ZALEN Sunday chanchinbu in Aug.9th ah headline-ah a hmang
Synod Chiahpuam tia sawilar tak Synod Pension & Provident Fund pawisa dahpun a nih chungchang chuan Mizoram mipuite ti ti a siam hnem phah a, a him tawk em? tih chu zawhna lian tak a nih laiin insurance company a pawisa dah chungchangah a commission Reverend fate’n an ei thute pawh chanchinbu lamah tihlan a ni tawh bawk. Health Care Scheme pawisa chiahpuam nen khaikhin te pawh a hlawh ta hial mai.
Chutih laiin 2008-2009 Audit report in mi tam takah ngaihthat lohna a tuh a, opening balance a Rs Nuai 124 chuang lai a kim lo siam rem ngai te, siam rem a nih hnu pawha Nuai 27 chuanga a la kim lo cheu chuan Synod Pensioner pawl te thla a ti bar hle bawk a. Synod Pension & Provident accountant bang ta Cheng Nuai 39 chuang tibotu chu vawiin thlengin a chungthu rel lohvin a la awm bawk. Hemi chungchanga ZALEN in information document awm behchhena a thil hmuh te chu hetiang hi a ni -
Dan bawhchhiatna
Synod hnuaiah hian Pension and Provident Fund Board of Trustees (PPF) din a ni, Pension sum leh pai chu a enkawl a, engemaw chenah thuneihna pawh pek chu a ni ve. Tuna Board of Trustees ah hian Chairman chu Synod Executive Secretary Senior Rev. Lalhmangaiha a ni a, Treasurer Upa F.Lalsangliana niin Lalhunliana Ralte chu Secretary a ni. Synod Pension Dan 2002 a Synod in a pawm tak Bung IV, A(4) in a tarlan dan chuan Pawisa chu Central/ State Sorkar-in a pawm Scheduled Bank ah dah zel tur a ni a, Sorkar laipuiin Indian Trust Act 1882, Section 20-a clause (a) atanga (d) a sawrkar sum dahna him Employees Provident Fund Scheme 1952 in pawisa peipun dan hmang a ziak angin dah zel tur a ni. Central in provident fund dah punna (interest) rate a tihhniam vangin PPF Board chuan kum 2000 atang khan Pension dan chu bawhchhiain Schedule bank ni lo Unit Trust of India ah pawisa a dah pung tan ta a.
Kum 2006 atangin insurance company Mizoram-ah an a lo lut tan a, Birla Sunlife, ICICI, Bajaj Allianz ah te a dah chhunzawm ta zel a ni. Dan chuan sawrkar sum dahna him bakah Provident Fund Scheme a phut laiin insurance angin an dah ta tihna a nih chu. Hemi chungchangah hian PPF Board lam chuan ZALEN zawhna chhangin Board in a lo rel tawh ang a nih vanga dah an nih thu an sawi a ni. “Kan awm ve hma pawhin kum 2000 atang khan investment hi lo tih tawh thin a ni a. Tih dan phung chu kan zawm ve mai a, Board in kan rel zela kan invest zel a ni” tiin Synod Executive Secretary Rev Lalhmangaiha chuan ZALEN a hrilh a ni.
Document lak khawm theih china a lan dan chuan ICICI Agent chu Utpal Mazumdar, Lalremruata (s/o Rev. Lalhmangaiha), Birla Sunlife ah Vanlalruata (s/o Rev. Lalrinawma) LICI ah JC Dintluangate (s/o Rev. C Rosiama) an ni a. “Mipuiin kan lak nat lai ber nia lang chu Synod in investment a siam hi a ni pakhat a, kan sum tlingkhawm atanga Synod hotu fate’n commission an nei hi mipuiin kan thik a ni. Pawisa a dahpunna company agent te chu Reverend fate an lo ni chat chat zel hi a mak a ni” tiin Zozam, Jt. Editor Remruata Renthlei chuan a sawi. Pawisa a dah laklawh avangin Synod hian insurance company ah te hian pawisa a dah zel a la ngai a, chumiah pawh chuan agent te pawhin commission an nei leh zel ang.
