mi(sual).com

Mi te chuan tleirawl sual an nei a, kei ve thung chu ka naupan sual kha tleirawl sualin a chhunzawm nghal, buaipui tham ka tling takzet thin a nih kha maw! Ruihhlo bawiha ka tan chhung kha kum li chauh a ni, kha kum reilote chhung khan ka hnawksak hman hle tih ka pha lo, kum li chhung chauh kan ti tak nain kha ka thiltih tha lo tak tak khan ka damchhung zawng hian mi zui zel ang a, tichuan a kum telin ka chawh tawlh tawlh dawn a nih hmel e, chuti ang chuan kum 20 em pawh ka tlin hma hun reilote chhung kha ka hmang a ni. Mahse, nun beidawng leh chautak chu Lalpa’n min chhanchhuak ve hlauh mai. Lalpa chu fakin awm mawlh mawlh rawh se.

Ka pi-in rum fe fea mi melh lohna pawh a lo rei ve leh ta, Bathroom-ah pawh ek chhuah zual chang deuh paw’n a thut rei ve theih ta e, thawven thlak tak a ni. Khang nunhlui liamhnu te kha ka dawn kir chang hian, Mizorama mi fel ber berte an dah khawmna hmun Sethawn University Campus mawlh kha tu lawm loh hian mi la nuih tir vur vur fo mai, tah chuan alawm ruih ngawlveite tlangtin mualtin atangin kan fuankhawm a, tumah kan inhmusitin kan in nuihzat lo mahse kan dawheh tlang hlawm a ni.

Sethawn Universitya thla ruk awm tawh chin ngat hi chu an finphakar chalak dan hi chu a ni nghur mai zuk nia! University kan ti deuh kher a ka koh fiamna satliah mai a ni e, De Addiction Rehabilitation Centre tih zawk tur a ni, a awmna hmun khu Sethawn khua a nih avangin Sethawn kan ti mai a, student thenkhatte hi chuan fiamthu in University kan telh deuh kher thin.

Rorel palai te vang vek :

Ka chhungten fel min ti lutuk tawh a, awm botir zai min rel ta a, rorel palai an han in ko khawm nak nak a, ‘He pa sual ritphurh dah bo sak thei hi an awm em?’ tih chu an rorel Agenda pui ber a ni. An ngaituah vel chiam a, Jail-ah dah ang an ti ta! Karei leh! an inhnial bap bap a, a tha ang ti leh a tha lo ti pawl chu an inzat nuk mai mah se, misual vanneihna a kal tluang hlauh Jail em chu an hnawl ta, lawm avangin biangah mittui a luang lo chauh. ‘Gospel camping’ an ti leh Pakhat chuan “Naaa… a lut hnem tawh lutuk eng aang leh tak tak pek lo ang nge!” a rawn ti, a tlu leh ta lo hlauh, chu veleh kei ve teh lul rilruah chuan Pathian thu a rawn lang ve teh tlat chu thu chu ’Lawm fo rawh u’ tih te mai hi mawle, chutah an zingah chuan ‘Ka sual ritphurh paih bo thei tur awm mi’ an in zawng leh ta, Rorelna room chu hlauhthawnna avangin dar chanve lai a rehthuap a, ka hma ngai ve tak taka ka hriatte pawh khan tuman ‘Keiman’ an ti hauh lo, in hrang atang chuan min hmangaih viau mahse an in chhunga temporary member lek atan pawh min lo duh awzawng hlawm lo, mak thei ngei mai.

Chairman a rawn ding ‘Chutia tuman inenkawl duh si loh chuan, Sethawn-ah khuan dah mai ila tha kan ti tlang em?’ a rawn ti, chu velah rorel palai ngawi thiap chu bazar lun vanglai ang mai an lo ni ta a, tha ti hmasa ber tu nih inchuh niawm fahran hian ‘Kei chu tha ka ti khawp mai’ an ti tliar tliar hlawm a, thenkhat chuan ‘Kei pawh’ an lo ti ve bawk a. An hmel kan en hlawm a, ‘Ka sual ritphurh paih bo thei tur awm mi’ an in zawn lai ai kha chuan, an hlim hle tih chu kei misual lung phakar tak chuan a hai hauh lo.

An vai chuan an haw dawnah ‘I tana thatna tur vek a ni’ an han tivei luam tak nain, ka rilru tak chuan ‘I ti tak tak maw?’ han tih hlawm hram kha ka chak khawp mai a mah se, beram a hmul mettu hmaa a ngawi reng ang hian ka ngawi tlat a, ka ka reng ka ang lo. Tlai khua a lo ngui ruai a, kei pawh ka ngui a, zan a lo thleng ta, a tuka Sethawn lam pan tur tih inhre ran chunga laikhum thlehnem han belh chu e, khum chu tun daih a chakawm zawk mah, ka tan vanpui mai pawh nilo vanthengreng zawng zawng khi a chim a ni zawk. Rorel palai te vang vek.

