mi(sual).com

“Nipui lai tûk khat ka chunga thil thleng zet kha zawng theihnghilh hâr ka ti kher mai! Ka mumangah chuan kan chhungkua chu kan lo hlim êm êm a, kan hlim dan chu tawngkaa hrilhfiah phâk rual a ni lo. A chhan pawh, ka pa zu ngawlvei chuan a zu in thin sima nun thar a neih tâk vang a ni. Ka pa’n nun thar a neih avang hian ka nu nen chuan kan hlim êm êm a, awm ngaihna reng kan hre lo.

Chutia tui taka ka muthilh lai leh mumang rama hlim taka chhungkua kan awmho lai chuan ka harh hlawl mai a. Chutia ka han harh tak thutah chuan ka mumang hlimawm tak chu ka nu hrilh hlan mawlh ka nghakhlel tawh a. Dik tak chuan ka pa zu in avanga ka nu nen kan tawrh nasatzia leh ka nu ngei pawhin a retheih phah dan ka ngaihtuah chuan ka mumang hlimâwm zet mai hrilh hlan ka nghakhlel êm êm pawh chu thil mak a ni hran lo.

Hmanhmawh takin thawh mai ka han tum a, mahse ka beisei loh thil ka han hmu thut chuan min tiphu chiang kher mai. Ka nu chuan mit tla lo lêkin min lo en reng mai chu niin! Ka nu hmelah chuan lungngaihna leh mi khawngaihna hmel chu kei naupang mai pawh hian ka hmuh hmaih hauh si lo! Chiang êm êmin ka nu hmel chu ka han en leh a, ka nu mittui parawl kiang ka han hmuh hnu phei chuan ngaihthatlohna chuan ka nun a luah khat nghal vek a. Mumang hlimâwm tak ka neih thu hrilh ka tum mêk laia mittui tla chunga ka nu’n ka zing tho min lo en reng mai han hmuh chu ka tân chuan khawvela thil hmuhnawm loh ber pawl a tling hial awm e! ‘Ka nu engatinge? Eng thil nge ni ta?’ tih leh thawh ka rual a. Meng phawk fe chung chuan ka nu chu ka en reng a; ka mit laksawn zai rêng ka rel thei tawh lo.

Ka nu chuan min chhâng mai lo va, a che sawn hek lo, chutah dan rual lovin a mittui a rawn luang chhuak ngiai ngiai a. Ka nu chu ka va han lainat tak em! Mittui tla hial khawpa ka nu lo tilungngaitu chu tunge maw a nih le? Ka va han run tehlul em! Keini chhungkua ve hi zawng hlim ni kan nei ve meuh lo va, kan hlim ni ve te lah chu chhum rei lo te lo langa ral leh ta mai thin ang hian rei lo teah mual an liam leh mai thin a, a chhan pawh ka pa hi zu ngawlvei niin zu tel lova a nun theih tawh loh vang a ni.

Ka pa zu in chu kan chhungkua chuan kan tuarin ka nu phei chu a in thawk hlum lo chauh a ni ber a. Ka pa chuan retheihna khurah min hnuk lut tawh a, ka nu’n tawngkam thaa a zilh paw’n awmzia a nei bawk si lo. Ka nu chuan min hmangaih êm avangin ka pa hi a then lo mai a ni zawk a; engtik niah emaw zawng sima inlamlêt hun a la nei ve mahna tih chu ka nu innghahna awmchhun a ni tak a.

Pianpui unau pakhat chu ka nei. Ka nu leh pate hian an inneih hmain fapa pakhat an lo nei tawh a; chu chu an inneih hnu pawha ka pite hnena awm a duh zawk avangin kan awm ho lo a ni.

Ka nu chuan min hmangaih êm avangin hlim lo hle mah se ka hmuhah chuan hlim taka awm a tum hrâm hrâm thin a. Ka pa pawhin min hmangaih a; mahse, kei leh ka nu ai chuan ‘Zu’ a hmangaih zawk avangin kan chhungkua chu kan tapin kan rum fo reng a, chu chu nikhua ka hriat ve tan tirh atanga ka khawvel hman tan dan chu a ni!

Ka pa hian chhungkhat chu a nei ve meuh mai. Mahse, a nikhua loh em avang hian min tlawhpawh tha duh tawh si lo. Ka nu pawh chuti tho. Ka pa vang bawkin achhungte’n min be tha peihlo. Hetiang a nih avang hian manganna leh harsatna kan tawh châng pawhin ka nu nen hian kan inhnêm chawp mai thin a; han tlân tauhna tur leh thlamuantu dang kan nei hran lo.

Chutiang chhungkuaa seilian chu ni mah ila ka nu chuan hmel hlim lo min hmuh ngai reng reng lo va. Mahse, he mi tûk zet hi zawng ka nu insumtheihna paw’n a tlin ta ngang lo a ni ngei ang. Ka nu lungngai hmel ka hmuh avang chuan ka tiril a khûr a, hlauhna namen lo chuan min fan chhuak nghal vek ni ber hian ka hria a. Eng thil nge lo thleng ta? A ngaihna reng reng ka hre thei lo.

