mi(sual).com

Zoram POLITIK magazine atanga lakchhuah
(A sei deuh mai thei…)

Zoram Politik: Tun kum MLA inthlannaah in party hi a mala ding tur ang thawm a tam hle mai a, party malin in ding dawn nge nia party dang nen in thawkho dawn?
Lalduhoma : Thawhhona hi kan party-in engmah a la ngaihtuah lo.

Zoram Politik: A ni telin inthlan hi kan hnaih zel chu a ni a, party mal hian in ding mai angem? I rin dan min hrilh thei em?
Lalduhoma: Politics-ah chuan vawiinni zel bak a sawi theih loh a, khawi party mah mal din ngam an awm lo tih hi a chiang a, party zawng zawng hian ZNP nen kan thawkho dawn tih hi an sawi reng a, an party a mi lungawi tawh lo leh rinna nghat tawh lo te ZNP-a an lo lut tur chelh beh nan ZNP nen kan thawkho dawn a lawm an ti vek a ni.

Party dang kan thawh pui tur leh tur lo chu kan hotute’n an la ngaihtuah ang. Kan dinhmun kan hriat theih nan a khat tawkin assessment hi kan la reng a, Party in khai chhawn danah chuan Political Affair Committee (PAC) a ni a, chuan Office Bearers (OB), Executive, National Council (tah hian National executive member NCM an tel a), a dawtah Assembly a ni. Tu party mahin Assembly-ah hi chuan inthlan hmachhawn dan tur an rel ngai lo va. Kan party pawhin in thlan dawn hnaihah National Council meetingah in hawng takin kan thlirho anga, assessment a khat tawka kan lak ziah avangin kan dinhmun hi kan chhiang em em a, kan hotute’n a mala kan tling zo dawn an tih chuan a malin kan ding mai ang a, amala kan tling zo dawn lo a nih chuan thawhpui kan nei mai ang, kan hotute thu thu a ni. National Council-in a final vek hunah chuah kan puang ang. He council meetingah hian tu ngaihdan leh mit mei veng hauh lovin kan hotute ngaihdan an sawi dawn a ni.

A eng pawh chu nise, a mala kan tling zo dawn an nih chuan a tha a, kan tling zo dawn lo a nih chuan thawhpui kan nei dawn a ni mai a, kan thawhpui apiangte nen kan sawrkar ang a, min thawhpui lo lam chu opposition an ni mai. Tun din hmunah chuan Politics lung phum kan ni.

Zoram Politik: A nih leh party dang thawhpui dawn ula thawhpui chak bik i nei em?
Lalduhoma: Thawhho hrim hrim hi a tha ka ti lo va, loh theih loh thil zawk a ni. duhthusam kan tlin lo vanga thawkho mai hi kan ni zawk thin, coliation sawrkarah hian chuan stability a awm lo va, ram tan pawh thil tha ber chu a ni lo va, a thaber dawttu-a tlak thlak a ngaih vang mai zawk a ni. Kan ramah hian thawhhona tha tha tak kan la hmu lo va. Ka sawi tawh ang khan thawpui emaw thawpui chak bik engmah ala sawi theih loh.

Zoram Politik: Eng nge in party dinhmun, tuna i hmuh dan chhiah hi?
Lalduhoma: MLA ngah thei ber dinhmunah kan ding tan a, thla 4-5 lo awm tur hian engtin nge min hruai dawn tih hi a ni. Enchhin theih hian awm phawt teh ang u kan ti a ni, silent major neutral support theiha awm phawt hi kan tih tur a la ni.

Zoram Politik: Kal phung thar hi i sawi zing hle a, han sawi vak tur pawh in ni thei bik em ni, mi chuan ZNP-a awm te hi party hrang hranga awm tawhte an nia mi leh sa ngai vekin engtin nge kal phung thar an siam chuang ang an ti che u a.
Lalduhoma : Party danga tel tawh tih ngawt hi a dik tawk lo va, dan siamtuah (MLA) emaw Minister-ah awm tawh chu tlem te an ni a, anni pawh hi kal phung thar an duh avanga kan zinga lo tel an ni a, an tha tawh a ni mai. Minister emaw, MLA-ah emaw lo ni tawh hi chhiar tham kan nei mang lo, lo awm chhunte pawh hi inhmuchhuakin thil tha duh zingah an lo tel ta a ni.Kan party hian General Secretary Pariat kan nei tawh a, secretary leh joint secretary kan nei nuala ka han sawi ang kha chu an tlem khawp ang.

