mi(sual).com

A tirah tawp takin exam an conduct a, an ching fel thei hram dawn emaw tih laiin buaina dang a rawn chhuak leh si. Mi sanghnih-khat lek exam pawh fel fai taka buatsaih theilo nih hi thil zahthlak tak niin a lang. A tuartu zirlai te an lainatawm tawh hle. A bikin MBBS zirtur te hi class tan a hun deuh vek tawh a, chumi hma a admission procedure hrang hrang tih fel tur la awm tam tak te nen a ngaihtuah phei chuan, hun hi thil hlu tak a ni tawh. Hmanni lawk a ka lo kal pelh ve tawh thil anih avangin, ka hriat ang chhun chhun tlem a zawng kan sawi ve ang a.

Mahse thil kalphung hi tih danglam ve reng anih avangin dik tawk lo te pawh a lo awm maithei bawk. Tin, mimal beih duhna thinlung ka pu lova, mi taima leh tawk rim te hian an phu tawk zelin lawmman dawng rawh se, tih hi ka duh dan a ni tih min lo hriatsak bawk dawn nia .

Technical Entrance Examination

Technical entrance exam hi kum 1999 atanga neih tan a ni. He mi hma lam zawng hi chuan pawl 12 board exam a mark hmuh a zirin seat hi sorkarin a sem mai thin. Heng hun lai hian zirlaiten mark ren lo South India board lam kan bawh nasat lai a ni a, mahse entrance exam buatsaih a nih tak hnu kha chuan board exam a mark hmuh teuh teuh kan awmzia a nei ta si lova, south India lam kan bawh nep ta deuh.

A kalphung

Kum tin exam kalphung hi tih danglam ve hret hret a ni. Tunhma chuan exam pangngai angin essay type te kha a awm duah thin a, mahse tunah chuan objective type (MCQ) vek a ni tawh a ni awm e. Tin, a tir lamah chuan English leh GK te pawh kha a tel thin nghe nghe.

Medical leh engineering lam hawi zawngin then a ni a. Medical duh chuan compulsory subject pahnih- physics leh chemistry bakah biology an exam a ngai a, engineering lam duh tan physics leh chemistry bakah mathematics exam a ngai thung. Tin, a duh tan chuan biology leh mathematics hi a exam kawp theih tho bawk. An lo tling ve ve anih chuan duh zawk thlang thei dinhmunah an ding tihna a ni mai.

Medical stream lamah hian – MBBS, BDS, B.Pharm, BVSc., BSc (Nsg) etc te a thlan theih a. Engineering stream lamah chuan – B.Tech/B.E leh B.Arch te an ni tlangpui. Tichuan, exam a tih that dan indawt (merit list) in seat hi candidate tling te khan an thlang mai thin a ni. A tlangpuiin MBBS hi medical stream lam a top choice anih avangin seat chang tur chuan a ti tha pawl nih a ngai tlangpui. Mahse topper khan BDS lo duh zawk tlat sela, MBBS kher nilovin BDS kha a thlang thei tho bawk.

Seat hmuh dan

Mizoram quota kan tih hi, Mizoram-ah medical college leh engineering college a awm loh avangin Central sorkarin seat hi Mizoram sorkar hnenah, Mizo mipuite tan a rawn pe thin. (College neite chu ni ila quota hi kan buaipui bik lovang. Kan thenawm Assam pawhin Medical college pathum lai an neih avangin state pawn khawi hmunah mah quota an nei lo.) Hei hi hlawm hnihin a then theih a – Central pool ti a kan hriat (eg., Delhi, Guwahati, Udaipur, Lucknow etc etc) leh NEC kaltlanga kan hmuh (RIMS, Imphal) te an ni. Central pool hi kum tin a danglam ve hret hret thin. Tin, NEC quota kan tihah hian Assam Medical College, Dibrugarh-ah seat khat a rawn tel ve thin bawk. NEIGRIHMS, Shillong hi kum hnih-khat kal ta mai atanga function tan a ni a, hetah hian seat thum kan nei (NEIGRIHMS hi central pool nge NEC hnuaia awm ka hre bik chiah lo )

