“Mihring nun hi a tawi a, tun aia tha hian kan nung thei.
I kâin mite tana tha lo tur sawi chhuak lo sela, mite mamawh tur ngaihtuahpuiin anmahni tanpui thei tur thu chauh sawi thin ang che.”
America-a evangelist hmingthang ber, Billy Graham hi rinna leh thlarau lama America ram chauh pawh ni lo, khawvel puma mite entawn a ni. Kum 88 mi evangelist hmingthang hi natna chi hrang hrangin a tlakbuak mêk a, tunah hian thluak natna avanga taksa chak lohna chi hrang hrang thlen thei Parkinson’s disease te, prostate cancer te, ruh tliak avangtein a bawrhsawm hle a, a nupui Ruth nen kum zabi chanve dawn lai an lo chen dun tawhna, Montreat, North Carolina-ah taksa chau takin a hun a hmang mek a ni.
Billy Graham-a Crusade hnuhnung ber chu kum 4 kalta, 2005 khan New York City-a neih kha a ni tawh a, vawi engemawzat a thluak an zai tawh avangin tunah chuan a taksa a chak loin a chau hma thei hle a, hetih lai hian natna nei miah lote’n engmah kan tih loh laiin ani chuan nitin Pathian thu hrilh a la tum fan! A lehkhabu thar, The Journey tihah chuan nun hman dan tur engemawzat a sawi a, a thusawi thenkhatte hi i lo ngaihtuahzui ve dawn nia…
Midang nen inremin awm tum rawh
Hei hi mihringte hian kan ti thei em? Vanduaithlak takin kan thei lo. Theihtawp kan chhuah pawhin midangte ngaihdan kan thlaksak thei lo va, kan tihtheih awmchhun chu thil kan tihdik lohin Pathian hnenah kan dil ang a, kan sualnaah ngaihdam kan dil ang a, A tanpuina kan dil ang. Khawvel hi reilote atan chauh a ni a, keini pawh hi kan awm rei dawn lo va, kan nitin nun hi khawhral mai mai lo ila, Pathian ropui na’n i nung ang u.
Keimahni hi Pathian nena inrem ngei ngei a ngai bawk. Teenager ka nih laia Isua Krista ka pawm atang khan zingtin Pathian nena hun hmang turin rilru ka siam a, zingtin ka tawngai a, Bible ka chhiar a, ka tawngai hin. Isua Krista rinna kawngah hei aia pawimawh hi ka tan chuan a awm lo.
Miin i chunga an tih i duh tur ang bawkin mi chungah pawh ti ve rawh
He thu hi Isua’n tlâng chhipa a sawi a ni a, he thu hi zawm tak tak ila chuan kan nun hi a va han danglam nasa dawn em! Bible chuan tlâwmna atangin finna a lo awm tih min zirtir a, midang ang bawkin ka sual a ni tih leh Pathian khawngaihna avanga ngaihdam ka ni tih nitin ka ngaihtuah ziah thin. Pathian chuan thilpek tam tak min pe a, theihna tam tak min pe bawk a ni.
Kan thiltih thatahte a lawm thin. Kan nihna aia kan chapo hian Pathian kan biakna tur a dâl thin a, chapona hian kan sualte min hmuhtir thei lo.
Chuvang chuan kan thiante tan chauh lo pawh, kan hmelmate tan pawh kan tawngai thin tur a ni a, ‘miin i chunga an tih i duh tur ang bawkin mi chungah ti ve rawh’ tih hi kan zawm theihna tur kawng pakhat chu midangte tawngaisak a ni.
I lei veng tha rawh
Thilt ha lo sawi na’n i lei hmang lo la, a tha zawngin hmang ang che.
Midangte that lohna lai kan sawi chhuah avang hian inneihna leh inhianhatna engzatnge khawvelah hian chhe tawh ang aw…? Thil tha lo titheitu kan lei hi a tha zawngin a hman theih a, chu chu kan tum ber lo ni rawh se.
