Teh mauh mai a! Missionary hna hi tamtak chuan eizawnna ah pawh kan lo ngai meuh awm love. A dik nalai tak te pawh chu a awm mahna, ei leh in kha kan ngaih pawimawh ber a ni miau lo a. Pathian thu in ‘ Hnathawktu chu a hlawh hmu tlak a ni’ (1 Tim. 5:18) a ti a. Missionary pawh hi hna a ni a, eizawnnan/hlawh hmuh nan a tling tawk a, a hlawh petu/ruaitu a dang deuh tih mai a ni. Zofate tana hei aia eizawnna tha hi a awm a ngem aw?
Eizawnna dang langsar tak tak te ai chuan kei leh ka chhungte chuan kan han thlang phawt mai chu a ni a. Kum 1992 atang khan full time missionary hna hi ka lo tan ve tawh a, kan la inchhir lo chu a nih hi maw! He ka thawhna pawl Youth With A Mission (mizote chuan ywam/ ‘Waiwam’ tiin kan hre lar zawk mah awm e) pawh hi a dangdai ang reng khawp mai. Tumah in hlawh kan nei miah lova, chu a hnehin ei man, awm man pawisa kan pe zawk thin! Kan President atanga thawktu thar ber ber te pawhin kan ei leh in man te kan pe vek. Chuti chung chuan min chawmtu Pathian Engkimtithei hian min thlahthlam ngai lova, nghei leh riltamin kan la awm ngai lo.
Missionary hna hi Pathian malsawmna a ni a. A nih na takah chuan zofate mai ni lo, Kristian zawng zawngte tih tur a ni. Pathianin mihringte a siam khan he leilung hi luahkhata, thilsiam zawng zawngte enkawl turin thu a pe a (Gen 1:28), sualna in thil a rawn ti chingpen zova. Tichuan, Pathian chuan Abrahama hnenah Adama leh Evi thu a pek ang bawk kha tawngkam dang deuhin a hrilh leh a (Gen 12:2), Abrahama thlah Israel te khan chu missionary hna chu an hlawhchhampui der a, tichuan Pathian chuan a fapa Isua Krista ngei a rawntir ta a nih kha.
Isuan thupek ropui ‘The Great Commission’ (Matt 28:19-20, Mk. 16:15) kan tih mai, a zirtirte a pek pawh kha Pathian in Adama leh Evi, Abrahamate a lo pek tawh tawngkam dang deuh bawkin a rawn sawi nawn leh mai a ni. Tichuan missionary hna ,’thilsiam zawng zawngte hnena chanchin tha hril a, zirtirah te siam’ chu keini Kristiante kovah a lo tlu ta a ni.
Missionary hna hi eizawnna dangte aia a that zawkna tlem I han thlir teh ang:
A hmasa berah chuan a ruaitu/chawmtu hi Pathian hausa, Engkimtithei, ngilneihna a khat, mi thilphal, min ngaihven a min hmangaih em em tu a ni tlat mai. Hetiang ang ‘Employer’ hi khawii dangah nge I hmuh le? A employee te tana a thusawi/thutiam tlem I han en teh ang. ‘khawvel tawp thleng pawh in hnenah ka awm zel ang’(Matt.28:20), ‘…A ram leh a felna chu zawng hmasa zawk rawh u, tichuan chung zawng zawng (ei leh in/silh leh fen) chu a pek belhchhah dawn che u nia…’(Matt 6:25-34), ‘…nimahsela, kei chuan ka theihnghilh lo vang che.
En teh, ka kutphahahte hian ka ziak che hi’(Isaia 49:15-16), ‘Mi dil rawh, tichuan I rochun atan hnam tin ka pe ang che. Kawlkil tawp thlengin I ro atan ka pe bawk ang’(Sam 2:8), ‘…a thlahte chaw khawn pawh ka hmu ngai hek lo’(Sam 37:25), ‘Lalpa malsawmna chuan a ti hausa thin a, lungngaihna a belhchhah thin lo’(Thuf.10:22) a dang pawh a la tam. Thlamuan thlak vang vang deuh asin!
A dawt leh ah chuan he missionary hna ah hi chuan zalenna leh chhungril hlimna a tel tlat mai. Tin hlawh lampangah pawh, thla tir emaw tawp lam nghah a ngai lem lo, kan mamawh hun ah kan dil a min pe mai. Kei pawh tum hnih ngawt, kan indaih lo deuh va kan hriat a vangin, kan mamawh zat kan chhut chhuak a, chumi zat chiah chu kan dil (tumah dang kan hrilh lo), kan dil zat chiah chiah chu min rawn pe mai a ni.