Zoram Politik: A nih leh Mipui hian an ring tawk chein i hria em?
Lalduhoma: A… tu hi nge Chief Minister-ah i duh ber tih opinion poll vawi tam lak a ni tawha pakhatna ka ni zel si a, mipui hian min ring tawk a ni ang tih hi chu a awm khawp chuan ka hre . Tin mipui hian ka lakah hian an phut sang bik emaw ni aw te chu ka ti ve fo thin a, entirnan MLA te “dawt bill” tih mai kha mipui chuan MLA dang lak kha mak an ti vakin ka hre lova ka la ve kher kha an sawi duh bikin ka lakah an thikthu a chhe bik emaw ni aw te chu ka ti ve. Hei kan pe let mai ni lovin, ka la ta lo ngar ngar a, midang chuan an la la zela nuai 7 vel bawr hi chu ka chan a ni, mipuiin ka lakah an beiseina a sang bik a nih chuan an beisei ang ngeia awm pawh hi ka tih tur a ni. MLA dangte nen hian patla khatah mipui hi min khai lo deuh chuan ka hre ve mai mai thin.

Ram leh hnam avang hian ka nihna leh thil neih theih hi vawi thum ngawt ka hlip tawh a, Zoram mipui pawh hian min hriatpui avang hian ka lakah an beiseina a sang emaw ni aw te ka ti thin. Remna leh muanna duh vangin lohtheih lohin MP atangin chawlhtir ka ni a, Congress President atangin ka ban phah bawk a, tin Mizorama ka lo chhuah tir khan Delhi lam hotute’n min enkawl tha tura Mizoram lam an ngen avang khan, tuna Assam Rifle commandant bangalow bulah ram min pe a, mahse sawrkar ram a ni tih ka hriat avangin ka pe let leh a ni. Tuna kan awmna hi kan awm tirh chuan mi zawng zawng kawmthlang a ni a, a ram pawh hi ka lei khawm a ni.

Zoram Politik: Tunali thalai pawl lam hi eng nge i ngaih dan?
Lalduhoma: Thil tha duh an lo chhuak a, party zawng zawng mai misual leh eiru duha min ngai mai hi a mak ka ti, mithalo lo sawrkar tawh leh la sawrkar lote misuala min chhuah vek mai hi chu mak a ti a ni.

Zoram Politik: Tun sawrkar hmalakna abikin mautam kawngah hian eng nge i ngaihdan?
Lalduhoma: Mautam chungchanga Mizoram sawrkar hmalakna hi a tha ka ti lo hle a ni. Kan mau a tam dawna a tawih dawn tawh tih pawh hriat sa vek a ni a, a tam hmain hralh chhuah teuh tur a ni mautam hmain bamboo link road laih zawh vek tur a nih laiin, mautam kumah bamboo link road an lai chauh a, vision hi a awm lo a ni ber, Sazu-in kan thlaite a seh dawn tih pawh hriat sa vek a ni a, crops insurance (thlai luman) policy hi lo neih lawk vek tur a ni, tunah sazuin a seh chhiat hnuah an sawi ri ve chauh a, vawi tam tak ka au chhuah pui tawh a ni. A seh hrep hnuah tuin nge insurance pe duh tawh ang. Tin mautam hma zawngin BAFFACOS a awm a, mau an tama kan harsa tak veleh BAFFACOS a bo daih bawk. Kumin hi BAFFACOS kan mamawh ber kum a ni.BAFFACOS an kalpui dan hian tam a tinzawn lo reng reng a, a tum ber tur chu buhfai neih leh a leina mipui neihtir a nih laiin, Sangha dil an siam vak vak a, vai industry tan vaibelchhia chuang an pe bawk a, tam venna tur ni na na naa infrastructure lamah an kal pui daih a ni, hei hi thil diklo hulhual a ni.