Wall of Salvation :

Ka tel lova chun ni hman chu an chak tawh ngang a ni ang e, vai Pathian chu an thawh khalh em lova mah se, hmai a phih hman awrh awm e tihchuan, ni danga ka hriat zen zen loh aw nem leh zaidam tak chuan ‘Bawihte tho tawh rawh’ a rawn ti tlat mai, ‘karei leh! Pathian nge, ka lo mu hlum reng em ni?’, ka mang hriat deuh bawk nen ka han inthin harh nak chuan muthlum law law ka nap tak zet a, John Bunyan-a ‘Kristiana vanram kawng zawh’ ziak tupa chuan a hming vuah se chuan ‘Lei dawthei’ a tih ka ring, chu chu lo niin ka mak ti leh lawm rilru hmel tak pawh chu thinrimna leh lungngaihna nen a inchawm pawlh nuaih ta a nih kha.

Ka pa chuan a Gypsy ka nu ai pawha a duat chu an ti rum vut vut a, ni dangah pawh khalh chu sawi loh chuan chi rual loha ka lo enah chuan, khual zahawm ang maiin mi chuan tir a, chu mai ni nang kawngkhar mi hawn. Kan kal ta tak tak, kan tlan zel a, an tawngtai tha deuh nge ni, ka duh aiin kan tlan tluang a, han chhe deuh zeuh se pawi kan tih loh teh reng nen, kan thleng dawn ta mai. Sethawn khawchhung chu kan lut tan ta a, ‘Geat Wall of China’ kan thleng ta mai emaw ka ti rum ruma mah se, a ni lo D.R.C ngei mai hung na a ni zawk, Jail bang ang chiah sang tak leh chhah tak a ni reuh a, a kawngkhar pawh Jail kawngkhar nen adanglam lo, thir tuiek rawng a ni a, thir vek a ni reng a, a sir deuhah chuan mihring dah theih natur awm tawk vel hi a kaw hlek a, chu pawh akhar theih zui a, achhung lama awm phei chuan anhawng lai chu nan fuh viau a ngai a ni awm e.

Ka chhung te chuan atul apiang an tihzawh thuai thuai hnu chuan, Gate vengtu chuan min Welcome tih hriat fahran hian kawngka ngainatawm loh ber mai chu an hawng ri tuarh tuarh a, ka hreh lutuk chu tlan chhuahna a awm beiseiin kan hawi kual dun dun a, ka riru te te chuan ‘Aluh chu a awlsam, achhuah leh zawng aharsat dawn hi’ ka ti a, ka lut tep tawh tih chuan ‘Atawp nan aw’ ti rilru pah chuan Wall sang tak chu kan en leh hram a, ‘Wall Of Salvation’ tih chu rawng varin alo in ziak kulh a, ‘Tak tak ni maw’ tih pah chuan ka lut ve ta a.

Pa takin le :-

Mi inang lo sa inang lo tak tak chu an lo phe suau suau a, lut thar ka nih avang chuan min lo melh hrek hrek hlawm a, pakhat chuan ‘Hremhmunah kan lo lawm a che’ alo ti a, kei inti pa ve tak mai chi ka lo nisi a, ‘A ni maw, ramhuai arawn thlen belh a nih hi’ kan ti hram a, insual mai tura ka inrin teh reng nen, ka riahna hmuna min hruai tur lek alo ni a, ka mutbu leh thawnhnaw te chu ka hah hlau niawm takin mi la khaisak zui a, ka awmna tur lam chu min panpui a, Detox room an ti a, a chung rangva abang leh chhuat cement in ah chuan mi hruai lut a, tahchuan luttir chu awm phawt tur alo ni a, karkhat chhungin kan taksaa ruihhlo hnathawh la chambang awm leh min rawn thinglet thei thil chu, chulai hmunah chuan Doctor leh nurse ten an thiamna hmangin an tireh phawt thin chu lo ni in, azau si pawn chhuah ve min la phalsak si lo, an kalh tlat zel lehnghal, midang chimbuai phal ka ni loh avangin midang awmna atang chuan ava fal phian a, karkhat chhunga mahnia han chenna atan chuan ka duh aiin min duhsak mah mah ka ti hle mai.