Investment tihnate thlir hian SBI-ah a tam ber a anni chu bank panngai Synod in a dawr thin a ni a a awm viau a, a bak zawng zinga ICICI investment sang filawr ta bik hian mi tam tak ngaih a ti tha lo hle.
Pawisa dahtu hmingte leh dah zat
ICICI
Lalhunliana Ralte- Rs 120 Lakhs
Lalhmangaiha – Rs 180 Lakhs
Lalsangliana – Rs 400 Lakhs
Total- Rs 720 Lakhs
BAJAJ ALLIANZ
Lalrosanga Colney- Rs 40 Lakhs
F.Lalsangliana – Rs 20 Lakhs
Lalhunliana Ralte – Rs 30 Lakhs
Total- Rs 100 Lakhs
BIRLA SUNLIFE
Lalsangliana Rs 100 Lakhs
F.Lalsangliana Rs 30 Lakhs
Total Rs 130 Lakhs
Investment tihnate chu
SBI – Rs 9,00,00,000
IDBI- Rs 108,66,321,
UTI – Rs 2,20,57,750,
Birla- Rs 1,30,00,000
ICICI -Rs 5,60,00,000
Bajaj- Rs 1,00,00,00
LICI – Rs 1,00,00,00
Total: Rs 21,19,24,071
Ka hming an hmang lo
Birla Agent nia sawi Vanlalruata chuan engmah hlawkna a hmuh loh thu ZALEN a hrilh a. “Agent ka ni lova Agent Manager ka ni zawka ka hming ka hmang thei lova, ka hnuaia mi agent te hming ka hmang tur a ni” tiin a sawi a. “Synod in Birla a a dah dawn hian min rawn phone a a va lawmawm ve ka lo ti mai a. Vawikhat a dah chi single premium in kan ti a ni. PPF Treasurer, F.Lalsangliana u fa Zuimawii ka hnuaia agent ni bawk hmingin kan dah a, ani hian a commission chu a ei vek a ka kutah engmah a lut lo” tiin a sawi a ni.
LIC Agent JC Dintluanga chuan “ Kum 2007 ka pa pension hnu kha a ni a, phone in min rawn kova LIC ah Rs Nuai 100 (Rs Nuai 50 ve ve in) an dah thu min hrilh a, min duhsak avangin ka lawm hle a. Mahse ka agency chu a thih lai a nih vangin ka hming chuan a dah theih ta lova, agent dangin an chang ta zawk a ni” tiin ZALEN a hrilh a ni.
Reverend fate agent an lo ni remchang zel leh a fapa ngei pawh a hming a lan thu sawifiah tura ZALEN in a ngenna chhangin Rev Lalhmangaiha chuan “ Board in kan rel lai hian rilru tluangtlam taka ti kan ni a, mimal induhsakna kan rilruah a awm lova. Hetiang hian a hnuah thil a awm thei ang tih pawh kan ngaihtuah pha lo a ni. Kan hmingchhiatpui ta a nih hi ” a ti.
Him tak maw?
Investment ah hian risk a tel vek a, a changin a pung a sanga a changin an chan thin bawk. Synod in investment a siamnaah pawh chutiang tho chu a ni a. A sum dah zah leh a pung chu Unit Fund Value an ti a, thla kalta hmalam kha chuan IDBI, ICICI, Bajaj Allianz leh LIC ah te Synod hian sum a hloh zawka Birla, UTI leh SBI ah te a hlawkpui thung a ni. Tuna a pun dan dinhmun tak hi hriat a ni lova, a pun zel a beiseiawm viau rualin guarantee erawh eng company mahin an pe ngam lo.
