mi(sual).com

Nizan ka lungleng pheng chuan zan thlifim dawng turin inchung lamah ka thatchhe thutthleng ka pu chho va. Khua ka han chuan vel a, Purasawalkam kawng phei leh piah leh deuh va Prince Tower lo ding to luah te, chumi piah lawka eng company-in emaw building hrawl zet mai an sak laia crane ban sei zet mai lo her muai muai te, Doveton Bridge (anni chuan Dauton Bridji an ti!) inkham ruah mai te, kan inbul kawng sira Tamil pa zurui let ngat mai te chuan ka lunglen an hnem reng reng lo. Tuipui thli fim a thaw heuh heuh va, ka muthilh lai pawh chu ka lo hre hauh pek lo va. Chutia eng emaw chen ka muthilh hnu chuan kan inhnuai pa, Raveendran-a hi a lo kal a, “Ti rawh le, i kal tawh ang le,” a rawn ti ringawt a. Kei chuan a ngaihna hre lo zet hian, “Khawiah maw?” tiin ka lo zawt a. Ani chuan awlsam te hian, “Khaw ropui tak, misual dot com an tihah hian maw le,” a ti leh mai a. Misual dot com chu ka lo tlawh fo tawh thin khua a ni. Mahse, he Tamil pa hian engtinnge a lo hriat ve ngawt? A tan he khua hian engnge tangkaina a neih? Heng zawhna te hi ka rilruah a lo lut tuk tuk a, mahse ka zawt ta lem hlei lo va. Tichuan kan kal chu a ni ta mai a.

He khua hi khaw lian tak chu a ni lo. Mahse a ropui danglam ve tlat a ni. Khaw chhung kan han lut chu Raveendran-a chuan “An khaw VCP i tlawh hmasa ang,” a ti a, VCP in chu kan pan ding ta nghal a. Misual dot com khaw VCP Benjamin-a chu sitting roomah duhdah zet hian a lo thu kawisawi a. Khawtlang mipuite hmuha pho chhuah tur masala dosa leh bekang rawt thak zet mai a lo sawngbawl zo chiah hi a lo ni a. Kan titi karlakah chuan a nui leh suk thin a. Thingpuife a neih loh avanga thingpui pawh in ta lo chuan hmun dang tlawh kual turin kan chhuah san ta a ni.

A kawmthlang maiah chuan in pakhat, a kawngka lu chunga “father_sphinx” tih intar hi a awm a. Kan han lut chu in neitupa chuan Ruk khawm dawr-a Rs. 1000/- a a lei laptop hi a lo khal nuap nuap a. Thuka thirbel ung tawh tak inchhuangah chuan artui pathum hi a lo inchhuang barh barh bawk a. Tunlai chu research beia a buai thin zia te, a research title pawh, “The Impact of Artui Chhum in Human Digestive System with Special Reference to Vawih” tih a nih thu te tui takin a lo sawi a. Artui chhum pakhat ve ve min pe a, kan chhuah san ta a.

A piah leh deuh va in pakhatah chuan kan lut zui leh nghal a. Sitting room-ah chuan Pu Zoruna leh Pu Vangchhia te chuan khun khan em em hian thlahtu bul an lo chhui dun a. Mizo hi hnam a nih leh nih loh chung changa an ngaihdan inang lo chuan an boruak a lo ti sosang lek lek hi a lo ni a. An bula lo thu ve Samuelapa chuan ka ho hian an ti ti chu a lo ngaithla a. Synod website lama han chhuah chhawn tur awm a hmu mai lo tih a hmel atang chuan a lang reng mai. He mite hi he khuaah chuan val upa chan changte an nih thu Raveendran-a chuan min hrilh nghe nghe a ni.

Chu in kan chhuahsan hnu chuan Raveendran-a chuan, “Nuthlawi rim ang aw” a ti a, a piah chiaha in felfai takah chuan kan lut zui leh a. In neitunu Maimawm te, superstarring te, virgochhas te chuan mittui tla zawih zawih hian nun hlui an lo sawi a. A inleng pakhat, Nasty chuan tukverh thlang lama dah vauh vauh pah chuan an thusawi a thlawp a ni tih hriat tak hian a lo bu nghauh nghauh a, a lo insut deuh hraih hraih bawk a. Kan luh lai tak chuan Fistbone-a jail tan thu te an lo sawi riin ka hria. Engpawh nise, hemite hi an lung a leng a ni. Tlawh tur dang kan la ngah deuh avangin Maimawm thingpui lum tui tak kan in zawh hnu chuan kan chhuahsan ve leh ta a. Kan chhuahsan hnu chuan Raveendran-a chuan, “Maimawm kha misual dot com khawvel-a Anti-Boring Movement hlawhtling tak ti chhuaktu a nih kha,” a ti a. Tichuan ka lo ngaisang ta em em a.

In kan kal pelh kawngka lu chungah te chuan Horcrux tih te, Val_brosky tih te, Vladimir Putin tih te, Hrangkekuala tih te, Canibal tih te leh hming phawhraw pui pui a lo in tar hlawm a. Heng ho hi an ‘man’ hmel hlawm em avangin kan tih deuh roh va, kan tlawh ta lo. Kan kal zel a, in pakhat kawtah hian mi pakhat hi a lo disco zak zak a, he khaw khawnbawl upa Spikey a lo ni a. Kawm chi ni rih lo va kan hriat avangin haw lama tlawh zawk turin kan kal pel ta rih a.

Veng mawng lama in pakhatah chuan kan lut leh a. An kawt tuizemah chuan “Kan la ngai dawn mang e, khua reia’n – by RTPA” tih hi a lo inziak a. Tute in nge tih hrilh leh hranpa kan ngai lo. Amah ngei chuan tapchhakah mawm hmuar hian vawk lu a lo rawh a. Tun hnaia magic lama a lo tui chhoh tak dan te chu a lo sawi bauh bauh a.

Chutia kan ti ti lai tak chuan lirnghing nasa tak mai hi a lo thawk phut a, min sawi ta chiam chiam mai a. RTPA te kawm thlang, lyana te pawh an buai hle a ni tih a hriat theih. A piah lama in rauh san tawh, Aryan-a te in hlui leh hleizuama te in hlui pawh chu a insawi nasa ngei mai! Chutih lai tak chuan, “Tho rawh, tho rawh!” tia min au vak vak hi ka hria a. Ka han harh chu ka naute chuan inchunga ka awmrei lutuk chu ngaih tha lovin min rawn en a, min rawn kai tho hi a lo ni a. Ka mumang chu mak ka ti ang reng khawp mai a…

May be related

• Vun natna
• Tunlai chu..
• Catherine Lalpuii psychiatry ward-ah
• Thalaite’n Kuthnathawktu an tlawh dawn!
• Thalai Pawl chu lo awm ta se?

Recent entries

• To correct your comment
• Zorock (Rosangliana)
• Guwahati Mizo Sports
• Once upon a time in Mizoram
• Former DGP says pastor’s death cannot be suicide
• Delhi NE student orgs to compete for RNT Memorial Trophy
• MPCY-in MNF sawrkar zawhna an zawt
• AND1 Mixtape Tour Sydney.
• Woman Calendar
• Carmel dancers

This entry was posted on Friday, October 12th, 2007 at 4:22 pm and is filed under HAHAHA, more than words. You can follow any responses to this entry through the RSS 2.0 feed. You can leave a response, or trackback from your own site.