A Phing Kha !!
October 10th, 2007 2:25 pm | more than words | Zaia | 72 Views|
|
Kan aia upa hi chhiar sen ni lo mah se, Voter ID Card nei thei chin thahnem takin min koh dawn apianga kan hming hma lama ‘U’ an telh ve tak avang hian naupan lai thilte pawh ziah a inthlahrunawm ta bik lo maitheiin ka hria a. Naupan laia ‘A phing’ kan lawmzia sawi ka tum a ni.
Ka ngaihtuah chhuaka
Pu Biaka’n hnehsawh lutukin kan Bawng lian talh pumpui a hai bawrh bawrh a. Bawng ruhrel lian tak chhungah chuan a lut mai dawn emaw tih turin a thut hnaih a, Lalmama nen hnai fahranah kan en a; Rinkima’n ‘linght’ a lo khai sak a, Rindika’n Bawng bawp lehlam a lo pawt kak
vu bawk a. A phing a rawn phawrh chu - a lian kher mai! Chutih lai tak chuan Thangkhat lian zet ka ngaihtuah tawh ngai loh, naupan laia saphing kan lawmzia leh nei tura kan inhuam thui thinzia te, kan neih hnua kan buaipui thinziate kha chutih lai, zing boruak vawt vin tuk maiah chuan ka ngaihtuahnaah a rawn lut a. (Ka ngaihtuahnaah a rawn lut - a dik reng, mahse ka ngaihtuah chhuak a ni reng si a, Zo tawng hi chu a va mak em!!)
Sertawk to Saphing!
Chhung hnai deuhte talh a nih loh chuan vawk a ni emaw, bawng a ni emaw, a phing hauh ve ngawt ngam chi a ni ngai lo. Kum 20 aia tam liam taa Hortoki mipa naupang, tractor ke hniak ringawt pawh thutpui nileng peih thin tan chuan a phing kha a hlu em em thin.
Mipa naupang tawh phawt chuan chhung hnai deuh, vawk emaw bawng emaw talh an awm tawh chuan a phing kha kan chang far thin a, veng lehlama vawk talhte phei chu kan beisei ngam ngai reng reng lo.
Sertawk rah hmanga inkhelh hautak zia kha i ngaihtuah phak lo hial zawk ang. A rah lian tha kan duh ve ngei a. Inkhelh tan tirh lam chuan a rit em em a, pet kan a har. A tawp lamah chuan a lo dup a, defender…ni lo, full back niha, hla taka pet chhuah kan tum laiin ke zungpuiah a tang tut a! ‘Injury’ vang ni lovin, nuihzat luattuk vang zawkin inkhel kan chawlh lailawk a ngai ziah. Go-li in a man hman loh tura na leh sirah kan han pet a, kan sertawk hman a phel thin pawh kha buaithlak tak a ni thin. A phel lehlam lut mahse lehlam kha a luh si loh chuan si khata ngaih theih a ni ngawt lo. A pet goal-tu kha a huai ber a nih chuan thu hran a ni. Chutia kan ball a phel tawh chuan Nute’n min la au chiah lo mah se hun tawp a ni tho tho.
Chutiang chu a nih avangin sertawka inkhelh ai chuan saphing hmanga inkhelh chu nuam tak a ni. Ke a na ve lo va, sertawk aiin a tlo bawk.
Keima saphing
Ka Nite’n vawk an talh tuma a phing ka lak pawh kha tlo tak a ni. Keima sa phing ngei hmanga ka inkhelh vawikhatna a ni nghe nghe a. A phing an rawn phawrh chiah a, an rawn theh thla chiah kha ka lo la vat a, ka tlanpui nghal a; thiante’n min rawn umzui nghal. Vaivutah kan raphrual bawrh bawrh a, thiante’n mutih kuang an hman thin kha ka duh lo va, ka Nuin kan lo atanga a rawn hawn mau te kha ka tan a, ka’n ham peng peng mai ah! A rawn puar pang pangte kha a va mawi tak!
Mahse..
Sa phing hmanga inkhelh kha sertawk hman ai chuan nuam teh mah se a buaithlakna a tam lutuk. Duhna takah dah a har em em. Pet nat leh a ‘tai’ nasa mai niiin a hriat. A tai nguat nguat a, inchuh buai lai chuan thiante ngal chara pet a awl ang bawkin thiante’n kan ngal an pet awlsam bawk. Thlasik lai phei chuan ngal char ve ve intauh kha a na lutuk thin.
