mi(sual).com

Benjamin L. Khiangte (Didina) hianNational Under-21 Football Championship, Goa-a tun hnaia neih zawh takah Mizoram coach niin runner-up a nihpui a, “Football hi a hria a ni mai lo, a hmangaih a ni” an ti thin. Goan club Faria Striker chuan coach atan an sawm a, season tharah he club hi a enkawl ang. Mizo zingah Mizoram pawna football coach hna thawk hmasa ber tur nia hriat a ni.Pa ropui Zikpuii Pa fapa a ni a, Zozam Weekly hnenah hetiang hian Football chungchanga a sawi a -

Mizo zinga Mizoram pawna football coach ni hmasa ber tur i ni a. Eng club nge i enkawl dawn?
Faria Striker Club, Goa a ni a, Goan first division team an ni. Nia, kan player te beisei an ni a, a hnuah kei coach atan min sawm ve leh a ni.

Football hi naupantet atanga tuia khel i ni em?
Naupan lai atangin ka tui tawp a, naupan lai atangin ka theih tawpin ka khel chho ve.

Khawi hmunah te nge i khelh?
Age category U-14 ah Australia-ah state player ka ni ve a, Australian Capital Territory hmingin ka khel thin. Chumi hnuah Nepal-ah first division-ah ka khel a, tum khat phei chu kan champion nghe nghe a. Kum 1976-ah khan Mizoram-ah ka lo haw a, Football a lo lar tan a, Aizawl XI-ah ka khel ve thin.

Chumi hnu chuan?
Aizawl Football Club-ah khan team captain hmasa ber ka ni a. Chumi hnuah manager/coach-ah ka tang chho leh a, tum engemawzat chu kan champion a ni.
Kum 1996-ah khan MFA- in State manager-ah min ruat a, Mizoram hi tum tam tak ka champion pui ve tawh a. Under – 19 ah final ka luhpui bawk. Mizoramin U-19 ah record tha ber kan neih a la niawm e. Coaching hna hi kum 2002-ah ka chawlhsan a, tunah Goa-ah khan U-21 ka hruai leh a ni.

U-21 ah khan final-ah rinkai zawk in nia, in vanduai ta hlauh zawk sia?

Media zawng zawng pawhin champion turin min ngai tawh a, khami pressure kha kan zo lo emawni chu aw ka ti. Game-ah kan hneh em em chungin Punjab-in 3-2 in min lehthal ta a ni. Mahse, Mizoramin Under-21 a kan thlensan ber a la ni.
Goa-ah Mizo player hruaithlak i tum em?
Mizo player hruaithlak ka tum a, mahse, eng engemaw inpawhkual velah kan tlai ta deuh hlek emawni le ka ti deuh. Thutlukna an siam mai thei lo a, kan nghak hman tawh bik lo a ni.

Football tuichilh tawp tia sawi i ni a …?
Football hi ka tui ringawt ni lovin Mizo te hian hnam dang aia talent kan nei tha bika ka ngaih vang a ni. Kan facility/resource te han en hian duhthu kan sam lo mai a ni. Under 16-ah phei hi chuan kan chungnung viau a ni. Mahse, infrastructure tha kan nei lo a, U-16 piahah hian kal ngaihna kan hre lo.
Sorkar ang leh nu leh pa ang pawhin kan la ngaihtuah thiam lo. Kan talent hi ‘wasted’ angin kan ngai a ni. India rama champion ni reng tur kan ni. Mahse, engmah ti hlei thei lovin kan awm a, kan theihna hi kan hre tak tak lo ni berin ka hria.

Eng ber hi nge football-a kan thanmawhbawk?
Mipui leh sorkar hi kan la motivate tawk lo a ni mai a. Football game hmangaihna hi neih a ngai a, Mizote hian kan nei em em a, mahse, kan pholang thiam lo a ni. I-league te hi kan ban phakah a awm reng a, a luh dan kan ngaihtuah thiam lo. I-league ah luh tum ila kan sitting room atang ngeia Mizo tlangval inkhel en te hi a chakawm asin. Chumi tihhlawhtlin a nih theihnan chuan kan hmanraw neih ang angte hi hmang ila.Mizo ni lo hnamdang tan, an hlawkna tura talent lo haitu nih reng mai hi ka lungawi zo lo. Mizote ngei hian India ramah team champion din ila, a bang, a dang chu state dangte pawh hian lo chang ve chauh sela. Mizoram hi football map-a dah thei tur hi chu kan inlakhawm thei ve tawh tur a ni. Resource a awm a, kan phuar khawm thiam lo. Club awmzia te hi kan la hre lo. Club tha tawk din tur hi chuan football hi kan hria a, kan hmangaih tawk. Mahse, India rama kan chamion lohna chhan hi a nihna takah chuan a mak zawk a ni.