Chutah, kei chuan hlauthawng tak chung hian, ‘Ka nu, engatinge i tah?’ ka han ti leh hrâm a. Ka nu chuan min chhân tumin a ka a ang zuau a, mah se engmah sawi zui lo chuan khumah a thu hnawk a, chutah awrawl chhuah meuhin ka nu chuan, ‘Bawiha, ka va han lainat tak che êm!’ a han ti zui leh vawng vawng mai te chuan min ti hrilhhai chiang kher mai! Naupang te mah ni ila ka nu chuan ka hriat atâna pawi lo chin chu min hrilh vek thin a.

Ka nu chutia a han tah tak siah chuan tunge min hnem ta ang le? Chuti taka ka nu a lungngaih takah chuan kei pawh ka han tap ve ta ringawt a! A nih leh ka nu nena lungngai taka kan tâp chu tunge min thlêm chuang ang? ‘A pa, a pa, khawiah nge i awm?’ tia tap chungin ka pa ka han zawng kual a, pawn lamah te tâp chunga ka kal kual hnu paw’n ka pa chu a reh vung vung a, chhanna reng reng ka hre lo. Beidawng takin ka lut leh a, chutah, ‘A nu, khawiahnge a pa?’ ka ti ta ringawt a. ‘Bawiha, i pa chuan keini aiin zu a duh zawk a, hei zan hnih chu a rawn haw tawh lo a nih hi,’ tia tap chunga ka nu’n thil awmzia min hrilh hnu chuan ka nu tah chhan pawh ka hrethiam ve ta a.

Mî pate chuan an chhungkua an tihlimin thlamuantu an ni thin a, keini chhungkua erawh chu ka pa vangin kan mittui tam tak kan sêng tawh a, eng anga nasa in nge ka pa vang hian kan rûm zel dawn pawh hriat a ni hek lo. Nunphung pangaia ka pa a nun lohna hi rei tak a ni tawh a. Zan rei tak tak thleng a meng a, a rawn haw lai ka hre ngai lo va, zu in tura a thawh lai ka hre ngai hek lo. Tunah zawng ka pa vangin chhungkaw kima chawhlui kilho hlutzia ka hrechiang ve êm êm tawh a, a chhan pawh ka pa avang hian chhungkaw kima chawhlui kan kilho khât em vang a ni. Ka nu chu ka lainat a, ka pa vanga chutiang taka kan han rûm thin chu ka rilru a nain, ka pa chu ka hua a, mahse, ka pa chu ka hmangaih bawk si. ‘A nu, a pa chu ka va ko a nge aw?’ ka ti a, ka nu chuan ‘Awle, Bawiha va ko ta che,’ min ti a, phur êm êmin ka kal ta a.

Kan in atanga hla vak lovah hian zu zuar nuthlawi, Pi Parite in a awm a, chu lam chu ka pan ta hnâk hnâk a.

Ka pa awmna ni ngei tura ka rin, Pi Parite in chu rei vaklo hnuah chuan ka thleng ta a. Zu zawrhna in ka thlen hma chuan ka pa leh zu zuar nu chu an rawn inzui chhuak mêk a. Zu zuar nu chuan, ‘Khi, i fapa pawhin rawn lam che a tum a nih khi, va haw rawh,’ a tih chu ka hre thei a.

Chutih lai chuan mi tam tak chu ram lam hna thawk turin an liam zut zut tawh a, ka pa ve erawh chu zu zuar inah awmin, a nupui leh a fapa khawhar tak pawh min hrechâng tawh lo va, a fapa lam ngaiin a awm a nih chu!

Ka pa chuan ka bul a lo thleng a, ‘Bawiha, min rawn lam i tum a mi?’ a ti a. Kei chuan, ‘A pa, engatinge hetah i riah a, a nu nen zu in tawh suh kan tih kan tih che kha, hmun dangah i riak daih a, a nu nen kan khua a hâr lutuk a, kan tâp kan tâp asin, a nu chu tunah pawh a la tâp ang,’ ka ti a. Ka thusawi chuan ka pa rilru pawh a hneh ve deuh ni ngeiin ka hria a, amaherawhchu, engtin mah min chhâng lo a. Ka pain zu a ruih lai chuan kan hlim ngai lo va, kan thla a muang ngai hek lo. Mahse, ka pa chuan harhfim lai erawh a nei tlem êm êm thung si! Chuvangin kan chhungkaw tân chuan hlimna chu khawvela thil thlakhlelhawm ber a ni lo thei lo. Chu chu khawvel hun ka hman tantirha kan chhungkaw awm dan a nih miau avangin ka hmalam hun erawh beisei a sang lo kher mai!

May thla chawhma lam a ni a, ni khat kan sikul bâng chu ka thiante nen veng thlâng lamah kan infiam a, nuam kan tiin keimahni tawkah kan hlim ve êm êm a. Bai lêmte chhuangin tumah dang reng kan ngai bik lo, chutih lai chuan zu ngawlvei fa ka ni tih reng ka inhre lo va, thil dang ka ngaihtuah hek lo. Ka hlimna chuan kan chhungkaw nun engkim min theihnghilh tira, haw nachâng ka hre hek lo. Chutiang reng chuan awm thei ni ila ka nunkhua pawh a nuam ve deuh tur!

