mi(sual).com

Kan naupan lai chuan krismas lo thleng tur hi kan ur lawk nasa thei ngei mai. Thawmhnaw thar kan nei le hang a, silai lem thar kan nei leh ang a, biakinah kan inkhawm anga, kan zaikhawm leh mup mup ang a, chutah ruai kan theh ang. Hengte kan hisap lawk chuan krismas hi lo thleng thuai thuai se kan ti thin. Kan thian pakhat phei chuan “Krismas hi nitin in ni thei se la a nuam awm,” tiin duhthu tenau a sam thin. A ni reng asin, keini thingtlang atanga rawn chawr chhuak tan chuan krismas hi a hlu vet vet thin a nia.

Thingtlangah chuan nu leh pa ten kum tluan in rim takin hna an thawk a, nileng in ram ah lo lam hna thawkin an tul a. Chhungkaw ei tur buh leh thlai zawng an nei ve thin. Pawisa fai erawh chu a harsa takzet a ni. Inhlawhfakna tur a awm zen zen lova, thlai thar lah a thar tam meuh chuan a man a lo tla hniam zel si. Chu pawh mahni khua ah chuan hralh ngaihna a awm der lova, khawpui lamah riaka kalpui a ngai thin. Kumtluana an thawh rah chu tlawmte in an hralh a, an lawm ve em em thin.

Chung an pawisa hmuh ang ang te chu hmang phal lovin fate krismas thawmhnaw lei nan an hmang ve thin. Hmeichhe naupangin kawrfual mawi, bakilh, sam tawnna leh pheikhawk nen an duh a, naute lem leh inawm tleina dang nen. Mipa naupang lahin kawr mawi, kekawr mawi, pheikhawk mawi, silai lem, motor lem nen. Nu leh pa tan chuan ava luhai thlak dawn em. Ren takin an pawisa neih ang ang te an hmang a, an fate tan an lei kim theih hlauh chuan an lawm thei hle.

Chutih laiin hmeithai te, chhungkuaa pa ber hna hram thawk thei lo te tan erawh chuan krismas hi ava han huphurhawm dawn tak em. Khawi a mi pawisa tehlul in nge an fate thawmhnaw thar an leisak ve tak ang le? An kham khawp thar chhuah pawh huphurhawm tham a ni si. Naupang thawmhnaw lei sak chu sawi loh an tan krismas thawhlawm thawh pawh a harsa si. Puitu an nei lo. Mahse an Pa van ami chuan a theih nghilh ngai lova, a rukin a chen chilh reng thin. Engmah neih nei lo mahse Pathian an fak a, mi zawng zawng nalh taka an inchei niah kawrmawi nei lo mahse an tan Lal Isua a piang vet ho a ni tih an hai lo va, krismas hlim takin an hmang ral ve thin.

Sumdawng te u, he krismas ah hian sum a lo lut tam thin a, ka lawmpui a che u. Mi rethei leh harsa tak tak ten an dawr che chuan neih thing lung khawng a ti ve an nih kha theih nghilh suh u la, mi dang aia tlawmin pe thin teh u. Kumin krismas na na na chu mirethei zawkte tan han ti tlawm ve chhin ula, in Pa van ami ava lawm dawn tak em.

Krismas chu a lo thleng ta a. Bethlehema a pian zan, keinin urlawk zan kan ti mai a, ah chuan chhung tin a thei thei kan inkhawm a. Thuhriltu thusawi pawh a dang ta ruih mai. Mitthlain Bethlehem dai leh ran chaw pekna thleng kan hmu uar uar a. Thilpek pek tur nei ve lo berampute ang in Lalthar lo piang chu chibai kan buk a, Amah fak nan hla kan sa a, hlim takin kan zai thin. Inkhawm ban ah ‘chow kan leh ar kan’ tih te a lang lova, hemi zana in atan tia zu lo lei sa teuh phei chu rilruah a lang lo hrim hrim.

