mi(sual).com

-Lalthantluanga Chawngthu

Hlim takin i nui hár hár a, tlânchhiat pahin ka zakhnûaiah min rawn dêk leh zauh thin a. Ka ûm ve che a, ka man veleh ka dêk ve che a, mahse, dêk i huat lem loh avangin i nui thláwr thláwr zel a. Keimah zawk chu ka tlânchhe ve thung a, min ûm ve záwr záwr a, a tawpah ka hah ta deuh a, ka ding a, thaw hlawp hlawp chungin ka lam pana ilo tlân chu ka thlir ringawt che a. Chutah, min dêk tuma i kut i rawn lék chu ka man a, ka dawmbet ringawt che a, “Ngawi rawh, hahchâwl phawt ang,” ka ti a. Kut la invuan reng chung chuan kan ding dun a.

Thlifim arawn tleh héuh héuh a, i sam chu a chhêm lêng siau siau a, ka biang arawn hrût tel leh zauh zauh thin a. Chutihlai tak chuan kan dinna bulah tumah an lang lo va. Kan hmuhtheih loh Biak In bang lehlamah chuan midang infiamhote thâwm chu a ri chél chûl tho a. Ka kut chu ka lasawn a,i koki-ah ka rawn nghat a, ka kuah che a.

Eng hian nge maw min mawlh ta mai le? Ka küaiher che a, ka tângah i bei hnap a. Chutah, dimtein i khabe-ah dawmin ka kuaidâk che a; ka nui a, i nui a, chutah ka fâwp che a, nang paw’n min fâwp lét bawk a. I tálchhuak thut a, “Kal ang,” iti a. Kal tura i inher lai taki kut veilamah ka vuan thuai a,ka lamah ka pawt hnai che a,ka fâwp leh che a, “Anih leh kal tawh ang,” ka ti a, midang fin turin kan kal ta a.

Ka ngaihtuahna chu abuai hle a, i hmui duhawm tak ka fawh ngawtna chhan kha engvang nge niang le? Eng hmangaihna thû mah ka la hlán lo che a; eng thu mah min la hlán bawk silo. Nang nen hian kan innêlin kan inkawmngeih viau na a, inngaihzawnna lam reng kan la sawi dun ngai silo. Engvangin nge kan lo in fawh ve ngawt le? A mak ka ti a, a ho ka ti theilo. Hmeichhe dang hi ka lo fâwp ve nual tawh a, mahse, kan infawh hmâ in infawh theihna turin a thuhmahruai sawifel hmasak phawt a ngai si. Engmah sawi dun silo va kan in fâwp hi a mak ka ti tâwp theilo a ni.

A hmâ a ka endán angin  ka en thei tawhlo che a, min melh dan pawh a danglam ta. Chiangtakin min en ngamlo ni te hian ka hre thin a, amaherawhchu, min en leh zauh zauh thin tih chu ka hria. Nangmah ang bawkin keipaw’n ka en reng ngamlo che a, mahse, ka en lo phal silo che a; reiloté kârdanah ka en leh záwk záwk thin che a. Kan mit a intawng leh záuh záuh thin réng a ni.

Ka ngaihtuahnate hi a kalbing thei êm êm a, nangmaha nangmah chauh kha ka véi bür thin. Tumah hrilh ka duhlo nâ in ka thian kawmngeih tak pakhat bulah chuan zêp nei miahlovin ka ngaihzia che hi ka sawichhuak fo thin. Dik chiah chuan kan pahniha kan awmdun chângte hian ka lâi ve thei êm êm a. Nang aiin ka upa zawk a, mahse, i bulah chuan ka naupang zawk tlatin ka inhre thin. Nangin min áwm tléi ni bera inngaihnate ka nei thin bawk.

Ngûntaka kan inkâr thu ka ngaihtuahin kan mualpho ang tih hi ka hlâu êm êm a. Mahse, i thinlung kawngkhár min hawnsakah lâwm takin ka lût a, ka chhûak leh thei tawh silo a ni. Hun remchang a awm apiangin i bulah ka awm a, midang chu eng’ahmah kan ngài ngãilo. Ngampa takin i kut ka hûmin ka khâl niap niap thin a, i taksa duhawm tak chu ka nghêng fo va. I hriat tur tawk chauhvin ka duhzia ka hrilh sep sep thin che a. Hetih lai hian ka hringnun hi ropui viauin ka hre thin.

