mi(sual).com

    A thupui an han chhiar ang a, a ziaktu hming an han en leh ang a, min hre chiangtute chu an nuih a za hle ta ve ang. Mahse, engemaw chang hi chuan ka zak ve ngawih ngawih thin a, duh leh min lo nuih sela, duh leh min lo rel rawh se. Ka kut hi a za tlat a, ka tawn loh leh ka nihna ni lem lo thil ka ziak ang a, ‘ta sela, ta ila’ tiin bul ka tan ang a, hetiang bawk hian a hmawr ka bawk leh ang.

    Officer lian, motor dawng pha chin ngat ni ve ta ila, ka motor dawn chu ka fate’n nuam tawl nan leh theuleu mai mai nan te hmang ta fo mai sela, kei chu ka zak ngawt ang. Chu mai bakah, ka motor chu ka fate sikul kal, a hranpa ngata hruai nan leh lam leh nan te hmang thin ta ila, ka nupui dawr nghak a hranpa ngata va hruai te chu ka driver chuan ngaiah neih tawh sela, hrilh ngai miah lovin tlai tin lo va lam zat zat thin sela, office kal nan leh thil pawimawha hman atana sorkar-in min pek ka motor chu tawng thei ve sela chuan a ang buan buan thin ngeiin ka ring a. Chu ber aia ka la zah zawkna tur chu, ka pawisa lak luh leh ka hlawh nena inphu lo tawpin ka In sak lai chu thang duang mai sela, kawngpuia kalte chuan ka In chu en hrek hrek se, sawi chhuak duh si lovin ka pawisa lak luh zat awm chu chhut neuh neuh bawk sela. Kohhran lama ka chanvo te han ngaihtuah tel bawk sela, han ner nawng nawng mai se, zah fakah lu bung thei hialin ka ring.

    Kohhran upa te hi han ni ve ta thut mai ila, tun ang reng hi ka nih si chuan ka mangang thin ngawt ang. Thih thlamuanna nei hawt si lo hian Upa hi ka ni ve khanglang si ang a, chhungril kha ru fu chung hian thu thlum tak tak hi chhak chhuah fo mai a ngai ang a, thenawmte nen lah tukzan tha nei thei mang bawk si lo ila, ramri sawn ruk ka chin lah sim duh chuang lo ila, kei chu ka zak ngawt ang. Piangthar hawt si lo hian thawhlawm ka thawh hnem theih vang ringawt te hian Kohhranho hian dinhmun sang takah min dintir ve ang tih te hi a nia ka hlauh ni. Mi hriata Pathian thu tha tak tak kan sawi lai te hian naktuka ka ‘bill’ siam pun theih dan tur te kha ngaihtuah rauh rauh mai ila, ka ngaihtuahna min lo hriatpui vektu leh a chanchin ka sawi mek, Pathian chu ka zah ngawt ang.

    Ka tlin vang reng pawh ni lem lovin, chhungte buai peih leh thil tihtheih vang ringawtin khawi office-ah emaw te hian lo thawk ve ta ila, kei ber emaw intiin, min rawn dawrtute lo biak that duh mang loh te chu changkanna emaw ti tlat ila, min biaka a rul tawk baka chhan duh loh te chuan ropui ta riauin inhre tlat bawk ila, min biak laklawh laia ngaihsak awm lo deuha ka thawhpui dangte han biaksan daih a, min dawrtute thusawi pawh lo ngaihthlaksak duh mang loh te khan sang hliah hliahin inhre tlat ila, min dawrtu lah khan min ngaisang viau emaw tiin han inla mi lian vel ila, a nuam ngawt ang. Mahse, min dawrtu khan min ngaisang reng reng lo tih leh min ngei ngawih ngawih tih han hre chhuak thut mai ila aw…, hnar chu hnar chu, Pa Chhuana te saum bur tia zet a nih ka ring.

    Khawpui mi lian fa te hi lo ni ve ta thut mai ila, bike-in nula tawih deuh deuh kha han phur ila, leu zek zek mai ila, a nuam ngawt ang. Thingtlang nula leh tlangval, mahni inchawm chawpa harsa taka lehkha zirte hi han hmusit vel ila, ka pa eiruk vanga chutiang ve mai bawk chu ka ni tih hriain min lo ngaisang bik der si lo sela, a zahthlak duh haih haih ngawt ang. Anni’n thahnemngai taka thawk chunga lehkha zirin, tha tak takin pass thin sela, kei, pate eiruk saa lo inchhek arbawm ve ringawt chu fail deuh reng mai ila, nawmchen ringawt chu emaw ka dam chhan tiin han leu vel ila, ropui leh liana inngai ve ringawt, vai thirchhezawng pawh tluk si lo ka ni tih ka hriat chhuah ni chuan ka va zak dawn tak em!