Vanduaithlak takin chutia hlim taka kan awm lai leh engmah ngaihtuah chang lo lêka kan awm lai chuan ‘To’ haw tur chu namen lo hian a lo intâm mêk a lo ni a. Kâwl a eng uau a, thli a thaw vuk vuk a, chhum dum chhah pui pui chu kan khaw thlang kawr ruamah chuan chak êm êm hian a rawn inzial chho tup tup mai bawk a. Thli a thawt nasat em avangin khawlaia bawlhhlawh leh hnahthelte chu an leng chûm chûm a, kan bula thingte lah chu an tlu mai ang tih hlauhawm khawp hian an kûr suau suau mai bawk a! Khaw awm dan chu keini naupang tân chuan a rapawm duh kher mai.

Hlim takin thiante nen kan inkawm a, kan chhungkaw hreawmna pawh hre châng lova ka awm ve lai chu ruahpui vangin mual a liam leh ta!

Hmanhmawh baklêngin kan tlânchhia a, chu ruahthimpui rapthlak tak tlânchhiatsan tum chuan kan hmanhmawh êm êm a, khua lah chu a thim khup khup mai bawk a.

Ka thianteho chu an chhungten an rawn hruai avangin rei lo teah min tlân liamsan ta vek a. Keipawh ka theih ang tawka chakin ka tlân ve tang tang a, ruah fang lah chu a lianin khawlaia vaivut te chu a nan khu sut sut mai bawk a. Hetih lai hi sakhi tluk zeta tlân chak nih châkawm lai ber a ni hial ta ve ang! Thlipui leh ruahpui chu a nasat em avangin ka hlau tak zet a, ka thian dangte ang bawkin ka nu leh pate chuan min lo hmuak ve se ti rilru chungin ka tlân zel a, kan in hi a hlat deuh avangin ka huh zawr hnep tawh mai bawk si.

A tawpa tawpah chuan kan in chu ka thleng ve hlawl mai. Mahse, ka beisei loh takin kan in chu a lo la inkalh thiap mai a! Khua lah chu a thim chakin, tek tla te lah chu a ring tulh tulh mai bawk si, hlauhna namen loin ka khat a, inchhungah ka lut ngam si lo; ka hlau lutuk chu ka tap ta ringawt mai a! Thiante in lama han tlân leh turin ruah a sur nasa tawh bawk si. He mi ni zet hi zawng a rapthlak dan a danglamin duat leh hmangaih taka enkawltu nu leh pa hlutzia hre thar hlein ka inhria.

Khua a thim tulh tulh a, ‘To Thli’ lah chuan kan inchung chu a chhêm ri vûk vûk a, ka tân chuan hlauh tizual tur hlir an ni mai a. Ka rilruin, ‘ka pa hi rui lovin lo haw thut mai se ka va hlim dawn tehlul em!’ ka ti a. A châng leh ka nu chu thing phur chunga lo thleng mai dawn ni te hian ka hria a, mahse a hmel hmuh tih reng a awm thei si lo.

Chutih lai chuan ka nu’n a feh dawn a, ‘Bawiha, chaw lo chhum la, chawhmeh erawh chu ka lo haw hunah kan siamchawp mai dawn nia, i pa hi zawng khawsak rel atân pawh a tlâk tawh loh a nih hi; Bawiha, lo theihnghilh hauh suh aw,’ tia min hrilh chu ka hre chhuak thut a. Ka nu min hauh ka hlauh em avang chuan hlau chung chungin inchhung thim takah chuan ka lut ta rawih a.

Inchhung ka lut chu a lo thim êm êm mai reng a, ka hlau lutuk chu ka khur zawih zawih a, engmah ka hmu thei bawk si lo. Rei vak lo hnuah chuan ka mitvai a reh a, thil ka hmu thei ta a. Khawnvar ka chhi vat a, mei ka chhêm thuai thuai a, chaw chhumna tur tui ka lum sawk sawk a; mahni tawkah ka buai ve êm êm mai a ni. Nakinah chuan buhfai thlâk ka han tum a, mahse ka beisei loh takin kan fâirêl belah chuan buhfai awzawng a lo awm lo chu niin!! Mi mah riltam tawh nak alaia chutia buhfai pakhatmah a lo awm lo ka hriat chuan ka hrilh a haiin ka mang a ang êm êm a, tih ngaihna reng ka hre bawk si lo. Chhuara bel zawng zawngte chu ka han en kual a, engmah ka hmu bawk si lo. Ka nu lah chu a chauin a riltam tawh awm si a, ruahin a nan phei chuan a damlo mai ang a tih hlauhna nen ka rilru chu a buaiin thaw a veng lo tak meuh meuh a.