Kan inhmangaihna chu thupsén anih loh fo avangin mi thenkhat chuan inngaizawngah min ngâiin min chhaih ta fo va. Vanneihthlak takin, i û ka ngaihzawn vanga nangmah be tha angin kan insawi daih a. Chumi avang chuan midang tam tak hriatah inthüp nan i û chu kan hmang thin.

Nangmahah hian ka rilru hi a nà hmà in ka thinlung hi a lawm hma êm êm a. Fiamthu-a mipa dang chanchin i sawi mai maite hian ka rilru hi alo nà hman thin. Nula dang ngaizawng turin min tifiam fo \hin a; ka rilru en i tum vang nge tih chu ka hre lo. Nang chauh ka duh che avang hian nula dang ngaihtuah nân ka rilru ka sêng phallo asin.

Nikhat chu kan bul hnâiah tûmah an awmlo va. Nang chu dawhkànah i thu a, i hmazawn thutthlengah thu-in i malchüngah ka lû ka nghat a. Nakinah chuan, “Kei chu min theihnghilh hmak rawh. Hetianga kan awmdun reng chuan nang pawh, kei pawh kan mualpho dawn asin. Inthupin rêi tak kan awm thei chuang lovang,” iti a.

“Ni e, theihnghilh theih che chu ka duh khawp mai,” ka ti ve mai a, ka rilru tak taka sawi pawh ka nilo va.

“Midang ngaizawng mai la? A…khi a hmêltha ka ti a; amâ’n a duh êm êm tho che a, duh lêt ve mai rawh.”

“Nang hi ka thlang tawh che a, midang ka duh hleinem.”

“Min theihnghilh theih nân chú chú a ngài si alâwm.” tihpahin ka biang tawn tawnah ikut pahnihin i rawn dawm a, min kuai dâk a. I hawikual a, tumâ’n min rawn en loh avangin min rawn fâwp zauh a. Ka kut pahnih chu i bahsam kârah rawlhin ka biang i dawmna i kut chu ka rawn vuan a, chutah, ka thuchhuak a, dawhkânah chuan ka thu ve nghal a, kan inkuah vawng vawng a.

Darkâr a liam a, ni a ral zêl a. Ka ngâi thei êm êm che a, nang paw’n min ngâi ve thin hle tih ka hria. In awmna leh kan awmna chu a inhlat lûtuklo nâ in, zanah chuan ka rawn lêng ngáilo va. Rawn lên chu duh viau mah ila, i nu leh pate ka záh si a, ka rawn kal ngam ngânglo a ni. Chhûnah School-ah kan inhmu thei tho a, chawlh(break) apiangin i bulah záh pawh dâwnlovin ka awm vat zêl a.

Nihnih lâi School i rawn kallo a. I pàng a sâ in i khûa asik hluah hluah alo ni a. Nangmahni inah ngêi rawn tlawh che ka duh êm êm a, mahse, ka ngam silo. I awmloh chuan School pawh a nuamlo ka ti êm êm a; zirlâi tam tak ri nuaih nuaih kârah i àw ri ka hriat siloh avangin a réh tláwk tláwk ni berin ka hria.

October thla êng mâwi ták chu tukverhah dâkin ka thlir ngâwih ngâwih a. Khawiah mah lên châkna ka neilo. Ka thiante’n lêng tura min sâwm pawhin keimah chauhva awm ka thlang zâwk a. Ka bulah han awm la, thla êng thlirdûnin arsi phé néuh néuh kâra vanrâng chhûm pan té té a kal riai riai chu kâwkin duhthu sâm ila; mahse, nang zawng, damdawiin khumah natna tûarin i awm daih si a. Ih e, nangmah ang bawkin i dam hun ka nghakhlêl ve êm êm asin.

Zan a rei tiál tiál a, thla pawh thlanglamah a herliam zêl a, kan in chhak lawka tlângah tlangval thenkhat chu tingtang nen lunglêng êm êmin an zâi a. Ka han hawi vel a, hmuh theih siloh hian ka mitthlâah i lang rêng a! Tûdang mah ngâilo va kan pahnih chauhva kan nuih dun hàr hàr lâite chu ka hrechhuak a; ka lung a lêng êm êm a.

Ka ngaihtuahnaah chuan kan pahniha lehkha kan zir dun lâite ka hrechhuak a. Lehkha kan zir dun rêng emaw kan tih lâiin, “Ka hmangaih che,” ka ti thüt a.

“Eng maw i sawi? Han sawi nawn leh teh.”

“Ka hmangah che!”

“Vawikhat chiah sawi leh rawh”

“Enga’ti nge? Ka hmangaih che”

“Vawikhat leh chiah…!”

