By Denis Lalfela sdb, Rome.
Kristian State ni a inchhal Zoram a zu leh drugs ngawlvei tamzia ngaihtuah la, duhthlanna dik siam a harsatzia i chhut thiam ngei ang. Zing thawh phat atangin duhthlanna siam tur kan nei. Kan nun pum nghawng thei duhthlanna chu fimkhur taka siam a tul thin. A leiba tam tak rulh nan putar pakhat hi a chenna in mawi tak hralh a, in chhe taka a insawn a tul ta a. A khawsak a nawm thin em avangin a thenawmte chuan an huphurhpui ngang aniang, “Ka pu, khi in chhia leh chep takah khian i hlim meuh ang maw?” tiin an zawt sek mai. Putar chuan, “Khi inah khian eng harsatna pawh tawk ila hlim taka nung turin duhthlanna ka siam fel ta” tiin a chhang mauh mai a, a tum tlat avangin a hlim chho ta. Sual hnathawh leh sual hneh tum a duhthlanna sang ber siamte nihlawhzia i thlir ho dawn teh ang.
Mahni duh vanga sual a tlu an awm ngai meuh lo; fimkhur loh vanga tlu erawh an tam. Zaithiam, speakers leh evangelists ropui takte hi engatinge inngaihna sual leh sual dangah an tluk thin le? Thlaraua thuamtu Isua zawi zawia an kalsan thin vang a ni. Pathian chauh kan engkima kan pawm theih nan, kan duhna piahlamah vuak leh tihtlawm fo kan ni. Kraws a hnehna puang ngamte erawh chuan tluknaah chakna an hmu a, tlawmnaah thiltihtheihna an hmu tlat thung. Hei hi thlarau finna, thlarau rah duhawm chu a ni. Anih leh sual lian dai lo inti si khan eng salah i tan le? Midang la kawk ngam tur i ni em? Sim tur kan nei theuh. Kan chaklohna erawh a in ang lova, a then sualna a langsar deuh a, an mualphopui mai a ni. Duhthlanna sang ber – Krista thlangtute chuan midang an kawk ngai lo. Mahni nun inenletin, thil dang zawng aia hlu, Krista nitinin an thlang thar thin. Harsatna leh thlemna kara chunglam tanpuina dilna chang hriate leh sual hneh tum tlatte hi kan Pathianin a ensan ngai lo. Humsual dai lo tura rilru siam te pawh thlarauah chakna a pe a, a humhim tlat thin. “Ka Pa, anni hi humhim rawh; khawvelah an awm a, khawvel mi an ni si lo” ti a Lal Isuan a zirtirte tana a dil ang khan, sual do pui tura Isua sawm nachang hria te hi mi chak leh mi vannei an ni.
Ngawlveite chu chàkna leh itna salah tàngin tumruhna an tlachham fo. Sual chu hneh thei lova an inngaih tlat avangin bawih rinawm, hmelma Setana michuamte an ni thin. Han sim ve ngial mahse, thlemna hmasa ber a lo kalin an tlawm leh mai. Chàkna sual khan sim duhna thinlung chu thununin a rawn chhu chhe vek a; thluak fim pawh nei hman lovin duh lo chungin an tlu leh thin a ni. He nunram hrehawm tak hi Tirhkoh Paula chuan, “Mirethei ka va han ni em!” a lo tihna chhan kha ni. Paula erawh chuan pen zel nachang a hria; hnehtu Pathian hnenah lawmthu a sawi thei tlat. Duhthlanna sang ber- Lal Isua a thlan tlat avangin, a sal tanna leh natna te chu laksak ni lo mahse Krista khawngaihna chu a tan a tawkzia a hre thar a, “Nun hi Krista a ni” a ti thei ta. Amaha nung chu tu dang nilovin a Lal leh tlantu, Isua chu a ni. Kraws a hnehna puangtu Krista ah chauh ngawlveite leh beidawng mek ten hnehna an chang ang. Kum 32 a niha piangthar Mt. Augustina chuan, “Aw Pathian, nangin i tan min siam tawh a. Kan thinlungte hi i hnena an chawlh hma loh zawng khawiah mah an hahchawl tawp lovang” tiin Lal Isua chu a lal leh Chhandamtu atan a puang hmiah mai.
