mi(sual).com

Kan thupui “Thlaphang au nge hnehna hlado” tih hi ngaihdan hrang awm thei, inhnial theih tak (controversial) a ni a.

Theologian-ten tun thleng hian Bible lehlin dan dik leh tha zawk an dap reng a, Sam 24:10 ‘YAWEH SABAOTH’ tih chu Authorised Version-ah leh kan Mizo Bible lehlin hmasakah “Sipaihote Lalpa” tih a ni a. ‘Sabaoth’ tih chu English-a an sawi dan tlangpuiah chuan ‘Sipaihote (Host) emaw Engkimtithei (Almighty)’ tih a ni a. Mizo Bible lehlin tharah chuan “Engkim Lalpa” tih a ni thung a ni. Chutiang chuan thil a kal chhoh mek zel avangin kan thupui pawh hi khel chhoh mek a ni ta zel a ni.

Kros-a Lal Isua au hla hi kan lo pawm dan thin chuan lungngai thlaphang aw a ni a, “Ka Pathian, ka Pathian, engahnge min kalsan?” tih hi a nih ang angin pawm a ni thin a. Chutih lai chuan Goerge M.Lamsa, Galili rama seilian, Aramik tawng pianpui tawnga hmang, Aramik Lecturer chuan Marka leh Mathaia hian Aramik hmanga Isua au hla hi Greek tawnga letling dik lo niin a hria a, hetiang hian a sawi dan tlangpui chu a ni a :

Lmana (Lama) tih chu Aramik chuan ‘Engnge a nih’ ‘Eng atan nge’ tihna a ni a. Sabakthani tih chu ‘vawng’ ‘khek’ ‘hnutchhiah’ tihna a ni a. “Eli Eli Lmana Sabakthani” tih chu “Ka Pathian tihtur mi ruat chu ka ti zo ta” tihna niin a sawi a ni.

Pathian thu tanchhan a nei hlawm a, Lal Isuan Kros-a a thih tur a hre sa vek a, Gethsmani-ah lungngai mahse Angel-in a tihharh hnuah chuan a zam lova, a lungngai hek lova, a pha nawi hek lo. Hlau leh zam lovin Kros chu a hmachhawn a, Kros-a a thusawi te pawh zam aw a ni lova, a pa-in tihtur a tuk chu a hlenchhuak ta a ni. Tichuan, Kros-ah “Eli Eli Lmana Sabakthani,” “Ka Pathian, ka Pathian, ka tihtura i ruat chu ka hlenchhuak ta,” a tihna a ni. Johana’n, “A kim ta (Tetelestai)” a tih nen thuhmuna ngaiin a tarlang a ni. Heng Bible bung leh changte hi ngun takin zir ila : Joh 10:17; Joh 16:21; Heb 12:2; Joh 6:37; Joh 4:34; “A kim ta (Tetelestai)” Joh 19:30.

Lal Isua a zam loh ang bawkin Thlarau Thianghlim an chan chinah chuan a hote pawh an zam lova. Stephana te, Petera te, Andria te, Apostol dangte pawh thuhretu rinawm (Martyr)-in an thi hlawm a ni. (Fox’s Christian Martyr)

Lal Isua hunah khan tawng pawimawh nia lang chu Hebrai, Greek leh Rom tawng a ni a. Kros-ah pawh heng tawngte hian an ziak a nih kha.

Lal Isua zuitute kha Galili mi an ni hlawm a. Petera pawhin a awphawi (accent) danah Aramik a thiam vak lo a ni tih a hriat a(Mat 26:73) Mathaia leh Marka thu lakna bera an ngaih chu Petera a ni a, Petera hian Hebrai tawng pawh a thiam vak lo thei bawk a, a hriat dan a hrilh chu ziaktute chuan Greek tawngin an letling fuh lo deuh mai thei bawk a ni. Chubakah hriat sual awm thei a ni bawk a. Marka ziak dan chuan, “Eloi Eloi Lema Sabakthani” tih a ni a. Mathaia chuan “Eli Eli Lama Sabakthani” a ti thung a, an ziak dan pawh a inang lo deuh a ni. Aramik (Aramaik) chuan, “Eli Eli Lmana Sabakthani” “Ka Pathian, ka Pathian, ka tihtur ka ti zo ta e” tihna a ni thung a.

Kros bula dingte hriat dan pawh a inang kher lo thei bawk a. Pagan (Greek leh Rom) te chuan an Ni pathian Helios kovah pawh an ngai mai thei a. (William Barclay)

Elija kova ngaitute erawh hi chu Hebrai tawng leh Zawlneite chanchin hria niin an lang a, Elija kovah an ngai thung a nih kha (Mathaia 27:47)

Rin dan dang awm leh thei chu Lal Isua khan Hebrai a thiam ngei ang. Lehkhabu zial (Scroll/Parchment) a chhiar a nih kha (Lk 4:18), Magdal mi Mari pawhin Hebrai tawngin ‘Rabboni’ a ti a. Hebrai tawng pawh an thiam nual niin a lang. (Joh 20:16) Paula pawhin Hebrai a thiam bawk a. (TT 22:2) Chuvangin Lal Isua chu Hebrai tawngin a au thei bawk a ni.