    Ka hming tawpah hian ‘a’ awm lovin ‘i’ lo awm ta zawk sela, eng tin tak khawsa ang i maw. Dam chhung rei lo te hi ka chen nasa ngawt ang chu. College te han kal ve ila, kekawr tlawn, ka hak tawk aia te hret kha han ha ila, ‘make-up’ chauh leng, bag te tak te kha han ak ngei bawk ila, han kal heih heih mai ila, a nuam duh reuh ngawt ang. Ka hmui chu Chhura hlauh tham fe tura senin han hnawih ila, ka kerek-ah ngun bun bawk ila! Vawk In kawmthlang Feren an ang maiin ka mit chu dum dur ham mai bawk sela, mawi min titu nge a ruka min nuihtu tam ang le!!! E tak a, ka beng tawn tawnah chuan bengbeh pathum aia tlem lo a uai ngei ngei bawk tur a ni. Pathianin a duh ang taka min siam sak sa ka mithmul chu pawt kawlh ila, a aia fiahin han ziak dum kual leh raih ila, tlangval lo ding khawm te hi han kal pel zan zan mai ila, ‘a va chhe lo e’ min lo ti se, han en tha duh lo vel ila, a nuam lehpek dawn lutuk. Mahse, ka kal pelh hnu chuan ka mizia tur awm ang an chhut ru rauh rauh a, tuman min ngaisang lo tih han hre chhuak leh ta thut mai ila, ngaihzawng atan chuan min duh a, nupui atan min duh lo tih te han hre chhuak leh ta zel bawk ila, kei chu ka zak chem chem ngawt ang.

    Chu ai pawha ka la zah zawkna tur a la awm cheu; tlangval tantirh, intihthengthawng ve lai han ni se. Nalh deuha incheiin khawlai leng reng mai ila, ram leh hnam humhalh tih te kha hre thawi ve deuh si, hrethiam tak tak mang si lovin vai chhang zuar te hi lo vel ve leh ringawt zel ila. Ka thalai puiten thi leh thau pawlhin ram leh hnam tan an bei tih hre miah lovin damdawi ngawl te lo vei ve ringawt ila. In chhung khur tlabal em em chunga inchei zuara len reng mai te hi a zahthlak tih pawh hre miah lovin lo la intithei zawk zawmah ila, a zahthlak duh chem chem ngawt ang.

    Rui deuh chhaka nula rim te hi ‘pa’-na emaw ti tlat reng ila, eng mah thawk peih si lova pawisa neih viau reng te hi changkannaah ngai nghet hmiah ila, fashion chhuak thar nei hmasa thei nih te chu ropuina chi khatah dah nghet hmiah bawk ila. Keimah vangin ka nu leh pate an rum mek tih hre reng chungin thawveng deuhin han leng ziai ziai mai ila, mahni kan inngaihsan ang he huin tuman min lo ngaisang ve reng reng lo va, min lo nuih ru tet tet zawk thin tih han hre chhuak thut mai ila chuan, hnar a lian duh lawl lawl ngawt ang chu.

    Minister emaw, MLA emaw te hi lo ni ve ta thut ila, ka ropui vet vet viau maithei a ni. Bial fang turin ka’n thawk chhuak ang a, zai thiam ka’n hruai ngei bawk dawn a ni. Thingtlang mi, rethei te te, beiseina sang tak nena min lo thlang tlingtute hmaah khan a awihawm thei ang ber turin dawt ka’n sawi leh zut zut ang a. An chan ai te chu ka lo eiruksak tawh tih hre miah lovin ngaisang deuhin min han thlir doh doh ang a, ka dawt sawiah chuan lungawi em emin kut an han beng ang a, chhungrila inthiam lo ru veng veng chungin an bial ka hmangaihzia chu ka’n fah leh vel ang a, an retheih luatah awih lo thei dinhmunah ding tawh dawn hek lo. An pum puar vena ai chu ka lo eiruksak daih tawh tih hre ru rauh rauh chungin tawngka na na na kha chuan an tanghma ka’n hai leh vel ang a.

    Mahse, chung lam atanga min lo thlirtu leh Amah anga min siamtu chu a lungawi reng reng lo tih ka hriat chhuah ni leh, ka bum mêkte chuan ka thlarau hi anchhia an la rawn lawh dawn a ni tih ka hriat chhuah darkarah chuan ka rilru hi a hrehawmin ka va han zak dawn tak em! He ramah hian ka lu pawh ka phum ngam dawn em ni? Tuna dam laiate hi keiin ka lo zah lo a nih pawhin chhuan lo la kal zelah ka tu leh fate chu an la rawn zak ngawih ngawih tho ang.

    Nasa fea ka campaign hnu-ah YMA hruaitu atana thlan tlin te lo ni ve ta ila; nuam ka ti hauh lo vang. Ram leh hnam hmangaih ai maha mahni tanghma hai tum ka ang dawn tlat. YMA chu tanpui ngaite tanpuitu, mi tawrh ai tuara mi hrehawm ai pawh pawisa lo a ni si a, ka campaign rilru nen kha chuan a inpersan dawn tlat. Thahnemngai takin ka lo campaign tih mipui vantlangin an hriat chhuah ni phei chuan ka zak lutuk ang a, kawl ram lamah ka pem vang vang duh hialin ka ring.

May be related

• Nang erawh chu engkimah Fimkhur la…..
• Chhanlet loh hmangaihna
• Vawih
• BLACK CAT PHILOSOPHY - B.CH-a
• Ka D

Recent entries

• Ramsangi in a TV commercial
• Indian!
• Lawngtlai fire
• Mapuii English Album chah theih
• Isaac Hmar killer confesses
• Youth Icon 2007 update
• Aryan invasion
• Transformers ‘Illah’
• Rita Malsawmi - Ka vei reng che(live)
• Sualna Khurpui Lamah Chuan Kal Zelin…

This entry was posted on Thursday, May 3rd, 2007 at 2:27 am and is filed under more than words. You can follow any responses to this entry through the RSS 2.0 feed. You can leave a response, or trackback from your own site.