mi(sual).com

Phailam Pan Ngai Lovin Aizawl-ah Cancer Enkawl Theih Vek A Ni Tawh
Aizawl, Nov 08 : Cancer enkawlna chungchangah phai lama an tih theih angte chu Mizoram Aizawl Civil Hospital-ah tih theih ve vek a ni tawh a,phai lama inenkawl chu sawrkar leh mimal tana senso tihautak mai a ni. Cancer enkawlna lamah Aizawl Civil Hospital chuan hma a sawn hle a, department hrang hrangah cancer lam bik trained chhuak tawhte an awm tawh bakah damdawia inenkawlna (chemotherapy) te, a zai lam pang (cancer surgery) te, a hem (radiotherapy) te leh cancer na chhawkna (pain relief and palliative care) te a tih theih tawh a ni. Cancer na chhawkna injection bakah tunah hian a mum chi chah mek a ni.Heng thute hi Regional Cancer Centre, Aizawl leh Directorate of Hospital & Medical Education, Mizoram-in nimin Nov. ni 7, National Cancer Awareness Day hmanna Aizawl Press Club-a an buatsaihah sawi chhuah a ni. Dr.D.Baruah, Addl.Director, Hospital & Medical Education chuan Aizawl Civil Hospital chu India rama Regional Cancer Centre 23-naah kum 2003 khan pawm a niin hmar chhakah pahnihna a ni a. RCC a lo nih takah hian cheng nuai 150 man khawl hrang hrang leina sawrkar laipuiin a rawn pe tawh a, cheng nuai 80 Zemabawka Cancer Ward sakna tur a rawn pe tawh bawk a ni a ti a. Tunah hian project eng emawzat khawl leina tur te, cancer awarness atan te, Day Care Centre sakna turte thehluh leh tawh a ni a ti.
Aizawl Civil Hospital-ah hian cencer hmuh chhuahna khaw tha tak tak -CT Scan, Mammpgraphy (hnute cancer enna), bronchoscope (chuap enna), endoscope hrang hrang, pumpui, pumpui dawt, ril, hrawk, hnar, ka,etc. enna) a awm tawh a, chhul hmawr cancer enna (pap smear, colposcope) leh cancer confirm-na hrang hrang, biopsy, FNAC, Bone marrow (thling) exam te a tih theih vek tawh a ni.
Dr.Eric Zomawia Principal Investigator, Cancer Registry chuan mihring tam dan a zira cancer vei chhinchhiahna (Population Based Cancer Registry, PBCR) chungchang sawiin Indian Council of Medical Research-in an siam chhuah thar “National Cancer Registry Programme – First Report : 2003-2004” atangin Mizoram dinhmun a sawi a, Mizoram chu khawvel leh India rama cancer tamna champion a ni a, pumpui, chuap cancer-ah champion a ni bawk a, cancer awmtirtu meizukah pawh Mizoram chu champion a ni bawk a ni a ti. Mizoramah mipaah pumpui, chaw dawt, chuap leh hrawk cancer an tam hle a, hmeichhiaah chuap, pumpui, chhul hmawr leh nute cancer an tam hle bawk
Radio Oncologist Dr.Zothankima chuan cancer 80% chu hriat chhuah hma a nih chuan a dam thei a ni a ti a, cancer lo lan chhuahna hrang hrangte a sawi a, cancer hi tihdam theih chin a awma, mahse, a enkawlna kawngah chuan chintawk a awm lo a ti thung. Mizorama cancer vei enkawlna, a hemna leh damdawia an enkawl dante a sawi a, Dr. Saia. Cancer Surgeon chuan Aizawl Cicil Hospital-ah ngei cancer tamtak an lo zai tawh dan te ngaihnawm takin a sawi.
Mizoramah heti tak maia cancer vei tam a nih avangin cancer laka inven a pawimawhzia uar taka sawi a ni a, zuk leh hmuam, thil rep, um leh al lam ei nasat lutuk leh cancer siam thei dang lakah invawn fimkhur a pawimawhzia uar taka sawi chhuaha ni a, National Cancer Awareness Day thupui “Cancer lakah a inven theih a, tihdam theih a ni” tih uar taka sawi chhuah a ni.
Khual lian Pu H.Darzika, Joint Secretary, Health & Family Welfare chuan doctor-ten cancer chungchang an sawi atangin an hna an lo thiam leh inpek nasatzia a hmu a ni a ti a, ropui a tiin a fak. Hetianga Mizo tawng ngei maia natna chanchin an sawi leh natna veite pawhin an nat dan engkim an hrilh theihna doctor-te hi hlu a ti a, mahni service leh promotion pawh ngaihsak lova hna thawktute an ni a ti.
He National Cancer Awareness Day hmannaah hian chanchinmite an tel tha hle a, Dr.R. Lalzauva, Medical Superintendent, Civil Hospital chuan kaihruaiin Dr.K.Lalbiakzuala, Senior Specialit & Head of Surgery Department chuan lawmthu a sawi a, Dr. Lalbiakzuala chuan cancer laka inveng lote chu a rethei hlei hlei an ni a, an ei a, an in a, an thial ten ten mai a ni a ti a. Cancer sawi avanga hlau hlum dawna awm tur a ni lo a, kan velah hian cancer chauh ni lo hlauh tur hlir a awm a, kan fimkhurin kan inveng tur a ni a, cancer hi natna chi hrang hrang a ni tih hriat bawk tur a ni a ti.

