Matric Result Nge Pawimawh BA/MA Result?
– James Ramdinmawia
Matric Result a ropui!
Kum sawm chuang zet a liam ta; zan khat chu chhungkuain TV kan en a. Damlo kan neih avangin a volume pawh pe sang ngam lovin kan uipui tui lian thlir ve mai mai a. Chanchinthar a lo hun a, chutah mipui pung khawm tuau tuau a lo lang a. Eng thila pung khawm nge an nih tih leh khawi hmun nge an pun khawmna tih chu kan hre thei mai lo. Chutah Cameraman inher kual deuh niawm chuan an awmna hmun chu MBSE building kawt a ni tih a rawn tilang ta a.
TV volume kan herh san deuh chuan MBSE-in HSLC (Matric) result an tichhuak hi a lo ni a. Chuti em ema tam mipui an pungkhawm chuan Matric Result a lo ropui zia a hril chiang hle mai. Chutah le, a Topper ber interview-na TV ah te kan thlir awl lova, Top ten-a lang pha te pawh result kimchang nen chanchinbu lamah an lang chuai chuai bawk. Chutih hun lai chuan Matric Exam-a Top Ten-a lang pha nih chu BA/MA (a tam zawkin kan hriatthiam theih dan turin UG leh PG sawi nan kan hmang ang -jrdm) result chhuaka University Topper nih ai pawhin a thlannahawm zawk ngei ang; a chhan chu Media lamin an umzui nasa a, media-in an umzui nasat na na na chuan mipui lamin an lo ngaisang leh huam si.
New Millennium kan chuang kai a. Kum 2009 meuh a inherchhuah tawh pawhin kan media-te rilru puthmang leh mipui nawlpui rilru sukthlek chu kum sawm chuang fe kal taa an rilru puthmang leh sukthlek nen danglamna a la awm ta chuang lo emaw ni tih mai tur a ni a, hmasawnna hmuh tur a vang nangiang mai. MBSE chuan hmanni lawkah Matric Result 2009 a tichhuak a, tun hma kum tam tak kaltaa kan tih thin dan bawkin kan la khawsa a. Mipui tam namen lo chuan MBSE kawt an mawi a, media lamin nasa takin Matric Topper leh Top Ten-a lang ve dangte pawh an rawn umzui a. TV leh chanchinbu lamah Matric Result kimchang thlir tur leh chhiar tur kan vai lo va.
Mizo Zirlai pawl lian ber, nursery atanga BA/MA, Ph.D leh Post Doctoral research beitute thlenga huap zo ni tura ngaih MZP lah chuan MBSE Matric Result Top Ten-a Mizo langte chauh emaw chawimawi tlak an ti ni tur a ni, zirna sang zawk leh lukhawng nei zawk Mizoram University leh University danga BA/MA result chhuaka Mizo Topper-te chawimawina an neih thawm kan hre ngai lo. Matric Result chhuak nge nge chuan ngaihven a hlawhin Mizoram-a thilthleng pawimawh tak a ni kan ti thei ang. Chutih laiin University Exam Result -te chuan kan ngeng a chhun pha lo hle, hei tak hi a ni Matric Result ropui ka tihna em em chu!
Eng Vanga Matric Result Chu Ngaisang Em Em Nge Maw Kan Nih Le?
Zofate zinga Matric pass hmasa ber kan neih atanga kum 1980 bawr vel thleng kha chuan Matric Pass chin te chu lehkhathiam, mi puitling, rawn tlak, ram leh hnam thilah pawh hmathlir nei phaa ngaih an niin ngaihsan an hlawh em em a, “Matric Val ngat” tan chuan hna pawh a la tam em em a ni. Ngaihsan an hlawh em em chhan nia lang chu khatih hun lai khan lehkhathiam BA/MA an la tlem em em a, Matric pass ngei pawh an la tam lova, mipui nawlpuiin lehkha an la thiam loh bawk vang a ni. Tin matric pass chhuak chin kha chu kum lamah pawh puitling tak an lo nih tawh avangin an rawn tlak viau zel a ni. Chutih hun lai chuan Matric Result chuan ngaihven lo hlawh ta viau pawh nise a mawh love.