Awlsam khawp! Mahni lam kan sawi ta sa sa, missionary ka chhuah tirh ata tawh, sum lamah hian kohhran hian min la chawm ngai lova, tuna min puitute pawh hian an mahni thuawihna in, kan dil leh ngen ni hauh lovin min pui a ni. Pathian hian kan mamawh zat lek lek hi chu a hria in a lo nei khawp mai.Tin, insurance lam te hi le; Sapram a company tam tak chuan an mi rawihte hi health and accident insurance an pe nghal thin. Indiaah hian kan nei ve emaw ka hre lo. Mahse chung insurance te pawh chu damloh hnu emaw chhiat tawh hnu emaw a chhawmdawlna atana pawisa chauh a ni. Missionary hna ah hi chuan kan insurance hi van lam atangin a ni leh pek tlat.
Chhawmdawlnana pawisa mai ni lovin, chhawmdawl ngai lova, damlohna leh chhiat tawhna laka venhimna te a tel daih asin. Hna hmuh zawhloh tih angreng te hi a awm ve ngai lo, Isua lo kal leh hma chu, hna kan hmu char char dawn a ang khawp mai. Thawhpuite ‘co-workers’ lam ve thung, missionary ngat tawh chin hi chu mi puitling, chhia leh tha hriatna hmang thiam, dikna ngaina mi, mi tha an lo ni tlangpui (an tha famkim e kan tihna a ni lo). Mi depde, sum ringawt ngaihtuah, eiruk leh hlep ruk pawh pawi ti miah lo, chhia leh tha hriatna chiangkuang nei lo te ai chuan thawhpui an nuam deuh.
Zawhna awm thei awm tak: ‘A nih leh tuna sum lama puitu che u hian pui thei ta lo thut che u sela?’ Hemi tlukpui deuh zawhna dangin han chhang ta ila: ‘Anih leh I dawr kha kangmei emaw lirnghing ten ti chhe ta vek sela?’ ‘Call Center a thawktu khan a zuk leh hmuam tih luat tuk avangin a lei lo cancer chhum ta hmawk sela? I hnathawhna company khan sum indaihloh vangin emaw thawktu thenkhat ban lo ngai ta sela, an ban zingah khan lo tel vet a hlauh si la? Tih ang vel a ni. Chhanthui vak pawh a ngai awm lo ve.
Anih leh ei leh in silh leh fen mai ni lo, thil dang (‘luxury items’ I ti mai ang) lam te hi? Ngawi teh! Kan Pathian hi I lo la hre chiang lo a ni mai thei. A mizia hi kan chian hmasak a ngai. Pathian uikawm tet tet a ni lova, mi thilphal lutuk ani. Kan mamawh mai bakah, thil tha kan tana tha tur hi chu min pek hi a lo in huam khawp. Mahse, Pathian hian kan rin ngam chin te hi mi a fiah ve thin. A malsawmna hi kan dawl zo dawn em tih te pawh a hrechiang zawktu chu Amah a ni.
Rinna hi chu mahni theihna piah lam thil a ni. Petera ang deuh khan: Tui dai tawh mah la I mawng lawnga a la innghah chhung chu rinna in I la nung lo a ni, Isua en chung a, tui chung I kal a, I innghahna lawng I thlah chiah khan, rinna in I lo pen tan ta ani. Rinna hi han sawi zau deuh ta ila, Pathian mizia ah a in nghat tlat a ni. Engmaha innghah na nei lo rin tlat te hi a awm ve thei a, mahse chu chu a saptawng takin ‘superstition’ an ti. Engtihna mah a ni lo.
Missionary hna hi lo zawm ve duh ta ila, engtin nge ka zawm ve ang? Engber chu nge ka tih ve ang? Khawiah nge ka kal ang? Kawng chi hrang tam taka awm thei ang, thawhna hmun tur pawh tam tak a awm. A hmasa in Pathian hnenah han thlen phawt mai teh. Pathian hian a mite hi Bible atang mai lo hian a la be reng a sin. Tawngtai la, chham zawt zawt ngawt lovin, I biak Pathian pawh kha tawngna hun te pe ve la, Samuela ang khan a thu ngaithla ang che. Chumi zawhah I Kohhran hruaitute emaw thlarau lama hruaitu, mipuitling te pawh han rawn leh ta la, a fuh khawp ang. Tin Nu leh Pa, chhung leh kua te pawh rawn tel a pawimawh.