“Ka hmangaih che” ka tinawn zêl a, kan inpawm vawng vawng a, kan lehkha zirlai chuan ngaihsak ahlawh ta lo anih kha.

Vawilehkhatah khawtlang mipuite hriat turin, “Hei hi YMA Information Centre a ni e,” tih ri, ringtakin alo chhuak a. “Eng tak chu puang ang maw?” tiin ka’n ngaithla chiang a. Awi! Ka mumang mai nise ka va’n ti êm! Ka inthing nawk nawk a, ka mumang chu a ni silo. Chu ri lo chhuak chu ri ka hriat tawh zawngah hian a mawilo bér a; a va râpthlák tehlûl êm! Ka bengah hian chiangtakin a ri nawn düp düp a, ka thinlung hi nghâwr che dàwt dàwt a, ka khûr zawih zawih a, vâwt erawh ka ti silo. Ka biangah thlantui alo hnâm chhuak a, ka mittui nen a inchawhpawlh a, chu chuan ka khawhmuh a tiphê ruai a; chutah, ka mitsülh thut a,ka tlu tawp a, engmah ka hre zui ta lo.

Ka han harhchhuah leh chuan ka nu leh ka nau Mami chuan ka kut leh ke chu an lo nûai nàwk nàwk a. Mami chuan, “Mama, eng’ati nge i khâwng vek, i damlo em ni?” alo tinghal a. Ka nu leh Mami chu ka’n en chiang a, an lo hlauhthawn hmêl viâu mai a.

“Ka khâwng vek maw? Engmah ka hre hleinem,” ka han tih chuan mak an tih hmêl lehzual a, ka thu chhuak a, “Ka tha tawh e, ka tha tawh alawm,” ka ti a.

Ka thinlungah ri râpthlâk, ngaihthlâk hrehawm tak chu a rawn ri nawn leh a, thutthleng bân vûanin ka kün tlàwk tlàwk a. Ka nu leh Mami lah chuan chutia ka awm chhan chu an hrethiam ve dêr silo. An hriatthiam ka duhlo va, an hria ang tih mawlh ka hlâu zâwk si. Min zâwt fiah ang tih ka hlâu êm êm a, danglam vaklo ang thei ang thei bêra awm hrâm hrâm chu tumin thutthlengah chuan ka thu zàwi hnàwk a.

Ka nu chuan, “Mama, insiam la, tlaivâr turin kal rawh,” min han ti chiah chu tûar a hâr ngêi mai.

Ka kal dàwna Mami’n ka nu hnênah, “Nu, Mama awmdân hi a mak ê!” atih chu kei chuan mak ka ti hauh lo.

Mitthi inlama khûang ri dàp dàp leh khawhàr hla lûngchhiat thlâk tak chu bengngàwng niha hriat theihloh mai ka va’n duh tak êm!

Khawlâi düngah chuan mûangchângin ka kal chhét chhét a, ka hmuh theih chinte chu ka thlir küal a. Van dumpâwl rûih kâra arsi leh chhûm pán té téa inzâm pharh siàr siàrte chuan min hnêm thlâwt lo. Khawvêl hi a dûl nghüih mai a, ka tân chuan zan râpthlàk a va ni tehlûl êm!

Mitthi inlam pawh pan ta lo chuan mi min hmuh lohna turah ka \hu hnawk a. Ka mittui dan rûal lohvin arawn sûr zúng zúng a, ka \àp ta záwih záwih a. Ka hmangaih, min hmangaihtu, tûma hriatpui lêm lohva hmangaihna pârzû ka dâwn pui chu; he ka lei hringnun hi a ral ve hmâ chuan ka thén ta! Kumkhûain ka tàwng leh tawh dáwn lo. Aw…….a va nã tak êm!!
Doctor-te chuan a nunna chu chhän tumin an thiamna vawrhtâwp hmang mahse, ka hmangaih chu hringnun khawvêl ata LAK BO A NI TA SI.

Similar Posts:

• Puitu Ka Ngai
• Nang malsawmna ni ang che
• Love Story- IV (Ka Thài)
• Valrianga rian khua a sei thlawn
• Mipat Hmeichhiatna leh Zu

Recent Posts:

• Duan lawk khawvel mahse tawn chawp hringnun nisi
• Singsihlìp damdawi
• Misual.com hi
• Hawh U, I Thawhkhawm Ang U Hmiang
• MIN PUI HRAM TEH U.

This entry was posted on Saturday, September 18th, 2010 at 10:03 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.