Hun lo kal zelin Mizoram chhungah college hrang hrang a lo ding ve ta a. BA pass an pung tial tial a, hna hmuh nan chuan Matric ngawt a tawk ta lo, “BA val ngat” lo tan chuan hna a vang tan ta. Chutah hun leh ni te lo ral zelin BA pass ringawt tan pawh hna a lo vang leh tan ta, “MA val ngat” tan chuan a zia deuh. Hun inher zelin a rawn hrin chu lehkhathiam leh zirna sang thleng phak kan neih belh ta teuh a. Thiamna sang zel leh hmasawnna avangin kum naupang te te in matric kan pass ta a, matric val chu kum naupang te te an nih tak avang leh an aia zirsang BA/MA val an tam tak em avangin rawn tlakah pawh kan ngai tawh lova, ram kalsiamah phei chuan eng rilru mah an pu pha lo ti ila kan sawi sual tam pui lovang.
Heti khawp hian zirna chungchangah hma kan sawnin zirna sang kan um tawh a ni si a. Chutih laia kan media-te, zirlai pawl te leh mipui nawlpuiin Matric Result chhuak kum engemaw zat kal taa kan buaipui luai luai thin ang thova kan la buaipui ta reng mai hi chuan ngaihtuah a tithui hle mai. Zirnaah hma kan sawn kan ti a, ‘Matric val ngat’ ti thinin ‘BA/MA naran’ tih tawngkam meuh kan hman tawh hnu pawha kan media, zirlai pawl leh mipui nawlpui rilru sukthlekin hma a sawn thei reng reng lo mai hian thil tam tak min ngaihtuahtir a ni.
Matric Result Dah Pawimawh Tlatna Chuan Eng Nge A Nghawng?
Media te pawimawhna leh thiltihtheihzia hi hrilh kher ngai lova hretu vek kan ni ngei ang, chutiang bawkin zirlai pawl pawh. Media-in an awn lam lam chu mipui awn lam a ni mai. Chuvangin mipui nawlpuiin “Matric Val” kan ngaih ropui tawh loh hnu leh “MA val ngat” kan tih tawh hnu pawha BA/MA Result aia Matric Result-in thawm a nei lian zawk tlat mai hi chu media vang ti ila kan sawi sual tam lovang. Matric Result nge BA/MA result hi pawimawha, a khawi zawk hi nge mipui nawlpui rilru-a vawrh lar tur zawk tih hi ngun taka ngaihtuah a tul a ni. Kum sawmhnih kalta chhung zawnga Matric Result chhuak tawha Top Ten-a lang zawng zawng media lamin ropui taka kan vawrh lar leh zirlai pawlte’n ropui taka kan chawimawi leh mipui nawlpuiin kan ngaihsan em em te kha tunah eng dinhmunah nge an din tih han chhui chiang chiah ila, ram leh hnam tana chhenfakawm, mi rintlak, rawn tlak, sorkara dinhmun pawimawh tak chelh emaw, eizawnna danga hlawhtling tak emaw, ram leh hnam tihmingthatu an zingah khan an tlem viau lovang maw? Khatih hun laia II leh III Division-a pass tawk tawk te kha kan han sawi tak mi hlawhtling zingah hian an tam zawk fe lovang maw?