Babulon sala an tan BC 586-538 chhung kum 49 (Hapta sarih) chhung khan Hebrai thiam lo tamtak an awmin Aramik (Babulon Official Language) chauh thiam an piang tawh a. Aramik leh Hebrai tawng chu Ralte tawng leh Lusei tawng anga inzul a ni a, Hebrai leh Aramik hriat pawlh awm thei a ni a, Eli, Eli tih chu Aramik leh Hebrai tawngin ‘Ka Pathian ka Pathian’ tihna a ni ve ve a.

Zawlneiten Isua chungchang ‘Chhiahhlawh tuara’ a nih tur leh a tawrh dan tur te an puang lawk a. (Isai 52:13-15, Isaia 53) Davida fa tih a ni bawk a. (Gen 49:10, Math 1:1, Mat 9:27) ‘Pathian chhiahhlawh’ tih a ni bawk a. (TT 4:27, TT 3:6)

A hlimthla rawngbawlna (Judaism) hunah khan Davida chuan a hlimthla Lal Isua tawrh ang tur a lo tuar lawk a, “Ka Pathian, ka Pathian, engahnge mi kalsan?” “Eli Eli Lama ezavthani’ (Heb) (Sam 22:1) a lo ti a. Tichuan Davida chu Krista tawrh dan tur ang lo tuar hmasatu (forerunner) a ni a, Isua chuan a thlahtu au hla chu a rawn hmang ta chiah a ni. Bible chhuizauna siamtute leh letlingtute pawhin he thu hi a anpui nia hriain an refered hlawm a ni. Chuvangin Lal Isua au hla chu Hebrai a ni thei bawk a ni.

Lipographa : Thuthlung hlui ziak chhawn dan te pawh a inang lo nual, Jerusalem Scroll te, Sinaitic Scroll te, Dead Sea Scroll te leh Scroll dang dangte pawh thu inang lo a awm nual a. II Samuel 24:90-a Juda sipai zat chu 500,000 tih a ni a, I Chronicle 21:5-ah thung chuan 470,000 a ni thung a.

Authorised Version-ah pawh Damsel (nula) tih turah ‘Camel’ (Sanghawngsei) tih a ni a. Copy sual emaw chhut sual emaw, hriat sual emaw a awm nual a, chuvangin Marka leh Mathaia te thu laknate pawhin an sawi sual theiin anni pawhin an ziak sual thei bawk a. Mathaia leh Marka ziak dan pawh a inang lo a ni si a. Tichuan, Hebrai tawnga ‘Eli Eli lama ezavthani’ tih chu Mathaia’n, ‘Eli ELi Lama Sabakthani’ tihin a ziak emaw, Marka’n, ‘Eloi Eloi Lema sabakthani’ tih angin an hriat danin inang lo deuhin an ziak pawh thil ni thei tho a ni a.

Chhungi ding lai han ral auh ta ila, ‘Hungi’ ti ila, min ko emaw a ti tho ang a, a ei tho awm asin! Chutiangin Waterloo indonaah Nelsona’n Nepolean-a a man thu ‘Nelsona’n Nepoleana a man’ tih an tar chu Sapho chuan ‘Nepoleana’n Nelsona a man’ tihin an chhiar vek e an tih chu! Chuvangin Lal Isua khan Hebrai tawng hmangin “Eli ELi Lama ezavthani’ a tih chu Aramik niin an ngai a ni mahna !

Aramik ni ngei sela, Greek tawnga an lehlin dan nen a inmil chuang lo kan tih tawh ang khan an lehlin sual emaw a ni ngei ang a. Lamsa chuan lehlin sualah a ngai a ni.

‘Eli ELi lama ezavthani’ ‘Eli – Pathian; lama – engahnge; ezavthani/ezabthani – kalsan / hnuchhawn’ a lo nih si chuan Mathaia leh Marka’n Greek tawnga an lehlin, “The mou hinati me egkatelipes” tih leh ‘Eli, Eli lama ezavthani’ tih chuan awmze thuhmun “Ka Pathian, ka pathian, engahnge min kalsan?” tihna a ni ve ve a. Septuagin lama a landan chuan, ‘Ho Theos, ho Theos mou proskhes, moi hinati egkatelipes’ ‘O God, My God, attend to me why has thou forsaken me?’ ‘Aw Pathian, ka Pathian, ka hnenah rawn kal teh, engahnge mi kalsan tak mai ni’ tih lam kawk a ni a.

Chuvangin Lal Isua khan Pathian leh mihring nih a fawmkem a, “Amah chu Mihring leh Pathian a ni, Lal leh Chhandamtu nih a fawm,” Pu Rokunga’n a hla duhawm tak (Christological lyrics)-a tarlan angin.