A tawp nan, heng kan thu ziahte hi sorkar, company, institution, etc a thawkte sawinepna a ni lo a, heng hnate hmang hian missionary a nih theih reng tih hi I hre nawn leh ang u. Missionary hna hi chu kan thinlung putzia leh kan nihna (identity) lamah a ni zawk, kan thiltih taka te ai mahin.
Similar Posts:
- You Don’t Know What You Got Till It’s Gone…
- Identity Crises ?
- Mi thil tih sualah I lungngai ngai em?
- Thlasik Malsawmtu
- An lo tunlai mi ve tawh thin
May 11th, 2010 at 4:40 am
YWAM avanga thatna tam tak ka hmu in ka hria, a ropui ka ti, YWAM hmang hian mi tamtak in Pathian an chawimawi a ni.
YWAM atang tho bawkin mumang lama an thawhpui te, “nangmah hi Pathian in nei tura min pek i ni,” ti tlat te pawh ka hre tho bawk a.
[Report abuse]
May 11th, 2010 at 5:06 am
I ngaihsanawm hle mai. Pathianin vengin i rawngbawlna malsawm zel rawh se.
Thlirna tlangdang atangin han sawi ta ila… Inhnial theih tak tur a ni: Ngaihdan hrang hrang pawh a tam ka ring. Missionary teuh2 hi (a missionary hna nilovin) a thawktu a zir hian ngaihsanawm leh ngaihsanawmlo an awm. Hlawh hmuhna ngawr ngawr anga ngaia rawngbawl hi thil awm thei a ni ve tlat. A ruaitu leh a latute fimkhur a ngai awm e. Pianthar hlim/tirh lai vel hi chuan tute mai pawh hi kan tha vek mai a, rei daih leh lemlo te pawh a awm theih ang. (hei hian rawngbawltute mawhphurhna san zia a kengtel a ni) Pathian pawh hian a rawngbawltu turte hi chu a inpe apiang a hmang duhna chungin a uluk ve viauin a rinawm.
Khawi hmuna pawh kal huam missionary an awm laiin kalduhna bik riau neite pawh an awm ang..(ngaihtuah peihte tan a ni e)
[Report abuse]
May 11th, 2010 at 6:57 am
@Raltefamily, i ziak thain chhiar a va nuam em! In chhungkua chu in ngaihsanawm mang e! Hlawh lakna bik pawh nei lo, Pathiana innghat tak tak Missionary te hi in ngaihsanawm tak zet zet a, missionary theuh theuh zingah pawh tisa lam bakah Thlarau lam hausakna pawh in dawng nasa ngei ang tih ka ring.
Lalpan in rawngbawlna malsawm zel rawh se. YWAM hi a dintu Lorren Cunningham (a spelling dik maw?) atang reng khan ka ngaisang thin!
[Report abuse]
May 11th, 2010 at 7:14 am
Hna zahawm a ni teh meuh mai. Mahse Missionay ve si, thlarau bo pakhat pawh chhanchhuak zo lo chuan a hna a tlin lo a ni thei em? Amah chhawrtu A lungawi lo thei mai lawng maw? He hna hi tih mai mai chi a ni lo. Employer hi a thikthu chhia ropui si a.
[Report abuse]
May 11th, 2010 at 7:21 am
Ziak tha hle mai. Pathian rawngbawltu te tana hriattur ka sawi fo ka’n sawi nawn leh ange.
“Nangnin min thlang lo, Keiman ka thlang zawk che u a,va rah tur leh in rah awm reng turin ka ruat bawk a che u, ka hminga Pa hnena in dil apiang a pek na tur che u in. Johana 15:16″ Bible-in alo tih angin, Pathian rawng kan bawl rau rau anih chuan a hmanrua te zinga pakhat, A mi hmantlak nih tum tur ani.
Pathian rawngbawltu ni ve si, Pathian mi hmantlak ni si lo, mahni inhmang tamtak an awm. Chungte chuan RINNA in ke an pen lova, mahni thahnemngaihna in rawng an bawla, an rawngbawlnaah rah chhuak hmuh tur a awm thin lo. An thawkrim thlawn a ni. “Lalpan in a sak loh chuan, a satu te chuan an thawkrim thlawn mai ani.” Sam 127:1
Hetiang anga rawng kan bawl thin anih chuan Matthaia 7:22-23 thu hi kan hnenah a thleng palh ang tih a hlauhawm khawp mai – Nangni thilsual tite u,Ka hre ngai lova che u, ka hnen ata kal bo rawh u… tih hi…
** He thu post tu pa te comment petu te ka sawi chhan na a ni lo tih minlo hriatsak dawn nia. Ka lawm e.
[Report abuse]
May 11th, 2010 at 8:00 am
May God bless you. Perhaps this is the first time I believe that there is a genuine missionary among the mizo people…
[Report abuse]
May 11th, 2010 at 8:39 am
Lal Isua hnai tak zuitute titikhawchang hian min tiharh sawng sawng thin.A ropui ka ti khawp mai.