Ruahpui lah chuan zual lam a pan deuh deuh mai bawk si, chu mai a ni lo, rialte a la tla tak ang deuh deuh a! Ka nu mawlh chu ka ngaihtuah a, engtinnge a awm ang le tih ngaihtuah reng rengin rilru ka seng a, chaw chhum tur neih loh nen, khua a va han var lo tak em! Chutia rilru mangang taka ka awm lai chuan Sande sikula kan zirtirtuin, ‘Manganna leh harsatna in tawh chuan Isua hnenah tanpui turin dîl ula, tih tak zeta in dîl phawt chuan a chhâng ngei ngei ang che u,’ tia min hrilh thin chu ka hre chhuak thut a, ka nuin zan mut dawna ‘Pathian chu tawngtawina chhângtu’ a nihzia min hrilhte chu ka hre chhuak uai uai bawk a.

Rilru mangang tak chungin kan khum bulah chuan ka thingthi a, ‘Lalpa Pathian, khawngaih takin ka tawngtaina hi min ngaihthlâksak turin ka ngen a che. Tunah hian ka ril a tam êm êm a, mahse chaw chhum tur kan nei bawk si lo, khawngaih takin kan chaw ei tur min pe turin ka ngen a che. Ka nu feh pawh a lo la haw lo va, ruah leh rial lakah nangin veng la, dam taka rawn hruai haw turin ka ngen che a, thlipui leh ruahpui pawh min haureh sak turin ka ngen bawk a che,’ tiin mittui tla zawih zawih leh beidawng tak chungin ka dîl ta ringawt a.

Ka tawngtai chu chhanin awm tak ang maw? Ka tawngtai atanga rei lutuk loah chuan ruahsur pawh a ziaawm chho ve ta mai a, khawthlang lam pawh a lo eng zui bawk a! Chung ka han hmuh chuan mak ka tiin chutianga keini ang naupang mai mai dîlna pawh ngaithla duhtu chu engang taka thiltithei nge ni ang tiin mei lum ai pah chuan ka ngaihtuah zui neuh neuh a, mak ka ti êm êm mai a ni.

Nakinah chuan ka nu feh pawh dam takin a lo thleng zui ve mai bawk a, dam taka ka nu lo haw ka hmuh chuan ka hlim êm êm a. Ka nu chuan, ‘Bawiha, chaw i chhûm tawh em? Hei maian ka rawn hâwn asin,’ tih pah chuan a phura maian têl tuihnai tak chu a rawn la thla a. Ka nu chu chhân ngaihna reng ka hre lo va, chaw chhum tur kan neih loh thu hrilh ka hreh em avangin ka ngawi reng a. Ka nu chuan, ‘Maian hi lo hik la, kan bai hmin veleh chaw kan ei nghal dawn nia, i ril a tâm tawh em? Kei chu ka ril a tâm tawh khawp mai,’ a ti zung zung a, ka nu chuan chaw ei tur kan nei lo tih reng a hre lo!!

‘A nu, ka ril a tam lutuk. Mahse, nu, chaw chhum tur kan nei lo!’

‘Chaw chhum tur kan nei lo a…!?’

‘Aw ni e.’

‘Nimin maia ka den kha maw le, i pa hian zu manah a lo hmangral leh tawh a ni maw?’ tih pahin fâirêl bêl chu a hawng a. Chutah beidawng tak chungin, ‘Aw, i pa tak hi chu aw, mahni nupui leh fate pawh ngaihtuah lêk lova zu a han buaipui mai hi chu a va han manganthlak tak em! Zu vanga heti tak maia kan han buai mai hi a huatthlala ngawt mai,’ tiin beidawng êm êmin a thu hnawk a. Kei chuan, ‘A nu, lungngai suh, hmana a chanchin min hrilh thin, damlote tidam a, mitthite pawh kai tho theitu Isua tia i sawi hnenah khan zanin kan chaw ei tur hi ka dîl a; a nu, Isua chuan engkim a ti thei i ti tiraw?’

‘Thei e, Bawiha’

‘A nu, naupangte dîlna pawh a ngaithla thin tihna em ni?’

‘Ngaithla tehreng mai.’

‘A nih leh a nu, mite chu Kohhran Upa fate an ni si a, kei chu zu ngawlvei fa mai ka ni si, ka tawngtaina hi a chhâng ve duh tho angem?’ ka ti a. Chu zawhna chuan ka nu rilru chu a hneh viau ni tur a ni, ‘Bawiha, lungngai reng reng suh. Pathian chuan mi sualte dîlna pawh a ngaithla duh tho a lawm,’ a ti chuai raih a.

Chutia lungngai taka ka nu nen kan awm hnu rei vak loah chuan ka thianpa Mafaka (hmannia a chanchin kan tarlan tawh Lalfakzuala kha) u tleirawl, Judith-i chu kawngkaah a rawn lut a, chutah, ‘Chhana, hei in zanriah tur chaw kan lo chhumsak che u a. Hei, chawhmeh pawh,’ ti pahin chaw leh chawhmeh min rawn pe ta teuh mai a! Kan thil hmuh leh tawn mêk chu ka nu nen chuan mak kan tiin tawng ngaihna reng kan hre lo va. Ka nu chuan, ‘Kan va han lawm em ve aw Judith, kan lawm hle mai, hei in zarah chaw pawh kan ei ve thei dawn ta nih hi le,’ a ti a.