PPF Audit tute chuan rawtna siamin Mutual Fund Investment chu hlawk an ti lova, lo tih lailawk tawh erawh sum hloh loh nan tihpuitlin law law tha an ti a ni. Mimal hminga invest tawh te chu Synod Pension and Provident Fund Board hminga thlak tha an ti a, tun hnuah chuan Bank tih loha investment tih dawn reng rengin Finance Committee remtihna lak hmasa turin an rawn bawk a ni.
Insurance tih hian vawi khat a pek tlak chi single premium leh regular vawi 3 pek ngai chi a ni tlangpui a, vawi thum pek ngai chi hi Bajaj, ICICI, etc ah pek tlak tur Pension Board hian a la nei a, tun dinhmunah hi chuan an la pe lo a ni. Pension Board hian sum a neih 90% chuang a invest a, 10% tling lo hret a la kawl a. Audit-a a lan danah chuan Rs 23,31,20,163 a neih atangin Rs 21,19,24,071 lai chu investment ah a dah a, chumi a nih chuan Rs 2,11,960,92 chauh a nei tihna a ni a, insurance company ah hian pek tur a la neih nual vangin a sum kawl lai Nuai 211 chuang awrh hian a daih ang em? tih chu zawhna a ni.
A vawi 3-na hi an dah lo a nih chuan thla khat grace period an nei anga, an la dah lo cheu a nih chuan pawisa chu a lapse anga che thei lovin a awm ang a, policy a zirin kum 4 atanga kum 6 inkar hnuah a lakchhuah theih anga mahse chutah chuan sum hloh a awm duai tawh ang. Premium vawi 3-na pek hi PPF hotute pawhin an sawifiah hleithei bik lova, an kal zel dan tur an sawi thei loh thu an sawi a ni.
Nuai 39 nge Nuai 27 kim lo?
2008-2009 Synod sum audit a nih hian 2004 atanga account chu hawn (re-open) leh account dik lo laite chu siam that niin kum 2004 atanga tihdikna chu thil tel a ni bawk. Audittu te hi Upa Laldinpuia leh Upa C Kapmawia te an ni.
Document a a lan dan chuan opening chu Rs 21,75,50,061 a ni a, siam rem nih lehin Rs 20,50,94,274 ah opening balance chu a tla ta dawrh a, Rs 1,24,55,787 laiin a kim lova chumi kim lo siamrem a nih dan chu thil tel a ni bawk. Mi tam tak ngaih tha lo mahse Synod hian Financial rules hran a neih avangin enge chin nge a pawm a a pawm loh hriat a ni lova, mahse fim khur loh vanga pawisa account buai chinfelna hnuhma niawm tak tak a awm thluah a ni. Entir nan, Bank a pawisa dan punna Rs 60,657 leh Rs 98,252 lai te chu reciept lama ziah luh miah loh cash book a lang leh si te an ni.
Audit-a a lan dan chuan Rs 21,19,24,071 chu investment ah dah a ni a, pawisa kawl lai, Rs 10,470 a awm a, Bank-ah 50,74,212 a awm a, Rs 1,33,77,528 chu hmuh let leh beisei (recoverable balance) ah dah a ni a, Rs 27,33,882 chu pawisa kim lohna anga tarlan a ni a, hemi zat hi accountant bang ta Muansanga kut atanga bo nia tarlan a ni a, hmuh let leh beisei a ni.
Muansanga hian a pawisa tihbo hi a pha lova pek let leh a tiam niin PPF Secretary chuan ZALEN a hrilh a. Dan anga man tir a nih loh chhan sawiin “ Jail a tan chuan tanah a tlak mai dawn a, pawisa hmuh let kan duh si a, kum khat khawngaihna hun kan siam a, cheng 10,000 chiah a rul a, kum khat dang a dil belh a a bak chu a rul tawh lo” tiin a sawi a. Engtin nge an tih zel dawn tih a hriat mai loh thu a sawi bawk. Hetih lai hian Muansanga kut atang hian Rs 39,80,099 a bo zawk niin Synod Pensioner ho chuan an sawi thung a, audit hnua Rs 27,33,882 a a tlahniam ta chu an hrethiam lo hle a ni.
