Highway-a kan tlàn laiin County Police car thàwm nei hem hawm takin min hmakhalh ta that mai a. Thin a phu hman lek lek —mahse, min PULLOVER lovin, kan hma chiaha Car sen tlàn, a mawng kan han hnìm thuak thuak chu a tlàn zui zèl theih tawh loh nân Police Car chuan kan tlànna lane chu a kawng vàng tàn zâwngin a dang phui ta hmiah a. Lane dangte pawh —SAIRIN ri nuai nuai, Police Car chung de sup sup chuan a dang khàwm ta khup mai le. NO BACK UP a ni ta tawp mai! Chhei’raw, eng thil nge ni ta ngai —ACCIDENT ràpthlàk a thleng ta em ni?
Exit kan tlàn pelhna a hla leh hman tawh si (hmanhmawh ve nàk alaiin) … kawnglakah kan ding ta khup mai —Zoram buai laia Convoy-te kha chu nèp tè a ni! Second 10 chhûng lek pawhin thlìr kìra mit tlin tàwkah Car leh Truck an ding ta pût mai le … hma lam lah chu meikhuin a zîng khat tuau tuau bawk a … chutih lai chuan Firefighters-ho an truck nèn an rawn thleng zut zut a. Tui an rawn phur thleng vek a, “Fire Brigade truck-ah tui a lo awm remchâng lo,” tih thàwm a awm ve map lo. Kawngpui dungzuia yellow line chhûng lam kha Emergency atân an ruat nghàl tawp a. Car hnung lam dârthlalang chhûnga rawng chi hrang hranga rawn de chhàwk zawr zawrte an rawn chiau thleng rang ngei mai —chùngho chu FBI an ni tih hriat a pawimawh. FBI-ho chu han thlîr chiang teh le —
Firefighters truck bàkah Ambulance pawh —doctor leh nurses-te nèn kawng sîr kil khatah hmun remchâng an lo inkhuar ve nghàl rap rap bawk! Hliam tuar an awm palh pawha Civilian Hospital panpui vat theihna tùrin —remchâng hi chu an hre kim bìk ngawt mai! Helicopter thla ka la lo teh mial —bul lawkah Police an ngîr khup si, a remchâng chiah lo a ni!
Mei khu zâm a awm tawh loh hun thleng min nghahtîr hrim hrim. Thlalàk hi a rùka tih ngawih ngawih a ni, inhnial buaina a awm lohna ber chu ‘a rùka lo click keuh’ hi a ni mai!
Keini lamlian West pan lamhawi kan ni a, kan ding trhuap mai si. East lam pante erawh —tui lian angin an tleh dùl dùl bìk a. Eng thil nge thleng tia hàwkdàk ve vek an ni bawk a, kàngmei a chhuahna zàwnah chuan an speed an rawn timuang ve deuh vek a. Kan din chhûng ringawt pawh khân lìrthei sàng tam engzàtin nge min thlèk liam hman ang âw? An tam thawkhat viau chuan ka hria —dârkâr chuang meuh han din chu … a ninawm hman duh khawp. Keini aia thu lah an kat nuk nuk mai bawk si!
An lamlian hi a zîm chhe lo va; “Yellow lines” vei lama tlàn hi a thiang lo va; hetianga rokhawlhna kâra Emergency a awm thut hian, Yellow lines vei lam hi emergency-a rawn tlàn tùrte puala reserve a ni nghàl hmak thung. Kan lamlian zawh mêk ding lamah hian “White line” a inrîn chhuak vek bawk a, white line dinglam zàwng chu motor leng hal hal a la ni tlângpui a, chu chu SHOULDER an ti thung a. Police-ten car an mante hi shoulder-ah chuan an pullover tlângpui thìn. Hemi nî erawh hi chuan kàngmei kha shoulder hrûla thleng a nih avàngin tumah chumi lamah chuan an han ding thei lo va, chu shoulder chu Firefighter trucks rawn tlàn thlen zut zut nân an hmang thung a ni.
Disaster Management pawh kan ramah kan nei ve a; kan lamlianpui kawng a chèp èm èm a —Firefighters truck-te pawh —in kàng an lo trhelh rèm fel ta maw tih vèla an thlen theihna tràwk tràwk hmun hi a la tam a, ‘Fire Brigade truck alarm bell nèna a tlàn chhuak hi Ambulance Truck hian a zui ve vat thìn em àw, kan Zoram-ah hian?’ tih te ka ngaihtuah zui vèl ta mai mai a.
