Krista tuarna ka ngaihtuahin

April 9th, 2009 6:15 pm | Religion | H.Vangchhia | 207 views

by Denis Lalfela sdb, Rome.

Lal Isuan a thih tur thu leh thihna hneha a thawhleh tur thu chiang takin a lo sawi thin. Temple a tlawh tum khan “He in hi tichhia ulang, ni thum chhungin ka tungding leh ang” (John 2:19) tiin chhinchhiahna beisei tlat Juda mite chu a cho a nih kha! Kum sawmli paruk lai an lo sak ni thum chhung leka tungding leh thei a a inchhal meuh chuan Juda hote an thinrim hle mai. Mahse Lal Isuan a ma taksa (in), thi a tho leh tur chungchang a sawi zawk si a.

“Tupawhin mi zui a duh chuan mahni hrehawm pawisa lovin, nitin a Kraws puin mi zui rawh se” tiin min sawm theuh a. Inthlahdah thei kan nih loh avangin nitina Kraws put a ngai anih chu! Kan thlarau kawng hi chhuk chho tak, tih hràm nun mamawh, tlawmna leh dawhtheihna nun tel lova awm thei lo a ni a; chuvang a tluk hial chàng pawh nei kan ni. Chauh chang awm mahse tlu hlen lova kan thawhleh zel hi Krista duhdan a ni. “Mi chak chu chaklohna nei lo mi ni lovin, a chakloh laia chakna pe thei Isua auh nachang hre mi chu a ni zawk” an lo tih thin hi a va dik em! Krista tuarna leh Kraws thiltihtheihna i thlir ho dawn teh ang.

Juda mi ten misual thah nana an hman uar ber chu lung a den hlum a ni. Hebrai mite thuziak atangin inhàlna leh innghaisaknate pawh an hmang tih hriat a ni. Mak tak mai chu, kraws a inkhenbeh hi Juda miten an uar ve tlat lo. Chutih rualin Rome mite chuan kraws a misual khenbeh chu an uar em em thung. Mi hnuaihnung zawk te, chhiahhlawhte, rùkrute, tuatthatte leh ram awptu laka helte chu an khengbet tlangpui. Chutiang zingah kan Lalpa chu telin thihna rapthlak leh mualpho thlak ber a tuar a ni. Kraws a inkhenbeh chu tihnamai lo tak, tlawm thlak ngawih ngawih a ni. Chutianga danin thiamloh a chantirte chu an khenbeh hmain nasa takin an nghaisa thin.

Lal Isua tuarna namen lo chu kan mitthla thei awm e; lung pawh a tichhe hle mai tirawh u! Mahse Isuan a Pa thu a awih em avangin heng zawng zawng hi a tuar hmiah hmiah a; kan chhandamna atana a inpekna chu a tawp thlengin a hlen ta a ni. A thihna chuan a zuitute chu hmelmate nuih tizatu ah a siam a. Mahse thihna chu a tawpna a ni si lo; thihna hnehin a tho leh si. Van kawng atan a inbuatsaihna mai a ni zawk. A thawhlehna hmanga min awmpuina kum hlun chu a hmangaihna thianghlim tak rah chu a ni.

Tirhkoh Paula chuan “Kraws thu chu boral mekte tan chuan àtna a ni si a; keini chhandam mekte tan erawh chuan Pathian thiltihtheihna a ni zawk e” (1 Korinth 1:18) tiin Korinth mite uar takin a fuih a. (Korinth khua chu lawngchawlhna hmun anih avangin khawtlang nun a thil dukdak lo tam tak hmuh tur a awm. Inluling leh hlemhletna nen a rorelte, mahni inzuarte leh Pathian awm ringlo ang hrim a nung an tam hle). Tirhkoh Paula hian a thiltawn (experience) atanga huai taka sawi ngam anih avangin a ropui leh zual. Good Friday a lo hnai ta tiin, kum danga ka tih fo tawh angin, Paula lù an tanna (martyr) hmun leh a thlàn te ka va tlawh leh a.

Rome khaw chhunga awm ni mahse, Paula hunlai kha chuan Rome khaw pawna awm a ni. A thih hma a jail bang a lo zùtna te chuan hnuk a ti ulh hial mai. Mak tak maiin, Paula lù an tan khan, a lu kha vawi thum lai a sawt a. Chu a lu sawhna hmun atangte chuan tuihna a lo chhuak a, tun hnaiah tui hmuh tur awm lo mahse ngun taka ngaihthlak chuan tui luang ri her her a hriat theih. A martyr na hmuna Biakin mawi tak, lian vak si lo an sak chuan a tizahawm hle bawk.

Biakin chhung bang chungsang takah Paula’n ‘Rome khua leh tui ka ni asin’ tih tah àw tak meuha a lo sawi te chu Latin tawngin a inziak kuau mai a. He Biakin kawtkai maiah hian Paula ngeiin a lo rah tawh leh tun thlenga la tihdanglam loh lungdawh a awm a; suangtuahna a kal thuiin thlarauah min ti chak thar takzet zu nia. Paula martyr na hmun atang hian a thlan hi km thum vela hla a ni. Chutah chuan Biakin ropui zet mai sak a ni a, Paula thlan hi Maicham hnuaiah a awm a.

