Vawiin ni (5 March) hi Indian Air Force in Aizawl khawpui jet fighter hmang a a beih champha vawi 44-na a ni a. He ni hriat reng nan hian MZP te chuan Zoram Ni an hmang leh dawn a ni. “MZP in he Ni a hman chhan hi Mizote hun kal tawh thlirlet-a hnam pumpuia kan tawrhna ni rapthlak ber leh chhinchhiah tlak niah a ngai a, pawisawilo nunna tam tak hlohna leh kuttualleichhama awmte, buh leh bal kangral tam takte kha channa runthlak, sawi hleih theih lohah a ngai a ni. Mahni hnam nunkawnga thilthleng hriatreng leh chhinchhiah that hi thangtharte leh Zoram mipuite tih turah a ngai a ni” tiin MZP chuan Press Release a siam a. Heti hian ka ngaihtuah a…..
Thawnthu hlui chu min hrilh rawh……
Rambuai lai chu ka hmu phak hauh lo mai a. Mizo pasalthate chanchin hi thudik behchhan nei ai mahin thawnthubu ah chhiar tur a tam zawk a. A dik emaw dik lo emaw, thangthar te hian kan hriat ve theuh ka ring a. Zalenna kan sual a, nunna chan tam tak an awm a. Thawnthu hriatin kan hria a. Hriat chian leh zual tumin kei anga nu leh pa thiamna lama B pawl pass zo lo nei ve tan chuan han zawt mah u la. An hriatrengna an mutthluk tir lui tlat thin. Kha hun thim kha hriatreng an duh lo.
“Ka nu, khawkhawmah chuan….” han ti dek dek i la, “A hunlai in hrethiam ve der si lova” tiin min chhang tawi fel et mai thin. An tawrhna kha kan thawnthu hriat mai mai a. Tun thlengin kan Indian unau te chu “Vai ngal sang” tiin kan hriat phah a. Dawt sawi miah lo chuan an rilru chhung ril takah huat namen in an haw lo a. Sawi sawi pawh an duh lo.
Tun thleng hian ka pa hian TV ah pawh Vai channel chu en a phal miah lo nia! He an vai huatna phenah hian huatna dang a inphumru tlat bawk a. Chu pawh chu sawi lang duh lo mah se, keini thangthar te hian kan hai chuangin ka ring lo. Tuboh leh dolung inkara an nun kha kan hriatthiam pui lo a ni lo.
Zoram Ni urhsun taka hman hi Hnam min ti pumkhattu a ni thei em?
A tha mange aw kan MZP thil tum hi chu! Amaherawhchu, Jet Fighter a min bomb (kei chuan min bomb ka ti tho tho!) ni hi kan sawi uar lutukna lamah hian a ni lo lamah hlet a chhuah ang em aw? Online communities hrang hranga kan comment te thlirin in unauna lam leh muanna lam ai chuan hliam tharah kan chan leh a ang ka ti zawk kei chuan. Kan hruaitute tawngkam thlirin “Nuai chimih barh tum” thawthang te a kan sawi phei hi chuan thil tha hrin chhuah ka ring thei hlawl lo.
He ni hi tih makmawh a kan hmang dawn a nih chuan kan MZP hruaitu te hian chiang leh zualin thang thar te hi a hnuai a mi te pawh hi min zirtir tel law law thei ang em le?
a) Kan ram a lo buai ta a, India sipai ten Human Rights an bawhpelh nasa hle tih chu hai rual a ni lo. Indira a rawn inhrosa a, emergency a rawn puang ta chiah mai a. India ram political party lian dang hruaitute rualin kan hruaitu thenkhat chu jail bang an zut a. Pu Thena te ho kha enga ti nge mi dang an chhuah hum hum tawhah pawh an tan reng na chhan? Pu Hmarliana ziah kha kan pawm mai dawn em ni?
b) Pachhunga College Library haltute kha vai sipai ho nge Mizo tlangval dik tak, khatih hunlai a MZP vel pawh a in hmang tak tak an tih thin hi khawi zawk nge dik? Kan lehkhabu ro tam tak hal tute kha hriat an chakawm khawp a sin. Thangthar te hian kan history hi rin ber tur kan hre dawn lo. Research paper fel tak nen tu emaw an rawn thawk chhuak thei em?
c) Special Force din a nih khan Pu Thena nge leh lam pawl zawk kha mawhphur? Mahni mi leh sa te khati tak mai nghaisa duhtu te kha Mizo chhul chhuak ngei anni an tih thin hi thutak nge dawt? Kan history a ni sia keini thangthar te tan chuan.
d) Ramhnuai atanga kan hnam pasalthate an lo chhuah khan CM chair kha ken an ni a, rei vak lovah chuan Congress bawk an lal leh mai si a. Kha an in remsiamna kalphung leh engvanga MNF kha tla leh mai nge an nih dan te kha thangthar te hi min hrilh thei ang em?
Eng vanga heng zawhna te hi zawt nge ka nih? Khing a chunga points te khi March ni 5, 1966 a thil thleng leh a kaihhnawih te an ni. Vai huatna a ni lo ti sawmsarih mah se mi tam tak thinlunga lut chu “India vai chhe ho” tih a ni tlat a ni. Rambuai lai chanchin te hi kan tan chuan ngaihnawm a ni palh mai ang tih ka hlau zawk e kei chuan. Ziaka fel taka dah that thlap mai hi kan history boral lohna tur chu a lo ni.
Za a za kristian inti te hian kan chung a thil tisualtu te chu ngaihdam a hnehin an lakah “ngaihdam dilna” kan la phut tak deuh deuh chu a ni si a. He ni kan hman na chhan lah chu kha ni kha Zofaten Pathian kan auh na ni a ni a te kan la ti! Hawh u, Zoram kalsiam tur a ke penna ah hian hling leh kangthai te hi i thianfai hmasa ang u. Hun kaltawh hi hre reng chung siin, hma kan sawnna kawng a dip dal thin tu, dik lohna nen a mipui min kaihruai thin tu te hi i hnual suat ngam zawk ang u. I thur chhuak i la, i paih bo zawk teh ang u.
Similar Posts:
- ENGTIKAH NGE NIANG? TUTE NGE BUL TAN ANG?
- Mizoram buai lai research
- Zoram tan engnge i tih ve theih?
- Zirtirna diklo a nih kan hre lo : MZP
- “Chhakchhuak” or “Hualngo” ?
March 5th, 2010 at 11:54 pm
Rammawia tih tum kan chhut sual chule
[Report abuse]