Emergency-ah hian hnam dangte hi an lo chengvawng hle mai! Zir belh tùr hi kan la ngah hle hian ka hria. South Hlimen leimin-ah khân mipui in-stampede palh thut vànga nu pakhat hliam tuar hi in pakhatah ka kuah lùt a. Chutah chuan Police Officer-ho an lo awm a; Shillong Barapani-a Police Training zirchhuak zo-hlìm! Mahse, hliam tuar an hmuh khân an inthiar fihlìm ta thung a … Zopâ inbawihsàwm sàwm khân kan inbawihsâwm ta thung a. Ka chhuahvahna rèng rèngah First Aid leh Thirst Aid pai chi mi ka lo ni bawk a. Mi kha kan inchìm hneh hrim a … Taxi-a Damdawi In-a phurh thlen a ni zui ta vat tho va. Police Officer-te khàn an hamrìk awrh nèn arrangement han siam vat mai sela chu, a rang lehzual ngawt chuan ka ring. Hun a inher liam leh ta fê bawk a, ka ziak lang ve ta mai mai a ni e.
Kàngmei hi inchhûngkhurah leh ram lamah Mizoram-in kan tuar nasa hle hian a hriat a; thingkùng pakhat atang hian naw-alh fung (match-sticks) sìng tam a chhuak thei a —match-stick pakhat handle dik loh avàng hian ngaw zau tak tak kan tichereu thei bawk si. Mei kan chelek dàn hi chu inzir belh hret zawng kan ngai hlein a lang. “What burns never returns,” a nih miau avàngin a ràpthlàk uchuak bìk a —kàngmei eng ang chi pawh —Oil, Electric, Solid fuel etc., pawh ni se … a trhelhna hmanruate pawh vàntlang mimirin kan hriat hran thlip thlep a hun ta hle mai! ZORAM Corruption —a zung nènlàma PHO RO tùr pawh fùr tui tam lai a la nih vàngin pho ro theih lohna chin chhuanlam tèsep a la siam theih nachungin, KANGMEI erawh hi chu vangvat khàp chhuah hun lai là làa a invèn dàn, trhelh mih dàn kan lo inzir thiam hman hi a trùl khawpin a lang ta.
Similar Posts:
- Pu Sangliana pawn a ringlo
- Kawlkulh leh Hliapui inkarah motor a chesual, mi 2 an thi
- Vairengte ah Bandh. Police leh mipui innawr buai
- Kan zu in dan hi i fimkhur ang u
- Kolasib-ah Vanduaina
September 23rd, 2009 at 6:07 am
Nitin thil thleng mah nise, i ziah ngaihnawm hrep chu a. Thil thleng zen zen lo chhiarin a chhiar theih mai dawn alawm mawle. Zanriah eikham pum lam puar hnu ah, mit leh ngaihtuahna i ti tlai e, a lawmawm e.
Prince Georges County lamah daih ani maw i tuan a. Bowie Fire Fighter ho an ni maw?
[Report abuse]
September 23rd, 2009 at 6:23 am
@HV : I pate Pawl DISASTER MANAGEMENT pual hreta ziak a ni ber e!
[Report abuse]
September 23rd, 2009 at 6:26 am
Ka ngaihtuah chhuak alawm.
Fire fighter training book hi la thawn tur emaw ni Mizoram lam hi, te ka ti fo asin. Ka la nei tat asin 
[Report abuse]
September 23rd, 2009 at 7:08 am
Mizoram rilru-a riak reng chungin ka chhiar ngaihnawm kati ngaih erawh a tithra lo
Disaster Management lama ka thusawi ve ziah chu Kawrkama insa zawng zawng te hi kawrkam 10ft zel hi laklet sak ang u. tih leh Kawngpui leh fotpath kama insa zawng zawng te hi Revenue Dept in kawng sir (edge) atrang 10 to 15ft a hla atrang chauhin LSC pek an ni. Heng ram hi kan laklet loh chuan chhiatrupna lo thleng ah hian chhanchhuahna hna a thawh theih loh.
ADA in Building regulation a siam mahse a zawmlo huai huai hi mihausa an ni. Heng ADA dan bawhchhe lui sak sak ho ngam sek sawka thriahtir ngam sawrkar hi kan va mamawh ve.
Treated shoulder hi India ramah kan insist ve dawn ta e, keini ramah erawh a huphurh awm hle tlangram kan nih avangin.
[Report abuse]
September 23rd, 2009 at 8:19 am
I tawng fuhin thlalak na chang i hriat a vangin misual ho mit a tlai a,kan fin phah sawt mai.Nitin a thil thleng hi a tak a engnge maw ti zawng a tuar tu nih hian thilthleng na ran a ni lo fo thin.Nang pawh hemi ni hian a leh lam zawng a tlan ni ula in tlan tlang ve pur pur awm si a,rikrum thil a sap ram tih dan first hand knowledge kan dawng a,a va han lawmawm ve
PS. Thlalak a nalh leh pek hlawm e.
[Report abuse]
September 23rd, 2009 at 8:28 am
Anni fire lorry chuan TUI an nei bik ani maw?
[Report abuse]
September 23rd, 2009 at 8:31 am
anni (anti tihna ah ngai ta ila) fire lorry, weinch
Fire Truck an ti mai.
[Report abuse]
September 23rd, 2009 at 8:50 am
Lal-pu-chawnghilh a nge nge ziak ngaihnawm thei lituk.