Similar Posts:
- Synod pawhin a chiahpuam?
- Pension Tha Mi?
- Bajaj Allianz – Fortune Plus Policy
- Chiahpuam agent nuai 173 nen man a ni
- I pension hun tur dawn ve teh
August 13th, 2009 at 3:17 pm
Amanda(te)-i hi a va reh ve, Kohhran in a awm a mi???
[Report abuse]
August 13th, 2009 at 3:18 pm
nuam thn ee!!
[Report abuse]
August 13th, 2009 at 3:21 pm
BornSpektator hi Pre upa or an chhungte an tel ani lo maw Fiamthu bawk 100-na ka ni tra la la
[Report abuse]
August 13th, 2009 at 8:52 pm
Ngaihnawm triap triap e, tetea7 lamah ka trang rih.
Kohhran tawngpawng sawisel ni lo in awmze neia soiselna hi kan mamawh tolh2 don chauh e ka unau.., Martin Luther, John Calvin te kha awmze neia Kohhrtan soiseltu an ni a, khovelin a dahsang lutuk bon top. Kohhran anih avangin soisel loh ngot tur an ni bik lo eeee,, awmze neia soisel hi kohhran dim loh na poh a ni lo eee.
Politician vs. Pastor leh Upa maw? Mi hian min ngaisang roh u an tih avangin kan ngaisag ngai lo, an nundan avagin ka ngaisag thin, ka sawi ril raih2 fu lo mo, Xetxeta?
[Report abuse]
August 13th, 2009 at 9:02 pm
Thu Puan 3:14 “Tin, Laodikei khuaa kohhranho tirhkoh hnènah chuan heti hian ziak rawh:‘Amena, thuhretu rinawm leh dik taka, Pathian thil siam bula khàn hèng thu hi a sawi a ni; 3:15 I thiltihziate ka hria, i vawh hek loh va, i sàt hek loh hi; i vawh emaw i sat emaw ka duh a ni. 3:16 Chutichuan, sa si lo va, vàwt si lo va, i lum chang chang avàngin ka kâ ata ka chhàk chhuak dâwn a che. 3:17 Ka hausa a, sum ka ngah a, engmah ka tlachham lo ve, i tih avàng leh nang mi rethei, khawngaihthlàk, pachhia, mitdel, saruak chu i ni tih i inhriat loh avàngin; 3:18 i lo hausak theih nân rangkachak meia tihthianghlim te, puan i sin theih nân leh i saruak zahmawh chu a lan loh nân puan vâr te, i hmuh theih nân i mita hnawihah mit nà hlote ka hnèna mi lei tùrin ka ràwn a che. 3:19 Ka hmangaih apiangte chu ka zilhhauvin ka thunun trhìn; chutichuan trhahnem ngai la, sim rawh. 3:20 Ngai teh, kawngkhàr bula dingin ka kik hi; tupawhin ka àw hriaa kawng a hawn chuan a hnènah ka lùt ang a, a hnènah zànriah ka ei ang a, ani pawhin ka hnènah a ei bawk ang. 3:21 A hnehtu apiang ka laltrhutphahah ka hnènah ka trhuttîr ang, kei pawhin ka hneh a, ka Pâ hnènah a laltrhutphaha ka trhû ang khân. 3:22 Thlarauvin kohhranho pâwlte hnèna thu a sawi hi beng nei chuan hre rawh se,a ti e,’ tiin,” a ti a.
[Report abuse]
August 13th, 2009 at 9:48 pm
Pu chawnghilh.. tinge i comment ah hian ‘Trh’ i tih tlat zela?
‘Thr’ ni awm tak.. kan ‘T’ thlakna atan keipoh hian ‘Tri’ hi ka hmang mai zela.. i comment ka chhiar hian ‘Trh’ i ti ve ziah.. a chhan min lo hrilh teh.. a diklo ka ti miahlo a nia.. a dik nge diklo hre tur pawn thiamna ka nei hranlo..
[Report abuse]