Aizawla veng pakhata kan lennaah chuan Chawngtlai khaw pa pakhat hi a lo thu ve ran maia thian zaho kan titi lai chu rawn pawt chatin, “Thianteu tun hnaia Pu Lalduhoma thusawi kha in hria em…” a lo ti a. Chu thingtlangpa chuan a ngaihdan thui tak sawiin an harsatna tawh mekte a sawi a, eirukna avanga an tawrh a rin avangin a rilru a hnual hle tih a hriat nghe nghe.
Ka pua chuan… Sawi tur a ngah khawp maia ngaihthlak vek sen pawh a ni lo. He pa valai tak mai hian beiseina khawvelah a cheng ve a ni tih chu a hriat a, amaherawhchu a beiseina titawp thintu nia a rin erawh Aizawl officer hausate an ni thung.
Ti hian pua chuan a sawi a, “Thiante u sawhthing ching thin ka ni a, khawchhak pa tih takah a thawh chu kan thawk taima ve bawk e. Sawhthing pawh kan thar nual mai, Kg khat zelah price support hi sawrkarin Re 1 min pe a, a ziaawm ve hle, amaherawhchu hemi bak thil hi a lo awm teuh mai…” a ti te tea Aizawla a rawn zin hnuah transport subsidy an chan tur an chang lo tih a hmuhchhuah thuin a chhunzawm a ni.
“Nula fel tak pakhat kan dawra transport subsidy kan dawng thei a ni tih kan hre ve chauh a, chu pawh bawhzui dan kan hre lo. He kan dawn tura hi department lam hian an dawng vek tawh niin kan hria, kan mawl sia a tih dan pawh kan hre lo, kei aia hrelo phei chu an tam lehzual ngawt ang,” tia a sawi lai phei chuan a beidawng hmel hle a ni.
Thingtlang mite tana thil harsat zia a lang chianga anmahni hmang hian sum kan lo siam a nih vaih chuan a titute hian nakinah chuan an la tuar ngei ang.
An kawtkai atanga Silchar thlenga an phurhna man kha sawrkarin subsidy a pe thei niin an sawi a, mahse chumi latu chu officer liante an ni daih niin an hriaa hei vang hian an lung a awi thei hlawl lo a ni.
Thingtlangpa chuan… He thingtlangpa hi pa vengva tak chu a ni phawt mai a, eizawnna kawngah ngaihtuahna a seng nasa hle a, ani chuan “sem” policy hi a duh vak lo. Rim taka thawha a thawhchhuah hralhna tha tak neih a duh a, chu chu a innghahna ber tur pawh a ni tih a chiang.
Mizoramah sa man a sang zel tih a hriat avangin Sawhthing chin leh ringawt ai chuan bawng vulh chiam a chak thu a sawi uar hle a, mahse Vety-ah insurance a tih theih tih erawh a hre hauh lo thung. Ani chuan bawng vulh teuha huan zau tak hunga chu chu Aizawla hralh theih a chak.
“Kawl bawng pawh an rawn kai duah duah thin a, keini pawhin kan vulh ve thei reng a, khaw chhak lama cheng kan nia kan ram a la tha em ema bawng chaw a tam khawp mai…” tiin a ngaihtuahna a sawi chhuak a.
He thingtlangpa hian ngaihtuah tel loh a nei a, chu chu bawng tam tak vulh turin pawisa a nei lo tih hi a ni. Sawrkara loan lak lah a la hmasate’n an rulh that duh loh avangin a harsa tawh bawk si.
Mahse a ngaihtuahna a seng nasa thei hle a ni tih a chiang. “Kum khat chhungin bawng hian no vawikhat an nei zel a, chu chu a dam tlangpuia tih tak zeta kan tih chuan kawng a awm khawp mai,” tiin a sawi. Kel vulh pawh a chak, note an nei tam thei zawk bakah enkawl an hahdam.
Hetiang zawng zawng ti tur hian thingtlangpa tan chuan capital hmuh ngaihna a awm lo a ni ber mai.
“Khawpuiah in chenga lirthei nalh tak tak nen intlana keini hah engphiarin hna kan thawka kan hawpkhawp bak kan thar thei si lo, thingtlang mite hi min ngaihtuah dan hi a dik lo, a takin in hre lo a ni,” tiin hepa hian a sawi. A sawi dik tam fu mai.
Sawrkarah innghat mah mah: Kawng lehlamah chuan kan thingtlang unaute hi sawrkarah an innghat nasa hle mai a, an nu leh pa ang hian an en hliah hliah tih a chiang reng mai. Kawng laih ni se khawtlanga inhlawhna atana hman an duh zel a, an pek lohin an vui nasa thei hle. Amaherawhchu an ngaihtuah thlen hauh loh chu kawng laihte hi hunbi nei a ni a, zawh hun te a awm veka khawl hmang lo chuan zawh huna zawh theihlohte a awm a, chu chu anni chuan an ngaihtuah lo. Khawtlang inhlawhna atan an duh tawp mai a ni.
A pawimawh em ema lang ta chu an bial chhunga contract hna thawh tur a awm hian mimalin pumbilh mai lo hian khawtlang thawh theih turin VC te thuam chak ni ta se, capital te pawh an lo nei thei deuh anga an “dream” tih hlawhtlin theihna kawng pawh a ni ngei ang.
Sawrkar lam hian thingtlang mite hi “kan ngaihtuah” chu an ti fo a, kan ngaihthah na chen hi chu a awm a ni. Khawpui a than chak viau rual hian population tlem siah chuan thingtlang hi kan thang muang hle sia he “gap” zau tak mai hi nakin lawkah chuan a la puakkeh ang tih a hlauhawm.