Pathian ngaihdamna rinhlelh hi Setana chaw tui tak, piangthar inti tam takte eichhetu a ni. Pathianin a ngaihdam hmak tawh, tun hmaa an tihsualte inthiamlohna nena an ngaihtuah fo avangin chhungrilah an zalen lova, an nunah thlarauin hna a thawk hlei thei lo. Tidam thei hmangaihna aia tlenfai tawh suala an rilru dah lui tlatte chuan damna an chang thei hek lova, beiseina leh phurna thar nena hmalam an thlir reng loh chuan kehsawmna nasa zawk an hmabak a ni. Zalenna i thlan tlat loh chuan piangthar sal tang, Kristian tangkai lo leh thlarau hlimna neilo mihring i ni ang. Piantharna chu thlarauva inthuamtharna a ni. Krista thlangtute chu mahni ta an ni tawh lo. Man a lei an nih avangin nitin inlamletna nun an nung a, mahni ral lam panin an nunah Krista an dah lal tial tial thin. Mahni felna chapo pui te aiin mahni sualna hria a inchhirte hi Pathian hmaah an ropui zawk daih! Tin, thinlung taka inchhirte hi Thlarau Thianghlimin a kaihruai a, chakna thar leh hnehzelna nun a pe thin.
Nang, duhthlanna sang ber – Lal Isua chu i thlang ngam ve dawn em le?
Similar Posts:
- DUHTHLANNA SANG BER By Denis Lalfela, Rome
- Duhthlanna Sang Ber
- Youth Icon leh Duhthlanna
- PIANTHARNA
- Pentecost pualin
April 5th, 2009 at 9:05 am
Thiltha leh thilthalo lakah duh thlang dawn ila, duh thlan a har lo. Thil tha ve ve nia lang ah hian duh thlan a harsa ka ti thin. Tin, nupui-pasal thlan phei hi chu RISK maw le.
Report this comment
April 5th, 2009 at 9:26 am
“Ka lawm e ka zalen ta khawvel sual ata nun thar ka nei Krista thisen vangin” tih hla phuahtu ang a khawvel sualna atrang zalen tur a, Krista chu bel tlat a ama chak na rin chhan a, amah thlang ngam tak tak tute chu, he lei ah leh vanah pawh mi vannei an ni si a. “Lalpa ka thlang che ka nitin nun hi i kutah ka hlan e” ti mai tur kan ni mawle….. mahse kan rin zia fiahna tur in Patian hian kan buan tawk tur sual hi khawvelah a dah ve si a. Nitin hian kan nunah sual keimahni a betve tlat hi alo inlar leh si thin, Ringtu ten ka zinkawng kan zawh tawp thleng in sual Setana hian min bei thin a, Khawvel sualna hneh a tho leh Isua vuan tlat tute chu an nghing ve ngai silo.
Report this comment
April 5th, 2009 at 9:43 am
Thaiboy Rome 13: 11 tun lai thil awmzia in hriat avang leh muhil thawh harlh a hun tawh tak zet tih in hriat avangin chu chu ka sawi ani. TUNAH CHUAN KAN RIN TIRH LAI AI KHAN KAN CHHANDAMNA CHU A HNAI TA ZAWK SIA. zan hi a ral lek lek tawh a, khua a var dawn ta e:chuvangin thima thiltih chu chu paihih i la eng thuamin inthuam ang u. chhuna awm angin mawi takin i awm ang u,zu in buai leh zu ruia awm lovin, insual leh initsika awm lovin, hur leh imngaih hmanga awm lovin. Lalpa Isua krista chuan inthuma zawk ulangin tisa chakna puitlin turin eangmah in siam suh u.
