B.CH-a hi class-I vel atang B.Com thleng chu lehkha ka zir rual pui ve a, rin ai in a lo tawng thei ve nek a. Tunah hian ZOLIFE Mag. ah hian eng eng emaw chu a rawn ziak thin a, veng khat a cheng dun ni mah ila kan inhmu khat hle. Vengchhung Chanchinbu(MARYMA) ah thu a ziak zauh zauh bawk. Han tarlang leh tawp teh ang, BENZAMIN-a hian SEI a lo ti leh viau ang chu!
Aizawl a veng lian ber pawl, YMA-ah pawh Branch lian berte zinga mi, KTP lamah chuti bawk. Kohhran pawl dangte pawh hi Mizorama a te pawl anni miah lo. Veng pakhatah rau rau chuan thalai tam berna venga kan tel ve hi intihthei viauin lo ‘hawi-champ’ deuh pawh ni ila, kan mawh lova, chutihrualin, ‘thing-champ’ leh ‘chhe-hot’ te pawh kan lo awm ve palh theih tlat mai.
Thalai tam berna veng na na na chu, thalai tha theh thawh zingah thalai tha lem lo an lo awm ve a nih pawhin thil mak a ni lovang. Dik tak chuan he veng ropui taka thalai thenkhatte hi chu kan nun han en reng reng pawha ‘chatuan nun’ pai lo tih hriat ngawih ngawih, engthawl piah lama thawveng, kan thlarau chan a thianghlim lo tih hriat reng rengte pawh hi hmuh tur chu kan awm ve chiang alawm.
Kan thalai thenkhatte khawsa zia han en hian nuam zawng zawng nei zo a, nuam lo hi nuam emaw ti tlat tawh, nalh lo pawh nalh ti tlat, thing hi changkang ta riau a ngai, balh hi p^-na emaw ti ta tlatte hi kan pung ta riau em aw? ka ti thin. Kan incheina lam han en ila, “A nei nung nung a fêng chhing chhing..” ti niawm takin mihausa fa emaw tih mai tur hian fashion chhuak thar ber ber kan hlah lova, chuti chungin kan chhungkua lah BPL member kan ni leh ang lawi a. Chhungkua thlatin sum lakluh zawng zawng belhkhawm a Rs 10000/- pawh la lut lo ten ‘Solomon’s Cave-ah ka bazar e’ kan ti ve khanglang a, pawn lamah nalh takin a nei ber ang ziazangin kan inpenparh a, kan inchhung erawh a kawrawng in, a tawp ru zek. Thawhchhuah nei hauh silo hian mobile handset lah a changkang kang kan la kawk kual ang zut zut a, “Camera leh MP3 keng tel lo chu” tihte chu kan la sawi zak chuang hauh lo nia! Thenkhatte hi chu mobile phone ai mah hian kan mobile zawk em ^w? tih tura khawlaia tam hi kan ni lehnghal. Rawlthar thenkhat lahin an kekawrte thing ve fe fe, TARA lang ngeiin an hafual a, JOCKEY te tal chu tilang sela, a ziaawm deuh mahna! Nitina vawk chaw chhum ngaite kan ‘chheihpar e’ tiin zan khaw tairekah beng thleng thlengin bawp kan khai ang lawp lawp a. Sarlamkai step khat pawh thiam lo hian kan ‘grind e’ kan ti thul, mahni tawka “zingah sava ten” tih hla pawh sa chhuak thei lo hian “My hump” te chu a phuahtu kan ni ta emaw tih mai tur hian kan chham ang zeih zeih a. Exam naa letter hmu pha si lo hian love letter erawh kan dawng thei phian.
Nula leh tlangval awmna chhungkuaa nu leh pa tui chawi, zo leh zo lova gas bur pu tawk tawk hmuh tur pawh an awm nia! ‘By-heart system’ in matric kan pass ve a, kan inti vai thingtang nghal ringawt a, college-ah nise, subject awl thei ang ber kan la a, kut hnathawh kan zak nghal ngawt anih pek chu! Ruih duh vangin grape juice kan sawi mawi a, rui theuh theuh grape tui leh buh tui ruih hi thil thuhmun a ni kan ti phal tlat lo. Thlarau lama harhtharna chang mang si lo hian mipat hmeichhiatna lamah kan harh thar a, harh tha that that tak kan ni. Kan tisa chakna hi a chak em a, kan hneh ngang lo hlawm a nih awm hi maw!
E khai, Ramhlun thalaite chu kan nikhua loh hmel ta riau mai. Ni, khiti chinah khian tawp ta ila chuan kan nikhua loh hmel ngawt ang. ‘Black Cat Philosophy’ erawh hman ngawt chi ani hauh lo. Ramhlun venga zawhte dum pakhat i hmuh mai vanga Ramhlun zawhte zawng zawng an dum vek tura i ngai a nih chuan i ngaisual let der ang. Zawhte chi hrang hrang zingah a dum alo awm ve ani mai, a dum lo an la tam zawk daih. Hetiang deuh chiah hian thalai, mahni intodelh tak tak, taima leh nun-mawi, entawn tlak hi Ramhlun thalai tam zawkte kan ni.
Ramhlun thalaite hi kan thing bik tur tihna lam a ni lova, kan khawsakna in a zawh tawk leh kan phak tawkah chuan a nalh ber ber leh a zei ber ber kan ni ngei tur a ni. A hausa leh awmthei deuhte tih dan thik a, neih thinglung khawng a, puk chawpa intih nalh a, mahni nihna lo ang taka lan kan tumna hi ‘choak arawn chang tawn’ ang chauh kan ni. ‘I harhthar teh ang u khai’ kan tihna ani zawk e.