Nula leh tlangval pawh zaikhawmna lam pan in an kal suau suau va. Khawi maw laia lo in terek hran a, Pathian ina a Fapa kan tana min rawn pekna ni hi, sual rawng bawl nan hman an tum lo hrim hrim. A dik a ni. Sual duh tan chuan sual rawng bawlna turin hun dang a tam lutuk. Hemi zan kher khera chet sual kan tum hi zawng a dik lo hul hual a ni. He krismas tenawm taka kan hman hian Lal Isua kan ti lawm ang nge kan ti lungngai ang aw? Mifing pathumte chuan Lal lo piang tur hre lawkin ram hla tak atanga lo kal in, Lal Isua chibai an buk a, an thil neih hlu ber ber te an pe a sin. Krismas hi nuam tawla a chena chen chi a ni lo. Nuam vawr tawp nia I hriat pawh kha thlengin, zu nen pawh chen chiam mah la, party throw in nula nen lam mup mup pawh nila, hlimna tak tak i chhar chhuakin i inhria em? I chet nasat poh leh i inchhirna a nasa mai a ni lo maw?

Krismas tuk hi chuan arsa kan hmeh ziah a. Chaw ei a tui duh kher mai. Chaw ei kham ah kan insil fai thuai thuai a, a vawt thin bawk a, insil chhung a rei lo duh kher mai. Chutah le kawr mawi, kekawr mawi, kawnghren lah a pa bawk si. Pheikhawk kan han bun leh a, a thar hian kan thar ta vuk mai. Krismas a ni miau alawm, kan nalh ang chu. Kristian tan hei baka hunpui a awm thei chuang lo.

Silai lem thar lah a puah in a puak thuai thuai reng mai a, naupang ho kan han inhmu khawm a, kawr thar kan lo nei deuh vek mai a lo ni. Kan chak ber chu thian te nana indo lem a ni. Chawhnu lamah chuan dai lam kan pan khawm a. Pawl leh pawl kan inseam a. Hnim hnuaiah kan bibo dial a. A tu emaw berin “Bihruk dar” tiin a auva, chutah lehlam atangin “Inveh dar” tiin a lo chhawn a, chu chu kei nin “Inkah dar” tiin kan lo chhawn ve a. Chu tah zet chuan indo kan tan ta thin. Kan inzawng, kan inveh, thiante hmuh kan tum. Thian ten min hmu ang tih kan hlau si. Thawmhnaw thar te zawng kan hre chang tawh lo. Tlangsam leh japan hlo pik hnuai ah kan vak lut a, kan bawk phek a. In kaphlum tur chuan thaw chauh ni lo, mita hmuh ngei a ngai a. A kap hmasa sa an chak a ni mai. Tlangsam buk leh a hnuai vawk kawng tum bel tak te chu kan bawh eng nasa thei a nia.

Chutih laiin nula leh tlangval rual an leng suau suau va. Kum khatah krismas vawikhat chauh a awm tih hria in a huhovin an leng a. Tumah thil sual tih tum an awm chuang lo. Tlai nitla tur thlirin an thu a, krismas hla sa in an zaiho va. Bike hnunga nula kekawr tawt lutuk ha phur chunga ramhuai speed dik tak maia han lim pur pur a, hmun fal lama engemaw tih tum ve mai awm hmel an pu lo. Lal pianni champha hi ‘ni thianghlim’ anih zia an hre chiang a, awmkhawloh na hun atan an phal lova. Thianghlim takin ni an hmang ral a, ui tak chung in chu ni thianghlim, tlai nit la tur in kawla a liam pui mek chu an thlir liam vawng vawng thin.