Judith-i chuan, ‘Keini pawh kan lawm lutuk e, ti khan puar takin chaw in ei dawn nia aw,’ a ti a, a kal leh ta a. Ka nu nen chuan mak kan tiin kan lawm lutuk chu tawngkaa sawifiah rual a ni lo! Ka nu chuan, ‘Bawiha, Isua chuan i tawngtaina chu chawp leh chilhin a chhâng che a nih hi tiraw?’ a ti a. Ka nu chu lawm avangin a hnuk a ulh teuh thei hial a, a biangah mittui a lo luang ngiai ngiai a. Mahse lawmna vang a ni zawk si! Isua chuan mite rilruah hna thawkin thil a lo ti thin a ni tih chu ka hre thiam ve ta a. Phur êm êmin ka nu chuan, ‘Bawiha, Pathian hnenah lawmthu i sawi ang,’ a ti a, ka nu nen chuan lawmthu sawiin kan tawngtai dun ta a. Kan tawngtai zawh chuan, ‘A nu, a pa chu awm ve se a lawm ve tho ang tiraw?’ ka ti a.

Mahse ka pa ve zawng zu inna tur a neihna a nih zawngin keini chu engtin pawh awm mah ila pawi tihna a nei lo va, a hmangaih ber chu ‘Zu’ a ni a; a zu in tur duh lutukin kan buhfai ei tur ngei pawh zu manah hmangin chaw kan nghei phah lo chauh a ni si a.

December thla a lo her chhuak a; Krismas pawh kar hnih emaw chauhin a dang tawh. Ka thianteho nen chuan Krismas hman dan tur kan sawiho nak nak a, thil dang reng kan ngaihtuah chang lo.

Chutah ka thianpa pakhat chuan, ‘Chhana, Krismas thawmhnaw tur i lei tawh em?’ tiin min zawt thut mai a. Ka hamhaih deuh nge ni chhân ngaihna ka hre mai lo va, ka zak bawk nen, ‘Ka la lei lo,’ tih ringawtin ka chhâng a. Ka thiante chuan, ‘Kei chu kawr ka lei dawn,’te tiin an thawmhnaw lei tur leh an lei tawh thute an sawi nak nak hlawm a.

Kei erawh chu ka nu leh pate’n engmah min leisak theih ka beisei loh avangin sawi tur engmah hre lo chuan ka ngawi reng a. Ka pain hetiang taka zu a in nasat hma chuan ‘Krismas kawr thar’ hi chu min lei an tum ve hram hram thin a. Pistol lem leh ka lawm zawng eng eng emaw te min leisakin rualawt lutukin min siam bik ngai lo.

Mahse, hmana ka pa kha chu tuna mi nen hi chuan ‘lei leh van’ ang mai a ni tawh a! Hmanah chuan ka pa chuan min hmangaihin a theih ang tawk tawkin ka awh zawng thawmhnawte min lei sak hrâm hrâm thin kha a ni a; mahse chung zawng zawng chuan hmanlai an châng zo tawh si! Ka pa chuan keini min hmangaih zo tawh lo va, a nawmna tur a nih chuan keini chu min ngaihtuah hek lo, ka naupan lai kha chuan ka pa chuan ka hlimna tur a nih chuan hreawm tuar a pawisa ngai reng reng lo. Mahse, chung ang hun zawng zawngte chuan kan chhungkua chu mual min liamsan tawh a. Ka pa nun chu a inlêtling thawk ni ber hian ka hria a, a chhan pawh ‘Zu’ vang liau liau a ni.

Kan chhungkaw nun chu a buai zo a, ka nuin rim tak leh harsa taka a thawh chhuahsa chu ka pa chuan zu in nan a lo hmang zo zel bawk si. Kum khat kalta atang phei kha chuan ka nu chauh hi hnathawktu niin, ka pa hi chuan ram hnathawh reng reng a tum tawh lo va; chuta tang chuan kan rethei tawlh tawlh a, chaw kan nghei lo chauh a ni ber zawk awm e. Kei chu awm lo ni ila ka nu leh pa chu an inthenna a rei tawh viau ta ve ang. Mahse ka nu chuan min hmangaih em avangin ka pa hi a nei hrâm hrâm a ni chauh zawk a, inchhira inhmuhchhuah hunte a neih tak hlauhin tih chu ka nu beiseina leh innghahna awmchhun a ni a, chu lah chu bei tidawng thlâwntu mai mai ni hian a lang rih bawk si. Keini thingtlâng mite chuan Krismas hun bak hi thawmhnaw thar leina hun kan nei ve lo va. Mahse, kei chuan Krismas hunah pawh thawmhnaw thar ka nei ve thei ngut angem? Ka rilru a nuam thei lo va, ka mangang rilru êm êm a; thiante zinga awm nuam ka ti tawh hek lo. Mite aia hniam bik ngawih ngawiha inhriatna chuan ka rilru a luahkhat tlat a, ka ngaihtuahnaah thil dang reng a leng thei tawh lo.

