Thihna hnehin a tho leh ta, Hallelujah!

April 11th, 2009 11:59 am | Religion | H.Vangchhia | 234 views

by Denis Lalfela sdb, Rome.

Ahmasain, Easter chibai ka buk a che u. Tholeh Krista chuan a hmangaihna, hlimna leh thlamuanna in tikhat che u rawh se. Ringtu hmasate ata tawh Kristiante kùt pawimawh ber chu Easter a ni; vawiin ni thlengin urhsun takin kan serh thin. Kumin Easter kan hman tak pawhin rah tha a chhuah ngei i beisei phawt teh ang. Kum 325 A .D. hma lam kha chuan Kristian ten Easter hi Pathianni kher lo, kar khata hun remchangah an hmang thin. Nicea khawmpui 325 A .D. ah, Lal Constantina chuan Easter chu lei puma chhun leh zan a inchen ni (march 21) emaw a hnulam emaw hnua thla bial hmasak ber atanga Pathianni hmasa ber a serh turin dan a siam a. Chumi zul zuiin, Easter chu kùt ni in sawn thei ni ta zelin, March 22 leh April 25 inkar a Pathianni engemaw berah serh a ni ta zel a ni.

Krista thawhlehna chuan Zirtirte leh ringtu hmasa te mai bakah, amah ringtu zawng zawng te hnenah beisei thar thlenin thihna chu hnehin a awm ta. Khawvel lo awm leh tur kan beiseina chuan awmzia a nei takzet mai! Tirhkoh Paula chuan, “Krista kha kaihthawhin a awm loh chuan in rin chu engmah lo a ni ang a, in sualnaah chuan in la awm fo a ni ang” (1 Kor 15:17-18) tiin ring nghet tlat turin min fuih a ni. A thawhleh hnua a Zirtirte hnena a inlar khan, Thoma a awm ve lova. A thian ten Tholeh Krista an hmuh dan ngaihnawm zet a an sawi chu a ringhlel tlat pek a. Ni riat hnuah Isua an hnenah a inlar leh a, Thoma pawh a awm ve ran a. Isuan a hnenah, “I kutzungin han khawih la, ka kutte en rawh; I kut han ban la, ka nàkah zen rawh; ring lovin awm suh la, ring rawh” a ti ta phut mai le. Thoma mak ti leh a rinloh avanga inchhir hmel kan mitthla fo awm e. “Ka Lalpa leh ka Pathian i ni” tiin a kuah chawt ta ve ang. Mahse Isua chuan, “Hmu lova ring apiang te chu an eng a thawl e” (Johana 20:24-29) a tihsan daih zu nia.

Krista a hring ahrànin hmu lo mah ila, Amah chu ring ngam a, ama hming a damna leh chakna thar hmu tur a sawm kan ni. Kan vannei teh e. Lal Isuan damlote a tihdam khan ‘I rinna hi i dampui a ni’ a ti fo mai. Chu rinna chu a thlawn a pekin kan awm a; tih thanleh leh par vul tir chu kan kutah a awm thung. Kan rin ngam tawk loh avanga kan natna leh kan chànna te sawi ngai lovin kan hre theuhin a rinawm.
Tholeh Krista chuan mitin te thlamuanna min pe. Zirtirte hnena a inlar pawh khan ‘In chungah thlamuanna awm rawh se’ (Johana 20:19, 26), tiin chibai a buk hmasa. Kan nitin nunah Krista thlamuanna kan mamawh teh e. Mahni theihna a kal tumin, hah takin hring nun kan hmang fo. A thlamuanna changtute erawh chu chhungril hlimna in a zui a, rah tha an chhuah thin. Pathian chhandamna Chanchin Tha puanchhuah chu Isua chaw tui ber a nih kha. Chu hna pawimawh tak chu a Zirtirte hnenah hlan chhawngin, “Khawvel zawng zawngah kal ula, thil siam zawng zawng hnènah chuan Chanchin Tha hi hril rawh u” (Marka 16:15) tiin a tir chhuak hlawm a.