Marka 16:15 Tin, an hnenah, “Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u.
Isuan a zirtirte hnena a sawi hi kan hnenah pawh a sawi a ni.Hemi KHAWVEL zawng zawng tih hi kan chenna hnai vai nilo,hmun hlatak sawina chauh a ngaih bur chu a fuh famkim lo maithei a,kan awmna theuh inchhung,khua,veng leh chettlatna hmun pawh ‘khawvel’tih hian a huam thei ang.
Kei missionary in ka pen chhuak ve thei ta rih lo,mahse ka khawvel tawn chinah leh thilpek lamah theih ang tawkin tan chu kan la ve bawk a.
Hun pum pathian tan liau liau a pe a ram dang leh ramthim ngei a vak chhuakte hi A class nita se,Awmhmun a lo supporter te hi B class tal an tling ve ang em ?.
Mizo in kan missionary hmuh hmasak ber ber te kha REVEREND an ni hlawm a… ngaihtuah a ti thui
[Report abuse]
May 11th, 2010 at 9:14 am
Hei chu post thatak anih hi, sailova hla angkhan”lawmthu sawitur kalonie isua hnenah,kan chanvo veka rawngbawlna kathlir chang hian,engkim maihi hmangaihna vang alonie,min dahna hmun katan renghian alo tawksi” kan hnathawhna theuh ah missi0nary kan nithei.
In hnathawhna ah pathian in alet tamtak in malsawmcheu rawhse pu ralte n family.
[Report abuse]
May 11th, 2010 at 9:44 am
A va ngaihnawm dup dup ve aw ! Pu Ralte Pathian tana i inpekna hi a ropui a, Pathian in a let tam takin malsawm che rawh se !
[Report abuse]
May 11th, 2010 at 10:13 am
Thui viau mai a, ka chhiarchhuak parh.
Post tha khawp mai.
“missionary ngat tawh chin hi chu mi puitling, chhia leh tha hriatna hmang thiam, dikna ngaina mi, mi tha an lo ni tlangpui”
Khi erawh khi chuhh… missionary thenkhat, Synod in N.E India a a rawihte nen in la thawh ho loh vang a nih ka ring
[Report abuse]
May 11th, 2010 at 10:49 am
Pathian a in nghat tawp thei mihring te hi khawvela mi awhawm ber te an ni.
[Report abuse]
May 11th, 2010 at 11:06 am
hman lai deuha missionaries & tunlai missionaries te hi an danglam viau toh ang em le
[Report abuse]
May 11th, 2010 at 11:25 am
Ziak tha hle mai…
[Report abuse]
May 11th, 2010 at 11:43 am
Luxury items chu a ngai awmlo e aw missionary tan chuan ka ti ve mai mai
[Report abuse]
May 11th, 2010 at 11:56 am
Pathian tana Pasaltha. I hlawh awmna tur chu ka hre reng mai…
[Report abuse]
May 11th, 2010 at 11:56 am
Ka rilru sir ah chuan missionary nih duhna hi a awm ve reng, mahse sorkar hna te kan lo thawk lak lawh ve si a, pension hnu ah tal kum hnih khat chu theih ang tawk a tih ve hram chu ka duh.
@Raltefamily..min fuih tha khawp mai. BTW ka pa hianRalte hi Mizo hnam ah chuan ‘pui thiam chi’ kan nie a ti thin a, a lo dik deuh emaw ni le.God Bless.
[Report abuse]
May 11th, 2010 at 12:44 pm
Tlem sawi ve ang. Sorkat vs Private hna hi kan compare fo a. Sorkar hi security a awm hi kan ti thin. Mahse security tak tak chu Pathian ah bak a awm lo ka ti thin.
[Report abuse]
May 11th, 2010 at 12:52 pm
Ben, Amen. Sorkar ah chuan awlsam takin Medical Reimbursement nuai chuang an la mai a. Mahse Pathian zara MR bill tul lo a kan dam hi a lo hlu fe zawk a!