Ni ka chhiar bauh bauh a ava han rei thin tak em, ka chak ber chu HUN siamtu hi hmuh a bawh leh tawp tawp hi ka chak ber thin. Karkhat chu aliam ve thei hram a, Sethawn ka awm chhung zawnga ka awmna hmun turah chuan ka awm ve dawn ta, Green, White, Yellow, Red, Brown in an lo inthen a, Green House ah chuan ka va awm ve a, House khatah an tam laiberin mi sawmpakhat te an lo ni thin a, ka awmtantirh chuan pasarih chauh kan ni, alut leh chhuak chu kan indawt zat reng a.

Hrehawm hi kan ti laileng khawp a, chutih nakalai chuan lutthar te chu an lo zaitir ziah zui a, tlai tin hi house te teah chuan Devotion kan nei ziah a, tahchuan minla zaitir zui, Guitar kan la a hreh tak chung chuan ‘Duh leh ka rui ang chu ka nun hi ka ta a ni’, tih hla kha kan sa vei awl awl a, thiam minti lem lo tih chu anhmel atang chu hai chi rual a ni lo, ka zai zova atawk tawh mai dawn emaw ka ti a, an duh duh chu min zawt zuia, ‘Farnu i nei em? Ahmel tha em? Makpa atan min duh em?’, tih vel chu addict rual ho chuan min han zawt vel a, chhechhawngate vai dawr an sawi ang chauh kan ni.

Ka awm chen tur kha thlaruk a ni a, calendar chu nitin mai chuan ka thai kauh kauh a, karhnih vel ka awmthleng chuan hrehawm hi ka la ti em em a, tlan chhuahpui tur ka zawng reng a, duh duha tlan chhuah theih a nisi lo, atawpah chuan chutia rilru hrehawm tak a awm ai chuan, ‘Ka awm ta sa sa nuam ti takin ka awm tur a ni’ tih chu thu tlukna ka siam a, ka rilru chuan ‘Thil sual i tih ngam chuan i tuar ngam tur a ni, Pa takin le’ ka ti ta a ni.

A nuam vei phian :-

Wall of Salvation in a kualkhung chhungah chuan Football field, Badminton Hall, Tabletenis, Volley Ball court, Basket Ball court, Boxing glove tet hnuang leh Criket materials vel chu a awm a. Chuti anga infiam ve thei lo Addict pan leh vung leng lung te chuan in lem leh Sonari siam, Coromboard leh Guitar te chu in awm tlei nan an hmang ve bawk, a in khel thei chin chu house te te a tangin kan inkhel reng mai a, kan inchawi thin te chu Ar, Sa tin, Tlai sa leh Artui sare tih vel a ni, kan tang ve thei thin teh a nia, kan chakloh hi chuan kan tap lo chauh chu a ni ber mai, kan indaih loh chang chuan inkhelh vek tur an ti a, a thenin Ball boat lehlam chauh an buntawk a, thenkhat buntawk nei miah lo lah bang lo, inkhel ngai lo kut leh ke vung leng lung inlenhleih nuaih mai te chu kan phut tel lo thei thin lova, an thinrim lutuk chu an inkhel tau nghawng nghawng a, lo chuh ve ai chuan goal tir mai hi an thlang zawk fo, buaithlak tak a ni.

A inkhela te hi kan han duai bik lo hlawm khawp a, Santosh Trophy lo khel ve zar zar tawh te, Mizoram ai lo awh ve fo tawh te leh 1st Division tih ang reng vela lo khel ve hrep tawh te an ni hlawm a, Tabletenis-ah phei chuan Mizoram number 1 kan kawl ran nghe nghe. Pawnlam mi te paw’n min rawn inkhelhpui fo reng a ni, Boxing an han khel ve thin hi chu bon turu tak a ni, field ah an inhnek mai a, Glove ahlui si athler pheng phung hlawm tawh a, chuti chung a anhan inhnek thin mai chu an kak nasa thin teh a nia.

K.T.P, P.Y.D, T.K.P, N.S.S, N.C.C etc..min rawn tlawh fo lehnghal a, inti thlarau mi tak tak lah an rawn inluh chhawk zat reng bawk a, ninawm ve tak a ni. Nula hmukhat ta chu, atu te pawh hi phuloh thasensiari an ni vek tawh mai a, Kolasib N.S.S in kan compound min rawn tihfaipui tum phei chuan tleirawl chhelo tak tak an tam si a, Ekhai… Sunday dress nena hmun tifai lawp lawp kha an tam mai a, kan riahna thleng thleng chuan min tihfaipui a, thenkhat an lo lai ringawt thul, kan senior te chuan kan che mawi lo palh ang tih hlau chuan min lo vil ve reng bawk a, kan phu suau suau hi a ni ber e. Chhungten min rawn tlawh tum a hmeichhia an rawn kal tel ve phei hi chuan, hmuh ve tumin thian thenkhat te chu an lo vir buai ve nasa mai thin a, azia lo thin khawp mai.