Adama leh a thlahte chunga Pathian anchhia chu Pathian leh mihring nihnain a tuar a, zam lovin chhel takin a tuar a. Lungngaihna leh natna hre mi, mihring a nihna dik takin, nat leh tuihal a tuar a ni. ‘Ka tui a hal’ (Joh 19:28) ‘Ka thla a phang hle mai, thihpui tham hial a ni’ (Marka 14:34). Thlemna a tawk a, remchan leh hun atan Setana’n a khek kha (Lk 4:13) he hunah hian tilang tain a bei ta chiam a ni. Lal Isua’n thlemtu a lo kal dawn tih a hre lawk a, “Thlemnaa in luh loh nan tawngtai rawh u,” a hote a ti a nih kha! (Lk 22:40)

Tichuan Eden-ah khan Pathianin “Adam, khawiahnge i awm tak?” a ti a, (Gen 3:9) Adama pahnihna Lal Isua, hmeichhe thlah chuan, “Ka Pathian, ka Pathian, engahnge min kalsan?” tiin a au let a, mahse vaivut a ni a, vauvuta a kir leh a ngaiin a thi ta a ni. (Gen 3:19)

Mahse, Lal Isuan a hmaa hlimna awm avanga a tawrh zawh hnuin Adama’n tihnun (Generated) a nihna chu bawhchhiatna avanga tihlum (degenerated) ni mahsela; Krista thihna leh thawhlehna khawvelin a zo theihna turin Lal Isua chu a tinung (regenerated) leh ta a ni. Hallelu YAH! Tholeh Isua thlarau, Awmpuitu (Parkletos) chu a lo thleng ta a, tihnun an lo ni leh ta a ni, chu tak chu a ni, Lal Isuan Nikodema hnena, “Dei humas genethenai anothen,’ ‘Chunglam atangin i piang tur a ni’ a tih chu William Barclay lehlin dan chuan “You must reborn from above,” tih a ni a. Chunglam atanga pianlehna chu Isua thlaraua pianna a ni. Bible-a piantharna tih awmzia tak chu hei hi a ni e.

Tichuan Lal Isua auna tawng hman hi ‘Aramik’ niin sawi mahse Pathian thu nihphung chhui chian chuan Hebrai tawnga au ni ngeiin a ngaih theih a ni.

‘Eli, Eli Lama ezavthani’ – Sam 22:1

Pathian thute hi mi hrang hrangin hun leh hmun hran hrana an ziak a ni a, thu thuhmun an ziak dan pawh a inang vek lova. Isua thawhleha Angel inlar an ziak zat pawh a inang lova, Angel pahnih (Joh 20:11) Angel pakhat (Marka 16:5). Chuvangin Pathian thute hi inang vek lo mahsela, a thuchah (message) erawh chu a thuhmun vek a, Lal Isua chu mihring dik tak, Pathian dik tak a ni bawk a. Mihring takin (humanly) a tuar a, Messia takin (Suffered as Christ) a tuar a, chuvangin Kros-a a tuar lai khan hrehawm leh natna, tuihal tuar mahse, Pathian hmangaihten nun an neih theihna chu a lawmna leh a lallukhum a ni tih hriain mahni inpe zawka tuartu nihna chu a hlenchhuak ta a ni.

1) Lmana – Aramik a ni a, ‘Eng atan nge’ ‘Engnge a nih’ tihna a ni.

2) Sabakthani – Aramik a ni a, ‘Vawng, khek, hnutchhiah’ tihna a ni.

3) YAWEH Shabaoth – LALPA Engkimtithei, Sipaihote LALPA

4) Hallelu YAH – YAHWEH chu fak rawh u.

5) Isua : (YASHUA) YAH – YAHWEH chhandamna, YAHWEH-an a chhandam.

6) Ezavthani : Hebrai a ni a, mi kalsan, hawisan tihna a ni.

7) Lama : Hebrai a ni a, Engahnge, khawahnge tihna a ni.

1) G.M.Lamsa Lehkhabu, Indispensable Guide of Jesus Teaching Pu Darchhawna lehlin

“Chanchin Tha Eng”

2) Old Testament in Hebrew

3) New Testament in Greek

4) English Bible. AV NIV

5) Mizo Bible, a hlui leh a thar

6) The Daily Study Bible. W.Barclay

7) New Testament in Hebrew (Israel Bible Society Edition)

Similar Posts:

• BIBLE HI
• Krista leh Mizo Literature
• Bible Code : A Rintlak Em?
• Greek Hmangaihna Chi hrang
• Bible hi aw….

Recent Posts:

• Piancham lawmna hun hlimawm karah
• Kerala a Engineering zir duh te tan
• Kelawng a tlan a tha
• Help!
• Mizoram University Examination Dept. leh hna lak chungchang

This entry was posted on Saturday, May 1st, 2010 at 10:00 pm and is filed under Opinion, Religion. You can follow any responses to this entry through the RSS 2.0 feed. You can leave a response, or trackback from your own site.