mi(sual).com

Lawng ruih nen, ngaihtuahna sawr bing tum ve pawh a inchawhchawrawi zo vek mai a. Ka han chawhpawlh tha leh teh ang!

KAWL LEH VAI:

Kawlvaiin min um liama, cachar vai ngal cherin min lo chep beta. Kawl vai kan ngeia, cachar vai kan hua a. Kawlvaiin kan khawpui chawlhniah min chhuhsak a. Chawlhlohniah cachar vain kan bazaar min luahlan leh a. Abak ni la awm zawng ‘ZAN’ kan chang ve a. Nuhoin Kasauti leh Karam min en san a, Pahoin VCP-inah BAFFACOS sum hman sual dan min sawi san leh daih a. Thalai rualin hlimhlawp kan neih tlem zia chhuanlamin chhas-te nen concert kan pan leh dial a. A bang la awm ten khuang leh lam a ’HARHNA’ kaihthawh kan tum a.

Ti hian ka han ngaihtuah dawn a, kan huat vai a te hi an tihdan ah chuan kan ngaisang a, a thalai kan sawi vawng a; kan ngei kawl ho buaipui awm tak mautam a vang a Zoram pum tam kan hlau ngawih ngawih a (buh kan thar tlem tlem nen!). A bak ka ngaihtuah dawn lai takin a inchawhchawrawi ta vek a.

PAWL LEH PAWLITIK:

Pawlah kan chiang a, pawlitikah kan chiang leh zual a. Pawl hotu kan ngah a, pawlitik-ah kan ngah leh zual a. Hruaitu erawh kan tlachham tlang a. Member in ngah siakah kan chiang em em a. A member lam te erawh kan chiang lo hle thung a. Pawl beh chhanin pawlitikah mahni tanghma kan hai a. Zunin contract kan sawi chhuak a, a thlawn a sa turin vawi kan man khawm a. Hlep hlang hi a ni ringawt!

Ruihhlo man khawmin hnam nun tlu chhe mek tun din leh tumin kan inhmu khawm a. Pipute thlarau kalkawng thleng thlengin kan vak vai a. Haw lamah kan chhawl a lo hal a, ‘Zotuithiang’ ai chuan Kawl vai ho sen chi kha a lo thiang ta zawk si a. Berampute hian an beram enkawl te hi min chawm zo lo pawh niin ka hre lo, a beram a te hian kan zui a leh kan zui chhan a hi kan chiang lo a ni zawk lo maw? Pawl ho hi pawlitik an ni a, pawlitik hi….. an in chawhchawrawi leh ta!

DO LEH KHAP:

Do leh khap hi kan ngah lutuk a. Raldote hi do theih leh hneh theih an nia, thil thenkhat erawh chu do chi loh, hnimhnaih loh chi a awm thung a. Khap a bet chi a awm a, khap beh theih loh a awm bawk a (mutte hi han khap vaih teh se, thianpa Kaartunlawma te chuan Zoram haw chhan hi a nei lo reng reng!). Zu kan khap bur a, a rethei deuh ta kan man zing deuh a. Vairengte kan pel a, ‘zu hi amah chuan sual a ni lo’ kan ti tlang theuh a. Sawrkar-in (kuthnathawktute thian?) saptheitui leh grape tui min chhawp chhuah sak a. Thlasik khawvawt zan tairekah theitui kan paipawn tut tut a.

Ruihhlo kan do a, kan zavaiin sawrkar hna kan thawk a. A chhan ngai zawk a ten hmusit leh endawng an hlawh phah a. Kan do thlang kawrvai leh kawl kerang ho hian zankhat thil thuah min han liamsan ta duak mai se la! Eng eng hruaitu thenkhat emaw te chuan chhuan kan chham der mai lo maw? Chutih laiin Educated Unemployed ho tan erawh chuan van mana, Electric phei leh bazaar bul vel chu ‘Employment Centre’-ah a chang thung dawn ani.

Khapna dan hmangin kan duh loh kan inhnawl tawna. Kan veng atangin veng dangah, veng dang atangin khawdangah. Mizoram a awm ngaihna hre lo a biru kual biru kual kha, vai ramah eng star star hotel-ah emaw bar girl ni se chuan……… ngaihdan a in chawhchawrawi leh ta!