Lunglei-ah Hnamdangin Hnamdang Sponsored
Mizo Students’ Union Regional Hqrs. Lunglei chuan RTP Building, Venglai hnuai ber (ground floor)-a Cement, Rod etc. zawrhna dawr chu Dan lova dawr hawn a ni tiin FIR an theh lut a. Hei hi Lianpuii Cement dawr a ni. Lianpuii hian a pasal Abdul Rahib (alias Badal) bakah midang 4, Bhola Laskar, Abdul Shahib, Nurul Uddil leh Abdul Hague, Karimganj te chu ILP a sponsored a. Police ten chhui nghalin dan dik lovin ILP a sponsored tih an hrechhuak. Lianpuii hi Hmuntha, Myanmar lam mi niin, trading permit ah a pasal Abdul Rahib ti lovin, Chharliana tih a hmang a. Aizawl Chaltlang ni-a insawiin, Thakthing-ah dawr an nei tih a sawi. Nimin piah khan Licence leh Document te laksak vek a ni bawk. -Ralvengtu

Cancer Essay Ziak Thiam Zirlaite Hnenah Lawmman Sem
“Cancer Lakah A Inven Theih” tih thupui hmanga Regional Cancer Centre, Aizawl Civil Hospital-in essay inziahsiakna a buatsaihah chuan University-ah Mizoram University ve ve Hmingthanzuala Colney chu pakhatna leh James Ramdinmawia pahnihna an ni a, lawmman Rs.2000 leh Rs.1500 an dawng. Saptawng ve vein an ziak a ni. College levelah Lallianzuala, Pachhunga University College pakhatna, B.Lalhmingmawia, T. Romana College pahnihna, H.Lalsangliana, Hrangbana College pathumna an ni a, Mizo tawng vekin an ziak a, lawmman Rs.1500, Rs.1200 leh Rs.1000 an dawng. High School leh Higher Secondary School levelah pakhatna C.Vanlalchhanhima pakhatna, Lalhruaikima pahnihna, C.Lalduhkimi pathumna an ni a, an vaiin St.Paul’s Higher Secondary School vek an ni a, lawmman Rs.1000, Rs.800 leh Rs.500 an dawng. Heng essay ziak thiamte hnenah hian lawmman hi nimina Aizawl Press Club-a National Cancer Awareness Day hmannaah khual lian Pu H.Darzika’n a sem. College leh High/Higher Secondary School levela ziakte hian Mizo tawng vekin an ziak.

MSEU Intuaithar Training
Mizo Students Evangelical Union (MSEU) chuan nimin piah atang khan vawiin dar 10:00 a.m. thleng awh turin Synod Conference Centre, Aizawlah intuaitharna training vawikhatna an nei a, Mizoram hmun hrang leh Aizawl atangin institution 16 atangtein an kal a, mi 43 an riaklut, Mi thiam hrang hranmg atangin thupui ngaihthlak leh sawihona an nei.

2nd.IR Bn. Hlawh La Lo
ZNP chuan Mizoram atanga 2nd IR Battalion Chhatisgarh-a kal tate chuan tun thlengin hlawh an la thei lo tih sawiin Mizoram sawrkara an hlawh chu khawla Chhatisgarh-a an hlawh chu ring tura tih an ni laklawh si a, pawisa nei lovin an buai mek a ni an ti. Nimin khan press release chhuahin ZNP chuan sum nei lova phai hmun hrehawm taka awm hrehawm turzia ngaihtuahin Mizoram sawrkar chu a rang thei ang bera IR Battalion-te manganna chingfel turin an phut.

