Kan ram hian hmasawn tumin tan a theihtawp in a la ve mek a. A hotu lam pawh an tang hle niin a lang. Nakum inthlan a han hnai anga, ram hmangaihtu chu kan tam leh mai mai ang chu!
Tuna kan term hman lai mek kan inthlan dawn khan party hrang hrang te chuan manifesto ropui tak tak an chhawpchhuak theuh a. Mipui lam te pawhin hamthatna kan dawn tur te thlengin an sawi hlawm a. Kan han thlang tling ta a le, hei, kum thum a vei awrh tihin an party office ah chuan an manifesto ziahna bu kha hmuh tur a awm ta lo chu a nia. Hetiang hi kan rama political party te kalphung a ni hi a lungchhiatthlak a. Rinawm lo chan an chang ta thin a ni.
Inthlang ram kan nih avangin kan ram hruaitute hi an ngai reng dawn lo. Hemi vang emaw ni, kan hruaitute hian mipui rawng han bawl ve bawk teh mahse a tam zawk chuan an mimal chhungkhur lam hai vur nan an hmang tho niin a lang. Ram tana hna thawk tak tak lova, vua leh vang te hmui tih mawm nan ram kan hruai ang tih hi a hlauhawm em em a, mipui in min thlantlin hian ‘enge kan chungah an beisei?’ (a positive zawngin) tih hi I ngaihtuah ang u.
Heng kan han sawi tak te atang hian mihring in DIKNA kan neih chuan ram ‘kan siamtha thei a ni’ tih hi a lang chiang hle. Eng chanvo pawh chelh ila; a te emaw, a lian emaw, keimahni ah dikna a awm a, sual tih duh lohna a len phawt chuan kan tan, kan hnuaia thawk te tan, kan sakhaw tan leh kan ram tan hlawkna kan haichhuak dawn a ni.
Dik taka nun hi a har a ni maithei. Mahse tih theih loh bur erawh chu a ni lo thung. Hetah hian kan ram hruaitute chauh pawh hi dem mai lovin, mipui te pawh kan in enchian a ngai hle a ni. ‘Kan sorkar hun chu aw…..’ tia kan iak kan iak chuan kan thil tih duhzawng tur chu a chiang nghak riak mai a ni. Chu chuan ram thatna aiin that lohna a hawi zawk a ni.
Sawi sawi hian awmzia a nei thui lem thin lo. A thawh a thawk te chauh hi kan chhinchhiah tur a ni. Sorkar hian tihtur tamtak a nei a. Chu’ng a tihtur te a puitlin hian auchhuahpui kher a ngai em? Miin a tihtur a tih a, chu chu a zawh hunah a auchhuahpui kher a tul em, tih hi zawhna lian tak a ni.
Chhawpchhuah tur neitha nazawng hi mipui te hian zui hul hul kher lovang u. Zirchiang phawt ila, a tha nia kan hriat te chauh zui ang u. Thenawmpa in a tha a tih avang maia kan zui ve ngawt thin hi chu a dik ber lo a ni. Ram siamthatna atan hian party party tih kher hi a tul ber em ni?
Tunge kan zui tak ang?
Kan hre mai lo. A hlui te min hruai tawh danin kan lung a len meuh tawh lova. A then te phei chu kan kham ngawih ngawih tawh. A nih leh a thlakna kan nei em? Kan neih si loh chuan a ngai te bawk hian an hruai chu a ngai dawn a ni. A thlakna kan neih erawh chuan kan tui a hal tawh em avangin kan thlak duh mai ang. Mahse chutah tak chuan mipui kan in ngaihtuah chian a ngai. Kan ramah mipui nuai 10 vel kan awm a, mitha 40 thlanchhuah tur chu an awm thei mai ang.
Ram hruaitu tur hian politician hlun kher hi kan duh nge, ram tana mi tha nia kan hriat te hi? Khawthlang ram lamah chuan an ram hruaitute an tlak tawh chuan ‘ramin min mamawh tawh love’ tiin an in thiarfihlim theuh thin. Chubakah, hausa takin rorelna an chhuahsan ngai lo. Ram tan an thawk a, chhungkua in tuar mahse hlawkna ramin a tel chuan hlawhtling ah an in ngai tho tho a ni. A nih leh chutiang mi chu he ram, ‘ka ram’ tia kan sawi kan sawi hian a hringchhuak tawh em? Hringchhuak ni ta se kan hruaitir mai dawn em ni? ‘Tir’ lai tak hi a harsa lai tur tak a nih ka ring. Felfai taka ram hruaitu kan mamawh lai si hian mipui nawlpui hian kan hre fuh tawk lovang tih erawh chu hlauhawm tak a ni. Felfai han tih hian sawisel kai lo thak tak tak phei chu an awm lo maithei, mahse a tlangpui a tha an awm ang. Chutiang mi te chu kan ram hian a mamawh a, a ko che a, I rawn chhuak dawn lawm ni?