ZIRNA LEH VAIRAM:

Shillong tlang a Elvis thin a fate khan Vairampur kan thleng thla ta a. Pa te hnenah education tour-in kan kal a, sum a lo thleng te te a, eng eng bar leh café-ah emaw week end Premiere League kan thlir liam mai mai a. Hnam culture humhalhtu nih in chuhin in lamah mipa leh hmeichhia kan in hek tawn a.

Central sum kan ei ruk ve chhun chhun te a ngai ngai in vairamah kan vawm liam leh a. Kan zirzo te te a, ‘political appointment’ nghakin mahni in lumah kan tawm leh kuk a. Kan zir chhuah mobile changkang leh computer tangkai zia leh zirna bulpui anih zia hrilh fakin nu leh pa te neihthinglungkhawngin kan leitir a. Mirethei video clip leh zan tairek a sms nan kan hmang leh mai mai a.

Mipa ten bialnu pali nga tal vai bulah kan nei fur a. Kan bul vai te kan ti vir a, an huang tau a, kan ngaimawh leh si a. Kan hmeichhiate ni khua loh zia hrilh fakin, mah ni farnute vairama lehkha zir tur a kan thawn loh tur zia hahipin kan sawi a. Chutih laiin hmun thenkhatah thil thar kan zir belh a. Palai tirh leh inruk buai ngai lovin ‘live in relationship’ te nu leh pa hriat lohah kan lo practice vel mek bawk a. A in chawhchawrawi vel vek mai ani.

CHAWHTAWLH:

Ti hian ka ngaihtuah a. Thil engkim mai hi kan chawh pawlh a, kan chawhpawlh rual leh si lo a, tichuan a lo chawhchawrawi ta alo ni. Kan hnamin humsual a dai tih chu mi thahnemngai ten min lo hrilh tawh a. Chu ai a thahnem ngai leh zual ten siam that hna thawkin ‘CHHIPTHUAI’ min tum a. Kan hel leh roh si a! Mahni nun piah hretah bula mite theuh kan in ngaimawh tawn a. Kan hun a lo thleng a, kan ngaithei leh si lo a.

Khawvel nun a in her danglam a, kan khawhawi a zau tawlh tawlh a. Kan thinlung a zim telh telh thung a. Kawl leh vai kan do a kan huat a te pawh hian chintawk nei sela. An tello a nun kan la inpeih hma chu ‘inleitawn dan’ thiam i la. Pawl leh pawlitik pawh phun ser ser loin a thatlohna lai auvin dinchhuahpui ngam i la. Thalai tam leh zualin Zoram pelin hna zawng ngam I la. Amaherawhchu, ‘ar khawthim dai’ mai lovin kan dai tur erawh thlir thiam i la (Mizo kan ni miau si a!).

Chuti ni lo va, hnam nunphung theihnghilh tawk a vairam a awm a, vai vel ngam tawk vel a lehkha zir a, zui rui tawk chiah a in thiam a, saptheitui leh grape tui inpui tawk chauh a kan hmeichhiate ngai a, an vodka dawmlai hmu leh thei si lo emaw Mizo nula, Mizo tlangval pasal a neih tlak a ngai lo kan pun tawlh tawlh chuan kan ‘CHAWHTAWLH’ tawlh dawn a ni mai!

(Note: He thuziak tawi hi Mumbai Mizo Association in Silver Jubilee an lawm tum a ka ziah a ni a. Ka rawn thar thawh leh a ni e)

Similar Posts:

• Mizo hmeichhiate hian
• Politician tha Ram hmangaihtu Pakhat tal pawh awm ve se….
• A sakhming kan sêl e
• Kerh Kerh…
• Thimthainu

Recent Posts:

• Welcome to Reality
• Sikni eng mawi a lo lang leh ta: Daih mai a!
• Zofa zinga mi hmasa thenkhat
• Kawngbo (Sunday pual)
• Thank you for loving me

This entry was posted on Tuesday, September 7th, 2010 at 9:12 pm and is filed under Mizo Society & Culture, More than words. You can follow any responses to this entry through the RSS 2.0 feed. You can leave a response, or trackback from your own site.