Buaina

Zirlaite tana buaina awm thin pakhat chu, NEC quota a chian mai theih laiin, central pool lam hi a fel har deuh hlek thin a, hei hian counselling a tibuai fo mai. NEC quota a RIMS-a kal tur te tihfel hma an duh thin laiin, central pool lam seat a la chiang thin si lova, a kum hmasa lam a seat neih dan ang khan counselling neih chang a awm fo. Mahse a tak a lo thlen meuh chuan a lo inang leh chiah tawh thin si lova, insiksawi a ngai leh ta thin a ni.

Seat hi mimal sawi chhuah theih a ni chiah em?

Ka tawng lo haw lo sela, mithenkhat mizoram pawh la pel lo, politician te thusawi apiang zawm vek tur emaw ti leh a taka medical college pawh la hmu lo tan chuan a awihawm thei maithei. Mahse kei chuan ka ring lo bur. State dang ami lehnghal Mizopa in Vaipachal hnenah, “Ka pu, khawngaih takin seat min lo pe ve”, tiin a lo dil pawh ni se la, a theih hi ka ring thei thlawt lo. Mizoram technical entrance exam beitute hi sang an tlin na a la rei lo. Chutihlaiin AIIMS a seat 50 lek inchuh khuan mi nuai chuang fe in exam an pek thinna hi a rei tawh. Ngaihdan i siam thiam mai em?

Private college thenkhat a nuai 20-30 vela seat lei theih te hi chu thuhran. Heng hi chu mizoram quota a ni lo hrim hrim a, mimal thu liau liau a ni. Mizoram qouta tur a rawn kal tawh chu Mizoram sorkar ta a ni tawh a, a sem danah pawh an thu thu a ni tawh mai. Helai tak hi ka ngaihdanah chuan a flaw awmna lai chu a ni. Sorkar official lal ve tawk tak , thil ti thei ve deuh khan a duhsak zawng tan a lo dah ru thei tlat. (A chian zawk nan entirna pakhat ka sawi ang a, mimal inbeihna lam a ni lo ka tih tawh kha).

Hman deuh a politician fanu pakhat, merit list a 100 hnuai lam ami in seat tha ber pawl a chan nawlh tum pawh khan an mahni nawr chhuah anga sawi anih tawh kha. Tichuan chu college, seat khat kan neihna thinah mi pahnih an kal ta a, mahse ka lo rin lawk ang ngeiin a kum lehah pawh pakhat aia tam bawk chu college ah chuan state in seat kan hmu leh tho. Thudik hre phak ve tawh hek lo, ka phak tawk rinthu kan lo kalpui ve nawk nawk a. ‘A kum hmasa khan seat kha central lamin an rawn tipung a, mahse kan hotuten duhsak zawng thun nan an lo hup bet anih dawn hi, chuti nilo se a kum lehah khan seat khat tho rawn pek leh awm tak’, te ka ti liam ta mai mai a.

Vawiin Vanglaini chhuak hi in en ho teh ang u. “Hetih lai hian, MZP Vice President, S Lalrinawma chuan, CMC-ah medical college nei lo state-te tan state sorkarin a pawmpui chuan seat pakhat hmuh theih a nih thu a sawi a; Caroline J Lalhruaitluangi pawh Health Department Addtional Secretary hminga lehkha thehluhsak a ni a, CM leh MP hlui Dr C Silvera ten an recommend thu leh, CMC-a seat hmuh dan chungchangah hian document pawh an neih thu a sawi bawk”.

CMC Vellore atanga seat lo kal khi a chunga kan sawi tawh ang khian, central atanga seat kan hmuh dangte nen a danglamna a awmin ka hre lo. Kum danga seat kan neihna thin, Maulana Azad Medical College, Delhi aia an rawn pek a ni mai. Entrance exam leh merit list hi engvanga nei nge kan nih, kan tih chuan, ‘Heng college-a Mizoram qouta a zir tur mithiam tak tak kan thlan chhuah theih nan’ tihna a ni mai.

