mi(sual).com

Vawiin google doodle chu mit a la zak mai. Robert Louis Stevenson-a kum 160 na birthday a lo ni reng a. RL Stevenson lehkhabu ziah lar ber te zinga mi Treasure Island hi rilru ah a rawn lang nghal lo thei lo. Hei vawiin google doodle chu, Google ho hian pawi an ti em lo ang chu maw.

Treasure Island hi 1883 khan chhuah a ni a. He lehkhabu a character leh idea tam tak te hi a hnu zela pirate thawnthu ten an copy nasa hle thin. Long John Silver, Treasure Island a misualpa ber kha ti mai ila, a ni kha a ke lehlam a bul a, thing a vuah a, vaki Captain Flint kha a nei bawk a. A saptawng takin “He is considered to be a true example of a stereotypical pirate.” – wikipedia

Khawvela pirate sual ber leh hlauhawm ber Blackbeard-a chanchin tlem i lo en teh ang. 1713 atanga 1718 chhung khan a pirate hna kha a thawk ti ila sawi dan dang vak awm loh avangin. Khami hun reilote ah khan lawng 40 aia tam a suam hman a, mi za tam tak thihna a thlen bawk. A mah hi palian tak mai, hmuihmul buk chhup mai a ni a, hemi vang hian Blackbeard ti a hriat a lo ni ta a, a hming dik tak chu Edward Teach a ni.

Mi lawng an suam dawn hian Blackbeard-a hian a samah hian hrui a phiar tel a, chumi chu a hal ta thin a, an hlau thei em em a, an in surrender nghal thuai thuai zel. A hnuaia thawk (crew) te phei chuan ramhuai ang hialah an ngai. A lawng hming hi Queen Anne’s Revenge ti ngatin a phuah a. November 22, 1718 khan England ram Royal Navy nena inbei in silaimu panga leh ngunhnam a vawi tam tak vihna tuarin a thi. Royal Navy hian a lu an tan a, lawngah chuan an tar a ni.

Pirate hla lar tak “Fifteen men on a dead man’s chest” tih pawh kha Blackbeard-a atanga lo chhuak a ni. Dead Man’s Chest hi British Virgin Islands a thliarkar pakhat a ni a, 250 sq yards a zau niin lung bang sang tak in a hual vel vek a, Blackbeard-a chuan a crew zinga hel 30 te chu rum bur khat leh ngunhnam pakhat theuh pe in he thliarkar ah hian a tantir a, an vaiin an lo inthat vek ang chu tih beiseina nen. Ni 30 hnua a va kir leh chuan mi 15 an lo la dam a. He hla lar tak hi a lo chhuak ta niin an sawi.

Fifteen men on a dead man’s chest
Yo-ho-ho, and a bottle of rum!
Drink and the devil had done for the rest
Yo-ho-ho, and a bottle of rum!

Pirate ho hian an lawnga an flag tar The Jolly Roger hi an tar nachhan ni bera an sawi chu he flag an hmuh ringawt pawha lawng tam tak chu an in surrender nghal zel nan a ni. Pirate thenkhat chuan puan dum ringawt hi flag atan an hmang bawk.

Davy Jones hi pirate thawnthu ah chuan tuihnuai pathian/ramhuai anga ngaih a ni a, Davy Jones’s Locker an tih chuan tuifinriat mawng an sawina a nia, lawng mi tuia tlahlum te kalna sawi nan an hmang bawk. Pirates of the Caribbean movie ah pawh khan Davy Jones chu hmel octopus ang deuh in kan hmuh kha.

Captain Jack Sparrow hi kan hmaih thei lo. A ni hi chu phuahchawp mai mai mah ni se a character hrim hrim hi a lawmawm em a. Pirates of the Caribbean series ah khan pirate thawnthu chi hrang hrang an lakhawm nasa hle tih kan hmuh kha. Dead man’s chest,  Davy Jones, The Black Spot, pirates treasure etc. A movie palina tur Pirates of the Caribbean: On Stranger Tides thawnthu kalhmang hi Tim Powers-a lehkhabu ziah On Stranger Tides tih atanga lak a ni. He movie ah hian Jack Sparrow leh Blackbeard an in khuainuai vel dawn a ni, May 2011 a release tura tih a ni a, en a chakawm tawh kher mai.

Pirate te hi han en mai chuan huaisen tak, thih pawh hlau lem lo an nih hmel a. Movie ah leh lehkhabu ah te an lo “romanticize” nasa bawk a, an nihna dik tak hi kan lo hrelo fo. Suamhmang nunrawng tak, mi nunna lak hreh lo, tuifinriat ti ralmuanglo tu an nih hi kan hriat fo a tha.

Bonus pic: Asterix comics a lo lang tel ve ziah pirates ho kha, an lawng hi a pil ngei ngei bawk.

Source: here and there, mostly Wikipedia

Chhiar zawm peih te tan:
History of piracy

Similar Posts:

• Jack Sparrow has done it again ;)
• Ngenna
• MTV Movie Awards 2008
• What does a heart attack feel like?
• Lehkhabu chhiar tur tha

Recent Posts:

• Fall Season thlalak
• Sensex Prediction Comes True!
• In awhfik a ni lo a nia – Part 2
• A Tlawm hlen lo Japan. Zoram i tlawm hlen bik dawn em ni?
• Engnge i password!!?

This entry was posted on Saturday, November 13th, 2010 at 2:49 pm and is filed under Event, Movies and Videos. You can follow any responses to this entry through the RSS 2.0 feed. You can leave a response, or trackback from your own site.