Nitin mi tam takin tlawhin, Kohhran/ pawl ram a buai lovin an tawngtai thin. Krista Kraws ah chakna thar a hmuh zel avang leh Kristaah chauh hlimna thuruk a awm tih a hriat avangin, Paula chuan harsatna leh tihduhdahna karah a Lalpa Chanchin Tha a puang a ni tih a chiang hle. Ani chang ni lovin, martyr tam takte leh vawiin ni thleng a Krista tan tlattute hian Krista Kraws ah an engkim an lo hlan thin a ni. Khawvel thilin min bàwm hneh em a; Van lam thilte leh Kraws hlutna ngei pawh chuan kan thinlungah thu a sawi thei lo fo. Kan tana a thihna azarah hnehtu kan ni ve ngei dawn lawm ni?

Ringtu hmasa ten Krista zuitute kawng chu Kraws kawng a ni tih min kawhhmuh a. Kan hlaah pawh ‘Ka Vanin kawng Kraws a ni’ tih kan sa fova, kan hlimpui hle thin kha! Aw unau, nang leh kei tehlul hi, chu Kraws pu ve tur a sawm kan ni tlat mai. Mak i ti ve em? Kan chak lohna chu thu hran, thatchhiatna sualin min phuar bet tlat leh nghal a. Kum sanghnih kal ta a thing Kraws rit tak ang kha pu ve kher lo mah ila, nitin nunah Kraws put tur kan ngah thin sia tiraw!

Thenkhat tan fa sualte chu kraws rit tak an ni a, thenkhat tan zu leh drugs ngawlvei te chu kraws, put hleih theih loh khawp a rit an ni ngei ang. Nupa inthen te pawhin khawharna leh lunglenna kraws an pu a. Lusun khawhar te pawh mal ngawih ngawih a inhriain, an kraws put chu àwm an ti thei hlawl lo. Ngaihdamna aia huatna thlang tlatte chuan kraws awmzia an hre meuh lova; chutin nitin mamawh nei vek si a, chhungril leh thlarau nun ruak huaia dah ten Kraws kawng zawh ve tan a; mahmawh leh chanhai te chhawmdawl a, krista atak a an zui a hun ta hle.

Chu duhthlanna leh a hlenna chu an kraws put tur a ni ang. Heng kraws kan put hrang hrang kan rawn tarlante hi entirna thenkhat nise; kraws put tur kan ngah em theuh avangin kan sawi seng lovang. Heng Kraws te hi Krista kraws enmil a kan put/ tawrh ava pawimawh em! Kan tuarnate hi Krista Kraws-ah thlen lova, mahni theihna a chinfel kan tum chuan nà kan ti a, kan dam zo dawn hek lo. Mihring ram atanga kan hriatthiam rualloh leh kan tawrh atan a àwm lo kan tih hi, Kalvari tlanga tuartu Krista tuarna nena kan enmil chuan damna kan nei chho ang a; kan duh angin thil inher lo mahse Lal Isuan a put dan min zirtir anga, min putpui dawn asin!

Chutin tumahin a thlawnin kan tuar tawh lovang a, Kraws phenna malsawmna inthup chu kan haichhuak zel zawk ang. Mi pakhat ro hlu tak hmu a, a neih thildang zawng zawng kalsantu ang khan Krista kan zui tawh ngei ang. Sakhawmite chuan, “ Kan hneh theih ai a nasa Lalpan thlemna min pe ngai lo” zuk ti tlat a. Chuvangin harsatna leh thlemnaah Lal Isua au thin ila, tichuan engkim mai hi Krista hmel min hmuhtirtu leh a malsawmna min auhthlak saktu a lo ni zel ang.

Krista Kraws chu mitin tan thiltihtheihna, tlanna leh damna a ni. Petera chuan, “Sualna lamahte thi tawhin felna lamah kan nun theih nan amah ngeiin thingah khan a taksain kan sualte a phur a; amah vuakna vualte chuan tihdamin in awm ta” (1 Petera 2:24) tiin Krista a thlawna a thih lohzia min hrilh a. Harsatna karah pawh Kraws kan en tlat chuan kan dam zel dawn a ni. Kraws lera kan tan a tuartu chuan mitinte ama hnenah min hip khawmin, pumkhatah min siam leh ang.

“Tin, Kei, lei ata khaikànin ka awm chuan mi zawng zawng keima hnenah ka hìp ang’ (John 12:32) Lal Isuan a lo ti tlat si a! Kan hmangaih zamual liam ta te thih champha awmni khama kan hmanin, kan inhmangaihna leh an nuna thilthate kan hrechhuak a; kan ngaih em avangin kan tap hial thin. Nang leh kei avanga Kraws lera thi, Krista thih champha hi ho mai mai in kan hmang ral leh dawn em ni? Khawngaihna hun hi mahni insiamthat nan leh thlarau nuna hmasawn nan i hmang theuh ang u. Lal Isua hliamahte chuan DAMNA FAMKIM kan neih theih nan, mitin Krista khawngaihna chuan min thuam thar mawlh rawh se. Amen!

mi(sual).com