Aw! ka va han rethei bîk tak em! Tawng nachâng reng ka hre tawh lo va, thianhoa inkawm mah ni ila ka thiante chênna khawvel leh kei rethei fa chênna khawvel chu hetih lai hi chuan a kâr ava hla tehlul em! Thawmhnaw thar pawh lei ve thei lo nu leh pa ka nei a nih chuan ka va han vanduai bik em ka ti rilru neuh neuh a. Keimah leh keimah chu ka inkhawngaih êm êm a. Ka mittui a tla a, ka insum thei hek lo. Thiante’n min hmuh ka hlau bawk si, ka chhungril nun chu a rûm tak meuh meuh a, ka sawifiah thiam rual loh boruak rit zet chuan ka chungah thla a zar a ni ti ila a dik ber awm e. Ka rilruah thil dang rêng a leng tawh lo va. Ka ngaihtuahna leh ka khaw hmuh chu a bing mûp mûp ni hian ka hria a, chutah ka thianpa pakhat Achhuana chuan, ‘Chhana, Krismas thawmhnaw i nei ve dawn lo maw? Kei chu ka pain min lei dawn asin, pheikhawk chu ka lei tawh a, pistol lem pawh min lei tawh,’ tih a han sawite chuan ka rilru a tina zual tak meuh meuh a. Mafaka chuan, ‘Chhana, i pa leitir ve mai rawh, kei pawh ka pa ka leitir dawn asin. Mahse, Krismas niah chauh ka ha dawn,’ a rawn ti ve bawk a. Ka rualawhna leh ka rilru tina tur a ni tih hre lovin ka thiante chuan an thil thar neih chu sawi nuam an ti êm êm hlawm a, mahse kei rethei fa tân chuan chung thil zawng zawng chu rilru tihreawmtu leh min timangang thlâwntu mai a ni thung si.

Chutah ka tlawmla lutuk chuan, ‘Ni e, keipawh ka pa hnenah ka dîl ve ang,’ ka han ti thla ve rawk a. Mahse keia pa ve te zawngin eng thil mah min lei thei lovang tih erawh ka hrechiang êm êm a. Mi pate chu an fate lawmzawng leiin hlim êm êmin an awm thin a; mahse ka pa ve erawh chuan kan ei tur mang mang pawh zu manah a hmangzo duh zel a ni si a! Khua zawng a var mawlh lo a ni. Chu thil hote anga lang avang chuan thiante zinga awm pawh nuam ka ti tawh lo va. Mittui tla chungin kan in lam panin ka haw ta a. Ka rilruah thawmhnaw thar neih leh neihloh mawlh chu a awm a, rilru dang reng ka pu thei tawh lo.

Kan in khawhar tak chu beiseina leh beidawnna, indona tualzawlah ka chantir a, chutah in ka thleng a, ka beisei ang ngeiin ka pa chu a lo awm a, naupang tih takah thil dang pawh sawi ta lo chuan, ‘A pa, Krismas thawmhnaw min lei ve rawh aw, ka thiante chuan an nei vek tawh asin,’ ka ti chuai raih a. Beiseina sang tak neiin ka pa mitmeng chu ka en reng a, ka mittui pawh ka la hru hul kim lo va, ka pa chuan engtin tak min chhâng ang maw tiin khaw dang hawi sawn zâi reng ka rêl lo. Ka pa chuan min lainat ve hle a ni tih pawh a hmel atang chuan ka hai bik lo, amaherawhchu engtin mah min chhâng lo chuan hrilhhai takin min melh ringawt a. Kei chuan ka zawhna ngai bawk chu ka han zawt leh a. Ka pa chu beidawng takin a hawikual a hawikual a, ka zawhna chu min chhân ngaihna a hre lo va, hreawm a ti hle a ni tih pawh a hmelah chuan a lang thei a. Ka leisak ang che min tih chuan min leisak theih loh a hlau bawk si, ka leisak lovang che a tih chuan hreawm ka tih a hlauin min khawngaih ve bawk si, ka zawhna chu chhân a awlai vak lo ni ngei tur a ni. Nakinah chuan, ‘Bawiha, tikhan lo awm la, i nu lo haw veleh kawr thar leina chu i lo dîl dawn nia, in lo nghak la, chawte i lo chhûm dawn nia,’ tih leh chhuah a rual a. Tih ngaihna dang awm hek lo le, hreawm ti hmel taka ka pa kal liam tur chu ka thlir zui vawng vawng a, beisei erawh a bo chiang kher mai!

Ka pa ve hi zawng pa azawnga lâktlâk loh ber ava ni tak em! Fapa pakhat (u phei chu ka nei a) chauh a nei (enkawl) a, a fapa lawmzawng takngial pawh min leisak thei lo chu a ni si a, mahse, chhan dang a awm lo, a chhan ber chu zu in a bawih hneh em vang mai a ni. Ka pa chhânna chuan min tibeidawng êm êm a, ka rilruin, ‘Aw, Krismas hi eng vanga lo awm kher kher nge maw a nih chu le?’ ka ti vawng vawng a. Keini naupang chuan a awmzia kan hrethiam ve lo va, thawmhnaw thar neih hi kan Krismas nghahhlelh chhan chu a ni ve mai a. Chu lah chu ka tân chuan beisei bo tak a ni bawk si. Ka rilru a mangang tak zet a, tih ngaihna dang ka hre bawk si lo. Mittui tla keuh keuh chungin eirawng ka bawl a, ka nu feh lo haw hlân mawlh ka nghakhlel tawh a.

