Tu Mawhphurhna nge ?
July 24th, 2007 7:22 am | more than words | Pawite | 95 Views|
|
Kar kalta maia Dholai thil thleng khan ka rilru a luahin, suangtuahna khawvelah min hruai lut nasa hle mai a. Ngaihtuah ngut ngut avangin tawng khat pawhin mahni dung kan tisei thei lo ang chiahin, ka ngaihtuah chiam avang maiin tun maiah chuan siamthatna a awm thei si lo. Engtia tih chi nge ni ang? Pawikhawihtute avangin pawi sawi lo mipui mimirin an tuar ve zel si, engtianga hmalak tur nge ni ang? Silchar vaiho nena intihbuai apianga Mizoram-ah thil a to zel mai hi tu mawhphurhna nge ni ang? Buaina siamtute nge, chakkhai mamawh kharchhawngtute nge, Mizoram atanga rawn la luttute? Ni e, a mawhphurtu chu an awm ngei mai… Mahse, heti zawng hian kei chuan ka ngaihtuah a…
Mizoram hi a chhengchhia tiin mi tam takin an sawi thin a. Ni e, kan thenawm state te leh ram dangte nena khaikhin ralah chuan a chhengchhiatna lai chu a awm ngei mai. Mahse, chuti chung chuan Pathian-in kan chenna leh inbenbelna tura min pek; Kanan ram anga khawizu leh hnute tui luanna ram ang ni lo mah se, a mi chengte’n tha taka kan enkawl chuan ram tha leh nuam, thlai tinreng thar theihna hmun a ni tlat mai.
Mizoram-ah hian thlai hrang hrang a chin theih a. Dailuah a ni emaw, Alu a ni emaw, zikhlum a ni emaw a chin theih vek a ni. Apple hi Shimla leh J&K khawvawtah chauh a tha duhin mi thiam leh thil zir mite’n an chhut a. Heng state-ah pawh hian vur a tlak tlem tum chuan an thar tlem viau thin a. Mizoram chu chutiang a ni lo, Apple thlengin a tha duh a ni. Vai ram hmun thenkhat i kal chuan an nitin chawhmeh thlai ringawt han en chiang la, eng thlaihnah nge an neih tih han zir chiang la; Mizoram nen han khaikhin teh le… Thlai-ah kher kher chuan Vai rama awm ang Mizoram-ah awm lo a tam lo, a awm lo pawh lak luha chinin a tha duh em em vek. Kan ram a chhengchhia tia kan sawi lai mek hian a phena Pathian-in malsawmna kan haichhuah tura a dah hi kan chhut a pawimawh a ni.
Chu malsawmna kan tan Pathian-in a lo dahsa diam haichhuah nachang kan hriat hunah chuan Silchar vai nena buaina tawh chang pawhin mipui mimirin an tuar tawh lo ang a, nghawng a nei tawh lo ang a; MZP leh MSU inla vung tak tak, engmah tak tak ngaihtuah thleng pha si lote an phak tawkah an chiap an chiap tawh lo ang a, buaina tawktu leh mi tlemte leh sawrkar chauh an buai ang a, a dang zawng chuan kan tihtur tiin nundan pangngaiin kan nung reng tho dawn a ni.
Gross Domestic Products (GDP) hi chi thuma then a ni a. Chung zingah chuan Agriculture hi a hmasa ber a ni. Mizoram-ah hian kan eizawnna bulpui ber chu agriculture a ni a. Tin, kan ram intodelh theihna hmanraw pawimawh ber chu Software solution lam ni loin, industry neuh neuh ni hek loin, power & electricity ni bawk chuang loin, Agriculture hi a ni. Hei bak a bulthut a awm chuang lo. Agriculture hi a bulthut a ni a; hemi a bulthut kan man fuh a, a nih dan tur ang taka kan kalpui chuan kum reilote chhungin kan ram a ding chhuak ang. Power & Electricity a pawimawh ber a, chumi atang lo chuan intodelhna tak tak a awm thei lo ti an awm a nih chuan a ziaktu hi min rawn be pawp dawn a nia. Chiang leh fiah zawkin kan inhrilh thei ang.
Aizawl chauh hi Mizoram a ni lo ang bawkin, ram siamthatna hna thawk tak tak tur chuan Sawrkarin amah maiin a thei lo a, a ram mipuite, a te ber atang lian ber thlengin kan pawimawh vek a, mawhphurtu bik kan awm lo. Kan theih tawk a inang lo theuh a, mahse, kan theih tawk theuh kan tih a, kan tih tur kan tih chuan kum reilote chhungin kan ding chhuak dawn a ni.
May be related
- Zofa te leh kan kristianna
- Mizo Thalai te tan
- A na asin…..
- Elevated Road kan siam ang maw?
- Zei Book - Part 2