Thingtlang mite hi Mizoram mipui tam lam nena teh chuan zaa 75 vel lai an ni a, heng mite ei leh bar lamah intodelha kan siam thei a nih chuan Mizoram chu kan intodelh thuai ang.
“Thingtlang mite min tih hausak theih chuan Mizoram khaw pum hi kan khawsa nuam thei dawn a ni mai, sumdawngte thlengin an hlawk mai dawn a ni,” tiin Thanbanglova, ZKP president chuan min hrilh a. Hei hi a dik thawkhat hlein ka hria.
(Zalen June 1, 2008 Issue FEATURE)
June 2nd, 2008 at 7:21 am
Hm, ani ang thingtlang mi in an subsidy dawntur zawng zawng a hriat kilh kelh te chuan aizawla officer hoin eiruk tur an nei nang. shhhhhh
[Report abuse]
June 2nd, 2008 at 7:22 am
A ngaihnawmin chhiar a nuam hle mai. ZOaTlau (i hming i thlak dawn emaw ka lo ti a), i thu ziah chu ak amen khawp mai. Kan sorkar sum senna tam ber hi thingtlang mi lo nei tan ni mahse an tan tih theih a tlem em em a, a chhan chu Congress pawh lal se, MNF pawh, Mizo Union pawh, MPC pawh, Aizawla hi hausa tawh sate hian an hausak belh ringawt zel a. Heti zel a kal tur chu ani lo hrim hrim.
[Report abuse]
June 2nd, 2008 at 9:56 am
Thingtlang lam hi zinkual tam i la an harsatna tam tak te va hriatpui i la, news hrang2 ah cover ta luah zel bawk i la. Tah chuan khawpui chhunga in vulh thau hlur te pawh an harh thar mai ang.
Ranvulh hi in tihhmuh chi tak ania, thingtlangmi tam tak te khian vulh threuh theise la hlawkna tamtak an neih nge a beisei awm, chutih rual in Capital kan neilo tih hi chu a awm zel dawn tho in a langa, kawngdang dap chhuah chu a hun tak meuh ani. Na chang kan hriat a tlai viau nan tlai lua a awm lo va an tih ang deuh khan, pahnih khat a trang in an tran a rilru neideuh a an vulh theih chuan kum rei lo vah Capital hranpa dang ngai lem lo vin a mah leh a mah in a lo pung ve mai dawn ani.
[Report abuse]
June 2nd, 2008 at 11:27 am
ka mitthla a, cham reng thin ..2004 khan krismas dawnah ka pate khua thingtlang ah kan zin a, ka pute chuan dawr an nei a, dawr ah chuan ka thu mai mai thin, tuk khat chu nu leh a fa 3 hi an lo kal a, an hmel en reng reng khan an berh ve tih a hriat ngoih 2 bok, naupang te chuan pheikhawk poh an bun lo..khatiang thlasik vanglai khan kelawngin an khua, thingtlang pilril lehchhawng atang chuan an nufa chuan masi bazar an ron nei ve chu ania…paidal ngatin…chutah le..an fapa pakhat chuan pheikhok 200 man chu a ngen ta tlat mai…a nu chuan a to ltk a tih pon hrethiam si lo chuan a kawk tlat mai bok si a, a nu hmela, a fapa lainatna leh retheihna in a sawisak mek hmel lungti chhe thei khawp beisei bo, beisei mek hmel chu thlir zui ngam loin inhnuaiah ka chhuksan ta zawk a…..
[Report abuse]
June 2nd, 2008 at 1:03 pm
INBIAKPAWHNA LEH INKALPAWHNA THA ECOLOGICAL BALANCE TIBUAI LEH TIHLIAU TAM LO ZAWNG A HMALAKNA DIK LEH DAM THINGTLANG LEH KHAWPUI INKAR TAN NASA TAK A MAMAWHNA HIAN HARSATNA A THLEN NIIN A LANG KAWNG ENGKIMAH.THINGTLANG KHAW CHI HRANG HRANG TE CHU KAWNG THA KHAWPUI AIZAWL KAWNGTE ANG A NGAIHTUAH CHIANG LO TAK A SIAM NILOVIN THING LEH MAUTE LEH MIZORAM MAWINA KHUANU MINPEKSA TE TICHHE TAM LO ZAWNG A PEK THEIH NISE A LAWMAWM HLE ANG.
CHU CHUAN RAMPUI EI LEH BAR A INTODELHNA LAMAH NGHAWNGTHA A NEIH A BEISEI AWM HLE.VAWHIN A KA TAN REMCHAN DAN ZAWNG LAM NGAWT NGAIHTUAH LOVIN.THANGTHARTE TAN ZEL MITTHLA CHUNGIN….
[Report abuse]
June 2nd, 2008 at 1:07 pm
THELH LOH HMUITAWK: Capital hlanga comment loh tur aw. Topic dangah pawh kan sawi tawh kha.
[Report abuse]
June 2nd, 2008 at 7:21 pm
ka chhiar chhuak chiah. A ngaihnawm khawp mai. Run vulh chu .. kan naupang lai chuan mi te kan vulh hlawh tir thin.
A naute kan lei a, chuan a talk hunah kan insem thin. capital neih lo chuan tiang deuh te pawh chuan kawng a awm em aw?
[Report abuse]
June 2nd, 2008 at 7:27 pm
THELH LOH HMUITAWK chu mirc chu ni se an KICK tawh ngei ang che..hehe…
Ngaihnawm dap dap hle mai, ngaihtuahna a ti kal thui…
[Report abuse]
June 2nd, 2008 at 7:34 pm
Hei chu a ngaihnawm hle mai..
engtin nge kawng kawh hmuh tur hria kan awm em??
engtin nge hma la se a that kan rin?
[Report abuse]