Rei vak loah ka nu pawh thing phur chungin a lo thleng zui ve mai bawk a. Ka nu chuan, ‘Bawiha, hei ka thing phurh chunga hi chawfun leh chawhmeh ka chhuang a, lo la lawk ta che,’ min ti a, rang takin pawnah chuan ka chhuak nghal a. Ka nu chu ka thil zawh tur zawh hlan mawlh ka nghakhlel tawh a. Ka nu chuan ka hmel a han hmuh chuan, ‘Bawiha, i tâp em ni? I mit mengte chu ava sen rîm rêm ve mawle,’ min lo ti a. Mahse engtin mah chhâng loin inchhungah ka lut nghal a, ka nu pawh chuan a thing phurh a keuh zawh chuan mi rawn zuilut ve nghal a.

Chutah kei chuan zawhna chhân harsa zet mai ka lo zawt ta a, ‘A nu, Krismas-ah thawmhnaw thar min lei ve rawh aw, ka thiante chuan an nei vek tawh asin,’ ka ti a, mittui tla kiang chung chuan ka nu hmel chu ka en reng a. Ka zawhna tawite chu zawhna chhân harsa tak ni ngei tur a ni, ka nu pawhin min chhâng thei mai lo va. Kei chuan, ‘A nu, Mafakate, Achhuana leh Johanate chu an nu leh pate’n an leisak dawn asin, a pa hian min leisak ve thei angem le?’ tiin beidawng tak chuan ka nu chu ka melh leh a.

Ka zawhna chuan ka nu rilru pawh a khawih viau a ni tih chu hai rual lovin a hriat a, ‘Bawiha, i pa zawngin engmah a leisak lul lovang che, hei Krismas ruaithehna tur ka han tuak tauh tauh ang a, karleh lamah chuan i thawmhnaw man tur pawh kan tuak ve thei tawh mai thei a nia,’ tia a han sawi takah chuan ka thaw huai a; ka nu thusawi chu a tak thleng ta ang hrim hian ka rilru a tidam sawng sawng mai a nih chu! Ka nu vek chuan, ‘Bawiha, i pa lah heti mai hi a ni si a, i duh anga thawmhnaw thar kan lei thei ta lo a nih pawhin hreawm ti miah suh aw?’ min tizui a. ‘A nih leh â nu, Krismas ruai chu kan theh thei tho ang tiraw?’ ‘Tehreng mai.’ ‘A nih leh a nu, thawmhnaw thar nei lo an awm ve tho angem?’ ‘Awm ve tho mai thei, awm lo pawh ni se hreawm ti reng reng suh aw. Thawmhnaw thar neih hi kan Krismas hman chhan a ni lo va. Krismas chu, Isua Krista mi sualte tâna khawvela a lo pian champha a ni a; thawmhnaw ringawt buaipui tur a ni lo,’ tia ka nuin min hrilh hnu chuan ka hre thiam ve ta deuh a.

Thlasik anga khêl lovin kumpui lingleta kan lo thlir, Krismas pawh chu engemaw ti tiin kan thleng chho ve ta reng mai a. Ka hlauhthawn ang ngeiin Krismas inrinni-ah pawh chuan thawmhnaw thar chu kan la lei thei ta chuang lo va, ka nu chuan theihtawp a chhuah tak meuh meuh a; amaherawhchu, a tuak daih hman ta si lo. Ka nu chuan hreawm a ti hle a ni tih pawh ka hai lo, ka rilru hreawm lutuk a hlauh avangin a theih ang angin min hnem ve bawk a. Keipawhin, ‘Kumin chu thawmhnaw thar ka nei ve thei dawn lo a nih hi,’ tiin ka rilru pawh ka siam fel vek tawh a. Ka nu chuan ka thiante thawmhnaw reng reng awt lo turin min fuih ve mêk bawk a, chutia tih mai loh zawng kawng dang awm hek lo le.

Zan a lo nih chuan ka thianteho nen hlim takin kan inkawm a, nuam kan tiin kan hlimtlang ve viau. Amaherawhchu, ka rilru tihreawmtu a awm leh ta tlat mai! Naupang tih takah thil thar neih hi zawng a lo hlu viau a ni chêk ang chu, nakinah chuan thawmhnaw thar chungchâng bawkah chuan an lut leh ta! Mahse kei, zu ngawlvei fapa chuan sawi tur ka nei ve ta si lo, rualawt ngawih ngawihin ka thiante chuan min siam leh ta! Ka thiante lah chuan ka rilru natna tur reng reng min ngaihtuah pui lo va, ‘Chhana chuan thawmhnaw thar a nei ve dawn lo,’ tih te, ‘Chhana pa chu zu ngawlvei a ni a, chuvangin a pain a leisak ve thei lo a,’ tia an han sawite phei chuan min tizakin awm ngaihna reng ka hre lo. Hlim taka ka awm ve lai pawhin lungngai taka min tahtirtu ka tawng leh ta a ni.

