mi(sual).com

Ka mumangah chuan….

… Ka kal zela, hmana midum kawnglai ho ka hmuh thinnaahte khan mizo thalai, sek pui pui, in fit tih hriat tak takten bianga thlantui fim far kauh kauhin bawngtu, suahdur leh thirtiang lekin lei an lo lai mawlh mawlh a. An hmelah phurna/ hlimna a lang tel tlat bawk si a, ka mitvai emaw tiin ka mit ka nuai hial a!

… Ka kal leh zel a, hmana silchar leh a chhehvel vai che te te ho hlir ka hmuh thinnaahte khan mizo thalai, hmeltha tak tak, mawng zang tak tak ten thawmhnaw tret hniang-hnuang nen thatho tak leh hlim takin cement, balu, brick-te an lo thiar suau suau a. An hmel leh che velah lungawina a lang tlat bawk si a, mak tiin ka kä hau ringawt a!

… Bus station ka thleng ta a, hmana burma lam mizo hlir ka hmu thinnaahte khan mizoram thalai rual hlir ka hmu leh ta a. Phai lam leh thingtlang atanga bungrua leh thlai rawn thleng apiang chu rang tak leh phur em em mai hian an lo thiar mawlh mawlh bawk a. An hmelah tumruhna leh chhelna a lang tel tlat bawk si a, awi harsa ka ti hial zawk a!

.. Khawpui chhung lunlai ka thlelng ta a, hmana nula/tlangval inchei maksak leh sexy tak tak, hman em em leh zawi zet, lei rahchim hlau niawmtaka kal dim-dem thin ho hlir ka hmun thinnaahte chuan mi zawng zawng hi an lo tul em em tawh mai a, nula/tlangval smart tak tak, fai väng mai leh nelawm hmel tak takte chu office file niawmtak zakzehin hmanhmawh em em hian an pen hlawk hlawk mai a. An hmelah rinawmna, hawihhawmna a lang tel tlat bawk si a, mak tiin ka thlir liam zut zut ringawt a!

… Biak In ka thleng ta a, hmana takna awmlo, lanmawi nan leh sual thup nana a der maia inkhawm thin ho zawng zawngte kha ka hmu ta miah lo. An Biak In chu pathian thlarau-in a awp/ chenchilh tih hriat em em hian ka en thuak ringawt pawhin ka hre mai a, en maia èng phùtin lang lo mahse ka chhung atang hian a enna chuan min rawn kap a, min hip bawka, ka hmabakte dahtha a han lawiluh ve hialte ka chak a. Kohhran mite pawh a hming maia kohhran mi inti nilo, he khawvel mite laka ta (eiruk/hlemhletna, hurna, itna, ruihna leh thiltha lo zawng zawng) laka ta Lalpa kohhran-te an ni tih alang chiang em em a, an nun chu lawmin a khata, an hmel chu hlimnain a khat bawk a, sualna leh tahna-ten hmun a chang lo. He lei hi van emaw anti niberin ka hria!

He hi em ni “Zoram Khawvar Hun” antih fo chu? Aw…..a va nuam dawn em! An bula chen ve ka va chak em! An zinga tel ve ka va duh em!

Ka thalaipuite u, harh teh u; harh mawlh ang u. Kum 2010 meuh kan chuangkai ta! Kan vela hnamte an lian zela an sang zel si. Thu maia taimak a hun ta lo, a der maia fel a hun tawh hek lo. Hna tha nghaka kut kuangkuaha thu mai mai hman kan ni tawh lo. Chutilozawngin ILP thuah sarih pawhin inhungbcng mah ila, kan inhum zo chuang lo ang. Kan pi&pu, kan nu&paten hman atanga an thlir, mi thianghlim lawr aimaha an nghakfak, “Zoram khawvar hun” an tih fo kha, nang leh kei hian tun Generation-ah ngei hian mumang ram mai nilo, a tak ngeia tem tir i tum tak tak ang u hmiang.

Similar Posts:

• AIZAWL – AIZWAL
• Enge kan nih chiah?
• A Zu Zi tan der a ni lo maw?
• YMA Day
• Suicide Rate Shoots Up

Recent Posts:

• A tha in ti ve em?
• Hringnun
• 4 tips to protect you from ATM thieves
• Finally, NLUP to be implemented!
• Virgin-a pasal neih tum Bethsy nen

This entry was posted on Monday, January 18th, 2010 at 9:55 pm and is filed under Pictures. You can follow any responses to this entry through the RSS 2.0 feed. You can leave a response, or trackback from your own site.