Karkhatah vawikhat Movie en zan kan nei a, kan vai chuan kan han enthap a, kan enzo ta maw tih chuan mahni house lamah kan lut khawm nak nak a, a seniour deuh te hi chu anthu fual a blue film an en thin a, mi dang mut vek tawh hnua house an rawn lut hi chu bathroom hi anpan hmasa tlangpui. Zing leh Zanah kan inkhawm ziah a, nilai zan thupui pawh kan sawi ho ve nak nak thin a, a nawi thei khawp mai. Chawlhni hi chu zing, chhun, chawhnu, zan inkhawm kan nei thung a, pawn lam mi ten min rawn inkhawmpui thin a ni.

Tudang reng pawlh loh keimahni hoa kan han inkhawm ve thin hi chu, pui tak a ni. Kanja vanga â hi kan kawla, sawi ang ang hian a awm a, thenkhatin an lo fuihpawrh, Sharing kan neih laiin arawn ding ve a, muang changa banpharin ring mangkheng hian ‘Kan boral vek dawn’ an ti mai chu, kan inkhawm hi a ho zo vek zel, thu hi aawmrei deuh tawh te hian an insawi chhawk thin a, pakhat sawi hreh lutuk ti lo ngam si lo chu pulpitah arawn ding chhuak ve a, pawr tak hian ‘Misual awmkhawm kan ni a, chuvang chuan engmah sawi tur ka hre bik lo’ tih zawng hi a sawi a, rang em em hian a chhuk leh daih bawk si, pumna tungin kan nui anih kha.

Thenkhat damlo hi kan Doctor hnenah an inentir ve thin a, kan Doctor lah khan engtin paw’n awm sela, ‘Digen’ chiah hi alo chawh hlawm thin a, house an rawn thlen phei hi chuan an thinrim lutuk kha an dam vek zel niin ka hria. Chaw kan han ei a kan lo bengchheng deuh a niang, awmrei ve tawh tak mai pate zet hi arawn che laih a, ading chu a ni der a, inti pa zet hian ‘Ni ve riau a inhria inawm a mi?’, an ti a, apate ve si athu phian lehnghala, kan ti ngam si lo kan ngei thin khawp mai. Han awm ve reng takah chuan a nuam vei phian.

Tlangkawmna :-
Calendar pawh chu ka thai tam ve fe ta, thla ruk awm tur thla li chauh ka la awm tih chuan, ka chhuak thei ta mai a, vanram pawh kal ila kha bak kha chuan lawm ngaihna ka hriat chuang ka ring nek love, thla li ngawt mai inkhung hnua pawn han chhuah chu, alungchhiatthlak zawk mah asin, kawngpui kan rap te chu ka pen haih haih hi a ni ber mai, tulawm loh hian ka khi vur reng a, ‘Tun min dem lul su, anuam em a ni’.

Heti ang thu lawi lo Addict center awm thu mai mai ziak tur hian ka inkhap rei hle a, tunah chuan khang hunlai a min hre lo tu te chuan, khati ang khan ka awm thin tihpawh an hre lova, min an sawi paw’n an awih lo fo tawh zawk laia, lo inpuan chu atha ber em? ka ti a mah se, ka kuthlei hi ka thu nun thei thlawt lo anih hi. Mi tam takin Sethawn an mitthla apiangin hrehawmna leh lungngaihna an hmu a, kei ang mi pangai hnuailam hi chuan hun hlimawm tak ka hmu teh tlat a, khati ang thil ka lo experiance te kha vannei ka inti zawk mah nia.

A tawngtu a zirin engmah hi ho lua a awm lo, mi pangai chuan mi dangte lungngaihna hmunah lawmna ahmu a, mi dangte an tah laiin a nui a, mi dangte an hlawhchham laiin ahlawhtling thung a, alungngaiin a hrehawm ve thei lo a ni reng reng lo, tawrh dan athiam mai zawk a ni, ahlawhchham ve fo a mah se, chu chuan hlawhtlin tumna rilru aput tir zual sauh zawk thin.

Similar Posts:

• An lo tunlai mi ve tawh thin
• Ang Phuau Policy
• View From Mz House,New Delhi.
• A Zu Zi tan der a ni lo maw?
• Mizoram Sumdawngte leh Bangkok

Recent Posts:

• Carolyne-i Mizoram State Quota in lut dawn lo
• The Mizoram (Revision of Pay) Rules 2010
• Kan damdawi leidan hi!!!!
• Kutdawh
• Dam lo enkawl dawnin

This entry was posted on Friday, August 6th, 2010 at 3:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.