3rd.MAP-in Lawm Dawn
Naktuk dar 1:30 p.m.-ah hian 3rd.Bn.MAP chuan an hmunpui Mualpuiah an Raising Day vawi 14-na, Independence Day 2006-a Football Champion an nih leh an Parade/Playground thar lawmna an nei dawn a, Home minister Pu Tawnluia khual lian, Pute Z.H.Ropuia, Minister, Lalhmingliana, MP leh R.Khawpuithanga, MLA, Adviser to CM te khual zahawm an ni anga, tlaiah ruai an theh (bara khana) ang.

MNF-ah Lawmlut
MNF press release chuan nimin khan Chief Minister Pu Zoramthanga’n Hnam Runah mi thar duhawm tak tak MNF-ah a lawmlut tih sawiin hengte hi Mizo Students Union (MSU) hruaitu hlun tak tak, lehkhathiam leh puitling tak tak rual an ni a ti. MNF party chuan kiam lam aiin pun lam a pan zel zawng tih sawiin bye election dawnah pawh khan Chawngte bialah Minister Pu H.Vanlalauva leh MNF Gen.Hqrs. Gen.Secretary Pu R.Lalhnuna chuan MNF-ah party hrang atangin mi thar 115 an lawmlut bawk niin a sawi. Mizoranm mipuiten MNF party leh a sawrkarah rinna an la nghat nghet hle a, party mal innghahna tlak berah an ngai chho tawlh tawlh dawn niin a lang a, arsi a la eng zual zel dawn a ni a ti.

Tuizem Puak Darh
Nisapui khuaa PHE Tanky siam thar Rs.16,00,000 hman ralna chu tui an han thun chhin a, he tuizem hi a puak darh vek tih thu dawn a ni a, thu dawnnain a sawi dan chuan he hna hi work order pawh awm lovin MNF Block hruaituten an President hovin an thawk a ni.

ZIDCO-in Thir Zuar Dawn
Steel Authority of India Limited (SAIL) chuan ZIDCO chu kum 4 chhung atan Aizawla Consignment Agent atan a ruat nghet ta a, ZIDCO hian rei lo teah thir tha chi hralh chhuah tur a nei ve dawn ta a ni.

Tui Tla Ruang Hmu
Hnahthial Peniel Venga Pu Vannghaka fapa Lalnunpuia,22 nimin piah chawhnu lama Chhimtuipui kai Darzo kai bula chesual ruang chu nimin chawhnu khan hmuh a ni. Lalnunpuia leh a thiante pahnih thingtuah laa kal chu Chhimtuipuiah lawnglengin an inkar a, an lawngleng hi a let a, an vaiin tuiah an tla a, Lalnunpuia hian tui a lo hleuh thiam ve loh avangin a chesual ta a ni.

Synod EC Thukhawm
Mizoram Presbyterian Kohhran Synod Executive Committee inkhawm vawi 208-na chu nimin atanga Synod Moderator Rev.Chanchinmawia hovin Synod Committee Room-ah tan a ni a, naktuk thleng a awh ang. Thu rel tur an ngah hle a, 70 lai an nei niawmin All India Radio chuan a puang. Member 99-ah 83 an tel a, an thu ngaihtuah tur zingah hnam dang hnena pawisa khawn chungchang a tel.

PIC Lawngtlaiah
PIB chuan Inter Media Publicity Coordination Committee (IMPCC) leh Mizoram sawrkar nen tangrualin Lawngtlaiah Public Information Campaign (PIC) vawihnihna tun thla ni 14 atangin a buatsaih dawn a, he PIC hian ninga chhung a awh ang a, Agriculture Minister Pu H.Rammawi chuan a hawng ang. PIC hi Aizawl District-ah Sihphir leh Reiek-ahte neih a lo ni tawh a ni.

Similar Posts:

• Civil Hospital Cheina tur Rs. vbc 6.50 a bo
• Ropeway kan sawi ngun bawk a ..
• Boxer Nula Jenny ropui taka hmuah a ni
• CM in Dawrpui Veng a lo tiam em?
• BJP in candidate 8 siam dawn

Recent Posts:

• Mizoram Congress Party Manifesto Progress Report
• Chhimtuipui hleuh kai lai
• Machhana Diary
• Ka ar thai
• Gettysburg

This entry was posted on Wednesday, November 8th, 2006 at 12:29 pm and is filed under News. You can follow any responses to this entry through the RSS 2.0 feed. You can leave a response, or trackback from your own site.