[Report abuse]
May 11th, 2010 at 4:52 pm
Mizo YWAM zawm ho hi foreign kal duh vanga zawm hi an tam lutuk. Azawl vela an rawn hawn lahin TKP velah te inhman an tum leh chuang lo, inkhawm an thatchhe bawk si. An inzirtirna hian a hmim hneh lo aniang. DTS an tiha thawk leh trainning vel phei hi chu.
Missionary rau rauah Mizorama lal ber SYNOD hnuaia thawh hi a tha ber. An hlawh tam sia, pension fun annei a, haousing loan pawh an la thei ani lawm ni. TA / DA te an la bill thei jui. Tha lituk.
Ka lawm e
–LVK
[Report abuse]
May 11th, 2010 at 5:11 pm
LVK, i a thai latuk. A thra karah a thra lo te chu an awm ve bawk ang chu. YWAM ah chuah a ni lo…khawvel ah hian a fel karah fello an lo in zep tel zel alawm. Zawlnei karah zawlnei der…chutiang zelin.
Ralte family in chhuanawm hle mai.
[Report abuse]
May 11th, 2010 at 6:22 pm
I rawn comment tliar tliar na leh fakna zawng zawng te hi keini tan chuan fuihna ropui tak a tling a ni. Ka lawm e. Comment thenkhatah Missionary thenkhat (YWAMers thenkhat telin) in mit tlung tawk lo an awm a nih hmel. A pawi thin khawp mai, Missionary te hi mihring ve tho, chaklohna nei vek kan ni. Viking sawi pawh khi a dik thawkhatlai a awm tih pawh ka rawn confirm duh. Pathian rawngbawltu tak leh taklo chu Pathianin a hria a, hun tawpah pawh kel leh beram thliar hran an nih dawn kha maw! Fulltime missionary a chhuah kher loh pawhin hna dang ah hian missionary a nih theih tih kha ka’n sawinawn kher duh a. A danglamna chu kan thinlungah a ni (Missionary nge ka nih hmasak keima hma ka sial tih chu keimahni chauin kan chhang thei). Hman deuh khan ‘business for mission’ tih a lo chhuak a, a hnu deuhah ‘business as mission’ a lo chhuak leh a, tunah chuan ‘Business is mission’ kan kai ta. Kan awmna theuhah, keini Mizote hi chuan Pathian rawng i bawl tlat zel ang u.
[Report abuse]
May 11th, 2010 at 6:53 pm
Kanidar nge nge thil hi hi i lo chik thin Misionary/Pastor leh rawngbawltu dang zingah pawh hian rilru puitling lo tak tak hi an tam ve hmel ka ti mai mai thin. Lalvikinga sawi pawh khi a dik ve viau na lai a awm tho mai, thenkhat chu an chhungten tihngaihna an hriat tawh loh avanga YWAM an zawmtir tha thei ta chuang silo te pawh ka hre ve nual a nia.
[Report abuse]
May 11th, 2010 at 7:23 pm
A post tupa hi i sawi ang tak tak a i nung anih chuan i ngaihsanawm ka ti hle mai. Pathian rawngbawl hi hna ropui ani tih hi ka pawm. Amaherawhchu, rawngbawltu tamtak ka hrechiang ve a, ka beisei an pha lo lutuk thin. Tawng mawilo ni lo se, Pastor pension hnai tamtak rawngbawlna aia in leh lo a an buai zia te, kan missionary tamtakin thlarau bo zawng hman lek lova kohhran danga awm mekte lakluh tum ringawt a an hmanhleh dan te, Mizorama kan kohhran lian ten kohhran dang Missionary tirhmekna hmuna mi beramte ruksak tuma an inluhchilh siah siah dan te hi mit ngeia hmu ve tawh tu ka ni. Ngaihsan tur pawh ka hrethiam tawh meuh lo ani e.
[Report abuse]
May 11th, 2010 at 9:32 pm
Ben… I va thaw ding mai mai ve! Ve teh khiat mai che chuan!
[Report abuse]
May 11th, 2010 at 9:56 pm
Himalaya tlangkar Tibet leh Nepal inri na laiah hian, ram te reuh te, “Mustang kingdom” (”The Lost Tibetan Kingdom” an tih mai) a awm ve a, mihring (population) 29,000 vel an awm ve….chung zing a rawngbawltu MIZO pa a nih hi.
https://img25.imageshack.us/img25/8508/img368m.jpg
[Report abuse]