni lo, traffic zam nasa em em mai te hi? ‘Tuikhuahtlang atanga Chanmari thlen nan car chuan darkar khat lai hun hman a ngai tawh’ hetiang khawpa harsatna nasa kan neih lai hian thawmhnaw dawr lian pui kan hmun neih laili berah kan han sa leh ngawt a, Millennuim Centre thawmhnaw dawr ai chuan parking-ah a vai sawn siam vek ila kan khawpui chu a thawl ve huai ang? Ngaihtuahna in seng hlawl lo em ni pu te u, nge thlam leh huan changkang vel in duh danah hian nawmsip in bawl tan tawh? Ala hun hlawl lo.

Tuna kan ram hruaitute hian an fate hmingin sumdawnna lian tak tak an nei hlawh tawh a, ngaihtuahnaa thui tak lut ta chu, ‘Sawrkarna an siam lai hian damchhunga an nawmsak theihna tur chauh an ngaihtuahin an inchhek mum mai mai em ni?’ tih hi a ni, a ni ngat a nih chuan Pathian leh mipui hmaah thil sual lian tak an ti tihna a ni ang a, mipui rawngbawl theia siam an nih laiin an ‘mission’ hawi sanin mahni chhungkaw dinchhuahna chiah an ngaihtuah tihna a ni ang.

Mi rethei te au aw

Retheinain Mizoram a tuam vel a, mi retheite au aw a ring tual tual a, siamthat ngai lai a awm tih a chiang hle. Sawrkar laite hi dem hlawh ber tur an ni lo thei lo, a titu tur leh hma la tu tur an ni tlat a.

Retheite retheihna hian tawp chin a nei thei lo, an rethei tlawk tlawk a ni ber mai. Retheite tan thil tih a har a, nitina kan mamawh vang ta thutah phei hi chuan retheite tan chuan khawsak phung a buai nasa lo thei lo, a rethei theite hi thil ti thei lo lo an ni bawk si. Hei hian Mizoramah chhiatna a thlen mek niin a lang ta.

Sawrkar lam atangin policy mumal tak a awm lo a, hna a vang a, inhlawhna a vang a, ei tur a vang a, pawisa a vang bawk. Hetiang em ema khawsak phung a buai ta mai hi Mizoram sawrkar hian beng sikin siamthat a tum tur a ni, chu chu a mawhphurhna a ni tlat. Contractor-te 3% ringawt pawh cheng nuai 5000 chuang an khawl tawh tih thawm a awm a, hengte hi enga tan nge hman an tum le, mi retheite tana hlawkna turin hman chi a va ni awm ve!

Sum kan siam dan a dik tawk lo a, thil dik lo hi a dikah kan chan zo tawh a, dik taka sei len tumte tan chuan harsatna hlir a ni ta ringawt te. Dik taka loan laka rulh leh tumte tana kawng a ping ta tlat te hian Zoram hi a dam lo tih a tichiang a, a bul berah chuan sawrkar hi a insiamthat a ngai a ni. A rethei ber leh a te ber te tana sawrkar tha siam turin ram hruaitute inenlet a tul ta, in hna thawh te, mipui tana in thawhna te, media-a puanzar vak vak a tul lo, in thawh tak tak chuan in sawi pawh ngai lovin media lam chuan an umzui che u ang a, an fak lo thei lo che u ang a, in inpekna fakna hlir in hmu ang. Tunah chuan Hnam Rum writer mi pathum velin MNF ministry fak ringawt an tum a, an sawiselna apiang tlip mam an tum a, anni hi mipuite hian tute nge an nih an hre vek, hetiang ringawt tur hi a ni lo, an fakna an ziah hnuah hian chanchinbu office-ah hian a ziaktu sawiselna leh diklo taka milem changa thil ziak an nih zia tarlan tumna article-in a rawn um zui a, chhuah chi pawh a ni thin lo, in thawh that chuan mipui ta in ni ang, mipui tana thawk thei in nih hi. Kum 1 chauh pawh hun nei ila thawh ve chhin ka va chak em! ti an tam asin, lal in ni lo a, mipuite tana thawk tur in nih hi khawngaihin han hre nawn leh teh u, hausa tur in ni lo a, mipui tana rethei tur in ni bawk e.
Kan lawm e.

May be related

• Mizoramah hian hna a vang tak tak em?
• Private Practise Vs NPA
• Ramin tunge a koh?
• Mizo Thalai te tan
• Vaiin min vel nge vai kan vel?

Recent entries

• ZWO (UK) Meet 2007
• A lo meng kiau a
• THE WEEK-Facts & Figures
• Ngai teh..
• Nakumah Rev.Chanchinmawia ziah zir dawn
• Mizo Hlakungpui Mual
• YMA-ah Beiseina Thar?
• Zo-quiz & Zo Star
• Laptop for Rs.9000/ only
• Hmeichhia chu..

This entry was posted on Friday, September 21st, 2007 at 5:12 pm and is filed under more than words. You can follow any responses to this entry through the RSS 2.0 feed. You can leave a response, or trackback from your own site.