Thaiboy, paula chuan chu lai chhiah chu ni chhandam a hnai a tih chauh kha, Krista in thuam rawh a ti kha, in thuam dan tur chu Calatia 3:27-29 thleng kha chhiar rawh. zawh tur dang a awm leh eng lai pawh in.
Report this comment
April 6th, 2009 at 4:19 am
Zorock (Rosangliana) sak, Thlarau rosepar tih hla kha, ngaihthlak anuam ka ti khawp mai. Isu ka hmangaih che, ka ta i ni e, tih hla hi sak ngam ka chak bawk….
Report this comment
April 6th, 2009 at 1:40 pm
sual kalsan tute sual in a hlat a, Pathian hnaih tute Pathian in a hnaih a, a ropui zia an hmu telh telh a, eng nen mah an thleng phal toh thin lo zawk a ni.
Report this comment
April 6th, 2009 at 6:59 pm
Nie ,,,Pu VH ‘Isu ka hmangaih che’ tih hla khi chu thinlung taka sa tur chuan A KHAWNGAIHNA a ngai….kei pawh in har ka ti thin khawp mai…tin KHB hla dang tam tak pawh hi…ngaihtuah chian chuan sak ngam loh tur leh Pathian laka kan in sak bat hi tam tak awm in ka hria…nitin a sual a tlu fo hian,,,Hneh Theihloh Nun Ka Nei, kan han tih thin hi chu a in hmeh lo deuh chuan ka hria….keimah pawh ka tel ka nun a thil thleng ve tho a ni…..Mahse heng zawng zawng ah hian….A Hmangaihna leh Khawngaihna avangin hneh tu ka ni zel ang…
Report this comment
April 10th, 2009 at 1:43 am
Mihring hian kan tana hlawkna nia kan hriat hi kan thlang zel. Rs 100 leh Rs 5 duhthlan tur pe che ila, pawisa hlutna hre chin i nih chuan Rs 100 i thlang hrim hrim. Naupang chumchiap chuan a color mawi zawk tiin Rs 5 chu a thlang mai thei. Krista thlangtute pawh hian tunge a nih, engnge a nih an hriat chian atangin an thlang lo thei lo thin. ‘Isua kraws mak tak chungah khan’ tih hi saptawng chuan ‘When I survey the wondrous cross’ tih a nia, ‘survey’ tih hi a hmang tlat. Kraws te hi survey tham, research beihna tham a ni. C.Lalzarmawian ‘Hriat chian lehzual che hi ka va duh em! Hre chiang ila nang ka vahbosan tawh lo’ng che” a tih hi kan thinlung chhungril testimony ni thei theuh se ka va ti em!
Report this comment
April 28th, 2009 at 1:17 am
From the author: Misual.com ka hmelhriat tan tirh atangin ka article ka hmu ve ta zeuh zeuh a. Website enkawltute ka thawn chang awm mahse, mithahnemngai ten min lo post sak a ni fova. An za achungah thinlung takin ka lawm e. Nangni chhiartu ten sawibelh tur, sawifiahna tha zawk leh hmasawnna tur in rawn chhawp chhuak zel hi ka lawm takzet bawk a. Article ngun takin in chhiar tih a chiang reng mai a. Heta in rawn comment bakah hian mimal taka hriatbelh duh leh article dang zelah pawh hmasawnna ka neih theih nana min pui turin readers te ka sawm che u a. denissdb@yahoo.com ah min rawn thawn theih chuan ka lawm ngawt ang. Readers leh comment ziaktute, in ti lawmawm takzet mai. Remchangah he article a bible thu vel khi exegesis rawn tarlan ka tum ang. Tunah hian Salesian Pontifical University, Rome ah Master of Theology ka zir a. Articles ka contribute ve te hi tawngtaina a ka dil thin a, Mizo mipui tana ka ziah avang leh Newspaper hrang hranga an chhuah thin avangin exegesis lam ka ngaihthah deuh bawk a ni e. Ka ziak teuh mai. Ka lawm e – in rawngbawlpui, Denis Lalfela, SDB, Rome, Italy.
Report this comment