A tuk leh chu ruai theh ni a ni a, naupang in kan hai ngai lo. Zingah kan thova, Fatu hovin bawng an chek thlu lai te, vawk an tuk thlu lai te hmuh loh kan hlau thin hle. Vawk anih chuan a beng leh a mei fatu ho kan dil a, kan rawh thin a. A hmin leh hmin loh pawh ka hre ta lo ve. Kan ei liam mai mai a, a tui em em pawh ka hre lo. Ei ve hrim hrim kha a nuam a ni mai. A phing erawh kan hampuar a kan hlim pui phian thin. Keini mipa naupang ho chu ruaitheh ni hi chuan kan inkhawm lo deuh zel a. Inkhawm ai chuan thiante nena ruai thehna tur changel hnah lak kha a nuam fe zawk tlat a ni.

Kha tih lai khan mipa naupang chuan thinga siam motor lem kan nei theuhva. Motor lem lian deuh hlek panga vel kha ramhnuai lamah kan nawr chhova, motor neitu tih loh zawng khan kan innawr chhawk ta thin a. Kan innghak khawm a, tichuan changel hnah sat in kan buai ve nak nak a. Kan hnah lak te chu a sei hlawm thin avang leh inah pawh an lo tan thin tho avangin a laiah kan tan a, kan motor lem ah chuan a tam thei ang berin kan rem ta a, a vum hian a vum thur a, chu chu a tlak mai loh nan kan phuar tha leh a. Kan haw nghal mai lo. Haw ringawt ila, ruaitheh nan a la hma lutuk.

Aidu kan sat a. Kan aidu ung sah chu tan chhumin hmawlhte in kan kilh zawm a, silai lem kan siam a. kan kilh bawr tuai thin. A then in hnahthel chilh khawm hmangin lukhum an siam a. A siam thiam ve lo te’n kan thlir a, kan awt a, min siam sak ve turin kan tlawn thin. Sana bun tumah awmlo mah ila Ni atangin hawn hun chu kan hai bik lo. Hawn lam hi chu a nuam thei khawp mai a. Motor lem neitu khan intineitu takin a khalh a, a bak zawng chuan a khu hip tawk turin kan umzui ta thin a ni.

Kan nghahhlelh ber tlai lam a lo ni a. Ruaitheh a hun e tihna niawm takin dar a ri vu vu a. Kan hmarhcha rawt kan fun tha sawk sawk a, Biakin lam kan nghal Biakin tual charah naupang kan zi luih luih a. Fatu hovin changel hnah chungah chaw an dah kual a, a lai takah bawngsa an chhung khu luih a. Chaw chungah sa tui an leih dan dan a. A bak tihtur chu tu’n kan hai lo. Savun a keh thei hleinem tiraw. Kum khat chhungin sa ei hun a tam si lova, ren map lova duhtawka lim theihna hun phei kha chu a tam lo leh zual. Bawng pachal thau tak, a kg-a lei nilo, a pum ngeia talh, ruai atana hman chu a tui dangdai bik riau asin. Vawksa angin a mawm ve hmuar lova, a thau ei duhloh paih a tam ve lo va, a hang em em bawk. Hmabak ava ko em!!! Kumthar ah ruai kan theh leh dawn.

Krismas thing, zaikhawmna in kawta an chheh khawm hmangin naupang hovin buk lem kan sa a. A chhuat fai leh fai lohah kan buai lo. A rem emaw rem lo emaw, kan mu nawk nawk thin. Vawt thei tak a ni. Kan la indo zui a, kan intihchim sak leh ur ur thin. Nuam ve thei riau.

Ka duh aiin a sei leh ta. In naupan laiin engtin nge Krismas in hman ve thin le? Share ngam in awm ve anih chuan han sawi zawm ula.

Similar Posts:

• Pu Rokunga leh Krismas..
• Ka dawn sei ngamlo e
• Aw….Krismas
• Lunglen a hun leh ta
• Chaw duh vanga Kristiante leh Krismas

Recent Posts:

• “Pa…”
• Foreign a inhlawhna – Thlirna dang
• Ho mai mai
• Chhanna Mak!
• Judgment Day

This entry was posted on Sunday, December 20th, 2009 at 3:43 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.