[Report abuse]
September 23rd, 2009 at 8:52 am
Mizo hming ziah dan pawh i hre nange. I duh tenawm em mai a, khawngaihin DELETE teh. I lawm zawng leh i website luh duhna a tawp em mai a. Uak thui
[Report abuse]
September 23rd, 2009 at 9:01 am
Lal-pu-vangchhia, report abuse tih khi hmang tangkai mai ta che
Hairehai
ka lawm e.
[Report abuse]
September 23rd, 2009 at 10:59 am
delete tawh e. thing uih tawp
[Report abuse]
September 23rd, 2009 at 1:40 pm
I traffic dan bawhchhia an rawn umzui che emaw tih nak alaia, ram kang chungchang daih a lo ni maw!!! A ngaihnawm khawp mai.
Mizoram chauh hi kan ni bik lo, US leh Australia lam hi, jhum burning ti ve si lo ram tihkan chiam chiam an ching ngawt mai.
[Report abuse]
September 23rd, 2009 at 1:46 pm
Tawng thu che lovah, ram kang thla hi ka la chak ve khawp mai
[Report abuse]
September 23rd, 2009 at 2:53 pm
lawks!usa hi khwvela ram k hmuh chak ber ala ni fan!khwvel sumdawnna tla chhe mek avaga mithiam&tha tak2,a ram mi ngei2te ph in hna anchan mek lai leh kum zabi-18 na hnu lama hna neilo/hna chan antam ber hun an hmachhwn mek lai hian zo(mizo)zingah hna chan emw,he mi avaga harstna tawk khwsak harsat phah fe2te in wm m o…kha lama misual zingah min hrilh thei in wm mial m?
[Report abuse]
September 23rd, 2009 at 3:45 pm
ben, California ah zin rawh, a kang deuh reng.
[Report abuse]
September 23rd, 2009 at 3:52 pm
Mrdeeep, Mizo tamtak chawlh lailawk tir (layoff) kan awm ve hemi nghawng ah hian. A then an thawhna ten an ko kir leh a athen erawh te chu an unemployment pawisa ringa khawsa te pawh an awm ve (dan phalna a US a awm te). Mahse, Mizo chu ka hriat chin ah chuan, hnamdang ang em em a che chhia etc emaw ka hrelo, kan awmlo aniang.
Cheap labor dapin Mexico (mehico) lam ah company an sawn nasa a, a buaithlak khawp mai (mi tamtak tan). US a mi 1 in darkar khat a hlawh ang zat kha Mexico ah chuan an ni khat hlawh aiin a tam tih kan engineer 1 in min hrilh nghe nghe.
Chhungkaw budget siam a pawimawh zia te leh pawisa manage dan hrim hrim kan zir nasat phah a, atha letling khawpin ka hria, keimah bik ah chuan.
[Report abuse]
September 23rd, 2009 at 4:22 pm
california on fire
https://www.boston.com/bigpictu.....iforn.html
[Report abuse]
September 23rd, 2009 at 4:45 pm
Goldmember, pic 34 na kha a mak ka ti hle mai. Khami car kha a thir (metal) leh plastic dang te kha luang pur khawin a thenlai te chu a kang nasa a mahse, a tyre a puar ngaiin a la puar tlat !! mak ve deuh a niin ka hria!!
[Report abuse]
September 23rd, 2009 at 4:48 pm
@ HV – hmm i sawi takah chuan a mak ve khawp mai a. hehe. ka lo ‘notice’ miah lova. eng tyre nge niang aw? Firestone aniang.Firestone tih takah chuan Firestone tyres hre phak an tam vak ka ring lo
[Report abuse]
September 23rd, 2009 at 4:50 pm
H.V Kulikawn ah khan Miss Ami te nen khan in in hre hman ang a. Foreign bike 2 an neih thin kha i hre ve em? Mary Mount kan luh lai khan nalh kan ti thei rap
[Report abuse]
September 23rd, 2009 at 4:52 pm
Hria e, Honda (cc?) leh Suzuki 650 cc anih kha. Mami varte pa, V-an Kolkata atanga a zuk lak alawm.
Korea siam tyre, Hankook tih emaw ni vang khan Hringchar (Silchar) kiang ah police in min ti buai hrep tawh.
[Report abuse]
September 23rd, 2009 at 5:04 pm
HV, enge kha bike te kha an chanchin ni ta? nalh kan ti thei sin aw tetlai phei kha chuan. khatiang “superbike” deuhreuh (superbike chu ni pha chiah lo ang) kha a la vang ania aizawl ah. tunah pawh a vang thova.
[Report abuse]
September 23rd, 2009 at 10:54 pm
pix a mawi khawp mai nia khawpui oh rck ah te chuan engkim hi a bu ang thlap a ni zel trhin reng a lawm chawng in kar kawng chu a mam ve tho in ka hria hring mawi bawk si a
[Report abuse]