Frankfurt International Airport Terminal One atanga ka chhuak chu ka thiannu Sangeeta leh a German bialpa in minlo hmuak a. Airport hnuai-a Express Train lain Heidelberg pan chuan kan kal a. German sana-ah chuan zinglam dar 8:40 alo ni tawh a. Breakfast te ka’n ei te te hnu chuan Prof Axel Michael-a hmu nghal in chawhnu lam a kan program te kan enkual nghal a.A tlai dar khatah German a India Ambassador Sudhir Vyas in Philosophy and Intellectual History Chair hawnna nei a.Hei chair a first holder Prof.Dhruv Raina(JNU) mi in inaugural lecture a pe bawk.Kei pawh in vote of thanks sawina hun ka nei ve a. Hei programme hi khawvel pumpuiah live in an pe chhuak.
Ka zuk kalna Heideberg hi Frankfurt atanga km 80 vel a ni a, University khawpui niin a mi cheng 450000 vela hmun nga a thena hmun khat vel hi zirlai an ni. Heidelberg kulh hmingthang tak te, kum 600-a upa Church of the Holy Spirit leh thildang hmuhnawm entur tam tak a awm a, kumtin mi maktaduai thum leh a chanve velin an tlawh thin anga chhut a ni. Heidelberg University pawh hi University hlun leh tha ber pawl niin kum 1368-a Rupert Elector Palatine a din a ni.
Mi ropui leh lar tak tak a lo chherchhuak ve tawh a chung zingah chuan G.W.Friedrich Hegel, Karl Jaspers, Karl Otto, Somerset Maugham-te hi han sawi mai theih tur an ni awm e. Heidelberg University chhuak mi pariat ten Nobel Prize an dawng tawh a ni. University Museum tha leh changtlung tak an nei a, Zoological Museum, Botanical Garden, Collection of Egyptology, Student Prism and Collection of Facsimile Classical texts etc. te hi a lar zual an ni.
A khawchhung ka fan kual vel naah chuan Museum te, thil thleng chhinchhiahna (memorial for events) leh thlalak chi hrang hrang te kawtthlerah hmuh tur a awm teuh a. Hetiang deuh hian Mizo te pawh hian tive ta ila a tha angem ? Thangthar zel ten a kan Mizo history kan hriatreng theihnan leh kan pipute hun laia thilthleng te kan theihnghilh loh nan a tha viau ang. Hmun hlui leh thilhlui, kan pipute sulhnu kan hmuh phak ang ang vawn that hi kan culture hriatreng na tur pawimawh tak a ni. Aizawl-a State Museum hi a tha tawk lo em em a. ‘Kan pi leh pu hunlai’ tih hla nalh tak takin sa thin mah ila, hnamdangte hmuhtir tur enge Mizo te hian kan neih le ? Sum lama harsat na hi kan chhuanlam a ni maithei a, mahse sum tam lutuk sen ngai lovin uluk taka ngaihtuahin hma kan la thei a ni.
Sulhnu pawimawh, entirnan – Selesih Sangsarih khaw hmun hlui te, kan pipute hun lai a thil hmingthang lo thlen/awm na hmun (rulchawm kua) te, kan mi hmingthang Khuangchera, Vanapa leh Taitesena, Ropuiliani etc. te leh tun hnu deuhva mi Pu Laldenga, Pi Lalsangzuali, Pu James Dokhuma te leh midangte chanchin leh an ro vawnthat te hi kan ngaih pawimawh a tul hle bawk. Chu chuan kan thlahte zel tan kan mi hmasa te hriatrengna leh ngaih hlutna a pe dawn a ni.Kan History ngaihhlutna chuan thilthleng tawh leh hriatreng tlakte hriatrengna leh chhawmnun tlakte chhawmnun zelna min pe dawn a ni.