Vawiin ni thlengin Kohhran ten an la chhunzawm reng. Chu Krista Thu nung chu tisa leh thlarau tidam thei a ni. Chuvangin Pathian thu hi hriat satliah a tawk lova; ‘chu chu a sawi tum a niang’ ti a mahni ngaihdan kalpui vak chi pawh a ni hek lo. Kan Thu chhiarte hrethiam a nunpui turin Krista finna kan dil tur a ni. Tholeh Kristan Thlarau Thianghlim a Zirtirte hnena a pek khan tun thlengin ringtute min awmpui reng a, nitinin min hruai zel a ni.
Nitinin duhthlanna kan nei. Thil tha leh dik ni ngei a kan hriat pawh, famkim lo mihring kan nih miau avangin, kan hnawl fo thin. Chatuan daih lo tur tih kan hriat reng sual kan thlang fo bawk. Sual chu enge ni? Pathian hmangaihna leh a mi kohna kan hnarna/ dodalna hi sual chu a ni. Sual chuan chawp leh chilha hlim zawkna a thlen a, mi a hip thin. Mi chak hmel tak pawh an tlu tho; do zo leh tlu thei lo kan awm lo. Sual chu a tirah thain lang mahse, rei a daih lova. Mahni inthiamlohna leh nun hlimlohna thuk takah min hruai lut thin. Kan hun tawng mek te kan thlir chuan, Pathian mi hman, thuhriltu ropui leh talent tha tak tak neite pawh sualah an tlu ve thei tih kan hria. Tirhkoh Paula ngei pawhin he experience hi kum sanghnih kal ta khan a lo nung daih tawh. “Thil ka tih hi a ngaihna ka hre si lo; ka thiltih thin hi, ka thiltih duhzàwng a ni si lo, ka thil huatzàwng tak chu ka ti zawk thin a ni” tiin amaha sual awm a huatzia a lo sawi a; mahse chutah a tawp mai lo.

Kan Lalpa Isua Krista hnenah lawmthu awm rawh se, Ama zarah hnehtu kan ni, a ti daih mai. He sual hnehna nun hi Rome mite fuih nan a hmang nghe nghe (Rom 7:15; 25). Sawi leh sawi hnu, thil tha leh sual indona khawvelah kan cheng miau a; sualin min hneh chang pawh a tam ang. Chak lo tè tè kan nih avang taka intawngtaisak tawn theuh tur kan ni. Thlaraua chak zawk ten tlu tawhte leh chaklo zawk te keh thei dawm a dawm a, hmangaihna a kan tuam hlawm a hun ta hle. Hei hi Tholeh Krista min sawmna chu a ni; a hmangaihna hi mitin thinlungah lal ber tawh rawh se.
Kristiante tihduhdahna ram pakhatah, milem be duh lova Lal Isua thlang tlattu te chu tanin (jail) ah an dah a. Misual dang awm ve te nen an tàng hova. Dam chhunga Krista auchhuahpui thei tawh lo tur a khungluh an ni. Hun rei tak an tan hnuah, ni khat chu Biakin dar ri ni awm tak hi an hria a, an ngaihven ta hrà hlawm a. An zinga pakhat chuan a kekawr ipte atangin calendar te tak te (a kal hma a an nu in) a pai ruk tàt chu a han phawrh a. An chhut chet chet a. Chumi ni chu Lalpa thawhlehni kùt (Easter) a lo ni reng mai le. An inhawr khawm a, kut insuih leh hlim hmel fahranin, ringlo mi tàng ve te pawh sawmin, ‘Lal Tawngtaina’ an sawi ho ta a. An mittui a tla nasa hle a; lawmna chibai an inbuk bawk. Krista avang tuar thei an ni chu lawmin, ringlo mite pawh chu Kristian ah an inlet ta hlawm hial a. Thlarau hnathawh hi a ropui teh e! Tihduhdahna awmna apiangah Kohhran an chak a, ringtute an phurin an in hmangaih thin. Chutiang tihduhdahna tawk ve lo mah ila, atak a Krista kan nuna lantir leh a Lalram tan a thawk zel tur a sawm kan ni. Tholeh Kristan kan mamawh te min phuhruk sakin mal min sawm theuh rawh se. Amen.
………………………………………..

DUHTHLANNA SANG BER

mi(sual).com