National Rural Employment Guarantee Scheme (NREGS) hi khaw tamtakah chuan tam tanpuina turin an sawi leh ngawt a, he scheme hi tam tanpuina tur scheme a ni lova, kan tam emaw kan tam lo emaw India rampum puia scheme kal lai a ni. MNF sawi chhuahahte hmun thenkhatah phei chuan an sawi ngawt a, anni sawi chhuah a ni hauh lo a, mipui bum tum fo hi thil tha a ni ka ti lo.

Zoram Politik : MNF sawrkar chuan budgetah thlaithar leina i sawi fo thin a D-A-H theih loh an tih chu an dah ta te niin kan lo hria a, hemi chung changah hian eng nge i ngaihdan?
Lalduhoma : A dah theih ngei a, an dah emaw kan ti a tlai hle mahse, a lawm awm tho e kan tih laiin Pu H.Rammawi Agriculture Minister kha session lai khan kan room-ah a lo leng lut a, ka lo zawt chiang chu thlai thar leina tur a ni lo, farmers assistance tan te, link road laihna a tan tui laknan te pawh hman theih vek a ni a ti leh daih si a, hriatthiam a harsa hle. Market Intervention Scheme MIS a dah a ni a, thlai thar lei na tur tih tluk a ni thei awm e, mahse hetianga min hrilh leh tak siah chuan vaibelchhia 20 hi eng tak ber atan an hmang dawn nge tih hriat a ni leh ta lo a ni.

Zoram Politik: Sawi duh dang hrim hrim i nei em le?
Lalduhoma: Sawi tur chu a tam mai a, mahse hei chauh hi sawi leh ta ila Budget-ah hian kan thil tih tur provision a awm ngei a ngai a, tunah pawh hian Sericulture lam buaina lian tak chu Cocoon leina hi a ni, pangang vulh tutete’n Cocoon an hralh a, budget-ah provision a awm si lova pawisa an dap khawm chawp a, pangang vulhtute pek tur an neih mai thin loh avangin thla 3-4 te an ba leh si a thingtlangpa chu a harsat phah em em a ni. Kan kuthnathawktute thil kan tihtir dawn chuan Budget-ah hian provision kan dah sak ngei ngei tur a ni. Contract farming te pawh an han pe chhuak ve a kuthnathawktute risk hi a la sang lutuk a, he ti mai mai hian kuthnathawktute awm hi keini chuan kan phal lo a ni. Entirnan sawhthing a ni emaw, aieng a ni emaw transport subsidy te pek an nih chuan zoram khawi laiah pawh uniform rate in a lei theih dawn a ni transport subsidy crop insurance hi kan kuthnathawktute tan ngaih pawimawh hmasak hi tih mak mawh a ni.
Tin Mizoramah BPL chhungkua kan pun zel nachhan hi kan ngaihtuah a ngai hle a ni. Kan leilung thatloh vang emaw kan thahchhiat vangah a puh ngawt theih loh. Kan ram hi a thaa mipui pawh kan thatchhe lo. Tun kan dinhmun angah hi chuan USA-a awm emaw, German-a awmte pawh lo awmin kuthnathawk ve se an rethei tual tual ang, sawrkarin support price a pe lo va, market hre lovin thil min chin tir bawk, Elaichi atangin tung, aieng chingtute hi mirethei kan la ni zel a, a chhan bulpui ber chu sawrkar hi a ni tlat a ni, chhuanlam hi sawrkar hian a siam mai mai tur a ni lo va, a ti mai zawk tur a ni.

May be related

• Sing chuang in ZNP zawm?
• Kalphung thar vrs Sawrkar Thar
• T Sailo working on alliance without Cong and MNF
• Sports lovers not aware of govt’s draft sports policy
• Ram hruaitu Poll update!

Recent entries

• Pa…!
• CBI leh Babutea
• Mizoram Kristian history research tur
• Pathian hi mipa nge hmeichhia?
• Good-O-Meter test
• Opening in Banks
• Ethel ft Manui - Medley
• Tih tur nei vak lo ho..!
• MNF decision on trust vote by next week
• Creed covers NGTV

This entry was posted on Thursday, July 3rd, 2008 at 4:35 pm and is filed under more than words. You can follow any responses to this entry through the RSS 2.0 feed. You can leave a response, or trackback from your own site.