Mi 24 telna ‘Museum of Antiquity, University of Heidelberg ah sawi hona kan neihna ah kei pawhin sawi karlak chuan Lunglei-a District Museum a ethnological collection anneih ho ka sawi tel a chu an phur khawp mai a. Zawhna chi hrang hrang – Zu nopui, Tuibur, Paikawng etc. chanchinte min zawt a, ka lo inbuatsaih lawk loh avangin an duh ang chuan ka chhang pha chiah loin ka hria. Dr.Herman Pflug-a’n German Tribes thenkhat in an culture vawn him zelna tura an hmalak dan te min hrilh bawk a, ngaihtuahna thar tam tak min pe a ni.Midang pawhin mimal bakah sawrkar nilo midang leh pawlho in a hma kan lak dan te min zawt hlawm a, mahse YMA hmalakna thenkhat leh K.V. Paradise Pu Chhawnthuama sak tih mai loh khi chu han hrilh tur ka hre tlem khawp mai.
Chuvang chuan Sawrkar ani emaw, mimal leh pawlho ang pawh a heng kan hmun hlui leh hriatreng tlak thil la vawnhim theih te hi kan vawnhim a hun ta khawp in ka hria. Mipui te thlawhtheih leh entheih tur a siam in mi hip thei ang bera kan siam a ngai. Kan pipute sulhnu ropui tak tak te hi nakin zelah pawh rampawn a mite hnen atanga kan sum lakluhna hnar pawimawh tak ala ni thei a ni. Heng atan hian mithiam kanneih te leh hetiang lampanga tui mite zirlai leh thalai te pawh huamin, an ngaihdan leh an idea te zawta rawtna siam tir te pawh thil tha tak a nih ka ring.
Europe-ah te, America-ah chuan Museum hi sumdawnna pawimawh takah an hmang a,Museum chhunga mi hralh theih awm te chu ( a ang/lem siamin) hralhin thlawhtu tamtak te leitheih turin an siam thin a ni. Chutiang deuh chuan keini pawhin kan Museum etc. maintain nan te (a man tam leh tamloh chu thuhran nise) hralh chhuah theih chi kan siam hi a pawimawh viau a ni.
Hetiang atan hian Media ten hma an lak a ngai a, mipui hriat theih leh hetiang lama kan thanharh theihnan chanchinbu leh media thildang hmanga kan puanzar that a ngai bawk a ni.Heti ang nei turin tu pawhin tun aia sense of history kan neih hi pawimawh hle in ka hria.
By_ Dr.Martin Chhangte
Camp:Heidelberg(Germany)
Similar Posts:
- Black Hill Regional Park
- Zirtirna diklo a nih kan hre lo : MZP
- Impact of Ten Commandments with Kan Pipute
- Vangchhia-ah i zin ang hmiang…
- Elevated Road kan siam ang maw?
July 13th, 2010 at 5:17 pm
@H.Vangchhia, hei article hi ka pa Martina, tunah Archelogical survey of India a thawk Englisha a ziah Mizo tawnga lehlin ani a, aziah angtakin accurate lo maithei. A chhan chu englsh a awm thenkhat terms Mizo tawngah awm si lo va. Mahse izawhna thenkhat abikin last para chu han hrilh fiah theih ka beisei. I tuina lamtak ani awm a, lawm awm e.
[Report abuse]
July 13th, 2010 at 5:18 pm
50 Pu Hv # I handwriting a chhe lo ve, i ziak chhuak dap peih khi, i taima hle mai.
[Report abuse]
July 13th, 2010 at 8:28 pm
sillyBoy, Zoram Vartian tih bu hi kal pah mai mai pawh in lo chhiar ve chhin teh. Mahse ka campaiqn a ni lo a ni aw…
[Report abuse]
July 13th, 2010 at 9:34 pm
jnu ho chu an va in daih ve mole
[Report abuse]
July 14th, 2010 at 8:15 am
jnu hi hyderabad a mi khu a mi…jntu nen in ang em
[Report abuse]