A la thar lai phei chuan a ‘hnun’ lam kha a buarchuar deuh a, rim pawh tlem a nei a, vaivut pawh a kai duh. A rawn tai phei tuang tuang a, nuih lai taka hahmaia a rawn per phei kha chuan a buaithlak thin a sin! Mahse khatiang vanga kam kan thuah tak hial ka hre miah lo!
Kan han pet pawp a, a riin ‘pawng’ a tih chuan a la mar tha tawk tihna a ni a. Chutiang hun lai tak chu a hlauhawm lai a ni. Pet a hlauhawm loh va, rah palh a hlauhawm. Rah palh chuan a pial rulh a, tukkhum lei vaw chawrha tluk a ni mai. Tukkhum a nih loh pawhin mawng sawh tal a ni hrim hrim. Kekawrte kan ha ngai si lova, mawng a tim duh teh mai a ni.
Bik lovang
Pet dik harsa ber mai kha a buaithlak lai a ni. Ke chhipin a dik duh deuh ber a, puan heikhawk bun ai chuan ke lawng ngeiin pet dik a awl bawk. A rih zawng leh a len zawng in balance tura Fifa
lamin dan leh hrai an siam hnan tunlai ball ang a ni ve lo va, vawk a len leh a phing a lian a, a tet deuh leh a te ve deuh va. Bawng phing a lian duh a, a tlo pawh a tlo hret. Ham puar that chuan a
bial ve lek lek thei a, mahse ham puar lutuk chu a tlo duh lo.
Saphing hmanga kan inkhelh thin lai khan kan zingah Bulgarian free kick specialist Hristo Stoichkov te, David Beckham-te pawh hi rawn tel vein, an Predator (Reebok) boot pawh hi bun mahse an pet dik ka ring bik lo reng reng. Beckham pawh hian a duh duh chuan a ‘bent’ bik hauh lovang maw le!
May be related
- Aizawlah Vawksa Kg 1 Rs 120, Bawngti Rs 140!
- Learn to say NO
- Happy Diwali
- Mizo Idol - ka ngaihdan
- Hriselna lam hawi post hi awm ve se
October 10th, 2007 at 2:29 pm
Hahaha.. ka nui nasa ltk.. Zaia rawn ziak zel teh.. A phing mawlh mai kha a ni… thenawm te vawk talh a, kan inchuh thrin kha… hahaha… tui thun te kha a nuam ve mai mai a… ball atan pawh kan hmang ve…
a bal duh khawp mai…. haha
October 10th, 2007 at 2:39 pm
Mahse… tih ka chhiar thleng a, ka nui nasa.
buaithlak duh om tak hle mai a
Zaia hi chu eng poh hi i chhuah ngaihnawm em2 vek mai a.
October 10th, 2007 at 4:20 pm
Saphing nei ngat kha chu kan neih loh tum chuan kan tlawn thei nasa mai mawle…thian te saphing nei in an han inti thei zui ah hahahaha..ngaihawm ve mai mai..
October 10th, 2007 at 4:23 pm
Saphing chu ka pet ve hman lom. Mahse khawlai atangin field ah ka gruadate lo.
October 10th, 2007 at 4:28 pm
Hihihihi!!!..Zaia, lung i va tilengin nuih i va tiza bawk si veee!! Nie, a phing mawlh kha!! Sertawk leh ‘a Phing’ bakah, pawnchhe ball kha in khel ve ngai em? A siam dan pawh ka la thiam lutuk! …Saphing ball chu a keha a ro hnuah pawh lukhum angrengah a la hman theih leh nghal… rilruah ka mitthla zui a, ka la nui char char..HAHAHAHAHA…
October 10th, 2007 at 5:28 pm
hehehe…va ron thloh hlui ve o…mizopa balloon te kan ti thin…ka naupan lai a vawk kan talh in an ti thler palh a ka tap vak toh …hehe
October 10th, 2007 at 6:57 pm
Hetiang thu mai mai hi a lawm Darrokima ten a bu-in an siam a, an hralh chur chur ni… Naupan lai hun hi a nuihzatthlak a, a hlimawm ber bawk….
October 11th, 2007 at 10:10 am
Nia… a rei ve tawh a sin. Naupan lai hun hi a ngaihawm a, a ngaihnawm bawk. Mite anga ziah thiam ve a chakawm thin. Min chawhphur viau chuan ka rel chuan hmasak ber chanchin pawh ziah tur ka la nei!! :))