Matric Result kan dah ropui em avangin nu leh pa tam tak chu an fate’n BA/MA an pass aiin Matric an pass khan an lawm zawk daih a! Nu leh pa, matric Result kan dah pawimawh em avanga mi hlawhtling tak tak ni tura an fate zirna sang zawmtir zel rilruk miah lova Matric-a duh tawk tir ta mai an tam ang. Tin, Matric Result kan dah pawimawh em avangin zirlai tam tak chuan kawlpui kheng thla ta huaia inngaiin matric pass an duh tawk viau bawk. Hei mai a ni lo, BA/MA result te aia Matric Result kan ngaih ropui tlat avang hian Matric-a kan inelna rilru ang kha BA/MA ah kan pu pha tawh lo. Matric Exam-a kan inbuatsaih tluka BA/MA exam-a inbuatsaih hi kan tlem khawp mai. BA/MA result te hi ngaihven hlawh leh Zoram ngawrnghing tham a nih miau loh avangin zirlaite’n ‘competitive mind’ an nei lova, kum tluana zir tawk tura mithiamte’n an duan sak an zirlaite chu exam dawn ah zan hnih khat leka chhiar puat chu chin dan tlanglawn tak a nih tawh avangin BA/MA thiamna ril tak tak nei lo, hman tlak loh kan chher chhuak teuh a, a tuartu chu keimahni bawk kan ni, dah pawimawh loh tur zawk dah pawimawha ngaihsan tur zawk kan ngaihsan tlat loh avangin.
University result (Under-Graduate & Post-Graduate) chhuak reng reng media lamin an ngaihven tawk lo hle tih kan sawi tawh. Chutih laiin Matric topper te chu a ropui theih tawpin kan umzui a, kan interview a, live discussion te kan neihpui thul, zirlai pawl, thawm nei ropui takte lah chuan chawimawina an lo nei bawk! A nih leh ram kalsiam tak takah leh midangte kawg kawhhmuha fuih thei tur khawpin kan Matric Topper te hi an rawn tlak em? University Topper (UG & PG) te hi ropui takin interview ve ila, Live Discussion/Phone-in Programme te siam sak ve ta ila kan ram chuan Matric topper te ngawt ai chuan a hlawkpui zawk fe dawn lovem ni? Hetianga tih ve nachang kan hriat hunah chuan University result te chuan mipui nawlpui rilru a luah pha ve ang a, zirlai zingah thiamna sang zawk awnna rilru a tuh ang a, College leh University level-ah competitive mind pu thei turin zirlai te a encourage ngei ngei dawn a ni! Chu chuan mi thiam tak tak chherchhuahna kawngah nasa takin min pui ngei ang. Ram hmasawnna kawnga media-te leh zirlai pawl te mawhphurhna hi a sang hle tih hemi atang hian a lang chiang viau lo maw?
Kan Thlen Chin Atangin Hma I Sawn Ang U:
Kan han sawi tak atanga thil lo lang chiang tak chu matric result aiin university result hian ram leh hnam hmasawnna kawngah awmzia a nei thui zawk tih hi a ni. Matric Distinction-a pass tamtak zingah BA/MA pawh zo lova zuzi leh ta mai mai an kat nawk, chutih laiin Matric-a II & III Division-a pass zingah BA/MA ti tha em em leh mi ropui tak ni ta, mi chhenfakawm an tam mai. Chuvangin Matric Result hian kan buaipui ang hu-in ram leh hnam tan hmasawnna kawng a hril thui lo. Tuna Top Ten, Distinction, I Division zawng zawngte hian BA/MA tha takin an zo vek kher ang em? Ram leh hnam tana mi chhenfakawm an ni vek kher ang em? BA/MA result nei tha te erawh mi puitling, chhawr nghal mawlh mawlh tlak, rawn tlak, an thu leh hla pawh bengkhawn tham, ram leh hnam vei phak an ni tawh asin. Chuvangin heng ho hi kan focus zawk tur an ni dawn lovem ni?
Khai le, tuna Mizoram University-in Under-Graduate Exam Results (BA, B.Sc., B.Com., B.C.A., etc) a tihchhuah mai turah leh, August/September vela Post-Graduate Exam Results (M.A., M.Sc., M.Com., M.S.W., M.L.I.Sc., etc.) a tihchhuah leh turah te hian kan media te leh zirlai pawl te’n hma an sawn leh sawn loh kan lo thlir reng dawn a ni.