Chutia merit list ang zela seat sem anih hnuah, khang candidate te khan sorkar lehkha, ‘He mi hi in college-a Mizoram aiawha rawn zir tura kan thlan chhuah (recommend) chu a ni e’ tih lehkha keng khan an in report ang a, medical fitness leh thil dang a an tling anih chuan an lo admit mai dawn a ni. Khang college hotute tan mizoram technical entrance result khan awmzia a nei tawh lo. Mizoram sorkar recommend na lehkha a neih a, pawl 12 science pass na certificate a neih phawt chuan tupawh kal se an lo admit mai ang. Mahse chutiang a kan tih chuan entrance exam leh merit list hlutna leh tulna a thai bo vek dawn tihna a nih chu.

Zawhna

Rilru a zawhna lo awm ta chu – mimal beihna vang liau liau a central in Mizoram sorkar a rawn pe tihah hian eng ang takin nge an beih? Central lamah minister te leh midangte mimal takin an zuk dil tihna em ni? Mizoram pawh chhuahsan lova Health Dept. Secretary, CM leh MP hlui ho recommend na lehkha neih ringawt kha ‘bei nasa’ tihna a ni thei dawn em ni? Chuti anih te chuan candidate dang ho pawh hi merit list-ah sang viau mahse Mizoram sorkarin a ‘recommend’-na lehkha tel lo chuan an in admit thei ngawt bik lo. Tin, a tir a thil dik lo lian tak hai chhuaktu MZP hruaitute an fakawm viau rualin, tunah thawm an nei tha ngam ta tlat lo mai hi a mak ka ti deuh. Thil awmzia hre chiang ber tur a ka ngaih te an ni asin mawle.

Chuvangin, rank 283-na in seat tha ber a chuh tlat hi thil dik ni thei in ka hre lo. A Pathian thu lo ka ti hle bawk. Mithiam zawk leh tling zawkte duhsak nachang kan hriat loh fo chuan kan hmakhua hi a eng tak tak thei lovang.

(Kan belh leh lawk . CMC Vellore a Kohhran sponsor seat leh Mizoram quota hi hriat pawlh kan awm nual mai. CMC-ah khuan Kohhran leh pawl sponsor te tan seat 75% hi kum tin reserved a ni. Hei hi Mizoram atang chuan Kohhran (eg., Synod, Baptist etc) sponsor na in a tlin theih. Entrance exam CMC in a a buatsaih exam zawhah personal interview hmachhawn leh a ngai.

He seat hi tu te tan mah fixed a ni lo. India ram pumah sponsor thei Kohhran / Pawl za chuang an awm. Chung ho candidate te chuan khi 75% khi an inchuh tihna ni a, Kohhran / Pawl khat sponsor candidate te an tih that phawt chuan pakhat aia tam pawh a tlin theih a, pakhatmah tlin loh pawh a theih ve tho bawk. Hemi kal tlang hian Mizoramin seat permanent in kan nei lo!! Tun a Mizoram quota a lo lang seat khat hi chu a bang 25% atanga lo kal ani e.)

Similar Posts:

• CMC Vellore ah seat inchuh
• RIMS ah seat 7 chauh kan nei tawh
• Carolyne-i Mizoram State Quota in lut dawn lo
• MBBS College Thenkhat Part II
• Ka thil vei (Thuneitute beng thleng thei hram se ka va ti em!!)

Recent Posts:

• Sex chungchanga zawhna tlem
• Carolyne-i Mizoram State Quota in lut dawn lo
• The Mizoram (Revision of Pay) Rules 2010
• Kan damdawi leidan hi!!!!
• Kutdawh

This entry was posted on Friday, August 6th, 2010 at 7:30 am and is filed under Education, Mizoram, Opinion. You can follow any responses to this entry through the RSS 2.0 feed. You can leave a response, or trackback from your own site.