I hmuh dan chuan football hi Mizote khelh chi a ni maw?
Kan khelh chi ni lo se tihian football hi ka buaipui reng hauh lo ang. Kan talent hi a tha lutuk. Kan khel a mawi a, Mizo chu kan talented a, sawi ang pawhin kan khel thei mai a ni. Goa-ah pawh khan ground ball kan khel lui tlat a, India ram player dangte theih loh hi Mizote tan chuan a awl a.
Talent kan inneih that hleih em alawm. Kan kar khat practice leh hnam dang ho thla nga practice a in-hen-sin ka hria a ni. Infrastructure nei tha, stadium ropui tak tak nei a, football atchilh em em Goa 3-1-a kan hneh chhan pawh kha eng dang vang a ni lo, Mizo talent a ni. Goa coach kha Goan club tha Salgoacar coach a ni a, mahse, kan hnehtlat. Coach ka ni a, ka tha zawk e tihna ni lovin ka ho te’n an zir a ni. Chulovah India ram football approach hi a dik lo hrim hrim a, power game leh football a nihna tur angin an khawih lo a ni. A tawpah chuan football hi chu speed leh power a ni tho tho.

Coach discipline khauh zet mai niin an sawi che a?
Football-in a demand vang zawk a ni. Keima mizia ai mahin football game-in a demand tlat a ni. Football te chu game ropui a ni a, team work nen tih tak tak a ngai. Army discipline ang mai a ni lo, mihring duhthlanna atanga tihchhuah a ngai a. Player te hi an rilru kan hmin phawt ang a, sipai anga ‘ti rawh’ tih avanga maia ti tur an ni lo. Duhthlanna a pawimawh a, mahni duhthlanna ngeia tih a ngai a ni. An duhthlanna a nih tawh avang leh chumi avanga result awm chu a ni zawk a ni.

Mizote tan kan football hmalam hun?
India ram highest level kan tum loh chuan football kan tihna chhan tur hi ka hre lo. I-league khelh hi kan tum ve tur a ni. Mizo mipui hian an ram club ngei champion an hmuh hi an phu a ni. Helaia khawi club eng eng emaw reserve team-a kan player te an khel leh pahnih khat inthun kual mai mai hi thil tak tak a tling lo. Anmahni tan chuan a tha a, kan lawmpui em em a, kan chhuang bawk. Ka sawi zawka chu Mizo ang chuan lawmna a la tling lo. Hei aia tam daih S.Malsawmtluanga ang 100 chuang chherchhuak thei tawh tur kan ni. Mizote hian luhchilh ila, dominate ang u. Chumi ti thei tur chuan talent kan nei a ni. Sorkar pawh tang se, a theih loh dan zawng ni lovin a theih dan zawng ngaihtuah ila. Student sing tel ramin kan support zo a, player 22 support zo lo state hi chu kan nih ka ring lo a ni. Number 1 nih hi a hlu a, hemi kan nih theih hunah chuan chu chu sumin a lei zo chuang lo ang. Mizo te kan induh ve theihna tur a ni. Kan nihna tur ang takah hian kan indah lo lutuk a ni. State pakhat hnam pakhat tih atan chuan thil tling a la ni lo.

Stadium chungchang te hi?
Mihring hi kan developed a pawimawh zawk, stadium te chu a pawimawh tho, sak tur pawh a ni. Mahse, mihring ngai pawimawh lo chunga kan ti a nih chuan stadium tha khan cup leh shield min pe dawn lo. Stadium tha tak pathum ai chuan stadium tha pakhat nei ila, stadium pahnih dang sakna atana sum hman tur kha inchhernan hmang ang u.Stadium tha em em nei Goa te pawh kan hneh thei alawm. Kan rilruah a ni hnehna kha a awm ni.
Mihring tlinga insiam a pawimawh ber a, Mizoram hian player tha lutuk thleng sang thei lutuk tur a vuiliam hnem lutuk tawh. Kha’ng player te kha an uihawm lutuk, talent thamral leh mai mai tur hi kan phal tawh tur a ni lo.India rama ropui thei tur, a ngaihna hriat loh vanga bo ta an tam lutuk tawh. A chhan chu hetah kan ram ngeiah hian development a awm loh vang a ni.

Sports hmasawnna lama sorkar hmalakna i ngaihdan?
Sport-ah hi chuan sorkar hian hei bak hi tihngaihna vak an hre tawh loin ka hria a, sport development tak tak hi chu mihring development a ni zawk. Mihring hi kan ngaihthah a, kan lar tur angin India ramah kan lar lo zawk a ni.Hman atang tawhin ngaih pawimawh loh tur kan ngai pawimawh a. A nihna tur ang khan thil a kal thin lo a ni.Thalkapthiam Lalremsanga hmuhchhuah a ni a, hlawhtling takin Olympic-ah thlengin a tel a. Sairawkherh perh thin Mizo naupang te an khuaah theuh an perh thiam leh thiam loh zawng ila India ram aiawh tur an tam khawp ang.

Also see https://fariastrikers.com/

Similar Posts:

• Mizoram-ah football a parvul mek e
• ARC Coach Koitrenga kawmna
• Mizo tlangval telna an champion leh ta!!!!!!
• Santosh Trophy 2009 Ah Mizoram Vannei Mai Thei
• Final round khel turin Mizo naupang

Recent Posts:

• 420
• The SAFEST rest you’ve ever had!
• US puts India on “Watch List”
• Vawthlep vanga thihna!
• Misual.com feature thar chungchanga Pu Bena kawmna

This entry was posted on Wednesday, June 10th, 2009 at 8:30 pm and is filed under Sports. You can follow any responses to this entry through the RSS 2.0 feed. You can leave a response, or trackback from your own site.