Heti zat state pawna professional player kan nei ta hi a lawmawm thlawt.
SSA Football Exhibition Match hmuhnawm tak min entir avangin SSA, MFA leh Mizoram pawn lam state hrang hranga kan Mizo player-te chungah ka lawm hle mai.
Opening match SSA naupang ten an khel hmasa a. SSA Academy, District hrang hrang ami te inelna a Champion (Primary Level) Aizawl SSA Aizawl District leh Rest of the Academy ten an khel a. Beiseina sang tak heng naupangte-ah hian ka nei a ni. An naupang ang aiin ball an zo daih. An goalkeeper ball han petchhuak phei chu YMA Tournament-a GK tam tak aiin a thleng thui daih, centre field line a pel tlat!
Dar 2:00-a tan tura min tiam chu dar 3:00 velah an tan thei tawk a, rorelna fumfe a awm lo tih a lang chiang hle. Khuallian, zaithiam zai tih vel a awm lova, SSA lam hruaitu pahnih khat in thu tawi an sawi a, MFA President-in a sawi bawk a, a zia tak a awm.
Inkhel hmuhnawm tak a ni lem lova, a dang angin boruak sang a awm lova, mipui pawh kan ngawi. Che tha deuh te kut bengin kan lo lawm chu thawm awm tam ber a ni deuh mai. FC Kulikawn hi MFA Cup Lungleia khelh zawh taka Champion an ni a, chak turah kan dah nghal deuh a, players dang hawh phalsakna pek an ni bawk nen. Mahse an han khel a le rin ang a ni hauh lo mai. State pawn player-te an tlanchak a, an taima si, Kulikawn lam a thleng phei zing zawk nghal der mai. Minute 10 pelh hnu deuhah vei lam field ro tha lai atanga Mala (?) cross ball chu Mama’n defender karah zuang chhungin an tauh pial zauh a, Kulikawn keeper RDa’n a man hman lo. A goal nghal der! FC Kulikawn hmatawng lamin tan an han la a, an thleng phei ve nghal mai, mahse Mizoram XI keeper Ruatfela (?) che rang thlawt! mawi lutuk a pet lut tawh tura mipui tam zawkin an ngai a beng per hman, mipui kan ‘E’ dual mai lawm. An nawr letna bawk a Mizoram XI defender phuahchawp an tal buai, handball avangin penalty an hmu ta. Samson Ramengmawia ron pen chhuakin mawi lutukin an ba a rawn rul first half a tawp a ni deuh nghal.
Second half an tan, phai lam player chawla rawn hawte an chau tih a hriat rualin an taima a, Kulikawn player MFC cup khelzo chiah te nen an danglamna a awm tam lo. Buangpuia’n D-Line chhunga awlsam te a pet luh a tum, Kulikawn defender a petper, handball! Penalty pet turin Tuaitea (Belinda-i ka hmu tel, a tawiawm a niang) rawn pen chhuak, a goal chiang lutuk. FC Kulikawn lamin ‘kan local football hi a nep bik’ lo tih rilru pua an han nawr let ve tak tak mai chu, an thawhrimna rah chu penalty-ah hmang bawkin an seng lut leh. Samsona bawk rawn pen chhuakin a pet goal leh, Man-of-the Match-ah thlang dawn ila a awm lo hran lo ti ila, Mama, Malsawma, Zaidina te an lang ve tho bawk. Tlawm zawk nih duh lo ve ve chu DRAW in an thelh dai thei ta hram a ni.
Personal View leh a dang te
Inkhel hmuhnawm tak a ni lem lo, friendly a ni bawk a. Inkhelh tan hmain Captain 2-te arm band MFA Pre. in a hren tir a, FIFA siam, friendly match entirna a ni nghal. Mizo tan a lian deuh emaw ni Mama khan a pawt sek mai a, a hnuah phei kha chuan a ron hreng tawh lo. 2half-ah hian World Cup Ball ngei mai kha SSA thulkhung pet a ni bawk. Kulikawn player-te fitness a tha tawk lo, phai lam inkhel chau chawlh la a rawn haw te an tlan chak zawk maha ball an um peih zawk bawk, ball an keng rei ngam zawk a, an confi zok a niang. A hunah chuan an dawk zawk zawk mai a lawm, tunlai tawngkam takin ‘an phit’
Kulikawn player-ten Mizoram XI defence phuahchawp an paltlang thei lo kha chu a mak ve khawp mai (an goal thun kha penalty ve2). Left winger Robert (Churchill) leh Malsawma (Ocean FC) te defence-ah an ding a nia. Central Defence pangngai an awm lo Mizoram pawnah. Mizoram XI te lo dangchat tu Samsona a khel tha a, Tuaitea (Mohun Bagan) dang bettu Kulikawn defender kha a hming ka hre lo, Tuaitea hi a te lova a sa a tha bawk a vai ho duh chi tak a ni. Zaidinmawia (OIL) pawh a in la mid-fielder tawh khawp mai, ball control a tha a a ball sem vel pawh a hmuhnawm, Mama (Salgoacar) ball drop a dik khawp mai. Jerry-a (Dempo SC) a ke a na a, 2nd half-ah a rawn lut a, a ke a rang bawk a, ke na chung pawh khan a pit leh zawk thin. Rova (East Bengal) a khel tha vak lo nangin a tangkai dan a nep chuang lo.
Mizoram XI or Mizo All Star
S.Malsawmtluang, Salgoacar
Jerry Zirsanga, Dempo SC
Robert Lalthlamuana, Churchill Brothers
Vanlalrova, East Bengal
P.C.Lalawmpuia, Mohun Bagan
H.Lalmalsawma, United Sports
Zaidinmawia Hmar, OIL
Lalnunpuia Vasco FC
Vanlalmawia, Ocean FC
Malsawma, OCean FC
lalhmingsanga, Signal Corps
Aldrin Zonunsanga, Blood Mouth
Mala, United Sports
Zorammuana, MB Academy
Lalremruata, MB Academy
Jerry, MB Academy
David, MB Academy
Kimpuia, MB Academy
Beikhohai, IFA Academy
Patea, Services
Ramnunsnga, Services
Lalthlamuana, India Under-17
Coach-Vanlalngheta
Asst. Coach-lalnunsiama
Manager-Tetea
Asst. Man-Hmingsanga
Physio-Patea
FC Kulikawn hi chu an squad pangngai an ni deuh mai a, Lengpui Star Rohmingthanga leh Chhuantea an hawh a, Luangmual FC atangin Samsona leh Lalthlamuana Hmar an hawh bawk.
Squad Source: Aizawlpost
Similar Posts:
- MFA League 2008 tineptu: Kulikawn leh Dinthar
- Foot ball
- Independence Day Football a hmuhnawm
- CYMA Sports: Laldenga Memorial Football ka en ve
- Gunners Laipui vawi 3 a puak
June 22nd, 2007 at 1:27 pm
Pic ka dah ve kha mawle https://img443.imageshack.us/im.....007hq5.jpg