Khawvel hi zawng a mak a nih hi! Ka thiante zinga awm pawh nuam ka tih loh avangin inah ka haw a; ka nu chuan ngai êm êmin min lo kuah a, mahse, ka nu chuan hlim lohna eng emaw tak a nei a ni tih chu a hmelah chuan a lang thei a, engmah erawh a sawi lang miah thung lo. Krismas ni, Dec 25, zing ni chhuak eng mawi tak chuan keini chhungkaw khawhar tak pawh min chhun hmaih bik lo. Ka nu nen chuan kan theih ang tawk tawkin in leh a velte kan tifai a, hlim takin kan awm a, thil dang reng kan ngaihtuah lo. Kan chhungkaw hlimna tizual êm êm tu pakhat chu, he mi tûk hian ka pa chuan zu a rui tlat lo mai chu a ni. Chu chuan kan chhungkaw nun a tinuamin tûk khat lek rûi lova a awm pawh chu a nupui leh a fate tân chuan ava hlu tehlul em!

Nakinah chuan, ‘A nu, chaw ei tawh ang u, inkhawm kan tlai palh a nge,’ ka ti a. Chutia inkhawm ka han sawi takah chuan ka nu hmelah chuan hlim lohna leh hreawm tihna hmel a lo lang chhuak nghal a. Ka nu hmel ka hmuh chuan ka nu chuan eng emaw tak zawng rilru tihreawmtu a nei ngei a ni tih chu ka hre mai a. Nu leh pate tân fate duh ang leisak thei lova awm chu a hreawm dan tur reng ka lo ngaihtuah ngai lo va, amaherawhchu, ka nu chuan ka duh ang thawmhnaw thar min leisak theih loh avangin hreawm a ti hle a ni tih chu ka hrethiam ve ta mai a. Dik tak chuan ka nu chuan theihtawp chhuahin tan a la a, chuti chung pawhin a tuak daih hman lo a ni mai zawk a, ka nu chu ka dem lo va, ka lainat hle zawk a ni.

Chutia, chaw ei tura kan inbuatsaih mêk lai chuan Mafaka chu a nu leh pa nen hlim hmel pu takin kawngka bulah an lo ding reng a, mak ka tiin ka phu zawk nghe nghe a. Chutah Mafaka chuan, ‘Chhana, kawr thar i nei tawh em?’ tiin min rawn zawt leh ta thut mai a, ka beisei loh leh chhân harsa ka tih zet mai a nih avangin mak ka ti angreng hle zawk a. Dik tak chuan thawmhnaw thar ka nei thei lo a ni tih chu ka rilru chuan a pawm fel tawh a, hreawm pawh ka ti lutuk hran tawh lo. Mahse, chutia Mafaka’n min han zawt leh ta thut chuan ka rilruah a tithar leh a. Chutah kei chuan, ‘Nei lo, mahse a pawi lo, kawr thar nei lovin ka inkhawm mai ang, mite pawh thawmhnaw thar nei lova inkhawm an awm ve tho ang,’ tiin ka chhâng ta ringawt a.

‘Chhana, hei i Krismas thawmhnaw tur kan rawn keng asin, hei hi vawiinah lo ha la, i nei nghal dawn nia,’ tih pahin Mafaka chuan kamis leh kekawr thar nalh zet mai hi ka lam hawi chuan a rawn lek chhuak va va a. Ka thil tawn chu mumang ramte pawh a ang rum rumin ka hria a. Mahse, mumang mai ni lovin a tak tak ngei chu a ni si! Kawr chu a var thianghlim tak mai a ni a; kekawr chu a dum lampang deuh a ni.

Rinhlelhnain ka khat a, Mafaka mit chu ka han en a, chutah a nu leh pa ka han en kual leh a, chutih lai chuan ka nu chuan tâp aw teuh hian, ‘Bawiha, ka lawm e ti rawh, Mafaka’n Krismas thawmhnaw a pe che a nih kha,’ a ti a.

Chutianga beisei loh taka thawmhnaw thar nalh tak mai ka’n nei thut ka lawm dan chu tawngkaa sawifiah phâk rual a ni lo! Kan inchhungah hian lungngaihna avangin vawiduailo ka nu nen mittui kan sêng dûn tawh thin a, beisei loh takin he Krismas niah erawh hi chuan lawm avangin kan biangah mittui a lo luang chhuak thung a, kan lawmna chu tawngka mai chuan a hrilhfiah zo lo. Lawm avanga kan mittui leh kan insut ri chu thilpek min petute tân chuan lawmthu sawina tawngkam lêt tam tak tluk zeta hlu a ni ngei ang le!

Similar Posts:

• Krismas lo thleng tur hi…
• Krismas Bazaar
• Aw….Krismas
• Ka dawn sei ngamlo e
• Pu Sanga Krismas

Recent Posts:

• Christmas Urlawk Zan
• Mahni intihhlum (Suicide)
• Regional Sports Centre, Saidan Kolasib
• Picture hrang hrang!!!
• TLANGAU (Krismas ka hman dan tur)

This entry was posted on Friday, December 3rd, 2010 at 3:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.