Mite’n an mimal harsatnaah thurâwn pe turin min ti fo thin a, Bible-a innghat thû hmanga chhanna pêk ka tum hram hram thin. Bible hi rangkachak khur mawng nei lo ang mai a ni a, kan laih thuk poh leh a hausakna kan hmuchhuak tam ting mai a ni. Bible chuan, “I kâin mite tana tha lo tur sawi chhuak lo sela, mite mamawh tur ngaihtuahpuiin anmahni tanpui thei tur thu chauh sawi thin ang che,” a ti a. Mite nena kan inbiak emaw, thu kan sawi reng rengah hemi rilru hi kan pu reng thin em tih hi inzawt ang u.
Sual chu sualin thungrul suh
Bible chuan sual zawng zawng hi Setan-a atanga chhuak vek niin a sawi a, Setan-a hian Pathian hi a do nasa em em a ni. Amaherawhchu, kan nundan leh kan chetdanah hian mimal tinin mawh kan phur tih theihnghilh lo ang u. Mite’n thil tha aia sual leh thil tha lo an ti nawn fo duh hi mak ka ti thin a, a chhan chu, sualna hian a tawpah chuan a titute a tichhe vek thin si a.
Kan sualna leh thilsual kan tih duhna thinlungte hi Pathian chauhin hmangaihna leh ngilneihnain min thlaksak thei a. Chuvang chuan Pathian hnenah kan rinna kan nghah a, A hnung kan zui a tul a ni.
Phuba lak pumpelh rawh
Thil kal tawhin tibuai che suh se. Miin dân bawhchhiaa min tihnat chuan chumi chunga rorelna dik a thlen theihna tura dan hman chu kan tan, khawtlâng leh ram tan pawh a tha a. Amaherawhchu, min tihnat avang ringawta tihnat vea, phuba lak kan duh hi chu a dang daih a ni. Thil kal tawh hi kan thlak thei lo va, kan tihsual zawng zawngah Pathian hnena ngaihdam dil bak tihtheih kan nei lo.
Ka nun pumpuiah hian ka theih phawt chuan midangte nun atanga inzir hi ka tum hram hram thin a, min sawiseltute nun ngei atang pawhin zir tur ka zawng thin. Mihringte hi sual mai kan ni lo va, Pathian nen a hrangin kan cheng a, he leia kan awm chhan hi kan hre lo fo va, kan damchhûnga kan tih ve tur pawh hi kan hai fo a ni. Bible chuan kan nuna kan hriat loh zawng zawng hi a chhânna min pe vek a, mihring nun atan hian kawng kawhhmuhtu a ni. Map tel loin khawiah mah i kal thei lo a ni lo’m ni?
Vanduaithlak takin Bible-a Pathian thute tel lo hian mi tam takin nun kan hmang thin a ni a! Tun atang hian he kan hringnun zinkawngah hian Pathian kaihhruaina leh kawngdik min kawhhmuhna kan mamawh a ni tih i hre thar theuh ang u.
Ngaihdam zir rawh
Sual huat hi ka nun pumpuiah ka zir thin a, chutih rualin misualte hmangaih pawh ka zir tel thin. Hei hi Pathianin mihringte min hmuhdan a ni tih ka ngaihtuah thin a, chuta tang chuan ka inzir ve thin a ni.
Kan sual apiang hian Pathian hmai kan bensak thlawrh zel angah ka chan thin a, kan nun hman dan turah Amah aiin keini hian kan hre zawk tih kan hrilh thin ang vel a ni. Pathian chuan sual hi a haw em em a, amaherawhchu keimahni hi min hmangaih a, sual hi kan tana a pawizia leh min tihchhiatzia hi a hrechiang em em a ni.
He thu hi engtinnge ka lo hriat le? Ka hriat dan chu, kan sual hremna tur kan pumpelh theih na’n a fapa neihchhun chu kross-a thihtir phal a ni. Isua Krista, sualna nei miah lo chu misualte thian tia hriat a ni a, misualte zawng tur leh chhandam turin a kalchhuak a, chuvang chuan midang tan pawh hriat a har lo.
Courtesy: Thlifim magazine, March issue
